¶ 1 BEA neu behe, Oku ou kole, fanogo akimoutolu ae kau mātua a Jekobe, bea mo kimoutolu ae houeiki oe fale o Isileli; ikai oku gali mo kimoutolu ke ilo ae fakamāu?

2 Akimoutolu oku fehia ki he lelei, ka e manako ki he kovi; aia oku fohi ho nau kili meiate kinautolu, bea mo ho nau kakano mei ho nau gaahi hui.

3 Akimoutolu oku kai ae kakano o hoku kakai foki, bea fohi a ho nau kili meiate kinautolu; bea oku nau feji‘i ho nau gaahi hui, mo tuutuu fakaikiiki akinautolu, o hage ka teu ki he kulo, bea hage koe kakano i he loto kulo.

4 Bea te nau toki tagi kia Jihova, ka e ikai te ne tokaga‘i kinautolu: koe mooni e fakafufu eia a hono fofoga meiate kinautolu i he kuoga koia, o hage koe nau gaue kovi i he e nau gaahi faiaga.

¶ 5 Oku behe e Jihova ki he kau balofita, aia oku fakahe‘i a hoku kakai; akinautolu oku uu aki ho nau nifo, bea kalaga, Fiemalie; bea koia oku ikai ke ai ki ho nau gutu, io, oku nau teu tau kiate ia:

6 Koia e iate kimoutolu ae bo, ke oua naa mou ma‘u ha mea ha mai; bea e bouli kiate kimoutolu ke oua naa mou kikite; bea e to ae laa ki he kau balofita, bea e bouli ae aho kiate kinautolu.

7 Bea e toki ma ae kau kikite, bea bubutuu ae kau fakailo mea: io, koe mooni, te nau ufiufi kotoabe ho nau lougutu; he oku ikai ha tali mei he Otua.

¶ 8 Ka koe mooni oku ou bito i he malohi mei he Laumalie o Jihova, bea moe fakamāu, moe faa fai, ke fakaha kia Jekobe ene hia, bea ki Isileli a ene agahala.

9 Oku ou kole, fanogo ki ai, akimoutolu ae kau mātua i he fale o Jekobe, moe houeiki oe fale o Isileli, aia oku fehia ki he fakamāu, mo liliu ae mea totonu kotoabe.

10 Oku nau laga a Saione aki ae toto, mo Jelusalema i he agahala.

11 Koe kau mātua i ai oku fakamāu ke ma‘u ae foaki, bea koe kau taulaeiki oia oku ako ke ma‘u totogi, bea oku kikite ae kau balofita ke ma‘u baaga; ka oku nau falala kia Jihova, mo behe, Ikai oku iate kitautolu a Jihova? e ikai ha kovi e hoko kiate kitautolu.

12 Koia, koeuhi ko kimoutolu e keli a Saione, o hage koe goue, bea e hoko a Jelusalema, koe gaahi tuuga, bea moe mouga oe fale, ke hage koe gaahi botu maoluga oe vao akau.