Kalig-on nga Maandam ug Mamahimo

Magmalamposon uban sa Manluluwas

Ni David A. Edwards

Mga Magasin sa Simbahan

Ang Manluluwas nagtabang kaninyo nga matuman ninyo ang matarong nga mga tinguha alang sa inyong kaugmaon.

Si Jesukristo naggakos og batang babaye

“Pangandam alang sa inyong kaugmaon.” Maorag mao kana ang mensahe nga nagpaluyo kaayo diha sa kinabuhi sa usa ka batan-on—sa eskwelahan, sa simbahan, sa trabaho ug sa panimalay. Ikaw mahimong magsugod sa paghunahuna, “Oo, lagi. Nakasabot na ko.” Siyempre nasayod kamo nga ang kaugmaon nagsingabot ug kamo kinahanglan nga mangandam alang niini. Ug sa kahiladman, kamo gusto nga talagsaon ang inyong kaugmaon.

Inyoha nang nailhan ang inyong kaugalingong kasingkasing. Nagkat-on kamo sa unsa gayod ang inyong gusto. Gusto kamo nga mobuhat og maayo ug makahuluganon nga mga butang sa inyong kinabuhi—aron sa pagbuhat og kalainan sa kalibotan ug sa kinabuhi sa ubang tawo, sa pagserbisyo sa Dios ug sa inyong isig ka tawo. Nahibaloan ninyo nga kini mao ang husto ug makapahimo ninyo nga tinuoray nga malipayon.

Busa, ania ang ubang importanteng mga butang nga angay masayran samtang kamo molambo ug mangandam alang sa kaugmaon:

• Ang Ginoo nasayod usab sa katuyoan sa inyong kasingkasing (tan-awa sa Doktina ug mga Pakigsaad 6:16). Kay ang inyong lawom ug sinsero nga tinguha alang sa inyong kinabuhi maayo ug matarong, si Jesukristo anaa nag-uban kaninyo aron sa pagpalig-on kaninyo samtang kamo mangandam.

• Dili lang kamo basta nangandam sa pagbuhat og mga butang; kamo nag-anam og kahimo sa unsay gilaoman sa Langitnong Amahan ug sa Manluluwas nga matang sa tawo nga kamo mamahimo.

• Kamo makatagamtam sa karon samtang nangandam usab sa umaabot. Kining higayona sa inyong kinabuhi lahi, ug ang maayo nga mga pagpili nga inyong gihimo nag-andam kaninyo alang sa maayo nga kaugmaon.

Samtang kamo maghunahuna mahitungod sa unsay inyong gipangandaman, hunahunaa usab kon sa unsang paagi ang Manluluwas nagpalig-on kaninyo sa tanang higayon. Ug hunahunaa kon unsa nga matang sa tawo ang Iyang gitabang kaninyo nga kamo mamahimo.

Unsa Ang Inyong Gipangandaman?

Ania ang pipila lang ka pananglitan:

• Dugang edukasyon

• Mga pakigsaad sa templo

• Misyon

• Kaminyoon

• Trabaho ug panginabuhian

• Pamilya ug pagkapari

• Pagkadisipulo sa tibuok kinabuhi

Unsaon sa Langitnong Amahan ug ni Jesukristo sa Paglig-on Kaninyo samtang Kamo Mangandam?

Ania ang pipila lang ka pananglitan:

1. Sila mopadala kaninyo sa Espiritu Santo, nga makahimo nga:

   1. Mohupay kaninyo.

   2. Mogiya kaninyo.

   3. Modasig kaninyo.

   4. Mopahinumdom kaninyo sa mga butang nga inyong nakat-onan.

   5. Mohatag kaninyo og kamasaligon.

   6. Mohatag kaninyo og kalinaw.

   7. Mopakalma sa inyong kahadlok.

2. Sila modasig sa mga propeta sa pagtudlo kaninyo pinaagi sa:

   1. Kinatibuk-ang komperensiya.

   2. Mga magasin sa Simbahan.

   3. Espesyal nga mga sibya.

   4. Website sa Simbahan ug sa social media.

   5. Alang sa Kalig-on sa mga Kabatan-onan: Usa ka Giya sa Paghimo og mga Pagpili.

3. Sila modasig sa uban sa pagtabang ug pagsuporta kaninyo, lakip sa:

   1. Mga Ginikanan.

   2. Mga Higala.

   3. Mga Lider.

   4. Mga Magtutudlo.

Kinsa ang mga Tawo nga Gipaningkamotan ni Jesukristo nga Kamo Mamahimo?

Si Jesukristo nagtabang kaninyo nga mas mahimong matang sa tawo nga mao Siya—mas sama sa inyong Langitnong Amahan.

Sila nagmaya sa matag gamayng lakang nga inyong gihimo—matag kasulatan nga inyong gibasa, matag buluhaton sa Simbahan nga inyong gituman, matag buluhaton sa eskwelahan nga inyong gikugihan sa pagbuhat, matag pasulit nga inyong gitun-an, matag mabination nga pulong nga inyong gilitok, matag buhat sa serbisyo nga inyong gihatag, ug daghan pa kaayo.

Uban sa kalig-on sa Manluluwas, kamo mas maandam alang sa inyong kaugmaon kay sa inyong mahimo kon wala Siya. Ug kamo mamahimong mas talagsaon pa.

Ang pagpangandam usa ka bahin sa katuyoan sa Alang sa Kalig-on sa mga Kabatan-onan: Usa ka Giya alang sa Paghimo og mga Pagpili. Ang pagbasa niini “makatabang kaninyo sa pagpangandam aron makahimo og sagrado nga mga pakigsaad diha sa templo, makaandam sa pagserbisyo og misyon, ug makakaplag og hingpit nga kalipay sa pagsunod ni Jesukristo sa tibuok ninyong kinabuhi.” Dayon kamo “makabaton og gahom gikan Kaniya aron matuman ang Iyang mga katuyoan alang kaninyo” ([2022], 2).

Ang Ebanghelyo ni Jesukristo: Usa ka Plano alang sa Pagkahimo

“Ang mga sugo, mga ordinansa, ug mga pakigsaad sa ebanghelyo dili usa ka lista sa mga deposito nga gikinahanglan nga ibutang ngadto sa pipila ka langitnong pundo. Ang ebanghelyo ni Jesukristo usa ka plano nga nagpakita kanato kon unsaon nga mamahimong matang sa tawo nga gitinguha sa atong Langitnong Amahan nga kita mamahimo.”

Presidente Dallin H. Oaks, Unang Magtatambag sa Unang Kapangulohan, Okt. 2000 nga kinatibuk-ang komperensiya (Ensign, Nob. 2000, 32).

Padayon sa Pagpangandam

“Ang umaabot mahimayaon alang niadtong kinsa nakaandam ug kinsa magpadayon sa pagpangandam nga mahimong mga instrumento sa mga kamot sa Ginoo.”

President Russell M. Nelson, “Hangupon ang Umaabot uban sa Hugot nga Pagtuo,” Okt. 2020 nga kinatibuk-ang komperensiya (Liahona, Nob. 2020, 75–76).

batan-ong babaye

“Wala nako seryosoha og maayo ang Young Women sa dugayng panahon samtang ako usa pa ka batan-on. Apan usa ka adlaw akong nakita ang akong mama (nga usa ka lider sa Young Women) nagtrabaho sa mga proyekto alang sa programa sa kabatan-onan. Nakahinumdom ko nga mibati nga nadasig pag-ayo sa iyang ehemplo aron mouswag sa espirituhanong paagi, busa naningkamot ko sa pag-usab sa akong kinaiya.

“Misugod ko sa pagkat-on og tinuoray kon unsa ang kahulogan sa ebanghelyo ni Jesukristo sa akong kinabuhi. Sulod sa katuigan, ako mibati og usa ka pagsaksi nga ang ebanghelyo ni Jesukristo tinuod. Bisan kon ang kinabuhi lisod samtang akong gisabot ang akong kinabuhi human sa akong mga katuigan sa pagkabatan-on, samtang gipadayon nako ang paghupot niadtong mga butang nga akong nasayran nga tinuod isip usa ka batan-ong babaye, ako nakabaton og daghang espirituhanong mga kasinatian nga nakapahimo sa akong pagpamatuod kon unsa kini karon.”

Sundae I., Misamis Oriental, Philippines