Ilo Digital Wōt: Rūm̧m̧an Ded ro
Pukōt Kōjatdikdik ilo iien Apan̄
Ke Italy ekar le kōn COVID-19, ikar pukōt juon wūn n̄an dapdep ilo kōjatdikdik.
Rijeje eo ej jokwe ilo Catanzaro, Italy
Ij iakwe naan in kaenōm̧m̧an ko Jisōs ekar kwaļo̧k n̄an rikaloor ro An ālikin Jerkakpeje: “Aenōm̧m̧an n̄an kom̧” (Jon 20:19). Elukkuun ke kabūlōn̄lōn̄ bwe Rilo̧mo̧o̧r eo ad ekar baj wōt kallim̧ur aenōm̧m̧an n̄an aolep rikaloor ro An? Juon iien aorōk ikar io̧o̧ne ekar kakeememej e n̄an kōn m̧ool in.
Kijooror im kar Quarantine
Juon bon̄ ke ikar alwoj, ro ilo jikin nuuj ko rekar kōnaan kōn COVID-19 im jorāān eo ilo Italy, ijo ij jokwe ie. Rej kōnaan kōn uteij in numba in armej emōj aer mej jān nan̄inmej in im eddōkļo̧k in numba in ro renan̄inmej. Men̄e ekar kamijak, ikar jab lukkuun inepata kake iien eo. Bōtaab ālkin ruo wiik tokālkin, ekar nana ļo̧k, im kar barāinwot bwe in ilbōk.
Ikar en̄jake būromōj im ikumkum kōn aolepen ta eo ekar waļo̧k. Ikar lukkuun inepata elan̄e inaaj nan̄inmej. Im kar jinoin tata ilo mour eo aō, ikar mijak in etal n̄an jikin jerbal. Ikar aikuj in ekōnak kulōp im māej aolep iien aō etal n̄an namoj. Juon wiik toālik, aolep laļ eo aō ekar kōm̧m̧ane juon iien kalibuuj im aolep rekar aikuj in ped wot moko.
Ilo iien in ekar jab melim am etal jān moko im̧om ijeļo̧kin wot n̄an wia m̧ōn̄a juon alen juon wiik. Ilo am ped wot lowaan em ekar lukkun pen. Aolep kweiļo̧k ko an Kabun in emōj aer pojrak, im ilo toreo ekar kōm̧m̧an menin aō būromōj, ta eo ekar lukkun kabūromōj n̄a ej ilo an tampel ko kiļōk kōnke ikar karok aō etal n̄an liap eo an juon baamle ikar katakin ilo mijen eo aō. Ikar en̄jake rub būruō im ejeļo̧k kōjatdikdik kōn men ko rej waļo̧k ilo laļ in.
Im̧we jān Al ko
Juon jibbon̄ ke ikar riiti jeje ko rekwojarjar im ron̄jake juon al etan “Mour ilo Kraist,” ikar jar im kajjitōk ippen Jemedwōj Ilan̄, “Elmen aō dāpdāp ippen kōjatdikdik ilo iien in epen?”
Innem ikar jino aō ron̄jake naan ko ilo al in:
Ej le tok mour
N̄e mour ejako.
Ej le tok Pein
Bwe jen bōk lo̧ mo̧r.
Ej le tok Pein
Ilo ļan̄ ko an laļ.
N̄e mour e jako laļ,
Ewōr mour ilo Kraist.1
Ikar en̄jake an Jetōb Kwojarjar kam̧ool n̄an n̄a bwe naan rej m̧ool. Ikar kalimjōk et eo eta ke ikar juon mijenede im ron̄ naan kein ilo kōļmenļo̧kjen eo ao: “Romina, ikōnaan bwe kwon bōk aenōm̧m̧an eo kwar leļo̧k n̄an ro jet ilo mijen eo am ilo am kwaļo̧k kōn ennaan ko aō kōn kōjatdikdik. Men otemjej renaaj EMMAN. Iban kōtļo̧k bwe kwon make iam.”
Innām kiiō, ikōnaan kwaļo̧k ennaan eo kōn kōjatdikdik! Mekarta ikar en̄jake eļap mijak im abōņōņō ilo iien in epen ilo laļ in, ilukkun jeļā bwe kōn Jisōs Kraist, ewor kōjatdikdik. Oktak n̄an E. Kwōn ron̄jake E. Ļoor E. Jemaron̄̄ loe aenōm̧m̧an Ippān. Ewor kajoor ilo tōmak ilo E, im elan̄e kwonaaj, Enaaj lewaj n̄an kwe kajoor n̄an dāpdāp wot n̄an kōjatdikdik (lale Ether 12:4).
Atartar n̄an Kōjatdikdik
Kōnono kōn kōjatdikdik, Elder Dieter F. Uchtdorf jān Doulul eo an Rijilōk ro Jon̄oulruo ekar katakin, “Kōjatdikdik ilo Anij, em̧m̧an eo An, im kajoor eo An ej kōkāāl kōj kōn peran ilo iien in epen.”2 Men̄n̄e ej juon iien eo ekamijak, jemaron̄ kalet peran im leke kallim̧ur ko an Irooj. N̄e mour in ekapan̄pan̄, jej jab aikuj kajitōk ippān Jemedwōj Ilan̄ n̄an kaoktak ta ko jej iooni, ijoke, jej aikuj kajjitōk Ippen bwe en ukōte mwil ko ad. Jemaron̄̄ ekkatak im eddōkļo̧k ilo jabdewot wāween:
Ijeļā bwe Anij ej ped ipped im bwe E ej iakwe ajri ro Nejin—barāinwot kōj ro jej ped ioļap in ajedeed in nan̄inmej in. Ijeļā bwe kōn e, men otemjej renaaj EMMAN. Im ijeļā bwe imaron̄ atartar n̄an aenōm̧m̧an eo ej itok jān tōmak ilo Jisōs Kraist. Kōn Pinmuur eo An indeeo, ijjab maron̄ jelmae men ko repen make iaō.