Bulanan nga Mensahe sang Para sa Kusog sang mga Lamharon, Hulyo 2025

Pagkatapos Sining Kabuhi

Mga Sabat sa Pila ka Pamangkot

Ni David A. Edwards

Mga Magasin sang Simbahan

Ang plano sang Amay nga Langitnon makahatag sa aton sang perspektibo kag kalinong parte sa kabuhi pagkatapos sang kamatayon.

Ano ang matabo kon mapatay kita?

Amo ini siguro ang pamangkot sa tanan nga relihiyon. Mabaskog ang mga sabat nga ara sa aton paagi kay Jesucristo kag sa Iya ebanghelyo. Ini nga kabuhi indi ang katapusan. Tungod nabanhaw si Jesucristo, ang aton mga espiritu magabalikay upod sa aton mga lawas, kag tanan kita mabanhaw sa pila ka adlaw.

Siyempre, may iban pa nga mga detalye parte sa kabuhi pagkatapos sang kamatayon nga nag-abot sa aton paagi sa moderno nga rebelasyon mga makasabat sa iban pa naton nga mga pamangkot. Ari ang pila sina ka mga pamangkot, upod ang pila ka malip-ot nga sabat.

Ano ang hitsura sang lawas nga espiritu?

Ang espiritu isa ka klase sang matter, nga “mas pino ukon putli” (Doktrina kag mga Kasugtanan 131:7). Ang espiritu nga mga lawas daw pareho sang hamtong nga mga lawas sang tawo.

Sa diin ang kalibutan sang mga espiritu?

Ari diri, sa palibot naton.

Ano ang nagakatabo sa kalibutan sang mga espiritu?

Dala sa iban nga mga butang, ang mga espiritu nga nagbaton sang ebanghelyo ginaorganisar para magwali sang ebanghelyo sa mga espiritu nga wala pa nakabaton sang ebanghelyo. Ina nga mga espiritu pwede magbaton ukon magsikway sini.

Ano ang hitsura sang nabanhaw nga mga lawas?

Ang nabanhaw nga mga lawas indi na mapatay, may unod kag tul-an, kag perpekto. Mahimayaon ini kag matahum. “Wala na sing mas matahum pa tulukon sangsa nabanhaw nga lalaki ukon babayi.”

Ano ang nagakatabo sa selestiyal nga ginharian?

Ang ara sa pinakamataas nga lebel sa selestiyal nga ginharian mangin pareho sa aton Amay nga Langitnon kag makaeksperiyensya sang kabug-osan sang kalipay. Mabaton nila ang tanan nga ara sa Amay. Nagapartisipar sila sa Iya buluhaton kag himaya. Naselyohan sila sa wala katapusan nga pag-asawahay kag nagaestar na karon sa wala katapusan nga mga pamilya, nga may ara naman sang ila kaugalingon nga espiritu nga kabataan.

Paano ang mga tawo nga wala makasal sa sini nga kabuhi?

Ang plano sang Amay nga Langitnon patas kag maluluy-on. “Nagpromisa ang Ginuo nga sa wala katubtuban wala sang bugay nga idingot sa iya mga anak nga lalaki kag babayi nga nagatuman sang mga kasugoan, nga tampad sa ila mga kasugtanan, kag nagahandum sang husto.”

Ginselyohan ang akon mga ginikanan sa templo, pero diborsyado na sila karon. Kay sin-o ako naselyohan?

Mahimo nga “nabata [ka] sa kasugtanan” (buot silingon, nabata ka pagkatapos nga naselyohan ang imo ginikanan sa templo), ukon mahimo nga naselyohan ka sa imo ginikanan pagkatapos nila nga maselyohan sa isa kag isa. Sa sining duha ka kaso, ang imo mga bugay magapabilin bisan pa nga ginpili sang imo ginikanan nga magdiborsyo kag ipakansela ang pagselyo sa ila.

Ang pagpili sang imo mga ginikanan indi makaapekto sa imo mga bugay. Ang importante nga magpabilin ka nga matinuohon kag handumon ang mga bugay sang templo para sa imo kaugalingon. Ang parte sa relasyon sang imo pamilya, dapat ka nga “magsalig sa Ginuo kag pangitaon ang Iya kasulhayan,” nga nakaintiendi nga “ang Amay nga Langitnon magaseguro nga ang tagsa ka tawo makabaton sang tagsa ka bugay nga ginatugot sang iya mga handum kag mga pagpili.”

Ano ang matabo sa mga tawo nga napatay paagi sa paghikog?

Wala kita makahibalo kon ano ang matabo sa mga tawo nga napatay paagi sa paghikog, kag indi naton sila pwede husgahan (pareho sa tanan nga tawo, sa kabilogan). “Bisan pa sa tanan nga pagpaninguha sang mga mahal sa kabuhi, mga lider, kag mga propesyunal, ang paghikog indi gid pirme mapunggan. …

“Indi husto nga kuhaon sang isa ka tawo ang iya kaugalingon nga kabuhi. Pero, ang Dios gid lamang ang makahukom sang pamensaron, aksyon, kag lebel sang pagka-may salabton sang tawo (tan-awa sa 1 Samuel 16:7; Doktrina kag mga Kasugtanan 137:9). …

“Ang mga nawad-an sang mahal sa kabuhi tungod sa paghikog makakita sang paglaum kag pag-ayo kay Jesucristo kag sa Iya Pagbayad-Sala.”

© 2025 iya sang Intellectual Reserve, Inc. All rights reserved. Gin-imprinta sa Pilipinas. Petsa sang pagtugot sa Ingles: 6/19. Petsa sang pagtugot sa paglubad: 6/19. Paglubad sang Monthly For the Strength of Youth Message, July 2025. Hiligaynon. 19618 861