“Juon Ijtō n̄an Keememej,” Jera, M̧aaj 2024, 14–15.
Juon Ijtō n̄an Keememej
Jonas ekar en̄jake iakwe eo an Jisōs ilo an kar al.
Bwebwenato in ekar bōk jikin ilo Finland.
Jonas ekar ettōn̄ ke ekar iaikwōj ippān ļōm̧aro jein n̄an etōņaak eo n̄an nokon in jota. E ekar maron̄ in wōt āt bwin ļaam̧ eo ekaijoļjoļ kar uum̧ni jān kōjota in Ijtō eo. Im ekar maron̄ in wōt nemak tōn̄al in pasha eo, kōm̧ao laļ eo aer an Ijtō iminene kake.
Ālkin an baam̧le eo kar jijet ilo ikōn̄, ļeo jein Jonas Tristan ekar jutak.
“M̧ōņōņō ilo Ijtō!” Tristan ekar ba. E ekar jino noko in jota an baam̧le eo aer kōn juon al im jar. Innām ekar iien n̄an būrookraam̧ in al eo aer ejenolo̧k. Aolep raar kōpooj juon al kōn Jisōs Kraist n̄an kwaļo̧k.
Tristan ekar kūta, kōjan̄ kajjojo to ko ilo kōkōm̧anm̧ōn. Innām ļeo jein Einar ekar piano. Addi in pein raar em̧akūtkūt ilo aolep kii ko. Jinen, Jemen, im ļōm̧aro jet jein Jonas raar barāinwōt kōjan̄ al ko. Jonas em̧m̧an ippān ron̄jake al ko an baam̧le eo an.
Āliktata ekar iien eo an Jonas. Ekar bōk kūtuwōn im kar jino al.
“Ilo iien ko ikar tōn po n̄an kōm̧m̧ane juon kāālet ebōd, bōtaab ikar kajjieon̄ ron̄jake ilo an ainikien eo edik unoojdikdik, ‘Iakwe doon āinwōt Jisōs ej iakwe eok’”*
Ilo an kar Jonas al, būruwōn ekar obrak kōn iakwe. Māj ko mejān raar obrak kōn dān in kōmejaļal in m̧ōņōņō. Kar en̄jake āinwōt Jetōb Kwojarjar eo ekar jiron̄ Jonas bwe Jemedwōj Ilan̄ im Jisōs raar iakwe e.
“Kom̧ em̧ool aolep kōn ami kwaļo̧k tōļan ko ami,” Baba ekar ba. Ekar kotak lōn̄ļo̧k juon pija. Ekar kwaļo̧k an Jisōs Kraist bukwelōlō im jar turin juon wōjke. “Wōn eo ejeļā ta eo waļo̧k ilo pija in?”
Jonas ekar kajutak pein. “En̄iin Jisōs ej jar ilo Gethsemane.”
Baba eaar em̧ajidjid. “Aaet. Ej ijo E ekar en̄jake aolep metak im būrom̧ōj ko ad.”
“E ekar etal n̄an Jikin Kallib Gethsemane m̧okta jān An kar mej,” M̧am̧a ekar ba. “Ālkin An kar mej, E ekar bar mour. Menin ej m̧ōttan Pinmuur eo An. Jisōs ekar kōm̧m̧an aolepān menin kōnke E ej iakwe kōj.”
M̧am̧a ekar kōjo̧ juon pija in alooj kōn Ijtō eo im̧aan tata. Ke pija in alooj eo ekar jem̧ļo̧k, aolep raar ikōn̄ ium̧win juon minit. Jonas ekar en̄jake bar juon alen iakwe eo an Jemedwōj Ilan̄ im Jisōs Kraist.
“Kiiō ej iien n̄an m̧akūtkūt eo ad?” Jonas ekar kajjitōk.
M̧am̧a ekar jutak jān kauj eo im kar etal n̄an kāpnet eo. “Aaet! “Jonas, kwonaaj ke jipan̄ eō?”
Jonas im M̧am̧a raar kwaļo̧ktok kūļu, jijej ko, im juon kōro̧ro in māākjin ko an Kabun̄ in. Raar kōjepelōklōk er ioon būļoor eo. Innām M̧am̧a ekar leļo̧k n̄an aolep jōnōl in Ijtō ko aer raorōk. “Jen kōm̧m̧ane pijan in Jisōs Kraist ilo jōnōļ in Ijtō ko ad.”
Jonas ekar jijet laļ im kar kōpeļļo̧k bok in jeje eo an.
Baba ekar kotak juon pen n̄an jeje ilo jōnōļ eo an. “Iturin pija ko ami, kom̧ maron̄ je ta eo kwonaaj kōm̧m̧ane n̄an ļoor Jemedwōj Ilan̄ im Jisōs bwe kwon maron̄ eromļo̧k āinwōt Er.”
Jonas ekar elōkļo̧k peij ko an juon iaan māākjin ko. Ekar lo juon pija in an Jisōs Kraist ettōn̄.
Jonas ekar m̧wijitiļo̧k pija eo im kar kūļuki ilo ioļapļap in peij in jōnōļ eo an. Ekar ļōmņak kōn aolepān iakwe eo ekar en̄jake jān Rilo̧mo̧o̧r eo raan eo. Innām ekar je, “Inaaj ļoor Jemedwōj Ilan̄ im Jisōs kōn ron̄jake Baba im M̧am̧a im jipan̄ kōn jerbal ko. Inaaj kōļapļo̧k aō iakwe ļōm̧aro jeiū.” Ekar kotak lōn̄ļo̧k n̄an kwaļo̧k n̄an M̧am̧a. Liin ekar riiti ta eo ekar je im ettōn̄ dikdik.
Jonas enaaj keememej Ijtō in ium̧win juon tōre aitok. Ekar en̄jake iakwe eo an Jisōs Kraist ke ekar al im kar katak kōn E. Im ekar en̄jake iakwe eo an Jisōs ke ekar kajjieon̄ in erom āinwōt E.
Jemedwōj Ilan̄ im Jisōs Kraist raar lukkuun in iakwe Jonas. Im Jonas ekar iakwe Er barāinwōt.
Kōmeļeļe ko jān Steliyana Doneva