“Nangita og mga Unggoy,” Higala, Marso 2025, 4–5.

Nangita og mga Unggoy

Ni Chelsea Mortensen

“Sama lang kini kon sa unsang paagi ako makadungog sa Espiritu Santo kon ako maminaw.”

Usa ka tinuod nga istorya gikan sa Costa Rica.

Batang lalaki nga nagsul-ob og sunglass nga nagmug-ot samtang ang usa ka babaye ug lalaki sa luyo niya nagpahiyom ug nagtudlo sa usa ka butang sa laing dapit

“Oy!” Miingon si Ethan. “Nakita ba kadto nimo?”

“Oo, tan-awa ang iyang nindot nga gamay nga ikog niana!” miingon si Lily.

Mihangad si Boston, apan nakakita lamang siya og mga anino.

“Nakakita na kita og tulo ka unggoy karon!” Miingon si Ethan.

Apan walay unggoy nga nakit-an si Boston! Ang iyang pamilya nagbisita sa usa ka lasang aron makakita og ihalas nga mga unggoy. Apan ang mga unggoy layo ra kaayo nga makita ni Boston.

Buta si Boston. Makakita lamang siya sa mga butang nga duol kaayo kaniya. Kasagaran, dili niya igsapayan nga buta siya. Makabuhat gihapon siya og daghang nindot nga mga butang. Makabasa siya og Braille gamit ang iyang mga tudlo ug makalakaw gamit sa iyang sungkod diha sa ngitngit. Ug makapangita siya og mga tawo pinaagi sa pagpaminaw sa ilang mga tingog.

Apan usahay, dili ganahan si Boston sa pagkahimong buta. Sama karon.

Milingkod si Boston sa yuta ug nanghupaw. Dili kini makiangayon! naghunahuna siya.

Pipila ka minuto ang milabay siya adunay ideya. Langitnong Amahan, palihog tabangi ang usa ka unggoy nga igo nga moduol kanako aron ako makakita, nag-ampo si Boston sa iyang hunahuna.

Wala pay nakit-an nga mga unggoy si Boston. Dayon nakadungog siya og kabanha sa layo.

Batang lalaki nga nagsul-ob og sunglass nga nagpahiyom samtang gipinasawod niya ang iyang kamot sa iyang dunggan

“Nakadungog mo niana?” Nangutana si Boston. “Nagtuo ko nga usa ka unggoy kadto!”

“Wala koy bisan unsa nga nadunggan,” miingon si Ethan.

“Wala pod ko,” miingon si Papa. “Ikaw adunay maayo nga pandungog!”

Nakadungog si Boston og usa ka unggoy nga midagan latas sa kalibonan duol sa agianan. Mitudlo siya paingon sa tingog. “Didto!”

Dayon nakadungog siya og usa ka unggoy, ug lain pa. Usahay ang iyang pamilya makakita sa mga unggoy sa higayon nga iyang itudlo kini. Apan walay mga unggoy nga igong nakaduol aron makita niya.

Batang lalaki nga nagsul-ob og sunglass nga nag-istorya nga adunay usa ka porma nga nakasulat ang unsay anaa sa hunahuna aron masabtan [speech bubble] nga nagpakita og mga sound wave

Sa wala madugay oras na sa pagpauli.

“Pasaylo wala ka makakita og bisan unsa nga mga unggoy,” miingon si Mama samtang milakaw sila paingon sa sakyanan.

Mikibo si Boston. “OK ra. Gusto kong makakita og usa, apan nakadungog hinuon ko og daghan kanila.” Dayon naghunahuna siya mahitungod sa iyang pag-ampo. “Kini nagpahinumdom kanako sa Espiritu Santo.”

“Unsay buot nimong ipasabot?” Nangutana si Mama.

“Sa dihang mihunong ako aron maminaw, akong naamgohan nga sila naglibot kanako. Makadungog ko nila bisan og dili ko makakita nila. Sama lang kini kon sa unsang paagi ako makadungog sa Espiritu Santo kon ako maminaw.”

“Nindot kaayo kana nga leksiyon,” miingon si Mama.

Nakadungog si Boston og usa ka butang diha sa kalibonan tupad kaniya. Dayon adunay midagan pagawas ngadto sa agianan—sa atubangan gayod niya! Kini adunay pulahon nga buhok ug taas nga ikog. Kini mihunong ug mitan-aw gayod kaniya. Dayon midagan kini balik ngadto sa kakahoyan.

Usa ka unggoy! Nakakita gayod siya og usa sa kataposan!

Mipahiyom si Boston. Ang pagkahimong buta lisod usahay. Apan karon, kini mitabang kaniya nga makat-on mahitungod sa Espiritu Santo. Ug nindot kaayo kana.