Vakarau tu ki na Valetabu
Na italanoa oqo a yaco e Jamaica.
“Meu na taura vakacava e dua na ivolatara?” A taroga o Ajan.
E kaya o Moronai, “Dou kitaka na ka kecega ena yalodina” (Momani 9:29).
A matadredredre vakalevu o Ajan ni rogoca e dua na tukituki e katuba. Madda (O Na) sa sureta na nodratou dauveiqaravi turaga me veivuke ena dua na lotu vakamatavuvale digitaki.
A dolava o koya na katuba. “Wah gwaan, Brother Williams!” (“Na cava e yaco?”)
“Na veika kece e donu!” A kaya o Brother Williams. (“Sa donu na ka kecega!”) A solia vei Ajan e dua na taga maqo mai na nona vunimaqo.
A dabe sobu ena idabedabe o Brother Williams. A kerea o Madda na ganei Ajan lailai, o Dana, me cavuta e dua na masu.
Ni sa oti, a kaya o Brother Williams, “Ena yabaki oqo, sa na yabaki 12 tiko kina o Ajan. E dua beka e kila na vuna e dua kina na yabaki talei vua?”
Na taci Ajan lailai, o Tejaun, a yavavala ena marau. “Baleta ni rawa ni taura na matabete ka veivotayaka na sakaramede!”
“Donu vinaka!’ A kaya o Brother Williams. “Ia e dua tale na vuna.”
A dolava na nona bausi ka dreta mai e dua na tiki ni pepa lailai. “Oqo e dua na ivolatara ni valetabu.”
A solia yani vei Ajan.
“Totoka!” A yagoya o Ajan ena iqaqalo ni ligana na valetabu koula ena kadi. “Na cava o na cakava kina?”
“Au na vakaraitaka vei koya e dabe tiko ena desi e liu ena valetabu. E vakaraitaka vei ira ni sa kilikili meu curu ki loma.”
“Au via raica!” A suguta o Dana mai vei Ajan ka vakaraica sara vakavoleka.
“Na cava o nanuma ni o na vakila kevaka e tiko e dua nomu ivolatara?” A taroga o Brother Williams.
“Au na vakila e dua na ka talei!” A rai cake mai na kadi o Ajan. “Ia au sega ni kila keu rawa ni lako ki na valetabu. E sau levu me voli e dua na tikite ni waqavuka meu lako kina.”
“Au sega ni rawa ni lako vakawasoma ki na valetabu,” a kaya o Brother Williams. “Ia na noqu ivolatara e vakananuma vei au meu dau tu vakarau tu ga meu curu ki loma.”
A vakasama vakalailai o Ajan. “Au vinakata meu vakarau talega,” e kaya o koya. “Meu na taura vakacava e dua na ivolatara?”
“Mo drau na sota mada kei bisopi,” a kaya o Brother Williams. “Ena tarogi iko o Koya ena so na taro me rawa ni kila kevaka o sa vakarau tu.”
“Sa vaka beka e dua na veitarogi?” A taroga o Ajan, e vaka me taqaya vakalailai.
“E vaka e dua na veivosaki,” e kaya o Brother Williams. “Na bisopi e nomu itokani, ka vinakata o koya me vukei iko mo vakarau tu.”
A deguvacu o Ajan. E taleitaki bisopi o koya.
“O vinakata beka mo raica na taro?” A solia o Brother Williams vei Ajan e dua na tiki ni pepa ka tiko kina eso na taro. Rau a veidrigidrigi yani o Dana kei Tejaun me rau raica talega.
“Naba dua,” a wilika o Ajan. “‘Ko vakabauta ka vakadinadinataka na Kalou, na Tamada Tawamudu; kei na Luvena, o Jisu Karisito; kei na Yalo Tabu?’”
A ramase sara o koya. Sa rawarawa dina o ya. “Io!
A wilika tikoga na veitaro, yadudua. Erau vakamacalataka o Madda kei Brother Williams na ibalebale ni vica na ka.
A qai wilika o Ajan e dua tale na taro: “‘O kila vinaka tiko beka ka muria na Vosa ni Vuku?’” A vakaveveku mata. “Ena dua na gauna a solia kina vei au o D‘andre eso na ramu vakawainimoli mai nona vale,” e kaya o koya. “Ia au sega vakadua ni via gunuva tale. Au sa na sega beka kina ni rawata e dua na noqu ivolatara ni valetabu?”
“Na muri ni Vosa ni Vuku e kena ibalebale me da kakua ni gunu alakaolo, na ramu vakawainimoli e tiko kina na alakaolo,” e kaya o Brother Williams. “Ia se rawa tikoga ni o veivutuni ka kilikili mo lako ki na valetabu.”
“Ena vukui Jisu!” a kaya o Tejaun.
“Donu vinaka!” A kaya o Brother Williams. “Sa na qai rawa ni vakananuma vei iko na nomu ivolatara ni valetabu mo talairawarawa tikoga ki na Vosa ni Vuku. Ka dau tuvakarau e veigauna mo lako ki na valetabu.”
A vakasukadredre o Ajan. A vakila ni daumaka cake sara.
“Ena rawa beka niu gole ki valetabu ena dua na gauna totolo,” a kaya o Ajan. “Ia ni sa yaco mai, au sa na vakarau tu!”
Droinitaka o Shawna J. C. Tenney