Ilo Digital Wōt: Rūm̧m̧an Ded ro

Kōm̧m̧ani Jerbal ko Rekwojarjar ilo iien Quarantine

Jān Kaith Ashley Moran

Ilo an tam̧peļ ko kilōk, jemaron̄̄ wōnmaanļo̧k n̄an jipan̄ jerbal ko rekwojarjar jān moko.

Pija

Kōrā eo ej kalimjōk tablet eo

Rijeje eo ej jokwe ilo Manila, Philippines.

Ij ļōmņak in kar jab ron̄ kain naan kein āinwōt naan ko Būreejtōnji eo Kein Kajuon rekar kwaļo̧k allōn̄ eo ļo̧k: “Ālkin kar lukkuun jar im ļōm̧nak kake, im kōn juon ikdeelel n̄an jet ribōk eddo ilo kapijuknen eo an lal, emōj am̧ jokalet n̄an to̧rto̧r likļo̧k aolep makūtkūt ko an tampel.”¹

Bōlen āinwōt n̄a, kwoj ļōmņak elmen ad jelm̧ae men ko repen rainin ijeļo̧kin jikin ko rekwojarjar ilo aenōm̧m̧an. Ilo Philippines in, tampeļ ko rekar kilōk m̧oktaļo̧k jan aer kar kōjeļā ko kōn ped wōt m̧oko kar ejaak, innām iļo̧k kar baj alijerļo̧k n̄an roolļo̧k n̄an m̧weeo im̧ōn Irooj ilo jejjo̧ iien rej m̧ootļo̧k kiiō.

Bōtaab ikar kile juon men aorōk ilo aō pād wōt ilo m̧weeo m̧ō. Men̄e kōjem ko an tampeļ rekilōk, jerbal ko n̄an kapooji kain̄i ko rejjab. Rūtto ro jibūd im jimaad rej ped wōt ilo ijo rājet, kōttar n̄an ad katak eļapļo̧k kōn er. N̄e kwoj kappukōt jet wāween ko n̄an karuwainene en̄jake ko rekwojarjar in jerbal ko an tampeļ n̄an m̧weeo im̧ōm, erkein ej jejjo̧ wāween ko:

Lale menmenbwij eo an baamle eo am ilo FamilySearch.org.
Kajjieon̄ e index eo. Aaet eļap kōjeraam̧m̧an ko jān ikkure mijiin ko!
Kōjerbale technology ko raan kein n̄an kobaik kōj ippān ro nukid remour.
Je bwebwenato ko kōn baam̧le eo am make.

Em̧ōj aō lo an makūtkūt kein kar “u[kōt] būrue[er]” ro uwaan baam̧le eo aō, ilo an kōmeļeļeik ilo Malakai 4:6, im kōjparok kōj jān illu, pād bajjōk, im ejjeļo̧k kōjatdikdik. Im men̄n̄e pād wōt lowaan em̧ ejjab po ļōmen, ij kam̧oolol kōn juon iien em̧m̧an kar letok n̄an jipan̄ kōn jerbal in tampeļ.

Menin emaron̄̄ juon iien ekwojarjar ilo mour ko ad. Bōlen nan̄inmej in enij kakeemejmej kōj kōn ewi aorōk in tampeļ ko. Bōlen jenaaj emōņōņō ilo iien ko jenij maron̄̄ loļo̧k tampeļ eļapļo̧k jan kar jinoin. Ilo an kar Būreejtōnji eo Kein Kajuon kōjjeļā, “Ej juon oktak eo ilo kiiō wot, im jej kijoororļo̧k wot n̄an raan eo tampel ko renaaj bar pelļok.”²

Ikijooror n̄an raan eo jenaaj bar kōm̧m̧ani jerbal ko n̄an ro jibūd im jimaad bar juon alen. Mae iien raan eo, elukkun lōn̄ jerbal ko jemaron̄̄ kōm̧m̧ani wōt.

Kōjeram̧m̧an ko n̄an Kōmour

Elder Dale G. Renlund jān Doulul eo an Jon̄oulruo Rijiļōk ro ekar ba “ilo ad bōk koņaad ilo menmenbwij im jerbal an tampeļ rainin, jej likūt ‘kōmour’ in kōjeraam̧m̧an ko rikanaan ro im rijilōk ro rekar kallim̧ur kaki. Laajrak in eaitok ekūtbuuj kōjeraam̧m̧an kein:

Kōļapļo̧k meļeļe kōn Rilo̧mo̧o̧r eo im katok in pinmuur eo An;
Kōļapļo̧k kareel eo an Jetōb Kwojarjar n̄an en̄jake kajoor im tōl n̄an mour ko ad make;
Kōļapļo̧k tōmak, bwe oktak n̄an Rilo̧mo̧o̧r eo en m̧wilaļ im pād;
Kōļapļo̧k maron̄̄ im kareel n̄an katak im ukweļo̧k kōnke juon meļeļe kōn wōn kōj, ia eo jej itok jāne, im juon visōn eo ealikkar kōn ia eo jej etal n̄ane.
Kōļapļo̧k kōkōm̧anm̧anļo̧k, ko̧kwojarjarļo̧k, im kōjebwebweik ikdeleel ko an būruwōd;
Kōļapļo̧k lan̄lōn̄ jān juon maron̄̄ eo ej ļapļo̧k n̄an en̄jake iakwe eo an Irooj;
Kōļapļo̧k kōjeraam̧m̧an ko an baam̧le, jekdo̧o̧n kain jekjek rot ko kiiō, m̧okta, ak ilju eo an baam̧le ak ewi jon̄an an jab wājabdik menmenbwij eo ad emaron̄̄ in;
Kōļapļo̧k iakwe im kam̧m̧oolol kōn rūtto ro jibūd im jim̧aad im ro nukid remaron̄̄, im jejjab en̄jake ad make iaad.
Kōļapļo̧k kajoor n̄an kile ta eo emenin aikuj n̄an kōmouri im bwe, kōn jipan̄ eo an Irooj, jerbal n̄an ro jet;
Kōļapļo̧k kōjparok jān kapo ko im ļapļo̧k in kareel ko an rikapo eo; im
Kōlapļo̧k jipan̄ ko n̄an m̧adm̧od kabūņōņō ko, rub, im aikuj ko an būro ko kajojo im kōm̧m̧an bwe kinej eo an juon wot” (“Family History and Temple Work: Sealing and Healing,” Ensign ak Liahona, May 2018, 47).