¶ 1 BEA nae folofola a Jihova kia Mosese, o behe,

2 Fekau ki he fānau a Isileli, bea ke behe kiate kinautolu, Oka mou ka hoko ki he fonua ko Kenani; (koe fonua ia e to kiate kimoutolu koe tofia, io koe fonua ko Kenani moe gaahi gataaga fonua o ia:)

3 Bea ko ho mou gataaga ki he botu toga e mei he toafa o Sini o fai atu ki he mata fonua o Itomi, bea ko ho mou gataaga ki he botu toga e gata mei he matātahi oe tahi masima ki hahake:

4 Bea koe aluga o ho mou gataaga e gata mei he botu toga ki he hakeaga o Akilabime, o fai atu ki Sini: bea e mole atu ia ki he botu toga ki Ketesi‐bania, o fai atu ki he kolo ko Ata, o a‘u atu ki Asimoni:

5 Bea ko hono gataaga e fai atu mei Asimoni o a‘u ki he vaitafe o Ijibite, bea ko hono gataaga e mole atu ki he tahi.

6 Bea koeuhi ko hono gataaga ki luluga, e hoko ae tahi lahi ko ho mou gataaga: ko ho mou gataaga ia ki luluga.

7 Bea ko eni a ho mou gataaga ki tokelau: te mou fua atu maa moutolu mei he tahi lahi ki he mouga ko Hoa:

8 Mei he mouga ko Hoa te mou fakailoga‘i ho mou gataaga ki he huaga ki Hemati; bea e mole atu a hono gataaga o a‘u ki Sitati:

9 Bea e mole atu hono gataaga ki Sifiloni, bea e alu atu ia o a‘u ki he kolo ko Enani: ko eni ho mou gataaga ki tokelau.

10 Bea te mou fakailoga‘i ho mou gataaga ki hahake mei he kolo ko Enani ki Sifami:

11 Bea e alu hifo hono gataaga mei Sifami ki Libila, i he botu hahake o Aine; bea e alu hifo hono gataaga o a‘u ki he tafaaki oe tahi ko Kineleti ki hahake:

12 Bea e alu hifo hono gataaga ki Joatani, bea e mole atu ia ki he tahi masima: e hoko eni ko ho mou fonua mo hono gataaga fakatakamilo oia.

13 Bea nae fekau e Mosese ki he fānau a Isileli, o behe, Ko eni ae fonua aia te mou ma‘u i he talotalo, aia kuo fekau e Jihova ke foaki ki he faahiga e hiva, bea ki hono vaeua oe faahiga:

14 He koe faahiga oe fānau a Lubeni o fakatatau ki he fale oe nau gaahi tamai, moe faahiga oe fānau a Kata o fakatatau ki he fale oe nau gaahi tamai, kuo nau ma‘u ho nau tofia; bea ko hono vaeua oe faahiga o Manase kuo nau ma‘u ho nau tofia:

15 Koe faahiga e ua mo hono vaeua oe faahiga kuo nau ma‘u ho nau tofia i he kau vai ki heni o Joatani ki hahake, o haga ki he hoboaga laa.

¶ 16 Bea nae folofola a Jihova kia Mosese, o behe,

17 Koe gaahi higoa eni oe kau tagata te nau tufa ae fonua kiate kimoutolu: ko Eliesa koe taulaeiki, mo Josiua koe foha o Nuni.

18 Bea te mou fili mai ha eiki taki toko taha i he gaahi faahiga kotoabe, ke nau tufa ae fonua koe gaahi tofia.

19 Bea koe gaahi higoa eni oe kau tagata: i he faahiga o Juta, ko Kelebi koe foha o Jifune.

20 Bea mei he faahiga oe fānau a Simione, ko Simueli koe foha o Amihuti.

21 Mei he faahiga o Benijimani, ko Ilitati koe foha o Kisiloni.

22 Bea koe eiki oe faahiga oe fānau a Tani, ko Buki koe foha o Jokili.

23 Koe eiki oe fānau a Josefa, mei he faahiga oe fānau a Manase, ko Hanieli koe foha o Efoti.

24 Bea koe eiki oe faahiga oe fānau a Ifalemi, ko Kimueli koe foha o Sifitani.

25 Bea koe eiki oe faahiga oe fānau a Sebuloni, ko Ilisafani koe foha o Banaki.

26 Bea koe eiki oe faahiga oe fānau a Isaka, ko Baletili koe foha o Asana.

27 Bea koe eiki oe faahiga oe fānau a Aseli, ko Eihuti koe foha o Selomi.

28 Bea koe eiki oe faahiga oe fānau a Nafitali, ko Bitaeli koe foha o Amihuti.

29 Ko kinautolu eni nae fekau e Jihova ke nau vahevahe ae tofia ki he fānau a Isileli i he fonua ko Kenani.