Salig sa Iyang Kalig-on

Diha sa Ebanghelyo ni Marcos, atong mabasa ang bahin sa usa ka babaye kinsa pisikal nga nag-antos sulod sa 12 ka tuig. Adunay usa ka tawo nga misulti kaniya mahitungod ni Jesus. Mao nga, sa dihang Siya naabot sa iyang lungsod, siya milingkod sa daplin sa agianan, naghulat. Samtang Siya milabay, siya hilom nga mikab-ot aron hikapon ang sidsid sa iyang sapot.

Naayo siya dihadiha dayon. Apan dili lamang siya ang nakamatikod niana nga milagro, nakamatikod usab si Jesus. “Ug si Jesus, sa nailhan niya sulod sa iyang kaugalingon nga may gahom nga migula gikan kaniya, dihadiha miliso taliwala sa panon sa katawhan ug miingon, Kinsa bay mihikap sa akong mga sapot?” (Marcos 5:30). Ang gahom mahimong magpasabot usab og kalig-on. Si Jesus dihadiha dayon nakahibalo nga adunay usa ka tawo nga nakadawat og kalig-on gikan Kaniya. Ang Iyang reaksiyon dayon mao ang pagpangita niya, aron makig-istorya kaniya, ug sa pagpahinumdom kaniya sa gahom sa hugot nga pagtuo. Siya mitawag kaniya og “anak.” Pinaagi Kaniya, naayo siya.

Akong nakat-onan nga ang usa ka pag-ampo alang sa kalig-on dili gayod molabay nga dili matubag. Kon kita mangayo og tabang Kaniya, “Ako agakon” Niya (tan-awa sa Mga Himno, nu. 75). Ang matag artikulo sa magasin niini nga bulan usa ka pahinumdom niana nga kamatuoran.

Diha sa Alang sa Kalig-on sa mga Kabatan-onan: Usa ka Giya sa Paghimo og mga Pagpili, ang Unang Kapangulohan nagtudlo nga ang “Manluluwas … mao ang ‘kalig-on sa kabatan-onan’” ([2022], 2). Tingali naghunahuna kamo kon unsaon nga magamit kana nga kalig-on. Kini ang akong paglaom nga makakaplag kamo og usa ka butang dinhi niini nga mga pahina nga mogiya kaninyo sa pagsalig Kaniya.

Siksika kini nga mga pahina. Pangita sa mga pulong sa paglaom, pangita og usa ka kasulatan sa kalig-on, isulat ang mga pag-aghat nga mihatag og impresyon diha sa inyong kasingkasing. Pinaagi kang Jesukristo, kamo mahimong maayo usab.

Imahe

Emily Belle Freeman

Uban sa dakong gugma,

Emily Belle Freeman

Kinatibuk-ang Presidente sa Young Women