ត្រូវបានរកឃើញតាមរយៈអនុភាពនៃព្រះគម្ពីរមរមន
អ្វីៗទាំងអស់ត្រូវតែជួបបទពិសោធន៍ និងរកឃើញដោយអំណាចនៃសេចក្ដីពិតដែលមាននៅក្នុងព្រះគម្ពីរមរមន ។
ពេលខ្ញុំទៅលេងផ្ទះរបស់អ្នកផ្លាស់ប្រែចិត្តជឿ សំណួរមួយដែលខ្ញុំចូលចិត្តសួរជាញឹកញាប់ដល់ពួកគេគឺ តើពួកគេ និងគ្រួសារពួកគេបានដឹងពីសាសនាចក្រតាមរបៀបណា និងរបៀបដែលពួកគេបានទទួលបុណ្យជ្រមុជទឹក ។ វាមិនសំខាន់ទេ បើមនុស្សនៅក្នុងគ្រានោះ គឺជាសមាជិកសកម្ម ឬមិនបានទៅព្រះវិហារអស់ជាច្រើនឆ្នាំមកហើយ ។ ចម្លើយមិនតែងតែដូចគ្នានោះទេ ៖ ដោយមានទឹកមុខពព្រាយ និងស្នាមញញឹម ពួកគេចាប់ផ្ដើមប្រាប់រឿងអំពីរបៀបដែលពួកគេត្រូវបានរកឃើញ ។ តាមពិតទៅ វាទំនងជា ដំណើររឿងអំពីការប្រែចិត្តជឿគឺតែងតែជារឿងរ៉ាវពីរបៀបដែលយើងត្រូវបានរកឃើញ ។
ព្រះយេស៊ូវគ្រីស្ទផ្ទាល់គឺជាព្រះអម្ចាស់នៃអ្វីៗដែលបាត់ ។ ទ្រង់ខ្វល់ខ្វាយពីអ្វីៗដែលបាត់ ។ នោះប្រាកដជាមូលហេតុដែលទ្រង់បង្រៀនអំពីរឿងប្រៀបធៀបចំនួនបី ដែលមាននៅក្នុង លូកា ១៥ ៖ ជារឿងប្រៀបធៀបពីចៀមដែលបាត់ កាក់ដែលបាត់ហើយចុងក្រោយគឺរឿងកូនប្រុសខ្ជះខ្ជាយ ។ រឿងទាំងអស់នេះមានភាគជាទូទៅមួយ ៖ វាពុំសំខាន់ថាហេតុអ្វីបានជាពួកគេបានវង្វេងបាត់នោះទេ ។ វាពុំសំខាន់ទេ ទោះជាពួកគេបានដឹងថាពួកគេបានវង្វេងក្ដី ។ រាជ្យដ៏អស្ចារ្យ អារម្មណ៍អំណរដែលប្រកាសថា « ១ នៅទីបំផុត ពុំមានអ្វីដែលបាត់ជាប្រាកដចំពោះទ្រង់ឡើយ ។២
សូមឲ្យខ្ញុំចែកចាយជាមួយបងប្អូននាល្ងាចនេះនូវអ្វីមួយដែលមានតម្លៃបំផុតចំពោះខ្ញុំ—ដំណើររឿងពីរបៀបដែលខ្ញុំរកខ្លួនឯងឃើញ ។
ពេលខ្ញុំហៀបនឹងឈានចូលវ័យ ១៥ ឆ្នាំ ពូខ្ញុំ ឈ្មោះ ម៉ាញូអែល ប៊ូសថូស បានអញ្ជើញខ្ញុំឲ្យមកលេងគាត់ និងគ្រួសារគាត់មួយរយៈនៅសហរដ្ឋ ។ នេះជាឱកាសដ៏ល្អសម្រាប់ខ្ញុំដើម្បីរៀនភាសាអង់គ្លេសខ្លះៗ ។ ពូខ្ញុំបានប្រែចិត្តជឿចូលសាសនាចក្រជាច្រើនឆ្នាំពីមុននោះ ហើយគាត់មានស្មារតីជាអ្នកផ្សព្វផ្សាយសាសនាយ៉ាងអស្ចារ្យ ។ ប្រហែលនោះហើយជាមូលហេតុដែលម្ដាយខ្ញុំបាននិយាយជាមួយពូខ្ញុំទាំងមិនឲ្យខ្ញុំដឹងថា គាត់នឹងយល់ព្រមដល់ការអញ្ចើញរបស់ពូដោយមានលក្ខខណ្ឌមួយ ៖ ថាពូមិនត្រូវលួងលោមខ្ញុំឲ្យក្លាយជាសមាជិកសាសនាចក្ររបស់ពូនោះទេ ។ ពួកយើងជាពួកកាតូលិកជាច្រើនជំនាន់ ហើយគ្មានមូលហេតុអ្វីដែលត្រូវផ្លាស់ប្ដូរនោះទេ ។ ពូខ្ញុំបានយល់ព្រមទាំងស្រុង ហើយបានរក្សាពាក្យសន្យារបស់គាត់រហូតដល់គាត់មិនចង់ឆ្លើយសំណួរធម្មតាៗអំពីសាសនាចក្រ ។
ពិតណាស់ អ្វីដែលពូខ្ញុំ និងភរិយាដ៏ល្អរបស់គាត់ មីងម៉ាចូរី មិនអាចចៀសបានគឺការធ្វើជាខ្លួនឯង ។៣
ពួកគាត់ឲ្យខ្ញុំនៅក្នុងបន្ទប់មួយដែលមានបណ្ណាល័យដែលមានសៀវភៅជាច្រើន ។ ខ្ញុំអាចឃើញថា មានព្រះគម្ពីរមរមនជាភាសាខុសៗគ្នាប្រហែលជា ២០០ ក្បាលនៅក្នុងបណ្ណាល័យនោះ ក្នុងនោះមាន ២០ ក្បាល ជាភាសាអេស្ប៉ាញ ។
ថ្ងៃមួយ ដោយការចង់ដឹងចង់ឮពេក ខ្ញុំបានយកព្រះគម្ពីរជាភាសាអេស្ប៉ាញមួយក្បាលចុះមក ។
វាជាច្បាប់ដែលមានក្របទន់ពណ៌ផ្ទៃមេឃ ដែលមានរូបទេវតាមរ៉ូណៃនៅខាងមុខ ។ ពេលខ្ញុំបើកព្រះគម្ពីរ នៅលើទំព័រទីមួយវាមានសរសេរនូវការសន្យាដូចតទៅនេះ ៖ « ហើយកាលណាអ្នករាល់គ្នាទទួលនូវការណ៍ទាំងនេះ នោះខ្ញុំសូមទូន្មានដល់អ្នករាល់គ្នាឲ្យសូមសួរដល់ព្រះជាព្រះវរបិតាដ៏គង់នៅអស់កល្បជានិច្ច ដោយនូវព្រះនាមនៃព្រះគ្រីស្ទ បើសិនជាការណ៍ទាំងនេះមិនពិត ហើយបើសិនជាអ្នករាល់គ្នាសូមសួរដោយចិត្តស្មោះសគឺ ដោយស្មោះអស់ពីចិត្ត ដោយមានសេចក្តីជំនឿជឿដល់ព្រះគ្រីស្ទ នោះទ្រង់នឹងសម្ដែងសេចក្តីពិតនៃការណ៍នេះដល់អ្នកដោយព្រះចេស្តានៃព្រះវិញ្ញាណបរិសុទ្ធ » ។
បន្ទាប់មកវាបន្ថែមថា « ហើយដោយព្រះចេស្តានៃព្រះវិញ្ញាណបរិសុទ្ធ នោះអ្នករាល់គ្នាអាចស្គាល់សេចក្តីពិតនៃគ្រប់ការណ៍ទាំងអស់ » ។៤
វាពិបាកនឹងពន្យល់ពីឥទ្ធិពលដែលបទគម្ពីរទាំងនេះមានមកលើគំនិត និងដួងចិត្តខ្ញុំ ។ និយាយតាមត្រង់ ខ្ញុំមិនបានស្វែងរក « សេចក្ដីពិត » ទេ ។ ខ្ញុំគ្រាន់តែជាយុវជនម្នាក់ ដែលរីករាយនឹងជីវិត និងវប្បធម៌ថ្មីនេះ ។
ទោះជាយ៉ាងណា ដោយមានការសន្យានោះនៅក្នុងគំនិត ខ្ញុំបានចាប់ផ្ដើមអានព្រះគម្ពីរដោយសម្ងាត់ ។ នៅពេលខ្ញុំអានបន្ថែម ខ្ញុំយល់ថា បើខ្ញុំពិតជាចង់ទទួលបានអ្វីពីសៀវភៅនេះ ខ្ញុំគួរចាប់ផ្ដើមអធិស្ឋានទៅ ។ ហើយយើងទាំងអស់គ្នាដឹងនូវអ្វីដែលកើតឡើង នៅពេលអ្នកសម្រេចចិត្តថាមិនគ្រាន់តែអាន ប៉ុន្តែក៏អធិស្ឋានផងដែរអំពីព្រះគម្ពីរមរមន ។ មែនហើយ នោះគឺជាអ្វីដែលបានកើតឡើងចំពោះខ្ញុំ ។ វាជាអ្វីមួយដែលពិសេស និងប្លែកណាស់—មែនហើយ គឺដូចជាអ្វីដែលបានកើតឡើងដល់មនុស្សរាប់ពាន់នាក់ផ្សេងទៀតនៅជុំវិញពិភពលោកដែរ ។ ខ្ញុំបានដឹងដោយព្រះចេស្តានៃព្រះវិញ្ញាណបរិសុទ្ធថា ព្រះគម្ពីរមរមនពិត ។
បន្ទាប់មក ខ្ញុំបានទៅពន្យល់ប្រាប់ពូខ្ញុំពីអ្វីដែលបានកើតឡើង ហើយថាខ្ញុំត្រៀមខ្លួនរួចហើយដើម្បីទទួលបុណ្យជ្រមុជទឹក ។ ពូខ្ញុំពុំអាចទប់អារម្មណ៍រំភើបរបស់គាត់បានទេ ។ គាត់បានបើកឡានទៅព្រលានយន្តហោះ ហើយត្រឡប់មកវិញជាមួយនឹងសំបុត្រយន្តហោះឲ្យខ្ញុំត្រឡប់ទៅផ្ទះវិញ ដោយមានលិខិតតូចមួយផ្ញើទៅម្ដាយខ្ញុំ ដែលថ្លែងយ៉ាងសាមញ្ញថា « ខ្ញុំអត់មានអ្វីទាក់ទងនឹងរឿងនេះទេ ! »
ជារបៀបមួយ ដែលពូខ្ញុំត្រូវ ។ ខ្ញុំត្រូវបានរកឃើញដោយផ្ទាល់តាមរយៈអនុភាពនៃព្រះគម្ពីរមរមន ។
ប្រហែលជាមានមនុស្សជាច្រើនបានរកឃើញតាមរយៈអ្នកផ្សព្វផ្សាយដ៏ល្អៗនៅជុំវិញពិភពលោក នៅគ្រប់ករណីតាមរយៈរបៀបដ៏មានអព្ភូតហេតុ ។ ឬប្រហែលជាពួកគេបានរកឃើញតាមរយៈមិត្តភក្ដិដែលព្រះបានដាក់នៅលើផ្លូវរបស់ពួកគេ ។ ប្រហែលជាពួកគេត្រូវបានរកឃើញដោយនរណាម្នាក់ពីជំនាន់នេះ ឬតាមរយៈដូនតាម្នាក់របស់ពួកគេ ។៥ មិនថាជាករណីមួយណាទេ ដើម្បីរីកចម្រើនទៅកាន់ការប្រែចិត្តជឿដ៏ពិតមួយ ឲ្យបានឆាប់ជាជាងនៅពេលក្រោយ នោះពួកគេទាំងអស់គ្នាត្រូវតែដកពិសោធន៍ និងរកឃើញដោយព្រះចេស្ដានៃសេចក្ដីពិតដែលមានក្នុងព្រះគម្ពីរមរមន ។ ជាមួយគ្នានោះដែរ ពួកគេត្រូវតែសម្រេចចិត្តដោយផ្ទាល់ដើម្បីធ្វើការតាំងចិត្តដ៏ហ្មត់ចត់មួយចំពោះព្រះថា ពួកគេនឹងពុះពារដើម្បីរក្សាបទបញ្ញត្តិរបស់ទ្រង់ ។
ពេលខ្ញុំត្រឡប់មកប៊ុយណូហ្សែវិញ ម្ដាយខ្ញុំបានដឹងថា ខ្ញុំពិតជាចង់ទទួលបុណ្យជ្រមុជទឹកមែន ។ ដោយសារតែខ្ញុំមានវិញ្ញាណនៃការបះបោរខ្លះៗ ជាជាងគាត់ជំទាស់នឹងខ្ញុំ គាត់បានមកគៀកខ្ញុំយ៉ាងវ័យឆ្លាត ។ ហើយដោយពុំបានដឹងអំពីរឿងនោះ គាត់បានធ្វើការសម្ភាសពិធីបុណ្យជ្រមុជទឹកខ្ញុំដោយខ្លួនគាត់ផ្ទាល់ ។ ការពិត ខ្ញុំជឿថា ការសម្ភាសរបស់គាត់ស៊ីជម្រៅជាងការសម្ភាសដែលពួកអ្នកផ្សព្វផ្សាយសាសនាធ្វើឡើងទៅទៀត ។ គាត់បានប្រាប់ខ្ញុំ ៖ « បើកូនចង់ទទួលបុណ្យជ្រមុជទឹក ម៉ាក់នឹងគាំទ្រកូន ។ តែដំបូង ម៉ាក់នឹងសួរកូននូវសំណួរមួយចំនួនសិន ហើយម៉ាក់ចង់ឲ្យកូនគិតឲ្យហ្មត់ចត់ ហើយឆ្លើយនឹងម៉ាក់ដោយស្មោះត្រង់ ។ តើកូនប្ដេជ្ញាថាទៅព្រះវិហាររាល់ថ្ងៃអាទិត្យយ៉ាងប្រាកដឬទេ ?
ខ្ញុំបានប្រាប់គាត់ថា « បាទ ប្រាកដណាស់ ខ្ញុំនឹងធ្វើដូច្នោះ » ។
« តើកូនដឹងថា ព្រះវិហារយូរប៉ុណ្ណាទេ ?
ខ្ញុំបាននិយាយថា « បាទខ្ញុំដឹង » ។
គាត់តបថា « មែនហើយ បើកូនទទួលបុណ្យជ្រមុជទឹក ម៉ាក់ត្រូវធ្វើឲ្យប្រាកដថា កូនទៅព្រះវិហារ » ។ បន្ទាប់មក គាត់បានសួរខ្ញុំថាតើខ្ញុំពិតជាប្ដេជ្ញាមិនផឹកគ្រឿងស្រវឹង ឬជក់រហូតឬទេ ។
ខ្ញុំបានឆ្លើយថា « បាទ ប្រាកដណាស់ ខ្ញុំនឹងអនុវត្តតាមនោះផងដែរ » ។
គាត់បានបន្ថែមថា « មែនហើយ បើកូនទទួលបុណ្យជ្រមុជទឹក ម៉ាក់ត្រូវធ្វើឲ្យប្រាកដថា កូនត្រូវគោរពតាម » ។ ហើយគាត់បានបន្តតាមរបៀបនោះស្ទើរតែគ្រប់បទបញ្ញត្តិទាំងអស់ ។
ពូខ្ញុំបានទូរសព្ទទៅម្ដាយខ្ញុំប្រាប់គាត់ថាកុំឲ្យបារម្ភ អីមិនយូរទេខ្ញុំនឹងភ្លេចពីវាហើយ ។ បួនឆ្នាំក្រោយមក ពេលខ្ញុំបានទទួលការហៅបម្រើរបស់ខ្ញុំនៅក្នុងបេសកកម្ម យ៉ូរ៉ាហ្គាយ ម៉ុនតេវីដេអូ នោះម្ដាយខ្ញុំបានទូរសព្ទទៅសួរពូខ្ញុំថា តើពេលណាទើបខ្ញុំនឹងភ្លេចពីវាឲ្យប្រាកដទៅ ។ ការពិតគឺថា តាំងពីខ្ញុំទទួលបុណ្យជ្រមុជទឹក គាត់បានក្លាយជាម្ដាយម្នាក់ដែលកាន់តែរីករាយ ។
ខ្ញុំបានដឹងថា ព្រះគម្ពីរមរមនគឺសំខាន់ខ្លាំងណាស់នៅក្នុងដំណើរការប្រែចិត្តជឿ ដោយការដកពិសោធន៍ដោយផ្ទាល់នូវការសន្យាដែលថា « បុគ្គលម្នាក់ៗអាចចូលទៅជិតព្រះបានដោយសារធ្វើតាមសិក្ខាបទទាំងឡាយនៃគម្ពីរនេះ » ។៦
នីហ្វៃបានពន្យល់ពីគោលបំណងសំខាន់នៃព្រះគម្ពីរមរមនតាមរបៀបនេះ ៖
« ដ្បិតយើងព្យាយាមខំសរសេរពាក្យទាំងនេះ ដើម្បីបញ្ចុះបញ្ចូលកូនចៅយើង និងបងប្អូនយើងផង ដើម្បីឲ្យជឿដល់ព្រះគ្រីស្ទ ហើយឲ្យស្រុះស្រួលនឹងព្រះ …
« ហើយ [ ដូច្នោះ ] យើងនិយាយអំពីព្រះគ្រីស្ទ យើងអររីករាយក្នុងព្រះគ្រីស្ទ យើងផ្សាយអំពីព្រះគ្រីស្ទ [ ហើយ ] យើងព្យាករអំពីព្រះគ្រីស្ទ … ដើម្បីឲ្យកូនចៅយើងអាចដឹងថា តើត្រូវស្វែងរកប្រភពណាមួយ ដើម្បីឲ្យបានផ្ដាច់បាបរបស់ពួកគេ » ។៧
ព្រះគម្ពីរមរមនទាំងមូលមានពេញដោយគោលបំណងដ៏ពិសិដ្ឋដូចគ្នានោះ ។
ដោយមូលហេតុនេះ អ្នកអានណាដែលតាំងចិត្តសិក្សាដោយស្មោះ ដោយស្មារតីនៃការអធិស្ឋាន នោះនឹងពុំគ្រាន់តែរៀនអំពីព្រះគ្រីស្ទប៉ុណ្ណោះទេ ប៉ុន្តែនឹងរៀន មកពី ព្រះគ្រីស្ទ — ជាពិសេសបើពួកគេធ្វើការសម្រេចចិត្ត « សាកល្បងគុណតម្លៃនៃពាក្យសម្ដី » ៨ ហើយមិនបដិសេធវាជានិរន្ដរ៍ដោយការមិនជឿទាំងលម្អៀង ៩ ដោយអ្វីដែលអ្នកដទៃបាននិយាយអំពីរឿងទាំងឡាយដែលពួកគេមិនដែលបានអាន ។
ប្រធាន រ័សុល អិម ណិលសុន បានរំឭក ៖ « នៅពេលខ្ញុំគិតអំពីព្រះគម្ពីរមរមន ខ្ញុំគិតអំពីពាក្យថា អំណាច ។ សេចក្ដីពិតនៃព្រះគម្ពីរមរមនមាននូវ អំណាច ដើម្បីព្យាបាល លួងលោម ស្ដារឡើងវិញ ជួយ ពង្រឹង លើកទឹកចិត្ត ហើយធ្វើឲ្យព្រលឹងយើងរីករាយ » ។១០
មិនថាយើងជាសមាជិកសាសនាចក្រយូរយ៉ាងណាទេ ការអញ្ជើញរបស់ខ្ញុំនៅរសៀលនេះដល់យើងម្នាក់ៗ គឺដើម្បីអនុញ្ញាតឲ្យអនុភាពនៃសេចក្ដីពិតនៃព្រះគម្ពីរមរមនរកយើងឃើញ ហើយឱបក្រសោបយើងម្ដងទៀត និងពីមួយថ្ងៃទៅមួយថ្ងៃ ពេលយើងស្វែងរកវិវរណៈផ្ទាល់ខ្លួនដោយឧស្សាហ៍ព្យាយាម ។ វានឹងធ្វើដូច្នោះ បើយើងអនុញ្ញាត ។
ខ្ញុំសូមថ្លែងទីបន្ទាល់ដ៏ឧឡារិកថា ព្រះគម្ពីរមរមនមាននូវភាពពោរពេញនៃដំណឹងល្អនៃព្រះយេស៊ូវគ្រីស្ទ ហើយថា ព្រះវិញ្ញាណបរិសុទ្ធនឹងបញ្ជាក់សេចក្ដីពិតនោះម្ដងហើយម្ដងទៀតដល់នរណាដែលស្វែងរកការចេះដឹងដល់សេចក្ដីសង្គ្រោះព្រលឹងរបស់ពួកគេ ដោយដួងចិត្តស្មោះសរ ។១១ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ។