Digital Lamang
Aron Mogiya Kanato Niining Ulahing mga Adlaw
Gikan sa usa ka debosyonal sa BYU–Hawaii nga gihatag niadtong Pebrero 18, 2020.
Ang pagsunod sa mga propeta mosangpot kanunay ngadto sa gisaaad nga mga panalangin ug personal nga pag-uswag.
Samtang naningkamot kita sa pagsugakod sa mga hagit sa kinabuhi, ang giya gikan sa mga propeta nahimong bililhon kanato.
Makita nato ang nindot nga mga panalangin samtang mosunod kita sa mando sa mga propeta. Nahinumdom ko sa usa ka mahinungdanon kaayo nga ehemplo nga nahitabo magtulo ka semana human nga ang akong asawa, si Jill, ug ako naminyo. Mitambong kami og debosyonal diin ang Presidente sa Simbahan niadtong higayona, si Spencer W. Kimball, namulong mahitungod sa kaminyoon.1 Morag direkta siya nga namulong namo. Kana nga pakigpulong nakatabang namo sa pagtakda og pipila ka sundanan samtang nagsugod kami sa among kaminyoon ug pamilya, ug nakatabang kini namo nga makalikay sa mga laang nga gidasig sa Ginoo niya nga ipasidaan. Namalandong ko sa pipila ka tuig kon unsa kami ka bulahan nga makadawat niana nga giya atol sa ingon ka mahinungdanon nga panahon alang namo. Karon, 47 ka tuig na ang milabay, napanalanginan gihapon kami tungod niana nga tambag nga among nadawat isip bag-ong minyo nga magtiayon.
Kon Kita Mosunod sa Propeta, Kita Mapanalanginan
Segurado ko nga ang matag usa ninyo makasaysay og mga kasinatian dihang kamo napanalanginan tungod sa pagsunod sa propeta.
Ang pagsunod sa unsay gidasig sa mga propeta nga itudlo dili makagarantiya nga kita dili bugalbugalan o lutoson o kita dili mag-atubang og ubang mga kalisdanan tungod sa atong pagkamasulondon. Apan ang atong kaandam sa pagsunod sa kaulahian maghatag og “kalinaw niini nga kalibotan ug kinabuhi nga dayon sa kalibotan nga umaabot” (Doktrina ug mga Pakigsaad 59:23).
Si Nephi ug ang pipila sa mga pamilya ni Lehi ug ni Ishmael nga misunod sa mga pagtulon-an ni Lehi nag-atubang og dagkong mga hagit, apan sa kaulahian nagpuyo sila “subay sa matang sa pagkamalipayon” (2 Nephi 5:27) didto sa gisaad nga yuta. Ang paghulat ug pagtuo sa umaabot nga gisaad nga mga panalangin mahimong usa ka hagit niining panahona nga kita masagmuyo kon ang pagpangita diha sa kompyuter modangat og .62 ka segundo.
Kon ang mga Katilingban Magsugod sa Pagkadaotan, Daghan ang Mosalikway sa Tambag sa mga Propeta
Sa batan-on pa ko, naghunahuna ko kon ngano nga ang mga tawo sa Basahon ni Mormon misalikway man gayod sa mga propeta. Morag naglibog gyod ko. Wala ba sila makakita kon unsay mahimong mga resulta? Sa unsang paagi nga ang mga tawo moabot man sa punto nga ilang isalikway ang mga mensahe sa mga propeta ug gani isalikway ug kasilagan ang mga propeta mismo?
Pipila ka tuig ang milabay, nakadesisyon ko nga tun-an ang mga reaksiyon sa mga mensahe gikan sa mga propeta. Usahay ang mga tawo misalikway sa mga propeta tungod kay sila nasina nila ug sa ilang gahom.
Diha sa Basahon sa Ikatulong Nephi sa dihang si Nephi nangalagad uban sa dakong gahom, “sila nasuko kaniya, tungod kay siya adunay labaw nga gahom kay kanila” (3 Nephi 7:18). Ang mga tawo gani nakakita nga si Nephi mibuhi og balik sa iyang igsoong lalaki gikan sa pagkamatay; “ug ang mga katawhan nakakita niini, ug nagsaksi niini, ug nasuko kaniya tungod sa iyang gahom” (3 Nephi 7:20).
Sa dihang si Thomas Marsh mibalik sa Simbahan human sa iyang pagrebelde, siya mipasabot unsay nahitabo:
“Nawala nako ang Espiritu sa Ginoo sa akong kasingkasing. …
“Nasina ko sa Propeta … ug wala na makabantay sa tanang butang nga husto, ug gigahin nako ang tanan nakong panahon sa pagpangita sa unsay daotan; … Sa akong hunahuna nakakita ko og usa ka troso sa mata ni Brother Joseph, apan usa ka gamayng puling lang diay kadto, ug ang akong mga mata mao ang napuno sa troso; … Nasuko ko ug gusto nga ang tanan masuko. Nakig-istorya ko ni Brother Brigham Young ug ni Brother Heber C. Kimball, ug gusto ko nga masuko sila parehas nako; ug akong nakita nga wala sila masuko, ug mas nasuko ko kay wala sila masuko. Si Brother Brigham Young, sa mapasidan-on nga pagtan-aw, miingon, ‘Lider ka ba sa Simbahan, Brother Thomas?’ Mitubag ko og ‘Dili.’ ‘Nan unya,’ miingon siya, ‘nganong dili man lang na nimo pasagdan?’”2
Adunay ubang mga rason nga ang mga tawo mapakyas sa pagsunod sa mga propeta. Usa sa labing komon mao nga ang mga propeta nagpamatuod bahin sa mga sala sa katawhan ug nagsangyaw og paghinulsol. Dili kaayo ganahan niini ang mga tawo. Sa dili pa ang unang bersikulo sa Basahon ni Mormon, diha sa mubo nga pasiuna nga gihatag ni Nephi sa Unang Basahon ni Nephi, atong makita kini nga tema nga mitumaw. Si Nephi nagsulat, “Ang Ginoo mipasidaan kang Lehi nga mobiya siya sa yuta sa Jerusalem, tungod sa iyang gipanagna ngadto sa mga katawhan mahitungod sa ilang kadaotan ug sila nagtinguha paghunos sa iyang kinabuhi.” Kini nga sundanan gibalikbalik diha sa mga kasulatan (tan-awa, pananglitan, 1 Nephi 16:2; Mosiah 13:4; Alma 35:15; Helaman 8:4; 13:26–28).
Kadaghanan nato dili ganahan nga makadungog nga sayop ang atong gibuhat. Dili kita gusto nga korehian. Nahimo kining mas mahagiton ingon nga ang katilingban nag-anam og palayo gikan sa mga pagtulon-an ug sa mga sugo sa Dios. Sa usa ka matarong nga katilingban, ang mga tawo nga naanod ngadto sa pagpakasala mapalayo; apan sa usa ka katilingban nga nagbaliwala o nagsalikway sa mga pagtulon-an sa Ginoo, kadtong nagsunod sa mga sugo mao ang mapalayo ug mapaubos sila sa hilabihang pagpamugos.
Diha sa Basahon ni Mormon, kadtong mga katilingban nga hilabihan nga nadala sa sayop nga mga pilosopiya ug pagpakasala—sama sa katawhan ni Hari Noah, katawhan sa Ammonihah, o mga Zoramite—mao ang sagad nga adunay negatibong reaksyon ngadto sa mga mensahe sa mga propeta. Samtang magkadaotan ang katilingban, ang dako ug lapad nga gambalay maningkamot og maayo sa pag-impluwensya sa mga indibidwal. Morag nagkaduol ug nagkadako kini. Ang pagbugalbugal morag mas nagkagrabe ug mas nanulisok. Morag nagkadaghan ang mga kamot nga nanulisok—ug kay kini mao gayod. Kusog ang pagpamugos sa uban ngari kanato dili lamang aron mobiya sa dalan ug sa bunga sa kahoy apan aron moapil sa pagbugalbugal ug pang-atake niadtong mosulay sa pagpabilin diha sa dalan.
Unsa man ang hinungdan niadtong mga katilingban nga miabot sa punto diin ilang gisalikway ang mga propeta ug gani nagtinguha sa pagpatay kanila? Sa unsang paagi nga ang sayop nga mga pilosopiya ug mga doktrina nakaukit sa mga kasingkasing sa katawhan? Unsa ang mga butang nga nakapausab nila gikan sa pagkapamainubsanon ngadto sa pagkamapasigarbohon ug gikan sa pagkamasulondon ngadto sa pagkamabingkilon? Tingali mao kini ang hilisgotan sa laing higayon.
Kon tan-awon nato kini nga mga katilingban ug mga indibidwal nga mibiya sa mga propeta ug sa Ginoo, atong makita ang mga resulta sa pagkahuman na sa hitabo. Ang siyudad sa Ammonihah nagun-ob sa usa ka adlaw. Ang katawhan ni Noah naulipon, ug daghan ang gipatay. Ang mga Zoramite nasagmuyo nga ang mga kabos taliwala nila nga midawat sa ebanghelyo mainitong giabiabi didto sa Yuta sa Jershon. Kini ang nakaaghat sa ilang pag-apil sa gubat batok sa nasod sa Nephite.
Kita ang Maghimo og Personal nga Pagpili nga Mosunod sa Propeta o Dili
Matag usa nato adunay kapilian nga mosunod sa propeta, bisan unsa pa ang kahimtang sa piho nga katilingban nga atong gipuy-an. Tingali mobati kita sa pagpamugos gikan sa katilingban nga ibaliwala o gani isalikway ang mensahe sa propeta, apan anaa gihapon nato ang abilidad sa pagpili. Kon kita motuman sa atong mga pakigsaad ug magpaduol sa Ginoo, mas sayon alang nato ang pagsunod sa propeta. Makabaton kita sa Espiritu aron mogiya ug molig-on sa atong tinguha sa pagtugyan sa atong kabubut-on ngadto sa Ginoo. Ug dayon madawat nato ang mga panalangin sa Ginoo.
Naapil ko sa usa ka panagsultihanay pipila ka tuig ang milabay mahitungod sa piho nga hilisgotan nga adunay pipila ka politikanhong mga sangpotanan, apan ang hilisgotan wala pa gayod matubag sa Simbahan o sa propeta. Ang tawo mikomentaryo nga kon ang propeta mohangyo nato sa pagbuhat sa unsay among gihisgotan, kini nga tawo dili mobuhat niini ug alang niya magpasabot kini nga ang propeta dili na tinuod nga propeta. Nakuratan ko ug naghunahuna nga hinanali ra kaayo kini nga desisyon. Apan human sa panagsultihanay, naghunahuna ko: aduna bay butang nga adunay igong gibug-aton sa akong pagbati, o nahisupak gayod sa mga uso karon sa katilingban, nga mahimong hinungdan nga akong isalikway ang propeta?
Kon ang usa ka tambag sa propeta mosukwahi sa atong personal nga mga pagbati, mga tinguha, o konbiksyon, o kon kana nga tambag mosukwahi sa mga panglantaw sa kadaghanan sa katilingban, unsay atong reaksyon? Si Joseph Smith miingon, “Gisulayan na nako sulod sa daghan nga mga katuigan nga himoong maandam ang mga hunahuna sa mga Santos nga modawat sa mga butang sa Dios; apan kasagaran namong makita ang uban kanila, human sila mag-antos sa tanan nga anaa kanila alang sa buluhaton sa Dios, mangatuasik sila sama sa mga buak nga bildo kon mamatngunan nila nga adunay pagtulon-an nga sukwahi sa ilang mga tradisyon: dili na gayod sila makalahutay.”3
Si Presidente Henry B. Eyring, Ikaduhang Magtatambag sa Unang Kapangulohan, namulong bahin sa pagtubag sa tambag gikan sa mga propeta:
“Kon ang mga pulong sa propeta ingon og magbalikbalik, kinahanglan nga ibutang diha ang atong pagtagad ug mopuno sa atong mga kasingkasing sa pasalamat nga nagpuyo sa usa ka bulahan nga panahon.
“Ang pagpangita sa dalan sa kasiguroan diha sa tambag sa mga propeta importante niadtong adunay lig-on nga pagtuo. Kon ang propeta mamulong, kadtong gamay ra og pagtuo maghunahuna nga nakadungog sila og maalamon nga tawo nga naghatag og tambag. Kon ang iyang tambag morag komportable ug makataronganon, motukma sa unsay ilang gustong buhaton, dawaton nila kini. Kon dili, ikonsiderar nila kini nga sayop nga tambag o tan-awon ang ilang kahimtang isip walay apil sa tambag. Kadtong walay pagtuo tingali maghunahuna nga naminaw lang sila sa kalalakin-an nga nagtinguha sa pagpaningkamot sa pag-impluwensya alang sa pipila ka hinakog nga motibo…
“… Ang kapakyas sa pagsunod sa propetikanhong tambag makapahuyang sa atong gahom sa pagdawat sa dinasig nga tambag sa umaabot. …
“Sa matag higayon nga akong gipaminaw ang tambag sa mga propeta, gibati ang paghimatuod niini diha sa pag-ampo, ug dayon gisunod kini, akong namatngonan nga ako nagpaingon ngadto sa kahilwasan…
“Usahay makadawat kita og tambag nga dili nato masabtan o nga daw dili mapuslanon ngari kanato, bisan human sa mainampingong pag-ampo ug paghunahuna. Ayaw ibaliwala ang tambag, apan hupti kini pag-ayo. Kon ang usa ka tawo nga imong gisaligan mihatag kanimo og daw balas lamang uban ang saad nga kini adunay bulawan, maalamon tingali nga gunitan nimo kini diha sa imong kamot sa makadiyot, mouyog niini sa hinay. Sa matag higayon nga gibuhat ko kana sa tambag gikan sa usa ka propeta, sa wala madugay nakita nako ang bili niana nga panudlo ug nagmapasalamaton ko.”4
Ang Buta nga mga Giya Maningkamot sa Pagpalayo Nato gikan ni Jesukristo
Human nga si Samuel nga Lamanite mihulagway ngadto sa katawhan kon giunsa nila pagsalikway ang mga propeta ug gani naminaw sa uban nga mitudlo nila sa “[pag]lakaw subay sa garbo sa [ilang] mga mata, ug [pagbuhat sa] bisan unsa nga gipangandoy sa [ilang] kasingkasing” (Helaman 13:27), nangutana siya og duha ka makapahinuklog nga pangutana: “Hangtod kanus-a kamo motugot sa inyong mga kaugalingon nga dad-on sa walay kaalam ug buta nga pangulo?” ug “Hangtod kanus-a kamo mopili sa kangitngit kay sa kahayag?” (Helaman 13:29).
Walay usa nga moangkon nga gusto silang giyahan sa buta nga mga tiggiya. Kadtong nagiyahan sa sayop dili mohingalan niadtong mitudlo nila sa sayop nga mga pilosopiya isip “buta nga mga tiggiya.” Gani, kasagaran kadtong migiya sa sayop tan-awon kasagaran isip nalamdagan, mapanglantawon, brayt, ug kahibalo sa sosyal nga paagi.
Naghunahuna ko kon sa unsang paagi nga ang pipila niadtong buta nga mga tiggiya gikan sa Basahon ni Mormon mohaom sa panahon karon. Hunahunaa si Sherem, nga nakakat-on ug adunay hingpit nga kahibalo sa pinulongan sa katawhan aron makaulog-ulog siya og maayo. Gamit ang iyang pinulongan, segurado gayod nga iyang maangkon ang kalibotan sa Twitter. Tingali aduna siyay daghang makadani, maalamon nga mga tweet nga balikbalikon og tweet kay kahibalo gyod siya unsaon paghimo sa pulong o lugar nga makapabitik.
Gamit ang kakusgan ni Nehor, mahalon nga mga sinul-oban, ug kamadanihon ngadto sa katawhan, daghan gyod tingali ang mo-follow niya sa Instagram—naghulagway sa “maayong kinabuhi” nga walay restriksiyon sa kasugoan ug naggamit sa iyang sundanan sa pagguba sa Simbahan ug sa mga pagtulon-an niini.
Ug si Korihor minilyon tingali ang mga subscriber sa iyang YouTube channel diin gawasnon siyang mobugalbugal sa mga tumutuo ug motudlo og mga butang nga “[ma]kapahimuot ngadto sa kalibotanon nga hunahuna” (Alma 30:53). Siya tingali “[mo]barog sa pagsulti sa hilabihan ka lanog nga mga pulong … ug … [mo]biay-biay batok” (Alma 30:31) sa mga propeta ug sa mga lider sa Simbahan. Mas modaghan tingali ang iyang mga subscriber kon ang iyang mensahe mogawas nga nag-ingon “bisan unsa ang buhaton sa tawo dili kalapasan” (Alma 30:17).
Siyempre, ang nagpaluyo nga dangatan sa tanan nila nga mga komunikasyon mao nga walay Kristo. Ang ilang mga pagtulon-an dili ingon ka bag-o o orihinal. Mga kinopya kana gikan sa tigpasiugda sa mga bakak. Gani si Korihor sa kataposan miangkon nga ang yawa mitudlo niya kon unsay iyang isulti (tan-awa sa Alma 30:53).
Kon ang mga indibidwal o mga katilingban mopalayo gikan sa mga pagtulon-an sa Ginoo, nga moabot pinaagi sa mga propeta, mangita sila og alternatibo nga mga pagtulon-an nga magtugot nila sa pagpuyo sa paagi nga gusto nila—nga wala kanang makasamok sa tanlag.
Si Elder Jeffrey R. Holland sa Korum sa napulog Duha ka Apostoles mipasabot, “Subo kaayo, batan-ong mga higala, kinaiya kini sa atong panahon nga kon ang mga tawo gusto og bisan unsa nga dios, gusto sila sa mga dios nga dili magkinahanglan og daghan, komportable nga mga dios, kinsa dili manghilabot sa ilang kahimtang karon apan dili gani mohatag og direksyon, ang dios nga mopikpik sa atong ulo, makalipay kanato, sama sa gustong itudlo sa mga dagko ngadto sa mga bata.”5
Ang buta ug dili maalamon nga mga giya dili gayod mogiya nato ngadto sa mga kalipay ug mga panalangin nga gusto sa Ginoo nga madawat nato. Sa atong pagsunod sa mga propeta, kinahanglan nga andam kita nga mobarog sa unsay husto taliwala sa pagtamay ug pagpanglutos, bisan kon dili kini uso.
Ang mga Propeta Nagtawag Nato nga Moduol ngadto sa Manluluwas
Samtang ang buta nga mga tiggiya ug ang pagtamay sa kalibotan mosulay sa pagpalayo nato gikan sa Dios ug sa iyang mga panalangin, ang mga propeta nagtawag nato nga moduol ngadto sa Manluluwas. Ang mga propeta dili mosulay sa pagkombinsir nato sa pagsimba nila apan nagtawag nato sa pagsimba ug sa pagpaduol ngadto sa atong Langitnong Amahan ug sa Iyang Anak, si Jesukristo (tan-awa, pananglitan, si Lehi diha sa 1 Nephi 8:12).
Pipila ka tuig ang milabay, si Jill ug ako nakig-istorya uban ni Presidente Russell M. Nelson. Nangutana siya namo kon andam ba kami nga modawat og laing buluhaton. Si Presidente Nelson mabination kaayo namo kanunay ug mitratar ni Jill uban sa dakong gugma ug pagtahod. Human sa iyang pagpangutana bahin sa among kaandam, si Jill miingon, “Buhaton namo bisan unsa alang nimo, Presidente Nelson.” Dihadiha dayon siya mitubag, “Buhata kini alang Kaniya.” Nakapatandog kini ni Jill ug nako. Siya mitudlo namo og mahinungdanong leksiyon. Si Presidente Nelson gusto nga kami adunay tukmang mga motibo ug sa pagtumong sa among mga mata kon asa kini kinahanglang ipunting.
Kon kita giyahan sa mga propeta, sa pagkatinuod mosunod kita sa tambag tungod Kaniya—ang Manluluwas. Ang Iyang grasya paigo alang sa matag usa nato.
Panapos
Kita nasayod sa kaugalingong kaandam ni Presidente Nelson nga mosunod sa mga propeta sa tibuok niyang kinabuhi. Iyang gibiyaan ang iyang talagsaong oportunidad sa panarbaho agi og resulta sa tambag gikan sa propeta. Isip usa ka bisi kaayo nga surgeon nga may dakong pamilya, nagtuon siya og Chinese tungod kay ang propeta misulti mahitungod sa panginahanglan sa mga sakop sa Simbahan nga makasulti og Chinese. Kita nasayod nga sa dihang si Presidente Thomas S. Monson mihangyo sa mga miyembro sa Simbahan sa pagtuon sa Basahon ni Mormon, si Presidente Nelson mihimo dayon niini. Mahimong sama sa unsa kaha ang Simbahan o ang kalibotan kon ang matag usa nato ingon ka andam nga mosunod sa propeta sama ni Presidente Nelson?
Nasayod ko nga adunay daghang mga panalangin kon kita mosunod sa giya nga gihatag sa Ginoo pinaagi sa Iyang mga propeta. Kon ang ilang isulti mosukwahi sa uso karon sa katilingban, magbaton kita og kaisog sa pagsunod, pagpaluyo, ug pagdepensa. Dili kini kanunay nga mosangpot ngadto sa haruhay nga paglawig, apan sa kanunay mosangpot kini ngadto sa gisaad nga mga panalangin ug personal nga paglambo.