¶ 1 KOE folofola nae hoko mei a Jihova kia Jelemaia, o behe,

2 Oku folofola a Jihova koe Otua o Isileli, o behe, Ke ke tohi i he tohi ae gaahi lea kotoabe kuou lea aki kiate koe.

3 He oku behe e Jihova, Vakai, oku ha‘u ae gaahi aho aia teu toe omi ai ae kau bobula i hoku kakai ko Isileli mo Juta, oku behe e Jihova: bea teu bule kiate kinautolu ke nau foki ki ho nau fonua, aia naaku foaki ki he e nau gaahi tamai, bea te nau ma‘u ia.

¶ 4 Bea koe gaahi lea eni nae folofola aki e Jihova ki Isileli mo Juta.

5 He oku behe e Jihova; Kuo mau fanogo ki he le‘o oe tetetete, moe manavahe, kae ikai koe fiemalie.

6 Mou fehui eni, bea vakai be oku ai ha tagata oku laga ke faele? koeha oku ou mamata ai ki he tagata taki taha oku ai hono nima ki hono koga toto, o hage koe fefine oku laga, bea oku tetea ae mata kotoabe?

7 Oiaue! he oku lahi ae aho koia, he oku ikai hano tatau: io koe aho mamahi o Jekobe; ka e fakamoui ia mei ai.

8 He oku behe e Jihova oe gaahi kau tau, E hoko o behe i he aho koia, teu maumau‘i ae haamoga mei ho kia, bea teu motuhi ho gaahi ha‘i, bea e ikai te ne toe tauhi ki he kau muli:

9 Ka te nau tauhi kia Jihova ko ho nau Otua, mo Tevita ko ho nau tu‘i, aia teu fokotuu kiate kinautolu.

¶ 10 Koia oku behe e Jihova, Oua naa ke manavahe, E Jekobe ko eku tamaioeiki; bea oua naa ke bubutuu, E Isileli: koeuhi vakai, teu fakamoui koe mei he mamao, bea mo ho hako mei he fonua oe nau bobula; bea e tafoki a Jekobe, bea e mālōlō ia, mo fiemalie, bea e ikai fakailifia‘i ia e ha toko taha.

11 He oku behe e Jihova, Oku ou iate koe ke fakamoui koe: kabau teu fakaoji aubito ae gaahi kakai kuou fakamovete koe ki ai, ka e ikai teu fakaoji aubito koe: ka teu tautea fakajiijii koe, ka e ikai te ke hao aubito.

12 He oku behe e Jihova, Oku tae faa fakamoui ho fakavolu, bea oku kovi lahi ho lavea.

13 Oku ikai ha taha ke lagomaki‘i koe, ke ne nonoo ho lavea: oku ikai ha vai fakamoui kiate koe.

14 Kuo fakagalogalo‘i koe ekinautolu kotoabe nae ofa; oku ikai te nau kumi koe; he kuou tui aki koe ae ta ae fili, aki ae tautea lahi aubito, koeuhi ko hono lahi o hoo hia; bea koeuhi kuo tubu hoo gaahi agahala.

15 Koeha oku ke tagi ai koeuhi ko hoo mamahi? e ikai faa fakamoui ho lavea, koeuhi ko hono lahi o hoo hia: kuou fai ae gaahi mea ni kiate koe, koeuhi kuo tubu o lahi hoo gaahi agahala.

16 Koia e fakaauha akinautolu kotoabe oku fakaauha koe; bea e ave fakabobula taki taha kotoabe a ho gaahi fili; bea e maumau‘i akinautolu kotoabe oku nau maumau‘i koe, bea e tukuage ki he fakamalohi akinautolu kotoabe oku fakamalohi kiate koe.

17 He oku behe e Jihova, Teu fakamoui koe, bea teu fakamoui mo ho gaahi lavea; koeuhi naa nau ui koe, Koe liaki, o behe, Ko Saione eni, aia oku ikai kumi ki ai e ha taha.

¶ 18 Oku behe e Jihova; Vakai, teu toe liliu ae bobula oe gaahi fale fehikitaki o Jekobe, bea teu ofa ki hono gaahi nofoaga; bea e laga ae kolo i hono mouga oona, bea tuu mau be ae fale fehikitaki i hono aga mua.

19 Bea e alu atu mei ai ae fakafetai bea moe le‘o okinautolu oku fakafiefia: bea teu fakatoko lahi akinautolu, bea e ikai te nau toko jii; bea teu fakaogoogolelei‘i akinautolu, bea e ikai te nau māulalo.

20 Bea e i ai e nau fānau o hage koia i mua, bea e fakatuumau e nau fakataha i hoku ao, bea teu tautea akinautolu kotoabe oku fakamalohi‘i akinautolu.

21 Bea e tubu ho nau houeiki i ho nau faahiga, bea e tubu iate kinautolu a ho nau bule; bea teu bule ke ne unuunu mai, bea te ne ha‘u kiate au: he kohai eni naa ne ue‘i hono loto ke ha‘u kiate au? Oku behe e Jihova.

22 Bea te mou hoko ko hoku kakai, bea teu hoko ko ho mou Otua.

23 Vakai, oku alu atu ae ahiohio a Jihova o malohi lahi aubito, koe ahiohio mau ai be: e to ia koe fakamamahi ki he ulu oe agahala.

24 E ikai fakatafoki ae houhau kakaha o Jihova, kae oua ke ne fai ia, bea ke oua ke ne fai ki he tuutuuni a hono loto: te mou ilo ae mea ni i he gaahi aho amui.