“Alang sa Kalig-on sa mga Kabatan-onan: Ang Mensahe sa Manluluwas alang Kaninyo,” Alang sa Kalig-on sa mga Kabatan-onan, Mar. 2024.
Usa ka Giya ngadto sa Iyang Kalig-on
Alang sa Kalig-on sa mga Kabatan-onan: Ang Mensahe sa Manluluwas alang Kaninyo
Kini nga giya motabang kaninyo sa pagkonektar sa inyong mga pagpili ngadto ni Jesukristo ug sa Iyang doktrina.
Nagatindog Ako sa Pultahan ug Nagtuktok, ni J. Kirk Richards
Hunahunaa nga nagpuyo kamo sa karaang Galilea, 2,000 ka tuig kaniadto. Kamo ug ang inyong mga higala giimbitar ngadto sa usa ka debosyonal sa kabatan-onan diha sa usa ka lokal nga sinagoga, nga nagpasundayag og usa ka espesyal nga bisita nga mamumulong: si Jesus nga taga Nazaret. Ug diha sa usa ka piho nga higayon sa Iyang mensahe, giimbitar ni Jesus ang kabatan-onan diha sa mga nanambong sa pagpangutana Kaniya.
Unsa kaha nga mga pangutana sa inyong hunahuna ang inyong madungog?
Nagtuo ko nga pipila ka pangutana mopakita sa kultura ug mga kahimtang nianang panahona. Apan nagtuo gayod ko nga daghan niini mahimong sama kaayo sa mga pangutana nga anaa kita karon.
Sama pananglitan, diha sa Bag-ong Tugon, ang mga tawo nangutana sa Manluluwas og mga sama niini:
-
Unsa ang akong kinahanglan nga buhaton aron makaangkon og kinabuhing dayon?1
-
Gidawat ba ako? Nahisakop ba ako?2
-
Kon ang akong igsoon makasala batok kanako, kapila man nako siya kinahanglang pasayloon?3
-
Unsa may mahitabo niini nga kalibotan sa umaabot? Luwas ra ba kaha ko?4
-
Mahimo ba Nimong ayohon ang akong minahal?5
-
Unsa ang kamatuoran?6
-
Unsaon nako pagkahibalo kon nagsubay ko sa hustong dalan?7
Wala ba kita maghunahuna sa samang butang matag karon ug unya? Paglabay sa mga siglo, ang mga pangutana wala kaayo mausab. Ug ni ang kaluoy nga anaa ang Manluluwas ngadto niadtong mangutana niini. Nasayod Siya kon unsa ka makapabalaka ug makalibog mamahimo ang kinabuhi. Nasayod Siya kon unsa sayon nga mahisalaag. Nasayod Siya nga usahay mabalaka kita mahitungod sa umaabot. Ug Siya nagsulti kaninyo ug kanako, sama nga Siya misulti ngadto sa Iyang mga sumusunod dugay na kaniadto:
Kon kamo adunay importante nga mga pagpili nga himoon, si Jesukristo ug ang Iyang gipahiuli nga ebanghelyo mao ang labing maayong pagpili. Kon kamo adunay mga pangutana, si Jesukristo ug ang Iyang gipahiuli nga ebanghelyo mao ang labing maayong tubag.
Kini mao ngano nga ganahan ko sa Alang sa Kalig-on sa mga Kabatan-onan: Usa ka Giya sa Paghimo og mga Pagpili. Kini nagpunting kanato ngadto kang Jesukristo aron makadawat kita sa Iyang kalig-on. Nagbutang ko og usa ka kopya sa akong bulsa sa tanang higayon. Samtang makighimamat ko sa mga tawo sa tibuok kalibotan nga gustong mahibalo kon ngano kita, isip mga miyembro sa Simbahan ni Jesukristo, mobuhat sa unsay atong gibuhat, akong ipakigbahin kini nga giya ngadto kanila.
Ang Alang sa Kalig-on sa mga Kabatan-onan nagtudlo sa mahangtoron nga mga kamatuoran mahitungod sa Manluluwas ug sa Iyang Dalan [Pamaagi]. Kini nag-imbitar kaninyo sa paghimo og mga pagpili base niadto nga mga kamatuoran. Ug kini nagpakigbahin sa gisaad nga mga panalangin nga Iyang ihatag ngadto niadtong kinsa mosunod Kaniya. Palihog basaha, pamalandongi, ug ipakigbahin kini nga giya!
Imbitara Siya
Gusto si Jesukristo nga mahimong kabahin sa inyong kinabuhi—usa ka kanunay, inadlaw nga presensiya, sa maayo nga mga panahon ug sa dili maayo nga mga panahon. Wala lang siya nagbarog diha sa kataposan sa dalan, naghulat nga kamo makaapas Kaniya. Siya molakaw uban kaninyo sa matag lakang diha sa dalan. Siya mao ang Dalan!
Apan dili Niya ipamugos ang Iyang dalan [pamaagi] diha sa inyong kinabuhi. Imbitara Siya ninyo, pinaagi sa inyong mga pagpili. Kini mao ngano nga ang usa ka giya alang sa paghimo og mga pagpili, sama sa Alang sa Kalig-on sa mga Kabatan-onan, bililhon kaayo. Matag higayon nga mohimo kamo og usa ka matarong nga pagpili base sa mahangtoron nga mga kamatuoran sa Manluluwas, kamo nagpakita nga gusto ninyo nga maanaa Siya sa inyong kinabuhi. Kadto nga mga pagpili moabli sa mga ganghaan sa langit, ug ang Iyang kalig-on moabot nga ibubo diha sa inyong kinabuhi.11
Paghimo og usa ka Lig-on nga Koneksiyon
Tingali inyong mahinumdoman nga ang Manluluwas mitandi niadtong kinsa nakadungog ug mibuhat sa Iyang mga panultihon ngadto sa maalamon nga tawo kinsa “nagtukod sa iyang balay diha sa bato.” Siya mipasabot:
“Sa dihang mibundak ang ulan ug mibaha ang mga suba ug ang hangin mihapak ug mikusokuso niadtong balaya, wala kini matumba kay natukod man diha sa bato.”12
Ang usa ka balay dili lang maluwas sa unos tungod kay lig-on ang balay. Kini dili lang usab maluwas tungod lang kay lig-on ang bato. Ang balay maluwas sa unos tungod kay kini hugot nga nakakonektar ngadto nianang lig-on nga bato. Ang mahinungdanon mao ang kalig-on sa koneksiyon ngadto sa bato.
Sa samang paagi, samtang kita magtukod sa atong mga kinabuhi, importante ang paghimo og maayo nga mga pagpili. Ug importante ang pagsabot sa mahangtoron nga kamatuoran sa Manluluwas. Apan ang kalig-on nga atong kinahanglanon sa pagsugakod sa mga unos sa kinabuhi moabot kon kita mokonektar sa atong mga pagpili ngadto kang Jesukristo ug sa Iyang doktrina. Mao kana ang matabang sa Alang sa Kalig-on sa mga Kabatan-onan nga atong buhaton.
Sama pananglit, ang inyong mga higala mahimong masayod nga naningkamot kamo nga dili mogamit og makapasilo o makapasakit nga pinulongan. Mahimong makakita sila kaninyo nga nakighigala ngadto niana nga bata diha sa eskwelahan nga gibaliwala lang o gani gidaogdaog sa kadaghanang mga tawo. Apan nasayod ba sila nga gihimo ninyo kini nga mga pagpili tungod kay si Jesukristo mitudlo nga “tanang tawo inyong igsoon nga mga lalaki ug igsoon nga mga babaye—lakip … sa mga tawo kinsa lahi kaninyo o dili mouyon kaninyo”?13
Ang inyong mga higala tingali nasayod nga kamo mosimba matag Dominggo. Tingali nakamatikod sila sa dihang palongon ninyo ang usa ka piho nga awit o balibaran ang usa ka imbitasyon nga motan-aw sa usa ka piho nga salida. Apan nasayod ba sila nga gihimo ninyo kini nga mga pagpili tungod kay kamo adunay “usa ka malipayon nga relasyon sa pakigsaad uban sa Langitnong Amahan ug ni Jesukristo,” ug nga isip kabahin niana nga pasalig sa pagsunod sa Manluluwas, kamo mapasalamaton “nga makabaton sa Espiritu Santo isip inyong kanunay nga kauban”?14
Tingali nasayod ang mga tawo nga kamo dili moinom o manigarilyo o mogamit og ubang makadaot nga mga droga. Apan nasayod ba sila nga gihimo ninyo kini nga mga pagpili tungod si Jesukristo mitudlo nga “ang inyong lawas sagrado,” “usa ka talagsaon nga gasa gikan sa inyong Langitnong Amahan,” gihimo sama sa Iyang dagway?15
Ang inyong mga higala tingali nasayod nga dili kamo mangopya o mamakak ug nga giseryoso ninyo ang edukasyon. Apan nasayod ba sila nga kini tungod kay si Jesukristo mitudlo nga “ang kamatuoran maghatag kaninyog kagawasan”?16
Labaw sa tanan, nasayod ba ang inyong mga higala nga kamo mohimo nining mga pagpili nga usahay dili pinalabi sa kadaghanan aron magpabilin nga matinud-anon ngadto sa mga sumbanan ni Kristo tungod kay nasayod kamo nga “si Jesukristo mao ang inyong kusog”?17
Siya ang Inyong Kalig-on
Akong ihatag kaninyo ang akong segurado nga pagsaksi nga si Jesukristo mao ang Dalan ngadto sa usa ka mahayag ug mahimayaon nga kaugmaon—inyong kaugmaon. Ug Siya usab ang Dalan ngadto sa usa ka mahayag ug mahimayaon nga karon. Lakaw diha sa Iyang dalan, ug Siya molakaw uban kaninyo. Kamo makahimo niini!
Akong minahal nga batan-ong mga higala, si Jesukristo mao ang inyong kalig-on. Padayon sa paglakaw uban Kaniya, ug Siya motabang kaninyo nga mosulbong “pinaagi sa mga pako ingon sa mga agila”18 paingon sa mahangtoron nga kalipay nga Iyang giandam alang kaninyo.