El Suc Fuhlwact Emet Inmahsrlowos
Opi yohk emet luhn God som nuh sin mwet kuhlwacnsap ma tiac soano in fohlohkihnyuck nuh se.
Tamuhlwel sacohk wiyuck, kawuck luhk, yohk tarilacna luhk in wi kowos ke toeni wolacna luhn pristut fin facluh nohfohn. Prestuhn Monson, kuloh ke pweng lom ac mwe insewowo lom. Pacl nuh kwewa kuht ac fah sruokyac insiyacsr kahs in kolyuck, kahs in kahsruh, ac lahlmwetmwet lom. Kuht luhngse ac ahkkweye kom, ac kuht pruhe kiyom pacl nuh kwewa. Pwacye lah kom mwet pahluh luhn Leum. Kom Prestuhn lasr. Kuht ahkkweye, kuht luhngse, kom.
Apkuhran in yac longoul somlah ah, Madrid Spain Tempuhl kihsaclah ac muhtwacwacack orekmakihnyuck oacna sie lohm muhtahl sin Leum. Harriet ac nga esamyac na pwacye ke srihpen nga kuhlwacnsap ke Eria Prestuhnsi fin acn Europe ke pacl sac. Wi mwet puhs sahyac uh, kuht eis ao pucspucs in oraclah koanon plwacn ac pakiyac ma in orek nuh ke kihsac uh.
Ke lwen sac kihsac an tuhkuh, nga akihlen lah nga soenna eis sie solsol in wi nuh kac. Ma inge nga tiac pahngon ac sikyak. Ke srihpen, ke ma kunuck in pa Eria Prestuhn uh, yohk mukwilac luhk ke mukwikwi ke tempuhl se inge ac puhla kuhtasrihk kac lah ma kunuck in mukwikwi kac.
Nga siyuck sel Harriet lah el nuh eis solsol nuh kac uh. El soenna.
Lwen ekahsr tohkoh ac elyah luhk uh yohkwelihk. Nga nuhnkuh lah fin solsol lasr nuh kac uh tuhlac—sahp tuhlac inmahsrlon ilul ke sofa lasr ah. Sahp aluclac ke junk mail ah ac sisilac. Oasr kihsrihk na tipen soko nuhtin mwet tuhlan lasr ah ac nga luhman muhtwacwacack in motko na muh el.
Sahflahiyac ah nga ahkkohsyeyuck in eis ma pwacye uh: Tiacna suliyuck nga.
Tuhsruhk fuhkah ne in ohinge? Kuh oasr ma nga oruh koluk? Kuh oasr mwet pahngon muh loeslaclac nuh sesr in suhrak wi? Kuh muhlkihnyucklac nga?
Te paht, nga akihlen lah kain nuhnak inge kuh in kohllah nuh ke ohiyac ma nga tiac ke in oasr sihk.
Harriet ac nga ahkacsmakihnye kuht sifacna lah kihsac ke tempuhl sac tiac ma kacsr. Tiac ma ke mwet suc enenuh in suliyuck kuh tiac suliyuck. Ac tiacna ma ke puhla lasr uh kuh lah oasr suwohs lasr in wi.
Ohiyac in kihsaclah sie muhsah muhtahl, sie tempuhl luhn Leum God Fuhlwactlacna. Pa sie lwen in engan nuh sin mempucr ke Alu uh fin acn Spain.
Fin nga tuh suliyuck in wi, luhkuhn nga oraclah ke engan. Tuhsruhk fin nga tiac suliyuck, engan luhk uh fah tiac srihk. Harriet ac nga fah engan wi kawuck lasr uh, tamuhlwel ac tahmtahel wiyacsr, acn loesalah uh. Kuht fah kaksyakihn God ke mwe insewowo wolacna se inge arlac yohk oacna e lohm sesr Frankfurt oacna ke kuht oruh Madrid ah.
Wen nuhtin Puhlahl
Inmahsrlon mwet Singucul Luo ma Jisus El pahngon ac akmuhsraelah ah pa tamuhlwel luo, James ac John. Kom esam ine El pahngolos kac ah?
Wen nuhtin Puhlahl (Boanerges).1
Kom tiac ana eis ine ingacn fin wacngihn sramsram usrnguck kac. Koluk ohiyac, ma suhmuhslah uh tiacna sang ahkuhtweyac yohk ke srihpen ine ingacn. Tuhsruhk, kuht eis kuhtasrihk kalmeyacn ohiyac kacl James ac John. Elos inge pacna pa tamuhlwel suc ke in pahngon e inkuhsrao me nuh ke sie mura fin acn Samaria ke srihpen elos tiacna solsol nuh fin acn sacn.2
James ac John elos mwet pahtuhr—sahp elos mwet oasr facsin fihsrwacsr lalos—tuh nga nuhnkuh elos etuh ma puhkantwen ke ma luhn facluh. Pwacyena, elos mwet orekma uh.
Ke sie pacl ah, ke Mwet Lahngo El ahkolah in oraclah fuhfahsryucsr sahflah Lal nuh Jerusalem, James ac John ohsun nuh Sel ke sie nguhsr yohk—sahp sie nguhsr fal nuh ke inelos.
“Oasr ma se kut lungse siyuk kom in oru nu sesr,” elos fahk.
Nga kuh in motkwelah muh Jisus El isrwacsr nuh selos ke El topuk, “Mea se?”
“Ke pacl se kom ac muta fin tron wolana in Tokosrai lom, kut lungse wi kom muta, sie lac po layot ac sie lac po lasa sum.”
Na Mwet Lahngo El solwaclos in nuhnkuh yohk kuhtuh ke ma elos siyuck an ac fahk, “Tuh nga tia ku in fahk lah su ac fah muta lac pouk layot ac lac pouk lasa. God pa ac fah sang acn inge nu sin mwet su El akola nu se.”3
Ke kahs sahyac an, kom tiac kuh in eis ahkfuhlwact ke tohkohsrahi luhn inkuhsrao ke orek kacmpein nuh kac. Kom tiac pac kuh in ana eis wolacna ma pahtpaht lom ke wi lom uh.
Ke Mwet Sap singucul sahyac ah lohng ke nguhsr luhn Wen nuhtin Puhlahl ah, elos tiacna engan kac. Jisus El etuh lah pacl Lal uh apkuhranme, ac liye fohs inmahsrlon mwet suc fah tahfwelah orekma Lal uh lah luhman ahkkolukyacl.
El sramsram nuh sin Mwet Singucul ah ke kuh luhn ma facluh ac ma ac oruh nuh sin mwet suk ac sruok uh. “Kowos etu lah mwet kol lun mwet pegan uh lungsena sapsap nu fin mwet lalos,” El fahk, “ac mwet leum uh elos akkalemye lah ku nukewa oasr selos.”
Nga apkuhranna in liye Mwet Lahngo, ngwetngwet ke luhngse yohk nuh ke muhtuhn mwet tuhma lutlut yohk luhlahlfongi ingacn. Nga apkuhranna in lohng puhsrwen nguhsr Lal: “Tusruktu tia ouinge inmasrlowos. Sahyacna, sie suwos fin lungse in meet inmasrlowos, el enenu in mwet fokoko lowos nukewa.”4
Ke tohkohsrahi luhn God, in fuhlwact ac mwet kol kalmeyac pa in kahlwem ke mwet sahyac oacna elos—oacna God El liyaclos—ac in kahsruh ac lotwelos. Kalmac pa in engan yurin mwet suc engan, tuhng yurin mwet suc lalo, ahkkweye mwet suc suhpwacr, ac luhngse mwet tuhlan lasr oacna Kraist El luhngse kuht. Mwet Lahngo El luhngse tuhlihk nuhtin God uh finne fuhkah ohiyacn mukwikwi, atac, alu, kahs, nuhnak, acn lalos uh, kuh kuhtwena srisri sahyac. Ac kuht enenuh in oruh pac!
Opi yohk emet luhn God som nuh sin mwet kuhlwacnsap ma tiac soano in fohlohkihnyuck nuh se. Som pac nuh sin mwet suc tiac etweyuck kuhlwacnsap la; elos suc lukmac in suk inkacnek in kahsruh mwet sahyac uh; elos suc luti mwet sahyac kena srihpen elos luhngse God ac tuhlihk nuhtin God.5
Tiac Yuckihn
Tukun na pahng luhk oacna sie General Authority sasuc ah, nga eis pacl wowo in weluhl Prestuhn James E. Faust nuh ke sie sifil pakpucki luhn stek. Ke nga kahsruhsr nuh ke ma kunacsr fin acn kahto Southern Utah an, Prestuhn Faust el kuhlwacng in kaiyuc ac lutiyuc. Sie lesin nga fah tiacna muhlkuhnlah. El fahk, “Mempucr ke Alu uh elos kuhlwacng nuh sin Mwet Kol Fuhlwact. Elos fah oruh wo nuh sum ac fahk ma kuhlwacng keim.” Na el wetoklac ac fahk, “Dieter, fahk kuloh pacl nuhkwewa ke ma inge, tuhsruhk taran kom in tiac yuckihn.”
Lesin yohk srihpac ke kuhlwacnsap ke Alu uh inge kapsrweyuck nuh sin mwet sruok pristut nuh kwewa ke u ke Alu uh. Ma pac nuh sesr nohfohn ke Alu se inge.
Ke Prestuhn J. Reuben Clark Jr. el kai nuh sin mwet pahng nuh ke wal ke Alu uh ah, el fahk nuh selos in tiacna muhlkuhnlah masap ahk ohnkohsr ah.
Oacna ma etweyuck uh, mwet se ac siyuck, “Meac masap ahk ohnkohsr?”
“Nimet arlac elyah ke ma mwet nuhnkuh keim,” el fah fahk.
Pwacyelah, ma inge kol nuh ke sie kihsen siyuck tohkoh: “Meac masap limekohsr sahyac ah?”
Ke isracsr ke muhtahl, Prestuhn Clark el fah fahk, “Wacngihn na pwacye.”6
In mwet kol fokoko ke Alu uh, kuht enenuh in lotwelah lesin yohk srihpac se inge: in mwet kol ke Alu uh tiac arlac ma ke in kol mwet sahyac oacna ke kena lasr in kolyuck sin God.
Kunohkohn uh pa Pacl Wowo nuh ke Kuhlwacnsap
In Mwet Luhlahlfongi luhn God Fuhlwact Emet, kuht enenuh in esam pacl nuh kwewa mwet suhkahsruhp ac enenuh, ac mas ac kweok, ke srihpen mwet suc tiac oruh ma inge tiacna mwet tuhma lutlut Lal.7 Pacl wowo forfor in oruh ma wo ac in kuhlwacnsapuh mwet sahyac uh tiac sruhuh. Kuht kuh in sokuhlosyak ke mura lasr, ke ward kuh pracns lasr uh, ac pwacyena lohm sesr ah.
In weacng, mempucr nuh kwewa ke Alu uh ituckyang kais sie pacl wowo la in kuhlwacnsap. Kuht pahngon pacl wowo inge “kunohkohn” —sie ohiyac ma enenuh in ahkacsmakihnye lah suc pahngon kuht in kuhlwacnsap uh. Kuht fin motko muh kunohkohn lasr uh pacl wowo in kuhlwacnsapuh God ac luti mwet sahyac ke luhlahlfongi ac puhsisacl, mukwikwi in kuhlwacnsap nuh kwewa lasr fah sie step nuh ke inkacnek luhn mwet tuhma lutlut. Ke ohiyac se inge, God elac tiac muhsaheack Alu Lal muhkwena tuhsruhk mwet kuhlwacnsap Lal pac. Alu uh oreklac in kahsrwe kuht mwet tuhma lutlut pwacye ac luhlahlfongi luhn Kraist, tuhlihk mukul ac tuhlihk muhtwacn wowo ac suwohs nuhtin God. Ma inge sikyak tiac ke kuht som nuh ke miting ac lohng sramsram uh, tuhsruhk oacyacpac sikyak ke kuht nuhnkuh mwet sahyac ac kuhlwacnsapwaclos uh. Pa inge ohiyac ma ac ikihlkuhtlac “fuhlwact” ke tohkohsrahi luhn God uh.
Kuht eis kunohkohn uh ke pahkotwen, puhsisacl, ac srui. Ke kuht fihlfihllac liki kunohkohn inge, kuht eis eklac ke pahkotwen, puhsisacl, ac srui sacn pacna.
Ke nuhnak luhn God wacngihn kunohkohn ke tohkohsrahi ma yohk srihpac likina ma sahyac uh. Kuhlwacnsap lasr—finne yohk kuh srihk—ahkwoye nguhnasr, ikucslah winto inkuhsrao, ac fuhlwelah mwe insewowo luhn God tiac nuh sin mwet kuht kuhlwacnsapuh muhkwena tuhsruhk nuh sesr pac. Ac ke kuht kahsruh mwet sahyac uh, kuht kuh in etuh ke luhlahlfongi puhsisacl lah God El akihlen kuhlwacnsap lasr ke ahkkweye ac engan. El isrwacsr srihsrihk nuh sesr ke kuht sang mukwikwi pwacye ke luhngse inge, yohkna mukwikwi ma tiac liyeyuck ac tiac akihlenyuck sin mwet sahyac uh.8
Kais sie pacl ma kuht sang kuhtuh sesr nuh sin mwet sahyac, kuht fototoyang in eklac mwet luhlahlfongi wo ac suwos luhn Mwet se ma sang ma nuh kwewa Lal ke srihpacsr: Mwet Lahngo lasr.
Ke Karihngihn nuh ke Kuhlwacnsap ke Parade
Ke anniversary ahk 150 ke tui luhn payonir fin acn Salt Lake Valley, Brother Myron Richins el kuhlwacnsap oacna sie stek prestuhn fin acn Henefer, Utah. Oasr srihkeyacn fahsr luhn payonir an ahluhkwelah acn se sel ingacn ke ahkfuhlwact sacn.
Prestuhn Richins el wi nohfohn ke plwacn nuh ke ahkfuhlwact sacn, ac el wi miting puhkantwen yurin General Authorities ac mwet sahyac uh in sramsramkihn lwen sacn. El sang kuhiyacl nohfohn.
Met likina ahkfuhlwact kac an muhtwacwacack ah, stek lal Prestuhn Richins ah sifilpac ayaol mwet kol, ac el fihlfihllac ke prestuhn. Ke Sacnri se tohkohyang, el wi miting ke ward lal ah ke mwet kol an siyuck ke mwet in kahsruh in kahsruh ke ahkfuhlwact sacn. Prestuhn Richins, wi mwet sahyac an, kohlwack pahol ac ituckyang nuh se ohiyac in nuknuk ke nuknuk in orekma an ac in us pikuhp nahtuhl ah ac sie sahfuhl.
Sahflahiyac ah, lututacng ke ma ac sikyak ingacn tuhkuh, ac Prestuhn Richin el som in ahkfalye orekma lal oacna sie mwet kahsruh.
Wik na ekahsr met liki ah, el sie mwet kahsruh na wowo nuh ke plwacnwelah ac karihngihn mukwikwi luhlahp se inge. Ke na lwen sac, ne ohinge, orekma lal pa in ukwe ohsr ke parade(mahs) sac ac yucuk fohkohlos.
Prestuhn Richins el oruh ke pwacr ac ke engan.
El etuh lah kain kuhlwacnsap se ingacn tiac yohk srihpac liki ma sahyac uh.
El etuh ac orekmakihn kahs luhn Mwet Lahngo: “El su fulat emeet inmasrlowos elan mwet kulansap lowos.”9
Oruh Suwohsiyacn Mwet Tuhma Lutlut
Kuhtuh pacl uh, oacna Wen nuhtin Puhlahl, kuht kena in eis kunohkohn akihlenyuck. Kuht suk in akihlenyuck. Kuht suk in kol ac oraclah in akihlenyuck.
Wacngihn ma koluk ke in kena in kuhlwacnsapuh Leum, tuh ke kuht suk in eis moklweyuck ke Alu nuh ke ma wo lasr sifacna—in kuh in eis kaksyak ac yuckihn luhn mwet uh—kuht eis opi lasr. Ke kuht “puhlakihn” kaksyak luhn mwet sahyac uh, kaksyak sacn fah moliyac nuh sesr.
Meac pahng yohk srihpac emet ke Alu uh? Pa ma kunowos ingena uh. Finne fuhkah srihklaciyac kuh yohk akihlenyac, kunohkohn fal nuh sum ingena uh pa ma ac fah lwelah kom in tiac sruhk muhkwena mwet sahyac tuh in oacyacpac eklac sie mukul luhn God suc ma kom oreklac nuh kac.
Kawuck sacohk luhk ac tamuhlwel suc sruok pristut uh, sang kuh ke ma kunom!
Paul el luti ke Philippi, “Sahyacn in mokleyuck ke nuhnkuh kac sifacna, kais sie suwos enenuh, ke puhsisacl, mokleyuck in oruh nuh sie sin sie yohk srihpac oacna nuh suwos sifacna.”10
Kuhlwacnsap ke Suwohs
In suk ahkfuhlwact ac pwengpweng ke Alu uh sahyacn in sang kuhlwacnsap pwacye ac puhsisacl nuh sin mwet sahyac uh pa ma Esau el oruh oacna.11 Kuht kuh in eis mwe opi facluh, tuh ac tuhkuh ke molo yohk—wacngihnlac ahkkweye luhn God.
Lwelah kuht in ukwe srihkasrak luhn Mwet Lahngo lasr, suc fakpacp ac inse puhsisacl, suc tiac suk in kaksyakuhnuhlos tuh in oruh ma luhngse luhn Pahpah Tuhmwacl.12
Lwelah kuht in puhsisacl in kuhlwacnsapuh mwet sahyac—ke kuh, tarilac, ac suwohs. Finne mukwikwi ke orekma lasr uh oacna in fihsrwacsr, fal, kuh srihklac kalmeyac, mwet suc kahsruh ke kuhlwacng ac luhngse mwet sahyac uh fah sie lwen etuh yohk srihpaciyacn orekma lalos ke pahkotwen ma pahtpaht ac insewowo luhn God Kuhlwacna.13
Tamuhlwel sacohk wiyuck, kawuck sacohk luhk, nga finsrak tuh kuht in nuhnkuh, kahlwem, ac moulkihn mwe luti yohk srihpac ke mwet kol luhn Alu uh ac ohiyacn pristut uh. “El su fulat emeet inmasrlowos elan mwet kulansap lowos.” Pa inge pruhe ac mwe insewowo luhk ke ine muhtahl luhn Mwet Kol lasr, Mwet Lahngo lasr, ke inen Jisus Kraist, amen.