Katokan te Kangaanga te Nuu
“Ao ngkana ti uniki aroka tabeua?” E titiraki Cristal.
Te karaki ae koaua mai Argentina.
“Ti kona n nakon te marae n uteute?” E titiraki mwanen Ivan, ae Cristal.
E taraa tinaniku Ivan. I tangiria n nako,” e taku. “Ma tao ti riai n tataninga ni karokoa e bung taai. E rangi ni kabuebue!”
Te marae n uteute bon te marae ae bubura n uakaan ma mweengaia. A tatangiria n takakarona te ikakiino ni katikutiku ke te ikaraaba ikekei ma raraona. Ma akea te nuu n te marae n uteute ibukiia ake a na motirawa ni kamanoia iai man te kabuebue. Ao te tiamwa aei, ai bon te kangaanga ae bubura.
E kainabwaabu Cristal n te tai ae uarereke. Imwiina e taku, “Ao ngkana ti uniki aroka tabeua? N te aro anne e na reke nuun te marae. Ngkanne ti a kona n nako n takakaro riki ngkana e kabuebue!”
E matangare Ivan. “I tangira te iango anne!!”
Ivan ao Cristal a tuanga Papá taekan aia iango ni kabane. “N na tuatua nakon te kaawa ibukin te kariaia,” e taku.
Tabeua te wiiki imwiina, a karekea te kariaia are a kainnanoia ao a tauraoi ni waaki! E kaira Ivan ao Cristal Papá nakon te aroka ae bubura are e riki i akuun aia auti. Iaan te aroka, a rikirake iai bwabwati n aroka aika a bwebwerake.
“Ngkana e uee te aroka ae bubura, e kabwakai koraana i aontano,” e kabwarabwara Papá. “Ngkanne a rikirake mai iai aroka aika a uarereke. Kaanga ai aron au kakai aika bingingi man aroka ao bwaai ni katobibira!”
E kaota nakoia aron kenakin te aroka ae uarereke ma te taratara raoi. A karaurau n unikii inanon booran te uee Ivan ao Cristal.
Ngkanne, ni bwakantaain te Kaonobong teuana ngke e raba taai i akuun nang, a katokai aroka aika a uarereke iaon te kaa are e kokokaki Ivan ao Cristal. Ma te karaurau, a kookia nakon te marae n uteute. Tarin ao mwanen Ivan a buoki bwaketi n ran ni uotii. Mamá ao Papá a uoti tiabora tabeua.
Ngaia ni kabane, a rinei tabo ibukin aroka ni katei n tatabeua nako. A kena te bwangabwanga ao a uniki aroka nako ma te tangira. E kaota arona nakoia Mamá ni kenii mwaruarua ni katobibi aroka n tebokii. “Aroka a kainnanoa otan taai, te ran, ao kanana ae mwaiti bwa e na rikirake ni korakora,” e taku. “N ai aroia ataei!”
E iangoa te aroka Ivan are i akuun te auti ao e iangoia bwa aekakira taraakina inanon tabeua te bong. “Ko kona ni kakoaua?” e taku. “N tabeua te bong ao aroka aikai a na rietata riki nakoira!”
N te tiburing, aroka a na kamimiia te koraki ma ueeia aika tamaroa, n takiakia ni bingke. N te tiamwa, nuuia e na rababanako i nuukan te marae. Ao n tain bwakan baan aroka, baana a na rabuna aontano kaanga te kabete ae babobo.
Ni katoabong,, Ivan ao Cristal a nakon te marae n tuoi aroka. A kakoaua raoi bwa e tau te ran nakoia ni kabane. Ao ni katoatai e bwebwe baana ae boou, a namakina te kakatonga. E a bon boo mwiin aia mwakuri!
E namakina te kukurei Ivan n iangoia aomata ni kabane ake a na kukurei n te nuu iaan te buratiaa n te tai teuana. E a tia n ibuobuoki ni karika te aonaaba bwa te tabo ae tamaroa riki ibukiia natin Tamara are i Karawa.
Kamataata n te tamnei iroun Colleen McKeown