“Ofu Lou Malosi, O Siona e—O Nai Vaega,” Mo le Malosi o le Autalavou, Nov. 2022.

Ofu Lou Malosi, E, Siona e

O Nai Vaega

Elder David A. Bednar

O Le Korama a Aposetolo e Toasefululua

Ou te tatalo faatauanau ia faamalamalamaina i tatou taitoatasi e le Agaga Paia a o tatou mafaufau nei i le taua o le faataoto i le tausamaaga o le faaipoipoga faatupu. …

Ina ua ulufale atu le tupu i le faletele, sa ia vaavaai atu i le aofia ma iloa vave atu ai se tasi na iloagofie e le o ofuina se ofu o le tausamaaga. Sa aumai le tagata i luma, ma sa fesili atu le tupu: “Sole, pe faapefea ona e ulufale mai iinei ua le ia te oe le ofu o le tausamaaga? Ma sa le magagana o ia” [Mataio 22:12]. …

… O le musu o le tamaloa e ofu le laei o le faaipoipoga na faaalia ai le le faaaloalogia o le tupu ma lona atalii. Sa na ona ia lē ofu i le ofu o le tausamaaga, ae, sa ia filifili foi e lē ofuina. … Sa vave ma mautu le tali atu a le tupu: “Ia outou fusifusia ona vae ma ona lima, ma ave o ia, ma lafo i le pouliuli i fafo; e i ai le taufaitagiaue ma le lilivau o nifo” [Mataio 22:13].

… O le le i ai o ni ona ofu talafeagai na faaalia ai lona fouvale i le loto faasaga i le tupu ma ana faatonuga.

Ona faaiu ai lea o le faataoto i le mau faaootia loto lenei: “Aua e toatele ē e valaauina, ae toaitiiti ē e filifilia” [Mataio 22:14].

… E leai se lisi a le Atua o ni tagata e fiafia i ai, lea faapea tatou te faamoemoe e i ai se aso e faaopoopo atu i ai o tatou igoa. E le o fuapauina ‘le au filifilia’ na o ni nai tagata. Nai lo lena, o o tatou loto, o o tatou naunauga, o lo tatou faamamaluina o feagaiga ma sauniga paia o le talalelei, o lo tatou usiusitai i poloaiga, ma, o le mea e sili ona taua, o le alofatunoa togiola o le Faaola e filima’oti ai pe faitaulia i tatou o se tasi e filifilia e le Atua. …

A tatou saili faalelei mo le meaalofa faaleagaga o mata ia vaai ma taliga ia faalogo, ou te folafola atu o le a faamanuiaina i tatou i le mana ma le faautautaga e faamalolosia ai a tatou sootaga faalefeagaiga ma le Alii soifua. O le a tatou maua foi le mana o le faaleatua i o tatou olaga—ma i’u ai ina valaauina ma filifilia ai mo le tausamaaga a le Alii.