O Se Sooga Mau
O Se Afiafi ma Elder David A. Bednar
Faigalotu i le Lalolagi Atoa mo Talavou Matutua • 10 Setema 10, 2017 • Nofoaga Autu a le Siteki o Apex North Carolina
O Le Filifili o Augatupulaga
O la’u savali e pogai mai i se aafiaga na ma maua ma Susan ia Setema o le 1999. Sa malaga mai Peresitene Gordon B. Hinckley i le Kolisi o Ricks, lea ua avea nei ma BYU-Idaho, e faapaia le Maota fou faato’a maea o Spencer W. Kimball. Sa faamamaluina i ma’ua ma Susan e talimalo i le Peresitene ma Sister Hinckley i se aso faaleagaga ofoofogia ma le mafaagaloina.
A o i ai o ia i le lotoa, sa saunoa ai Peresitene Hinckley i se faigalotu i tamaitiaoga, aufaigaluega, ma faiaoga. Sa ou nofo i luga o le tulaga e le mamao mai le Peresitene o le Ekalesia toefuataiina a le Alii a o ia tilivaina lana savali. E oo lava i le asō, i lenei lava taimi a o ou tilotilo atu i o outou foliga ma tautala atu ia te outou, ua ou manatua ai ma le manino le tu ai o Peresitene Hinckley i le pulelaa i le Faletele o Hart. Ou te manatua mataupu faavae na ia aoaoina, o lona siufofoga ma foliga vaaia o ona fofoga, ma mea sa ou aoaoina e ala i le mana o le Agaga Paia a o ou faalogo atu ia te ia o saunoa.
Ou te valaaulia outou ia auai nei loa i se vaega o lena faigalotu.
“O le Aso Toonai ma le Aso Sa ua tuanai sa matou i ai i Columbus, Ohaio, sa faapaiaina se malumalu fou ma le matagofie. O le malumalu ma le falesa na lata ane sa faatumulia mo sauniga uma e ono. Sa i ai le Agaga o le Alii iina, ma o se sauniga maoae ma le taua le faapaiaina o le malumalu lona lua i le talafaasolopito o le Ekalesia i le setete maoae o Ohaio.
“Sa matou faatasi ai ma lo’u toalua ma lo’u afafine, sa i ai iina e fesoasoani i lona tina. I lo matou fiafia, o se afafine o se tasi o le ma fanau ma lana fanau e toalua, fanau o le fanau o le ma fanau, sa malaga atu mai St. Louis, i le mea o latou nonofo ai. …
“A o ou nofo ai i totonu o le malumalu o Columbus, Ohaio, i le tasi aso, ma tilotilo atu i a’u fanau a fanau a la’u fanau, na tupu se mea tulagaese ia te au. Sa faafuasei ona ou iloaina o loo ou tu i le ogatotonu faatasi ma tupulaga e tolu lea ou te masani ai i o’u tua atu ma tupulaga e tolu i o’u luma atu. Sa liliu moni atu lava lo’u loto i o’u augatama. Sa liliu atu foi lo’u loto i a’u fanau. Sa ou vaai faalemafaufau i se filifili o augatupulaga; o lena filifili e tau atu i tua i se mamao tele i le tuanai lea e itiiti lava sina mea tatou te iloaina. Ua aapa atu nei mo le tolu tupulaga i luma atu o au. Sa ou vaai i lena filifili i mata o lo’u mafaufau, e oo mai i lenei aso e le mamotusiaina, ma susulu ma malosi. …
“Ua ou mafaufau nei, a o ou saofai ai i le malumalu, o a’u o le sooga, ua sosooina ai augatupulaga uma o le tuanai ma augatupulaga uma o le lumanai. O mea uma ua ia te a’u o le mafaufau ma le tino, o musele ma ponaivi ma sooga o ivi ma le faiai, ua oo mai o se tofi mai ia i latou na muamua atu ia te a’u. Ma o a’u fanau uma latou te pasiaina a’u ina ia tau atu ai ia i latou. E le tatau ona ou motusiaina lena filifili. E le tatau foi i a’u fanau ona motusiaina lena filifili. …
“Ou te momoo maimau pe ana ou maua le tomai o le gagana e faaleo atu ai ia te outou le autalavou iinei i le aso ia lagona sa ou maua i totonu o le malumalu, le manao sili lofituina lea e le tatau ia te a’u po o a’u fanau ona motusiaina le filifili o augatupulaga o lo matou aiga.
“Ou te fai atu ia te outou ma lo’u malosi atoa lea ou te malosi ai, aua ne’i avea outou ma se sootaga vaivai i la outou filifili o augatupulaga. Ua outou o mai i lenei lalolagi ma se tofi ofoofogia. Ua outou o mai mai ni alii ma ni tamaitai maoae, o alii lotototoa ma lototetele, o tamaitai na ausiaina mea ma e i ai le faatuatua tele. Aua ne’i outou faalumaina i latou. Aua lava ne’i faia se mea e faavaivaia ai le filifili lea ua avea ai oe ma se vaega taua tele.”1
Sa manino lava i lo’u mafaufau le ata o se filifili o augatupulaga. O le lapataiga ia le avea ma se sooga vaivai i le filifili o augatupulaga sa mamana lea i lo’u loto. O le apoapoaiga ia le faia lava soo se mea o le a faavaivaia ai le filifili o augatupulaga na tuia ai lo’u agaga. Mo ma’ua ma Susan, o lesona faigofie ma mamana na ma aoaoina i lena aoauli o Setema na uunaia ai mo le lelei le ma faaipoipoga, lo ma aiga, ma vaega uma o o matou olaga.
O Le Aiga o Call
I le avea ai ma se teineitiiti na ola ae i lona nuu o Afton, Wyoming, sa iloa e Susan ma faamemelo i se aiga i lana uarota na avea ma se faataitaiga ofoofogia o le filifili o augatupulaga.
Saunoaga a Sister Susan K. Bednar
O le i ai i se uarota lea na ou ola ae ai sa i ai se aiga maoae sa i ai se fanau e 14. Sa faaipoipo le tina ma le tama, o Bessie ma Evan Call i le malumalu ma tumau faamaoni i a la feagaiga. Sa la aoao atu i le la fanau le aoaoga faavae o le talalelei toefuataiina ma sa faamanuiaina e tausi ae se aiga amiotonu.
I ni tausaga na mavae atu, sa ou feiloai ai i se tamaitai talavou lalelei i se sauniga famanatuga sa ou auai. Ina ua ia faailoa maia o ia ia te a’u, sa ia ta’ua sa ou iloaina lona tina. O lona tina o le afafine o Brother ma Sister Call ma o se uo pele lava mai lo’u talavou. O le tamaitai talavou lea na ou feiloai i ai i le sauniga faamanatuga o le afafine o se tasi o le fanau a le au Call. Ina ua ou fesili, sa ou iloa ai o ia le numera 44 o le 96 o fanau a fanau, ma o lana pepe fou o le lona 230 o fanau a fanau a fanau a Bessie ma Evan Call. O nei fuainumera na ou maofa ai. Oka se fanau ina a toatele!
Talu mai lena taimi, sa tele taimi na ou mafaufau ai: Ae faapefea pe ana le faaipoipo Brother ma Sister Call i le malumalu pe tausia foi a la feagaiga? Ae faapefea pe ana faapea la te lei tumau faamaoni i le “faatuatua tele” o augatupulaga na muamua atu? Ae faapefea pe a na la le aoaoina le la fanau i le talalelei e ala i faataitaiga ma mataupu? Ae faapefea pe ana avea i laua ma se sooga vaivai i le filifili o a la augatupulaga? Mata e fia ni tagata semanu e aafia i lenei mea? Ua manino lava le tali. O faaiuga na faia e lenei ulugalii ua aafia ai le silia ma le 300 tagata o le aiga—ma o loo faaauau pea ona faatupulaia le numera a o faafeiloai pea le oo mai o isi fanau a fanau a fanau a fanau i lenei aiga.
A faatusatusa la lenei mea i se aafiaga e ese ai na ou maua ma se uo lelei e le auai i le ekalesia sa ou iloaina mo se taimi umi. Mafaufau i lo’u te’i ina ua ia ta’ua faasamasamanoa i se tasi aso e faapea e i ai sona tinamatua Mamona. Sa ou toe tomanatu i tua ona sa leai ma se mea na ia iloaina ma sa le’i naunau foi e fia iloa aoaoga faavae ma mataupu faavae o le talalelei. E ui ou te le iloa le tali, ae e tele lava ina ou tuufesili, “O fea tonu na motusia ai le filifili i lana augatupulaga?” O le faaiuga mautinoa lava e faapea, sa le’i fiafia lava la’u uo i faamanuiaga o le talalelei a Iesu Keriso i lona olaga ona o faaiuga sa faia e i latou na muamua atu ia te ia.
I le avea ai ma se sootaga i le filifili o au augatupulaga, e tatau ona e iloaina o faaiuga e te faia i le taimi nei ma le lumanai e le na o oe e faatatau i ai. O au faaiuga e aafia ai uma i latou ua muamua atu ma i latou o le a mulimuli mai ia te oe. O le faataitaiga ma le faatosinaga o lou usiusitai i mataupu faavae o le talalelei, o le mana o lou amiotonu faaletagata lava ia, ma taunuuga o faaiuga e te faia mo le lelei po o le leaga o le a oo atu i augatuplaga. Faamolemole ia avea ma se sootaga malosi i le filifili o lou augatupulaga.
E i ai sa’u molimau o le talalelei toefuataiina a Iesu Keriso. Ou te molimau atu o le faaipoipoga i le va o se alii ma se tamaitai ua faauuina e le Atua, ma o le aiga e totonugalemu i le taunuuga e faavavau o le fanau a le Atua.
Ou te molimau atu ona o Lana taulaga togiola, ua togiola ai e Iesu Keriso i tatou mai i a tatou agasala ma filifiliga le lelei ma ua tatou maua ai foi le malosi e sili atu i lo tatou lava malosi e tumau faamaoni ai i le talalelei ma feagaiga ua tatou osia, aemaise lava pe a tatou oo i aafiaga faigata o le olaga.
Ou te iloa e aumaia e le Agaga Paia uunaiga faaleagaga i o tatou mafaufau ma loto ma o le a fesoasoani ia i tatou i le mauaina ma le faatinoina o auala e avea ai ma se sootaga faamaoni i le filifili o o tatou augatupulaga. I le suafa o Iesu Keriso, amene.
Faaiuga o le saunoaga a Sister Susan K. Bednar
O Se Sooga Mau
Ou te faamoemoe nei e atiae i luga o aoaoga a Peresitene Hinckley e uiga i la tatou “filifili o augatupulaga.” Sa ia faamatalaina ma le manino ma le mamafa mea e le tatau ona tatou faia, lea e avea ai ma se sooga vaivai i le filifili o augatupulga. Ou te fia taulai atu i mea e tatau ona tatou faia, lea e avea ai ma se sooga mau i le filifili o augatupulaga.
I le Mataupu Faavae ma Feagaiga vaega 128 ua tatou aoao ai “o le a taia le lalolagi i se fetuu vagana ua i ai se ituaiga o sooga mau po o se isi mea i le va o tamā ma fanau, i luga o se mataupu po o se isi mea—ma faauta o le a lena mataupu? O le papatisoga lea mo e ua oti. Ona o i tatou e aunoa ma i latou e lē mafai ona faaatoatoaina; pe mafai foi ona faaatoatoaina i latou e aunoa ma i tatou. Pe mafai foi ona faaatoatoaina i latou po o i tatou e aunoa ma i latou o e na maliliu i le talalelei; aua e tatau i le aumai o le tisipenisione o le atoatoaga o taimi, le tisipenisione lea ua amata nei ona aumai, ona faia o se tuufaatasiga atoa ma oʼooʼo ma atoatoa, ma se sooga mau faatasi o tisipenisione, ma ki, ma mana, ma mamalu, ma faaali mai e amata mai i aso o Atamu e oo mai lava i le taimi nei.”2
Ou te valaaulia outou ia mafaufau i ni fesili autu se lua ua oso ae mai lenei mau.
Fesili muamua: O le a le sooga mau? Sa aoao mai Peresitene Iosefa F. Samita, “E ao lava ona i ai se sooga mau faatasi ma se tuufaatasiga o matua ma fanau ma fanau ma matua seia oo ina sosoo mau faatasi uma le filifili atoa o le aiga o le Atua i le filifili e tasi, ma avea uma ai i latou ma le aiga o le Atua ma Lona Keriso.”3
O le toefuataiga o le pule ma ki o le perisitua i lenei tisipenisione mulimuli ua mafai ai mo i tatou taitoatasi ona maua, manatua, ma faamamaluina sauniga uma o le faaolataga mo le tagata lava ia ma le faaeaga o le aiga. O le mea moni ua oo mai Elia e pei ona sa folafolaina e faaee mai ki o le perisitua ma le pule faamau lea e liliu ai loto ma faamalosia ai sooga mau i augatupulaga. Ua toe i ai i le lalolagi i nei aso e gata ai ia auauna faatagaina o e mafai ona tuuina atu le faamanuiaga paia na tuuina mai e le Faaola, “o soo se mea e te faamaufaailogaina i le lalolagi o le a faamaufaailogaina i le lagi; ma o soo se mea e te faamauina i le lalolagi, i lo’u igoa ma i la’u upu, ua fetalai mai ai le Alii, o le a faamauina e faavavau i le lagi.”4
O lea, “o sauniga sui o loo tatou faataunuuina i totonu o malumalu, e amataina i le papatisoga, ua mafai ai se [sooga mau e faavavau] i le va o augatupulaga e faataunuuina ai le faamoemoega o le foafoaga o le lalolagi.”5
Fesili lona lua: E faapefea e le sooga mau ona malupuipuia le lalolagi mai le fetuuina i se fetuu? Sa tautino mai Peresitene Iosefa Filitia Samita, “E le o se fesili e na o le papatisoga mo e ua maliliu e faatatau i ai, ae faapena foi i le faamauina o matua ma fanau i matua, ina ia tatau ai ona i ai se ‘faatasiga atoa ma le atoatoa, ma le sosooina mau faatasi o tisipenisione, ma ki ma mana ma mamalu,’ mai le amataga e oo atu i le iuga o taimi. Afai o mana faamau [ia na toefuatai mai e Elia] sa le i i ai i luga i le laolagi, o lona uiga o le a salalau le fenumiai ma o le a suia e le gaogaosa le faatulagaga tonu i lena aso o le a oo mai ai le Alii, ma, e moni, e le mafai ona oo i lenei mea, aua o mea uma ua puleaina ma faatonutonuina e le tulafono atoatoa i le malo o le Atua.”6
“Aisea o le a fetuuina ai le lalolagi? “E faigofie lava aua afai e leai se sooga mau i le va o tama ma le fanau—lea o le galuega mo e ua maliliu—ia o lona uiga o le a teenaina i tatou uma; o le a toilalo le galuega atoa a le Atua ma matuai maumau lava. … O le toefuataiga o lenei pule [faamau] o le mea faafefete lea [po o le faatosinaga amiotonu] ua laveaiina ai le lalolagi mai le faama’umauina atoa i le oo mai o Iesu Keriso.”7
Ua fesoasoani nei upumoni faavae o le talalelei tatou te malamalama ai i le mafuaaga, “o le faaipoipoga i le va o se alii ma se tamaitai ua faauuina e le Atua ma o le aiga e totonugalemu i le fuafuaga a le Foafoa mo le taunuuga e faavavau o Ana fanau.”8
Ae o nisi o outou ua oo i ni faanoanoaga matuitui o sootaga sauaina po o mafutaga malepelepe faaleaiga. Ma o se taunuuga, atonu e itiiti pe leai foi sou manao ina ia fesootai ma tagata na faamatua’iaina lena lototiga po o mafatiaga.
Faamolemole faalogo: o sootaga e faavavau faaleaiga e na o le pule o le perisitua ma le amiotonu faaletagata lava ia e sosoo mau ai faatasi. Po o a lava ni mea leaga e ono tutupu i lou aiga, ou te molimau atu ma folafola atu o le Alii o Iesu Keriso o le puna o le faamaloloina, faafouina, ma le toefuataiina o loo e manaomia.
Atonu e te tagi i le po atoa o ou faigata, ae e mafai ona oo mai le olioli i le taeao o lou ola fou na mafai ona o lo tatou Togiola ma le Faaola.9
Ona ā lea?
I taimi o talanoaga o mataupu taua i le Korama a Aposetolo e Toasefululua, e masani lava ona fesili Peresitene Boyd K. Packer, “Ona ā lea?” Sa ou malamalama i le uiga o lana fesili, “O le a la le taua o le eseesega faaleagaga o le a faia e lenei manatu, fautuaga, po o ala o faatinoga i olaga o tagata o le Ekalesia? Pe o le a faamanuiaina moni ai lava i latou o tatou auauna atu i ai?” I le ute, sa ia valaauliaina i matou ia iloilo le taua ma faatinoga faifai pea e uiga i le mataupu sa matou fefautuaai ai. Ua ou iloaina o le fesili “ona a lea?” o se fesili sili ona aoga i le taulai atu o o’u mafaufauga e uiga i se faafitauli ma i le faailoaina o mea e sili ona taua.
O lea la, atonu e te fesili, “Brother Bednar, o le a la le “ona a lea?’ o lau savali ia i matou?” Ou te talitonu o le tali o lena fesili e mafai ona maua i fesili e tolu atonu o loo fesili ai nisi o outou ia te outou lava i le taimi nei.
O loo auai i lenei faigalotu le toatele o tamaitai ma alii talavou o le uluai tupulaga ua avea ma tagata o Le Ekalesia a Iesu Keriso o le Au Paia o Aso e Gata Ai. Ua e faafofoga ma taliaina le savali o le talalelei toefuataiina a Iesu Keriso, ua papatisoina ma faamauina e ala i le pule tatau ai o le perisitua, ma o le taimi nei, o loo fetaomi atu i luma ma le mausali ia Keriso. Pe o oe o se tagata fou faatoa liliu mai pe ua leva foi ona liliu mai, o oe o le toto ola o le Ekalesia ma le faaolataga o ou aiga i le taimi nei ma le lumanai. O oe o o le uluai sooga i le filifili o ou augatupulaga.
Ae atonu e te fesili ifo ia te oe lava ia, “Ona na o a’u le tagata o le Ekalesia i lo’u aiga ma ona o loo feagai ma se feteenaiga malosi mai o’u matua ma tei, e mafai faapefea ona ou avea ma se sooga mau malosi?”
A o e faitauina ma faalogo i tala e uiga i paionia anamua o lenei tisipenisione o e na mafatia i sauaga, sa onosaia faigata faaletino, ma savavali i laufanua valevalenoa ina ia nofoia le Vanu o Sate Leki, atonu e te tomanatu pe mata e mafai ona e faia le mea na latou faia. Ae o le toatele o outou o loo faia mea na latou faia! O le natura tonu ma ituaiga o luitau o loo tou feagai ai i aso nei atonu e ese mai na paionia, ae o feteenaiga e faasaga i le upumoni toefuataiina e tutusa lava ma aso nei ma o loo matua faatupulaia atili lava.
Ia Aperila o le 1986, na maliu ai le matai sa’o o se ituaiga i Kana tutotonu. Sa fesoasoani ai i tapenaga mo le maliu le uso fai o le matai, Fred Antwi, o le na papatisoina i le tausaga e tasi na muamua atu ma faamauina o se tagata o Le Ekalesia e Iesu Keriso o le Au Paia o Aso e Gata Ai. Sa le’i iloaina e Fred, sa faia ni fuafuaga e le tuafafine laitiiti o le matai, le tina masiofo, mo ia ina ia avea ma matai sa’o o le ituaiga.
I le afiafi a o lumanai ai le falelauasiga, sa talanoa faalilolilo atu ai se tasi o le aiga ia Fred ma fesili i ai, “O e iloaina fuafuaga a le aiga mo oe?” Sa tali atu Fred, “Leai, sei vagana ua ta’u mai ia te au.” Ona fai atu lea o le tagata o le aiga, “O le a avea oe ma matai sa’o fou.” Sa faate’ia Fred ma fai atu ma le malosi, “Leai! O le a le faatagaina a’u e la’u tapuaiga ona faia lenei mea.”
O le auauna atu o se matai sa’o o se faamamaluga. O le matai sa’o o le pule aoao lea i lona nuu, ma a saunoa o ia, o le a faia e tagata mea e faatonuina ai i latou. E maua e le matai sa’o le lagolago tautupe, ma po o a lava mea na te lagonaina na te manaomiaina o le a tuuina atu ia te ia. Sa auauna atu Fred o se peresitene o se paranesi i le taimi na ia iloa ai e uiga i le avanoa e avea ai o ia ma se matai sa’o. Ma sa faigofie lava lona le loto e auai i sauniga faaleituaiga ia e feteenai ma mataupu faavae o le talalelei a le Faaola.
Ou te fia ta’ua nei le tali a Fred lava ia i le faasilasilaga faate’ia a lona tuafafine. “I lena lava afiafi, sa ou alu atu ai i la’u taavale e asi se tasi o toeaina o lo matou ituaiga i se nuu lata ane. Sa ou fia talanoa ia te ia e uiga i le talafou na faasoa mai ia te au. Sa ia faamalamalama mai, ‘Ua ou iloaina le fuafuaga, ma e leai se mea e mafai ona ou faia e fesoasoani ai ia te oe e aloese ai mai le avea ma matai sa’o.’”
Ona fai atu lea o Fred, “Ua e silafia o a’u o se Kerisiano, ma o le a le faatagaina e la’u tapuaiga a’u e avea ma se matai sa’o ona e tele mea e tatau ona faia e se matai sa’o o le a ou le faia.” Sa tali atu le toeaina o le ituaiga, “Ia toefoi atu nei la i ou taitai ma ta’u atu ia i latou o oe o se Kerisiano ma e le mafai ona avea oe ma matai sa’o.” Ona tali mai lea o Fred, “Sa ou alu atu e faailoa i taitai, ae sa latou le amanaiaina la’u savali.”
Sa faaauau le tala a Fred, “Sa tatau ona falelauasi lo’u uso fai (sa avea muamua ma matai sa’o) i le vaeluapo, o lea sa ave atu ai la’u taavale i tua o isi tagata uma o le aiga sa o atu i a latou lava taavale. I le taunuu atu ai i se taula’igaala i le auala e agai atu ai i le falelauasiga, nai lo le afe i le agavale faatasi ma isi, sa ou afe i le taumatau e agai atu i se auala e tau atu i Cape Coast ma masau ese atu ai.”
Mo le isi ono masina, sa lei toe fesootai ai Fred ma le aiga lautele. Mulimuli ane sa ia iloa ana faapea na alu i le falelauasiga, semanu e faanofo ai o ia o le matai sa’o e sosoo ai, ma tuu ai o ia i se tulaga faigata tele. Sa ia iloa mulimuli ane o le atalii o lona tuafafine, le masiofo tina, sa faanofo o le matai sa’o fou.
Ina ua faia e Fred lena afega taumatau ma agai atu i Cape Coast, sa ia faamalosia ai le uluai sooga i le filifili o ona augatupulaga. I le mausali ai i lana molimau e uiga i aoaoga faavae ma mataupu faavae o le talalelei toefuataiina, sa suia ai le ala o Fred i le olaga i ni auala faavavega. O i laua ma Sister Antwi o uluai faifeautalai faamisiona ia mai Aferika i Sisifo na tofia e auauna atu i le Malumalu o Kana. O le taimi nei, o loo auauna atu Fred ma lona faletua o se fesoasoani i le au peresitene o le Malumalu o Accra Kana ma o se fesoasoani i le faatina.
I le avea ai ma se tagata fou liliu mai i le Ekalesia toefuataiina a le Faaola, sa faamanuiaina ma faamalosia Fred e faatoilalo le ituagai malosi mai lona aiga, uo, ma paaga. Ma ua aoaoina ma le filiga e Brother ma Sister Antwi le la fanau i le talalelei a Iesu Keriso ma faavaeina ni mamanu o le amiotonu i lo la aiga lea e oo atu i le tele o augatupulaga. E pei lava ona amataina ia Fred ma lona faletua, e faapena foi ona amata ia te oe!
Ia te outou o le uluai tupulaga ua avea ma tagata o le Ekalesia: e amata ia te outou! O outou o paionia mo vaega uma e lua o ou tuaa ma au fanau. O tagata o aiga ua maliliu na muamua atu i le filifili o au augatupulaga o loo tatalo mai mo lau fesoasoani, ma i latou o le a mulimuli mai ia te oe o loo faalagolago mai i lou faatuatua. E moni lava o loo ia te outou le mana e avea ai ma sooga mau malolosi. Manatua, e amata ia te oe. Ma e faatasi ai ma le fesoasoaniga a le Alii, e mafai ai ona e faia.
Atonu e fesili nisi o outou ia te outou lava, “E mafai faapefea ona ou faamoemoe e fatua’i se aiga e faavavau ae e le’i avea lava a’u ma se tagata o se aiga malosi o le Au Paia o Aso e Gata Ai?” Atonu e fesoasoani ni nai matauga mai o’u lava aafiaga ia te oe.
E fai si eseese o a’u “filifili o augatupulaga” patino i le gafa o o’u tuaa i le itu tina ma le itu tama. I le filifili o lo’u tina, o a’u o se tagata o le tupulaga lona lima o le Ekalesia. Sa auai ona tuaa i le Ekalesia i Egelani ma Suitiselani i uluai aso o le Toefuataiga. O lea la, i le laina o lo’u tina o au o se tasi o sooga i se filifili umi o augatupulaga faatuatua.
I le filifili o lo’u tama, o au o se tagata o le uluai tupulaga ua auai i le Ekalesia. Ona sa lei auai lo’u tama i le Ekalesia seia oo i se taimi mulimuli ane i lona olaga, o ma’ua la ma lo’u uso o le au uluai Bednar ia na mauaina le Perisitua. O au le tagata muamua o le matou aiga na auauna atu o se faifeautalai faamisiona. O lea, e pei o le toatele o outou, o au o le uluai sooga o le talalelei i le filifili o le augatupulaga o le au Bednar.
O lo’u tama o se tagata lelei, tuuto ma galue malosi. Ou te alofa ia te ia, ma sa aoaoina ni lesona maoae i le galulue faatasi ai ma ia ma ua fesoasoani ai ia te au e avea ma tagata ua ou i ai nei. Sa aoao au e lo’u tina e tatalo ma faapelepele i tusitusiga paia. Ou te alofa ia te ia ma talisapaia le afi o le faatuatua sa ia tutuina i totonu o au. Peitai e mata’ina foi, ou te le manatuaina le tatalo, suesueina o tusitusiga paia, po o le faia faatasi o afiafi faaleaiga o se aiga. Sa ou tatalo ma faitau le Tusi a Mamona faatasi ma lo’u tina, ae matou te lei faia lava nei mea faatasi o se tama, tina ma le fanau.
Faatasi ma le fesoasoaniga a le Alii, e mafai ai ona e fatua’iina se aiga e faavavau, e tusa lava pe e te le’i sau mai le ituaiga o aiga o le Au Paia o Aso e Gata Ai lea e tuu mai nisi taimi i le faavaa i luma o le mekasini o le Liahona po o le Ensign po o le Ensign. Faamolemole ia manatua i taimi uma: e amata ia te oe!
O le mea moni lava i lo’u le oo i aafiaga o ni mamanu amiotonu faaleaiga i lo’u aiga a o tamaitiiti na fatua’i ai i totonu o a’u se manaoga malosi e galue filiga ma Susan e faamautinoa le avea o nei mamanu i taimi uma o se vaega o le aiga ua ma fatua’ia faatasi. A o ma fefautuaai faatasi o le tasi ma le isi ma aioi atu mo se fesoasoani i a ma tatalo, sa musuia i ma’ua ma faamanuiaina e fesoasoani i le ma fanau e aoao ia mataupu faavae o le talalelei toefuataiina a le Faaola. E mautinoa lava e le o i maua o ni matua atoatoa, ae na mauaina ni meaalofa faaleagaga na ma manaomiaina ma maua le “fesoasoani … e sili atu ma lo [ma] gafatia.”10
E le o saisaitia oe ma a’u i o tatou aafiaga ua tuanai. E le o i tatou o ni tagata ua faamanualia atoatoa i o tatou tulaga o i ai nei pe o nofopologa i lo tatou siosiomaga. O le a aoaoina i tatou e le Agaga Paia i mea uma e tatau ona tatou faia, e aofia ai mamanu o le amiotonu faaleaiga lea tatou te lei auai ai muamua. E amata ia te oe! Ma e faatasi ai ma le fesoasoaniga a le Alii, e mafai ai ona e faia.
O nisi o outou na nutimomoia o outou loto e ni tagata o aiga po o ni taitai patino sa lei faamamaluina feagaiga paia o le faaipoipoga. Atonu e te fesili ifo ia te oe lava, “Afai na faamau o’u matua po o isi ulugalii ou te iloaina i le malumalu ma sa lei faamanuiaina a latou faaipoipoga, o le a la se faamoemoe e mafai ona ou maua o le a tumau ai la’u faaipoipoga e faavavau?”
Ia te oe na lagona le lototiga ona o se tatalaga o se faaipoipoga i lou aiga pe sa e lagonaina le tiga i le solia o le faatuatuaina, faamolemole ia manatua e toe amata foi ia te oe! Atonu e tasi le sooga i le filifili o au augatupulaga ua motusia, ae o isi sooga amiotonu ma mea o totoe o le filifili e le faaitiitia le taua e faavavau. E mafai ona e faaopoopoa i ai le malosi i lau filifili ma e masalo e oo lava i le fesoasoaniga e toefuatai mai sooga ua motusia.
O i tatou o atalii ma afafine o le Atua. E tusa ai ma le fuafuaga o le fiafia e faavavau a le Tama, ua faaeeina mai ai ia i tatou le meaalofa o le faitalia ma o ni sui ua i ai le gafatia e faatino ai. E le o i tatou o ni meafaitino e tau faagaoioi. O i tatou o sui ia i tatou lava ma e tatau ona auai ma le naunautai i le aumaia o le tele o le amiotonu.11
O se faaipoipoga faamalieina ma le fiafia e le maua [i se mea]; ae, e fatua’i e se alii ma se tamaitai e tausi feagaiga. Ou te popole mo nisi o outou o loo punouai i se sailiga le muta mo se mea e le o i ai. E le o i ai se toalua faaolioli ua atoatoa e mafai ona malupuipuia oe mai tiga faalelagona ma le tiga faaleagaga. Ae i le malosi o le Alii, o se alii ma se tamaitai faatuatua e galulue o ni sui e mafai ona fatuaiina le faaipoipoga faamalieina ma le aiga e faavavau ua latou faamoemoe ma naunau ia maua.
O le auauna atu ma le le manatu faapito i se sootaga faalefaaipoipoga e manaomia ai le onosai ma le faapalepale i se lalolagi o loo uunaia ma le malosi le faaloloto ma le manatu faapito. Ae e amata ia te oe pe a e galue ma fetaomi atu i luma ma le faatuatua i le Faaola, saili faifai pea mo le fesoasoaniga a le lagi, ma faatino ma le amiotonu lou faitalia a’ia’i. E mafai ona e faia i le fesoasoani a le Alii.
O Folafolaga, Faamanuiaga ma le Molimau
Ou uso e ma tuafafine pele, ou te uunaia outou ma le malosi atoa o lo’u agaga ia avea ma se sooga mau i le filifili o ou augatupulaga.
O le avea ma se sooga mau e amata ia te oe e ala i le faia o ni mea faatauvaa ia na faia e Brother ma Sister Call e faamamalu ai feagaiga paia ma aoao le la fanau ia ola ai ma alolofa i le talalelei toefuataiina a Iesu Keriso.
O le avea ma se sooga mau e amata ia te oe e ala i le mauaina o le lototele ma le faatuatua i le Faaola e afe ai i le taumatau e pei o Brother Antwi.
O le avea ma se sooga mau e amata ia te oe e ala i le faalagolago i le Agaga Paia e aoao oe i mea uma ma faamalamalama lou ala, e tusa lava pe e te le muai iloaina tonu le mea e tatau ona e alu i ai ma le mea e tatau ona e faia.
O le avea ma se sooga mau e amata ia te oe e ala i le tuliesea ma le filiga ma le lototoa o le pogisa mai ia te outou12 ma tu malosi e faasagatau atu i mea leaga faatosina o aso e gata ai.
Ou te tuu atu i o outou luga se faamanuiaga faaaposetolo, e ala i le mana o le Agaga Paia tou te malamalama atoatoa atili ai i le taua o lo outou tulaga i le filifili o augatupulaga. Ou te iloa o le a faamanuiaina ma faamalosia outou pe a outou tauivi e avea ma se sooga mau malosi. Ma ou te folafola atu, e faatasi ma le fesoasoaniga a le Alii e mafai ai ona outou faia.
Ou te molimau atu ma le olioli o Iesu Keriso o le Alo Soifua o le Atua Soifua. Ou te iloa o loo soifua o Ia, ua toetu mai o Ia, ma Na te silafia ma alofa ia i tatou taitoatasi. Ou te molimau atu o le pule ma ki o le perisitua e fusia ai i le lalolagi ma i le lagi ua toefuataiina mai i le lalolagi i nei aso e gata ai. Ma ou te iloa a tatou mulimuli i le fuafuaga e faavavau a le Tama, tatou te fiafia i lenei olaga, ma mafai ai ona faatasia o tatou aiga e faavavau. Ou te molimau atu ai i le suafa paia o le Alii o Iesu Keriso, amene.
© 2017 Puletaofia e le Intellectual Reserve, Inc. Ua taofia aia tatau uma. Faamaonia le faaperetania: 6/17. Faamaonia le faaliliuga: 6/17. Faaliliuga o le “A Welding Link.” Samoan. PD60004410 890