Uiraʼa ’e Pāhonoraʼa

« E mea fifi roa ’ia ha’apa’o i te mau fa’aturera’a, mai te mea te mau ta’ata ato’a tā’u i mātau ’ua ha’apāpū roa i tā rātou arapaera’a. E aha tā’u e rave ? »

« Tē ’imi ra ānei ’outou i te ’aravihi, te pārurura’a ’e te ataata ’ore i roto… i tā ’outou hereiti ? ’A riro ’ei pipi mau nā Iesu. ’A riro ’ei feiā mo’a mau ’e te ha’apa’o ’e te itoito. ’A ti’aturi ē, tei tō ’outou fa’aro’o ra tā ’outou hereiti, nō te mea ’o te reira mau ».

Elder Jeffrey R. Holland nō te Pupu nō te Tino ’Ahuru ma Piti ’āpōsetolo, « How Do I Love Thee ? » New Era, ’Ātopa 2003, 8.

Te ha’amaita’ira’a iāna iho

taure’are’a tamāhine

« E tāmata ’ia fa’atupu i te hi’ora’a mure ’ore ’e ’ia hōro’a i te taime nō te fa’atupu i te mau tā’amura’a hōhonu a’e ’e tō ’outou ’utuāfare ’e te mau hoa. E ’ume mai teie mau ’ohipa maita’i ia vetahi ’ē ia ’outou ra, nō te mea e ’ite rātou i tō ’outou huru maita’i a’e—tō ’outou huru mau ! »

Ellie S., 17 matahiti, California (Fenua Marite)

’Imi i te arata’ira’a

taure’are’a tamāroa

« Mai te mea tē fifi ra ’outou i te mana’o ē, ’ua fa’aru’ehia mai ’outou, ’a ani i te Metua i te ao ra i te tāmāhanahanara’a. E arata’i te Vārua Maita’i ia ’outou, ’e tei reira ’oia nō ’outou. E nehenehe ato’a ’outou e ani i te mau taime ato’a i tō ’outou mau metua ’e te mau ti’a fa’atere i te a’o, inaha ’ua ti’a ato’a na rātou i te vāhi tei reira ’outou ! »

Jaime G., 17 matahiti, Nuevo Casas Grandes, Mēhiko

Fa’ahoa i te mau hoa ’āpī

taure’are’a tamāhine

« E ha’amana’o vau ē, tē here nei te Atua iā’u. I muri iho, e haere au e fārerei i te mau hoa tahito, ’e e fa’atupu vau i te mau ’ātivite nō te fa’ahoa i te mau hoa ’āpī. E nehenehe ’outou e fa’a’ohipa i te reira taime nō te fa’arahi atu ā i tō ’outou ti’aturira’a, te mau tārēni, ’e te ’itera’a pāpū, ’e i reira te mau mea ato’a e tere maita’i ai ».

Julia S., 12 matahiti, Alberta, Canada

Te a’o a te mau peropheta

taure’are’a tamāhine

« E nehenehe ē, e mea pa’ari ’ia feruri i ni’a i te tau mure ’ore ’a hi’ohia ai teie taime ’ei taime faufa’a a’e. ’A ha’amana’o ē, ’ua a’o ’ū’ana te mau peropheta ’e te tahi feiā fa’atere o te ’Ēkalesia ’ia ha’apae i te arapaera’a i tō ’outou ’āpīra’a, noa atu i muri a’e i te 16 matahiti. E nehenehe te mau arapaera’a i te ’āpīra’a e arata’i ia ’outou i roto i te ’ā’au ’oto ’e i te ’ohipa tai’ata. E nehenehe ato’a ’outou e ani i te Metua i te ao ra e aha te ’ohipa maita’i roa a’e e rave ».

Julia C., 17 matahiti, Utaha (Fenua Marite)

’A fa’aō i roto i te hō’ē mea

taure’are’a tamāhine

« Te hō’ē rāve’a maita’i nō te ’ite mai i te mana’o fāri’i i ni’a ia ’outou iho, ’o te ravera’a ïa i te tahi atu mau mea. ’A tāmata i te hō’ē tū’aro ’āpī, ’a haere i te hō’ē tata’ura’a fa’aōra’a i roto i te ha’utira’a teata ta’ata ora, ’aore rā ’a fa’aō i roto i te hō’ē pupu ta’ata hāmani mātini. Mai te mea tē rave ra ’outou i te hō’ē ’ohipa tā ’outou i au, e fārerei ’outou i te mau ta’ata e au ’outou i te ti’a atu i pīha’i iho ».

Mayah S., 16 matahiti, Beijing, Taina

Nā ’outou terā mā’itira’a

« Mai te mea ’ua 16 a’ena tō ’oe matahiti, e nehenehe ’oe e mā’iti e hina’aro ānei ’oe e haere ’o ’oe ana’e ’e te tahi. Terā rā, ’ia rave ’oe i te reira mā’itira’a, ’eiaha e feruri ē, e aha tā vetahi ’ē e feruri nō ni’a ia ’oe. Mai te mea ’ua ineine ’oe ra, ’a rave. Mai te mea ’aita ra, ’eiaha e rave ».

Felipe M., 14 matahiti, Rio de Janero, Peretīria

Te tahi atu mau tā’amura’a faufa’a

« Noa atu ē, ’aita paha tō ’oe tā’amura’a i ‘te tahi atu ta’ata ta’a ’ē’, tē vai noa ra tō ’oe tā’amura’a au ’e tō ’oe mau hoa ’e tō ’oe ’utuāfare ’ati a’e ia ’oe. ’A fa’a’ite i te māuruuru nō te reira mau tā’amura’a. Nō te ha’apūai i te reira, ’ia riro ’oe mai te huru Mesia ’e ’ei hi’ora’a maita’i ».

Taylee L., 17 matahiti, Utaha (Fenua Marite)

Tīa’i nō te fa’atupu i te mau tā’amura’a pāpū

« E mea au nā’u ’eiaha ā e fa’aea i roto i te hō’ē tā’amura’a pāpū. E’ita te tahi mau hoa tō’u e ’āpiti mai iā’u nō te mea e rahi tō rātou taime i pīha’i iho i tō rātou mau hoa tamāroa. ’Ua mana’o vau ē, tei iā’u noa te hina’aro ’ia fārerei i te ta’ata ma te ’ore e rave ’oi’oi i te mau fa’aotira’a faufa’a ».

Gina C., 16 matahiti, Nuevo Casas Grandes, Mēhiko

’Eiaha e fa’ateimaha ia ’oe iho

« ’Ua fāri’i ato’a vau i te reira mana’o, terā rā, nā te purera’a i te Fatu, te tai’ora’a i ta’u mau pāpa’ira’a mo’a, ’e te paraparaura’a i tō’u nā metua i tauturu mai iā’u. ’Aita e tītauhia ia tātou ’ia fa’ateimaha ia tātou, nō te mea e tauturu te Fatu ia tātou ’ia ’ite e aha te taime ti’a. ’A ’oa’oa i tō ’oe orara’a, ’e ’a ’āmui i tō ’oe mau hoa ’e i te ’utuāfare i tō ’oe ’āpīra’a ! Hō’ē ana’e taime e tupu ai terā pu’e tau i roto i tō ’oe orara’a, nō reira, ’eiaha e mana’o ē, e tītauhia ia ’oe ’ia rū i te reira.

Victoria G., 16 matahiti, Nuevo Casas Grandes, Mēhiko

Te mau pāhonora’a a te feiā tai’o, nō te tauturu ïa ’e nō te fa’a’ā’ano i te hi’ora’a, e ’ere rā i te mau fa’ahitira’a mana nō te ha’api’ira’a tumu a te ’Ēkālesia.

E aha tō ’oe manaʼo ?

E mea fa’ahiahia te ravera’a i te ’ōro’a mo’a i te fare. Nō te aha te Fatu e hina’aro ai ’ia ho’i fa’ahou tātou i te fare purera’a ?

’A hāpono mai i tā ’oe pāhonora’a ’e te hōho’a nā mua a’e i te 15 nō ’Ātopa 2021.

’A haere i ni’a ftsoy.ChurchofJesusChrist.org, ’e ’a pata « Submit Your Work [Hāpono i tā ’oe ’ohipa] ». ’A fa’a’ohipa i tā ’oe tomora’a a te ’Ēkālesia ’e ’a mā’iti i muri iho « For the Strength of Youth [Nō te Pūai o te Feiā ’Āpī] » i raro a’e « Choose Magazine [Mā’iti i te ve’a] ». ’A pata i ni’a i te « Add File [mau putu’ite] » nō te mā’iti i tā ’oe mau putu’ite ’e te mau hōho’a, ’e i muri iho, ’a tāumi « Submit [Hāpono] » nō te fa’auta uira atu ’e nō te hāpono atu i tā ’oe putu’ite. ’Aore rā ’a fa’atae mai i te hō’ē rata uira i te [e-mail].

E nehenehe te mau pāhonoraʼa e taui-ri’i-hia nō te roa ’aore rā, nō te māramarama.