Kae ʻOua ke Tau Toe Fakataha Mai
ʻOfa ke hoko ʻiate kitautolu maʻu ai pē ʻa e Laumālie fakaʻofoʻofa ne tau ongoʻi ʻi he ʻaho ʻe ua kuo hilí pea ʻofa ke ne nofoʻia kitautolu maʻu ai pē ʻi he ngaahi ngāue ʻoku tau fai ʻi he ʻaho takitaha.
Siʻoku kāinga ʻofeina, ko ha konifelenisi fakaʻofoʻofa moʻoni ʻeni. Kuo fafangaʻi fakalaumālie kitautolu ʻi heʻetau fakafanongo ki he ngaahi lea fakalaumālie ʻa e kau tangata mo e kau fafine ne leá. Kuo laulōtaha ʻa e hivá, pea teuteuʻi mo fakahoko e ngaahi leá ʻo fakatatau mo e ngaahi ueʻi ʻa e Laumālie Māʻoniʻoní, pea kuo tataki kitautolu ʻe he ngaahi lotú ke tau toe ofi ange ki langi. Kuo langaki hake ʻetau moʻuí ʻi he tapa kotoa pē ʻi heʻetau kau fakataha maí.
ʻOku ou fakatauange te tau tuku ha kiʻi taimi ke tau lau ai e ngaahi pōpoaki ʻo e konifelenisí ʻi he taimi ʻe ʻatā atu ai ʻi he LDS.org ʻi ha ngaahi ʻaho siʻi mei heni pea mo e taimi ʻe paaki atu ai ʻi he makasini Ensign mo e Liahoná, he ʻoku taau ke vakaiʻi mo ako fakalelei ia.
ʻOku ou ʻiloʻi pē ʻoku tau kau fakataha ʻi hono fakahaaʻi ha houngaʻia ki he kau tangata mo e kau fafine ne tukuange he konifelenisí ni. Kuo lelei ʻenau faifatongiá mo ʻenau tokoni ki he ngāue ʻa e ʻEikí. Kuo kakato ʻenau mateakí.
Kuo tau poupouʻi foki ʻi heʻetau hikinimaʻí, ha kau tangata kuo uiuiʻi ki ha ngaahi fatongia foʻou. ʻOku tau talitali fiefia kinautolu pea ʻoku mau fakaʻamu ke nau meaʻi ʻoku mau hanganaki atu ke ngāue fakataha mo kinautolu he ngāue ko ʻeni ʻa e ʻEikí.
ʻI heʻetau fakalaulauloto ki he ngaahi pōpoaki kuo tau fanongoá, ʻofa ke tau fakapapau ke hoko ʻo lelei ange ʻi he tuʻunga ne tau ʻi ai he kuohilí. Fakatauange ke tau angalelei mo ʻofa ki he niʻihi ʻoku ʻikai ke tatau ʻetau tui fakalotú mo ʻetau tuʻunga moʻuí. Naʻe ʻomi ʻe he Fakamoʻuí ha pōpoaki ki he māmaní ʻo e ʻofa mo e failelei ki he kakai kotoa pē. ʻOfa ke tau muimui maʻu pē ki Heʻene sīpingá.
ʻOku tau fehangahangai mo ha ngaahi faingataʻa lalahi he māmaní he ʻahó ni, ka ʻoku ou fie fakapapauʻi atu ʻoku tokaimaʻananga mai e Tamai Hēvaní kiate kitautolu. Te Ne tataki mo tāpuakiʻi kitautolu ʻi heʻetau tui mo falala kiate Iá pea te Ne tokoni ke tau ikunaʻi ha faʻahinga faingataʻa pē te tau fehangahangai mo ia.
ʻOfa ke nofoʻia kitautolu ʻe he ngaahi tāpuaki ʻo e langí. ʻOfa ke fakafonu hotau ʻapí ʻaki ʻa e ʻofa mo e fakaʻapaʻapa pea mo e Laumālie ʻo e ʻEikí. ʻOfa ke tau hokohoko atu hono tanumaki ʻetau fakamoʻoni ki he ongoongoleleí ke hoko ia ko ha maluʻanga mei he ngaahi ʻohofi ʻa e filí. ʻOfa ke nofoʻia kitautolu ʻe he Laumālie ne tau ongoʻi he ʻaho ʻe ua ne toki ʻosí ʻi heʻetau fakahoko ʻetau ngaahi ngāue fakaʻahó pea ke tau fakahoko maʻu pē e ngāue ʻa e ʻEikí.
ʻOku ou fakamoʻoni atu ʻoku moʻoni e ngāué ni pea ʻoku moʻui hotau Fakamoʻuí, pea ʻokú Ne tataki mo fakahinohinoʻi Hono Siasí ʻi he māmaní. ʻOku ou ʻoatu ʻeku fakamoʻoní ʻoku moʻui ʻa e ʻOtua ko ʻetau Tamai Taʻengatá pea ʻokú Ne ʻofa ʻiate kitautolu. Ko Ia ʻetau Tamaí, ʻoku fakatāutaha mo moʻoni. ʻOfa ke tau ʻiloʻi ʻokú Ne fie ofi mo fie tokoni kiate kitautolu kae pehē ki he lahi ʻo ʻEne ʻofa ʻiate kitautolú.
ʻOfa ke tāpuekina kimoutolu ʻe he ʻOtuá siʻoku kāinga. ʻOfa ke ʻiate kimoutolu ʻEne melino ne talaʻofa maí, ʻi he taimí ni pea maʻu ai pē.
ʻOku ou tatau atu kae ʻoua ke tau toe fakataha mai ʻi ha māhina ʻe ono mei heni, pea ʻoku ou fai ia ʻi he huafa ʻo Sīsū Kalaisí, ʻēmeni.