1 Aonega merona ese tamana ena hahediba herevadia e kamonai henidiamu,a ḡonaḡona tawla ese sisiba herevadia se kamonaidiamu.

2 Uduna anina amo tau namona ese namo e aniamu,a kara heḡui-heḡui tauna ena ura be daḡedaḡe.

3 Uduna e nariamu tauna ese ena mauri nahuana e tohoamu,a uduna e haḡaia badabadamu tauna na sibona e hahedikamu.

4 Lahedo tauna lalona e ura dikadikamu, to ḡau ta se abiamu;a e ḡaukara malaka-malakamu tauna na ḡau e henia momomu.

5 Kara maoromaoro tauna ese koikoi e inai heniamu,a kara dika tauna na ena hemarai karadia daidiai e dadaraiamu.

6 Kara maoromaoro ese dala maoromaorona ai e rakamu tauna e gimaiamu,a dika ese kara dika tauna e hadarereamu.

7 Tau ta sibona taḡa tauna e hegwauraimu, to asi ena ḡau ta;ma ta sibona ogoḡami tauna e hegwauraimu, to ena taḡa na bada.

8 Tau ta ena mauri ibodohilaina na ena taḡa,a ogoḡami tauna na asi ena mauri ibodohilaina ḡauna.

9 Kara maoromaoro tauna diarina na mai moalena,a kara dika tauna lamepana na baine bodo.

10 Se henahua tohomu tauna ena ḡadeḡade ese heiri-heiri e havaraiamu,a aonega na sisiba e abia daemu taudia ediai.

11 E abi kava kohudia na bae ore haraḡa-haraḡa,a ena kohu taidia taidia amo e haboumu tauna ese ena taḡa baine habadaia.

12 Helaro mai halahena ese lalo-hisihisi e havaraiamu,a e haḡuḡurua urana na mauri auna.

13 Hereva e dadaraiamu tauna na sibona e hahedikamu,a haheḡani e matauraiamu tauna ese davana baine abia.

14 Aonega tauna ena hahediba herevadia na e lohilohia dae maurina,mase ena idoa ai basita kau helaoreana.

15 Lalo-parara ese lalo-namo e havaraiamu,a asi edia heabidadama taudia edia dala na e dika vaitanimu.

16 Lalo-parara tauna ese ḡau iboudiai mai aonegana ida e karamu,a kavakava tauna ese ena kavakava e heaḡilaiamu.

17 Gwaukau tauna dikana ese taunimanima na e hahekwakwanaidia dikadikamu,a gwaukau tauna mai momokanina ese hahemauri e mailaiamu.

18 Hahediba herevadia se kamonaimu tauna na e ogoḡamunu bona e hemaraimu,a sisiba herevadia e abi daemu tauna na e matauraiamu.

19 Ura ta anina idavarina na mai gaihona, tau lalona ai;a dika irakatanina na kavakava taudia ese e inai henia badamu.

20 Aonega taudia ida e raka heboumu tauna na e heaonegamu,a kavakava taudia e bamodiamu tauna na baine hekwakwanai.

21 Hahedika ese kara dika taudia e ḡavadiamu,a kara maoromaoro taudia ahudia na taḡa.

22 Tau namona ese garana ahudia e masetanimu;a kara dika tauna ena taḡa baine mia, kara maoromaoro tauna ena.

23 Ogoḡami tauna ena vahu gunana ese aniani momo e havaraiamua hahemaoro gageva-gagevana ese iena amo e daroa ohomu.

24 Se hekwadi momomu tauna ese natuna e inai heniamu,a natuna e ura heniamu tauna ese ia matana e hakania balahenimu.

25 Kara maoromaoro tauna na bogana e kunumu,a kara dika tauna na e hitoloamu.