“Bwebwenato ippān Will kōn Jipan̄ Rijipo̧kwe Ro,” Jera, M̧aaj 2024, 40–41.
Bwebwenato ippān Will kōn Jipan̄ Rijipo̧kwe Ro
Will ej jān Pennsylvania, USA. Kōm kar kajjitōk ippān jet kajjitōk ko kōn juon būroojāāk ekar kōm̧m̧ane n̄an jipan̄ ro jet.
Kwaļo̧k kajeem make n̄an kōm.
11 aō iiō. Ij kōņaan ikkure soccer im lacrosse, iiōk kukiij ko, aaō, ski, im roller-skate. Ij barāinwōt kōjan̄jan̄ piano im violin. Kōļar eo em̧m̧an tata ippa ej navy būļu, im m̧ōn̄ā eo enno tata ippa ej lep (jikūrām̧bōļ, būrae, lep boil—ij iakwe aolepāer!). N̄e irūttoļo̧k, ikōņaan erom juon taktō āinwōt baba.
Ta eo ekar lewaj am̧ aitia n̄an jipan̄?
Ikar ron̄ bwe elōn̄ baam̧le ko jān laļ ko jet raar ko n̄an pukōt aer ineem̧m̧an. Jet iaer raar em̧m̧akūtok n̄an juon eria epaktok. Ejjab to ikar ļōmņak, “Ekōjkan aō maron̄ jipan̄?”
Ikar ba juon jar n̄an jeļā ekōjkan aō maron̄ jipan̄. Innām m̧am̧a ekar bōk juon email jān Doulul eo an Kōrā ro ilo stake eo. Raar kajjitōk ippān armej n̄an jipan̄ļo̧k (donate) aitōm ko n̄an leļo̧k n̄an baam̧le ko rej jipo̧kwe. Ikar jeļa jar eo aō ekar uwaak
Ekōjkan am̧ kar jipan̄?
Em̧m̧an ippa iiōk (ijeļā tata kōm̧m̧an kukiij) kōn menin ikar jokāālet n̄an wia kake kukiij n̄an bōk jāān n̄an baam̧le kein. Ikar kōm̧m̧ani peba ko im kar iuwe ioon roller skate ko waaō ipeļaakin ijo ij jokwe ie n̄an būkiļok flier ko. Kidu eo nejū, Coco, ekar barāinwōt itok.
Elōn̄ iaan armej ro rūturū raar m̧ōņōņō in wiaik kukiij ko aō. Kōn jāān ko ikar būki, ikar wia ainbat ko im paan ko n̄an jipan̄ļo̧k.
Ekōjkan am̧ kar en̄jake?
Ekar em̧m̧an aō en̄jake ilo aō jeļā bwe baam̧le kein renaaj maron̄ in kōmat ilo kōjerbal ainbat ko im paan ko. Imaron̄ pijaikļo̧k ewi kaenōm̧m̧an an juon m̧ōn̄ā kōmate m̧weo enaaj kar nemake n̄e kwoj pād ilo juon laļ kāāl.
Ikar katak ilo Būraimere bwe ‟bwe elan̄n̄e kom̧ij jerbal n̄an armej ro ami kom̧ij jerbal wōt n̄an ami Anij” (Mosaia 2:17). Ikar en̄jake iakwe eo an Jemedwōj Ilan̄ n̄an n̄a im n̄an armej ro rej em̧m̧akūtok n̄an eria eo aō.
Ta kapilōk eo kwoj maron̄ leļo̧k n̄an juon eo me ej kōņaan jipan̄?
Kappukōt wāween ko n̄an jerbal ilo ward eo im stake eo am̧. Kwomaron̄ barāinwōt jipan̄ juon jikin kōttār (shelter) ilo eria eo am̧. Elōn̄ wāween ko n̄an jipan̄ aolepān laļ in!
Kōmeļeļe ko jān Dave Williams