“Pagkaplag og Balaan nga Laraw diha sa Among “Dili ideyal” nga Pamilya,” Liahona, Ene. 2023.

Mga Young Adult

Pagkaplag og Balaan nga Laraw diha sa Among “Dili-ideyal” nga Pamilya

Ni Jenet Erickson

Associate Propesor, sa Department of Church History and Doctrine, Brigham Young University

Ang dili pag-angkon sa “ideyal” nga pamilya sa mortalidad mahimong masakit, apan kita makagamit sa atong mga reyalidad aron mas makapaduol ngadto sa Manluluwas.

Imahe

babaye nga young adult nga gipakita ang paghunahuna sa pamilya

Mga paghulagway pinaagi ni David Green

Walay makadala og mas lawom nga mga pagbati og kahulugan, kalipay, pangandoy, ug kasakit kay sa relasyon nga maoy labing sentro sa atong kasinatian sa mortalidad—ang atong mga relasyon sa pamilya. Ug tungod kay kining mga relasyon hilabihan ka importante, ang atong mga lider sa Simbahan nadasig sa pagmugna sa “Ang Pamilya: Usa ka Pamahayag ngadto sa Kalibotan.”¹ Ang mga kamatuoran niini naghatag og pagsaksi sa usa ka mahigugmaong Amahan kinsa nangandoy alang kanato nga masayod sa balaan nga mga sundanan nga makadala ngadto sa mahangturon nga kalipay diha sa kinabuhi sa pamilya.

Si Presidente Henry B. Eyring, Ikaduhang Magtatambag sa Unang Kapangulohan, nagtudlo: “Tungod kay ang atong Amahan nahigugma sa iyang mga anak, dili kita niya pasagdan nga magtag-an tag-an mahitungod kon unsa ang labing importante niining kinabuhia kalabot kon diin ang atong pagtagad makahatag og kalipay o ang atong pagkawalay pagtagad makahatag og kasub-anan.”² Kini naglakip sa hilabihang kadaghan sa sagradong tahas sa pamilya nga mahimo natong maangkon niining kinabuhia: anak nga babaye o lalaki, igsoong babaye o lalaki, inahan o amahan, iyaan o uyoan, apohang babaye o apohang lalaki.

Ang mga kamatuoran diha sa pamahayag sa pamilya naghulagway sa “mahangturon nga ideyal” nga gitinguha sa kadaghanan kanato—lig-on, malipayon nga mga relasyon sa mahangturon nga pamilya. Ang problema mao nga kita nagpuyo sa “tinuod nga mortal.” Ug ang haw-ang tali sa “tinuod” ug sa “ideyal” mahimong masakit. Usahay, imbis motan-aw niini isip usa ka kahayag aron mogiya kanato, basin pa gani nga kita makasinati nga ang pamahayag sa pamilya isip usa ka sakit nga pahinumdom kon diin kita “napakyas” sa pagkab-ot sa “ideyal.”

Basin nangandoy kita alang sa kaminyoon apan wala makakita niini isip usa ka posibilidad.
Basin naminyo kita ug nasinati ang makagun-ob nga diboryso.
Basin nangandoy kita og mga anak nga kita dili makaatiman.
Basin nakasinati kita og pag-abuso sa mga relasyon sa pamilya nga atong gisaligan.
Basin nakasinati kita og dakong kasakit tungod sa mga pagpili sa gimahal nga mga sakop sa pamilya.
Basin mobati kita nga nagkabahin-bahin bisan pa sa atong labing maayo nga paningkamot aron mahatag ang panaghiusa sa atong mga minahal.
Basin mawad-an pa gani kita og paglaom tungod sa wala matuman nga mga pangandoy ug mga saad.

Ang reyalidad, kitang tanan makasinati sa mga hagit, kasakit, kasubo, diha sa kinabuhi sa pamilya—ang pipila labaw pa sa uban. Sa pipila ka punto, kitang tanan wala makaangkon sa mga sundanan nga ideyal nga gilatid sa pamahayag sa pamilya.

Tingali ang wala nato maamgohi mao ang balaan nga laraw nga anaa niana nga reyalidad.

Pagpangita ug Pagtugyan ngadto sa Manluluwas

Isip usa ka dili minyo nga babaye nga nangandoy alang sa kaminyoon ug mga anak sulod sa daghang katuigan, ako nagtinguha ug nagtuo nga ang usa ka sukaranang katuyoan sa akong kinabuhi mao ang pagkab-ot og mga ideyal sa kinabuhi sa pamilya nga gitakda diha sa pamahayag sa pamilya. Apan bisan pa man sa akong labing sinsero nga mga paningkamot, ako ingon og wala makahimo niini nga mahitabo sa paagi nga akong gituohan nga kini makab-ot. Kana nga panlimbasog sakit.

Sa usa ka higayon, dili nako makita ang milagrusong buhat nga ipahinabo sa Ginoo diha sa akong kasingkasing pinaagi niana nga panglimbasog.

Sa pagtan-aw og balik, ang akong wala matuman nga mga pangandoy nakahatag og usa ka sagradong bahin sa akong kasingkasing nga mosandig ngadto sa akong Manunubos sa pagpangita og kalinaw ug direksiyon bugtong nga Siya lang ang makahatag ug makapalawom sa akong pagsalig diha sa Iyang hingpit nga gugma ug makapahimo nga gahom. Ang inadlaw adlaw nga pag-ampo ug pagtuon sa kasulatan, ug ilabi na sa mga pulong sa kinatibuk-ang komperensiya, nahimong usa ka importanting paglaom ug direksiyon sa kinabuhi. Mibati ko nga giaghat sa pagdangop ngadto sa mga pulong sa akong patriyarkal nga panalangin—ug sa ubang mga panalangin sa pagkapari—sa pagkaplag og gugma ug direksiyon nga personal ngari kanako gikan sa akong Mahangturong Amahan.

Samtang akong gibubo ang akong pagbati ngadto sa Ginoo, bisan kon ako natintal sa pagpahilayo tungod sa kapait, ang sagradong mga pagbati misantop sa akong hunahuna ug kasingkasing nga mipasalig kanako nga Siya nasayod kon hain ako, nga ang akong kinabuhi adunay usa ka matahom nga plano, ug nga ako makasalig Kaniya. Ang Pagkahisakop sa Pakigsaad³ ngadto sa akong Manunubos nahimong usa ka agianan sa talagsaong kalinaw ug kalipay nga molapas pa sa bisan unsang mga tinubdan sa katumanan o kalipay.

Akong nakita nga bisan og ako mituo sa katuyoan sa akong kinabuhi nga mao ang pagkab-ot sa akong mga damgo sa ideyal nga pamilya, gihimo sa Ginoo nga posible ang unsay gitawag ni Elder Jeffrey R. Holland sa Korum sa Napulog Duha ka Apostoles nga sukaranang katuyoan sa mortalidad. Nagkutlo ni Haring Benjamin, siya mipasabot “Tingali ang sukaranang katuyoan … mao ang pagkahimong usa ka santos pinaagi sa pag-ula ni Kristo ang Ginoo,’ nga nagkinahanglan kanato nga mamahimong ‘sama sa usa ka bata manunuton, maaghop, mapainubsanon, mapailubon, puno sa gugma, mauyunon sa pagdawat sa tanan nga mga butang diin ang Ginoo makakita nga angay ipahamtang nganha kaniya, bisan ingon sa usa ka bata motugyan sa iyang kaugalingon ngadto sa iyang amahan.’”⁴

Ang akong panginahanglan alang sa tabang ug kalig-on sa Manluluwas midala kanako sa pagpangita ug pagsinati sa Iyang pagkamatugyanon nga kasingkasing, pagkaaghop, pagkamapainubsanon, ug gugma. Diha sa proseso ako nausab pinaagi sa iyang makapahimo nga gahom. Ug sa kamatuoran, nga unsay akong labing gusto. Unsay ingon og “dili ideyal” ug sa pagkatinuod miandam sa paagi alang sa labing matahom nga “ideyal.”

Ang akong higala ug kauban nga si Ty Mansfield mihulagway og usa ka susamang kamatuoran. Isip usa ka lalaki nga nakasinati og kaibog sa samang sekso, si Ty misaksi sa espirituwal nga paglambo nga mahimong mahitabo kon kita mopalig-on sa atong kinabuhi diha ni Jesukristo ug andam motugyan sa atong tibuok kasingkasing ngadto Kaniya, magtugot Kaniya sa pagpahinungod sa tanang malisod nga mga kasinatian alang sa atong kaayohan. Alang ni Ty, kana nagsugod samtang ang Espiritu mitudlo kaniya “nga kon ugaling ako maminyo man gayod, ako walay kinutoban nga gimahal ug gidawat sa Dios. Ang akong reponsibilidad mao ang pagpadayon sa pagpakabuhi usa ka adlaw matag higayon samtang magtinguha ug magsunod sa giya sa Espiritu.”⁵ Ug sa kataposan, ang pagsalig sa Dios migiya ni Ty sa pagsulod ngadto sa usa ka malipayon, matahom, mahangturon nga kaminyoon ngadto sa iyang asawa.

Pag-ugmad og Mas Lawom nga Relasyon uban sa Manluluwas

Ako usab sa kataposan naminyo human naghunahuna kon maminyo pa ba kaha ko. Apan ang panginahanglan nga mahimong labihan ka lig-on diha ni Jesukristo mipadayon lang, kon wala man mousbaw, sa katuigan sukad nga ako nasilyo ngadto sa akong bana. Ako usab misugod sa pagpangita Kaniya alang sa kalinaw samtang ako nanglimbasog sa pagkadili-makaanak. Wala ko masayod kon unsaon nako nga makabaton og kalipay nga akong gilauman diha sa kinabuhi sa pamilya nga walay mga anak. Apan bisan human ang akong bana ug ako napanalanginan og duha ka anak, ako sa kasagaran nagtutok sa akong kahuyang isip usa ka inahan. Bisan og ako sa kataposan nakaangkon sa unsay akong kanunayng gusto, sa ubang mga paagi ang haw-ang tali sa “ideyal” ug sa “tinuod” ingon og mitubo.

Kini nga mga sirkumstansiya midapit kanako sa paghunahuna pag-usab sa mga katuyoan sa mortalidad ug sa balaanon nga giorden nga mga proseso diin pinaagi niini kita motubo. Tingali ang katuyoan sa kinabuhi dili sa pagkatinuod aron makabaton sa ideyal nga pamilya. Tingali ang ideyal wala gani diha sa mortalidad. Tingali mao kana ang pamilya, imbis, usa ka oportunidad alang sa pag-uswag.

Gani, basin ang reyalidad nga pagabation nga sakit kaayo “minus kay sa ideyal” sa pagkatinuod nagtuman sa sagradong katuyoan sa pagdapit sa kalamboan nga atong gikinahanglan aron kita makapuyo gayod sa “ideyal” nga mga relasyon. Basin ang gahom anaa ra sa kamatuoran nga ang dakong haw-ang tali sa tinuod ug ideyal nagdapit kanato ngadto sa mas lawom nga relasyon uban ni Jesukristo diin Siya moayo ug mopabalaan sa unsay gibati nga naguba, mohatag og kaalam, kalig-on, ug gugma diha sa proseso. Sa milagroso nga paagi, kini pinaagi sa Iyang grasya ug katubsanan, ug Kaniya lamang, nga kita mamahimong matang sa tawo diha sa matang sa mga relasyon nga atong gipangita nga maangkon sa langit.

Ako nakaamgo sa pagtuo nga ang “pagkahingpit” dili sa pagkatinuod posible diha sa mga relasyon sa pamilya, alang ni bisan kinsa—bisan lang niining kinabuhi. Apan ang matinuorong paagi, kaligdong, ug tim-os nga kausod. Gani, ang pagpakaaron ingnon o pagdahom og kahingpitan makabalda sa tim-os nga kasuod ngadto sa Dios, sa atong mga pamilya, ug sa uban. Hinoon, samtang kita motugot sa atong kaugalingon nga makita ni Kristo ang atong tinud-anay nga pagkatawo, sa atong mga pamilya, ug sa uban, lakip sa tanan nga “minus kay sa ideyal” kita makadapit sa iyang makapabalaan nga gahom sa atong kinabuhi. Kita makasinati sa Iyang milagrosong gahom sa pagtakdo sa wala maresolba, mohulip kanato sa Iyang gugma, ug mousab kanato ngadto sa pagbaton og mga relasyon uban kaniya ug sa atong mga minahal.

Tingali ang labing sagrado nga katuyoan sa pamahayag sa pamilya mao ang pagsiguro kanato nga tungod ni Jesukristo, ang “Ideyal” nga pamilya mahimong mahangturon nga padulngan alang sa matag usa kanato.

Isip mga hinigugmang anak nga lalaki ug babaye sa langitnong mga ginikanan, kitang tanan nahisakop sa usa ka mahangturon nga pamilya. Ang atong lahi nga kasinatian sa mortalidad usa ka mahinungdanon nga bahin sa plano sa atong Amahan aron sa pagtabang kanato nga mouswag ug “ngadto sa kahingpitan ug sa kataposan makakab-ot sa [atong] walay kataposan nga kapalaran ingon mga manununod sa kinabuhing dayon”⁶—ang samang matahom nga kinabuhi sa pamilya nga iyang gisinati, hinoon lahi gikan sa ideyal nga mga kasinatian sa atong pamilya nga karon ingon og mao. Sama sa gipamahayag ni Elder D.Todd Christofferson sa Korum sa Napulog Duha ka apostoles nga: “Uban sa pagsalig kami mopamatuod nga ang Pag-ula ni Jesukristo nagpaabot ug, sa kataposan, mobayad sa tanang paghikaw ug pagkawala alang niadtong modangop ngadto Kaniya. Walay usa nga gitakda nang daan nga makadawat og minus pa kay sa tanan nga aduna ang Amahan alang sa Iyang mga anak.”⁷

Sama lang sa gisaad sa Ginoo kang Jacob taliwala sa mga hagit sa iyang “ubos kay sa ideyal” nga pamilya, ang Iyang pakigsaad nga relasyon uban kanato mopasalig pag-usab kanato nga, “Timan-i nga ako nag-uban kanimo. Panalipdan ko ikaw bisag asa ka paingon ug dad-on ko ikaw pagbalik niining yutaa. Dili ko ikaw biyaan hangtod nga matuman ang gisaad ko kanimo” (Genesis 28:15). Samtang kita magsunod Kaniya, bisan unsa pa nga pagkadili-hingpit sa mga reyalidad, Siya dili “mobuhi kanato,” hangtod nga kita makakab-ot sa tanan tang gitinguha, mabugkos sa mga relasyon sa pamilya sa labing dakong kalipay sa kahangtoran.