¶ 1 BEA e hoko o behe, kabau te ke tokaga lelei ki he fono a Jihova ko ho Otua, ke tokaga mo fai ene gaahi fekau kotoabe aia oku ou fekau‘i koe he aho ni, e hiki koe a Jihova ko ho Otua ke ke maoluga lahi koe i he gaahi buleaga kotoabe o mamani:

2 Bea e hoko kiate koe ae gaahi tabuaki ni kotoabe, o fetaomi kiate koe, o kabau te ke tokaga ki he le‘o o Jihova ko ho Otua.

3 E monuia koe i he kolo, bea e monuia koe i he goue.

4 E monuia ae fua o ho jino, moe fua o hoo goue, moe fua o hoo faga manu, mo hono tubu o hoo faga manu lalahi, mo hoo gaahi faga sibi.

5 E monuia hoo kato mo ho feleoko.

6 Te ke monuia koe i hoo hu mai, bea monuia i hoo alu kituaa.

7 E bule E Jihova ke teia i ho ao a ho gaahi fili oku tuu hake kiate koe: te nau ha‘u kiate koe i he hala e taha, bea hola meiate koe i he hala e fitu.

8 E fekau e Jihova ene tabuaki kiate koe i he gaahi fale faoaga koloa, bea i he mea kotoabe oku ke ai ho nima ki ai; bea te ne tabuaki koe i he fonua aia oku foaki kiate koe e Jihova ko ho Otua.

9 E fokotuu mau koe e Jihova koe kakai maonioni kiate ia, o hage ko ene fuakava kiate koe, o kabau te ke tauhi ae gaahi fekau a Jihova ko ho Otua, o eveeva i hono gaahi hala.

10 Bea e mamata e he kakai kotoabe o mamani, kuo ui koe i he huafa o Jihova; bea te nau manavahe kiate koe.

11 Bea e gaohi koe e Jihova ke lahi hoo lelei, i he gaahi fua o ho jino, bea i he fua o hoo faga manu lalahi, bea i he gaahi fua o ho fonua, i he fonua aia nae fuakava ai a Jihova ki hoo gaahi tamai ke foaki kiate koe.

12 E too kiate koe a Jihova a ene koloa lelei, ae lagi ke foaki mai ae uha ki ho fonua i hono faahita‘u totonu, bea ke tabuaki ae gaue kotoabe a ho nima: bea te ke nono atu koe ki he gaahi buleaga lahi, ka e ikai te ke no mai.

13 Bea e gaohi koe e Jihova koe ulu, ka oku ikai koe hiku; bea te ke maoluga be akoe, kae ikai te ke maulalo; o kabau te ke tokaga ki he gaahi fekau a Jihova ko ho Otua, aia oku ou fekau kiate koe he aho ni, ke tokaga ki ai o fai:

14 Bea e ikai te ke afe mei ha lea e taha aia oku ou fekau kiate koe he aho ni, ki he nima toomatau, be ki he toohema, ke muimui i ha gaahi otua kehe ke tauhi akinautolu.

¶ 15 Ka e hoko o behe, o kabau e ikai te ke fanogo ki he le‘o o Jihova ko ho Otua, ke tokaga o fai ki he ene gaahi fekau kotoabe mo ene gaahi tuutuuni aia oku ou fekau kiate koe he aho ni; e hoko ai ae gaahi malaia ni kiate koe o ne fetaomi kiate koe:

16 Te ke malaia koe i he kolo, bea malaia koe i he goue.

17 Te ke malaia koe i hoo kato, bea i ho feleoko.

18 E malaia ae fua o ho jino, moe fua o ho fonua, moe tubu o hoo faga manu lalahi, moe faga sibi.

19 E malaia koe i hoo hu mai, bea malaia koe oka ke ka alu kituaa.

20 E fekau e Jihova kiate koe ae malaia, moe mamahi, moe tautea, i he mea kotoabe oku ke ai ho nima ki ai ke fai, ka ke auha koe, bea ke mole o oji vave; koe mea i he kovi o hoo gaahi gaue, aia kuo ke liaki ai au.

21 E fakabikimau kiate koe e Jihova ae mahaki fakaauha, ke ne fakaauha ai koe mei he fuga oe fonua, aia oku ke alu ki ai ke ma‘u.

22 E ta‘i koe e Jihova aki ae fakaauaujino, bea moe mofi, bea moe hagatamaki, bea moe vela lahi aubito, bea moe heleta, bea moe mahunu, moe bobo; bea te nau tuli koe ke ke auha ai.

23 Bea e hoko ae lagi oku i oluga i ho ulu koe balasa, bea koe kelekele oku i lalo iate koe e hoko koe ukamea.

24 E gaohi e Jihova ae uha o ho fonua koe efu moe efuefu: e alu hifo ia mei lagi kiate koe ke ke auha ai.

25 E bule e Jihova ke ta‘i koe i he ao o ho gaahi fili: ke ke alu kituaa koe i he hala e taha kiate kinautolu, bea te ke hola i he hala e fitu mei ho nau ao: bea e fetuku koe ki he gaahi buleaga kotoabe o mamani.

26 Bea e hoko ho agaaga koe mea kai ia ki he faga buna oe āta, bea ki he faga manu oe fonua, bea e ikai fakaseesee akinautolu e ha toko taha.

27 Bea e ta‘i koe e Jihova aki ae bala o Ijibite, moe mahaki kovi, moe boku, moe veli, aia oku ikai faa fakamoui koe mei ai.

28 E ta‘i aki koe e Jihova ae faha, moe kui, moe lilika oe loto:

29 Bea te ke tautaufā i he hoata, o hage koe kui oku tautaufā i he bouli, bea e ikai te ke monuia i ho gaahi hala: bea e fakamoulaloa mau ai be koe mo maumau‘i ai be, bea e ikai fakamoui koe e ha toko taha:

30 Te ke boloi ho unoho bea e mohe ia moe tagata kehe: te ke laga ha fale, ka e ikai te ke nofo ki ai: te ke to ae goue vaine, ka e ikai te ke ma‘u hono gaahi fua.

31 E tamate‘i hoo bulu i ho ao, ka e ikai te ke kai ia: e too o ave fakamalohi be a hoo asi mei ho ao, bea e ikai toe omi kiate koe: e foaki a hoo faga sibi ki ho gaahi fili, bea e ikai iate koe ha toko taha ke toe ma‘u mai ia.

32 Ko ho gaahi foha mo ho gaahi ofefine e foaki ki he kakai kehe, bea e fakajio ho mata, bea mole i he holi kiate kinautolu i he aho kotoa: bea e ikai ha mafai i ho nima.

33 Koe fua o ho fonua, mo hoo gaue kotoabe, e kai o oji ia e ha buleaga aia oku ikai te ke iloa; bea e fakamoulaloa‘i koe mo taomia mau ai be.

34 Koia te ke faha ai i he mamata e ho mata aia te ke mamata ki ai.

35 E ta‘i koe e Jihova i ho tui, bea i ho va‘e, aki ae bala aia e ikai faa fakamoui, mei ho aofi va‘e o a‘u ki ho tumuaki.

36 E omi koe e Jihova moe tu‘i aia te ke fakanofo ke bule kiate koe, ki he buleaga aia nae ikai te ke ilo ekoe, be ko hoo gaahi tamai; bea te ke tauhi i ai ae gaahi otua kehe, koe akau moe maka.

37 Bea te ke hoko koe, koe ofoaga, moe lauikoviaga, moe lumaaga, i he gaahi buleaga kotoabe aia e tataki koe ki ai e Jihova.

38 Te ke fetuku ae tega lahi ki he goue, ka ke omi ae mea jii mei ai; koeuhi e kai o oji ia e he hee.

39 Ke ke to ae gaahi goue vaine, bea auhani ia, ka e ikai te ke inu hono uaine, be tanaki hono fua, koeuhi e kai ia e he unufe.

40 Ke ke ma‘u ae akau koa olive i he gaahi botu fonua kotoabe, ka e ikai te ke bani aki koa ae lolo; koeuhi e li hono fua e ho olive.

41 E tubu iate koe ae gaahi foha moe gaahi ofefine, ka e ikai te ke ma‘u ha fiemalie iate kinautolu; he te nau alu o nofo bobula.

42 Ko ho gaahi akau kotoabe moe fua o ho fonua e fakaoji ia e he hee.

43 Koe muli oku iate koe e hiki maoluga lahi iate koe; bea e fakahifo koe ke maulalo aubito.

44 E no atu eia kiate koe, bea e ikai te ke nono kiate ia: e hoko koe ulu ia bea koe hiku koe.

45 Bea koeuhi koe gaahi malaia ni e hoko kiate koe, te nau tuli koe, bea ma‘u koe, kae oua ke auha koe; koe mea i he ikai te ke tokaga ki he le‘o o Jihova ko ho Otua, ke tauhi ene gaahi fekau mo ene tuutuuni aia naa ne fekau‘i koe:

46 Bea te nau iate koe, koe fakailoga, moe mea fakaofo, bea ki ho hako o taegata.

47 Koe mea i he ikai te ke tauhi a Jihova ko ho Otua i he agatonu moe fiefia oe loto, koeuhi koe mahu mea lelei kotoabe;

48 Koia te ke tauhi ai a ho gaahi fili aia e fekau e Jihova ke tuu hake kiate koe, i he fiekaia, moe fieinu, bea i he telefua, bea i he majiva i he mea kotoabe: bea te ne ai ae haamoga ukamea ki ho kia, koeuhi ke ne fakaauha koe.

49 E omi e Jihova ae buleaga kiate koe mei he mamao, mei he gataaga o mamani, o hage koe buna ae ikale; ae buleaga koe lea a nautolu e ikai te ke ilo‘i;

50 Koe buleaga oku mata malohi, aia e ikai te nau tokaga ki he jino oe motua, be fakaha ha ofa ki he talavou:

51 Bea e kai eia hono tubu o hoo faga manu lahi, moe fua o ho fonua, ke oua ke ke auha koe: aia foki e ikai te nau tuku kiate koe ha uite, be ha uaine, be ha lolo, be koe tubu o hoo faga manu lalahi, be ha faga sibi, kae oua ke ne fakaauha koe.

52 Bea te ne tau‘i koe i ho gaahi mataba kotoabe, ke holoki hifo a ho gaahi a maoluga mo tali tau, aia oku ke falala ki ai, i ho fonua kotoabe: bea te ne tau‘i koe i he gaahi mataba kotoabe i he botu fonua kotoabe, aia kuo foaki kiate koe e Jihova ko ho Otua.

53 Bea te ke kai ae fua o ho jino oou, koe kakano o ho gaahi foha, bea mo ho gaahi ofefine, aia kuo foaki kiate koe e Jihova ko ho Otua, koe mea i he tau, bea i he kabui koe e ho gaahi fili aia te nau fakamamahi‘i ai koe.

54 Koe tagata iate kimoutolu aia oku vaivai bea mamahi gofua, e kovi hono mata ki hono tokoua, bea ki he unoho o hono fatafata, bea ki hono toe o ene fānau aia e liaki:

55 Koia e ikai atu ai eia ki ha toko taha ha koga jii oe kakano o ene fānau aia oku ne kai: koeuhi oku ikai ha mea oku toe kiate ia i he tau, moe fakahoge, aia e fakamamahi aki koe e ho gaahi fili i ho gaahi mataba.

56 Koe fefine vaivai mo mamahi gofua iate kimoutolu, aia nae ikai meimei tuku hono aofiva‘e ki he kelekele koeuhi koe vaivai moe mamahi gofua, e kovi hono mata ki he unoho o hono fatafata, bea ki he ene tama, bea ki he ene taahine,

57 Bea ki he tamajii oku ha‘u i he vahaa o hono va‘e, bea ki he ene fānau te ne fanau‘i: he te ne kai fakafufu ia i he ene majiva i he mea kotoabe i he tau moe fakahoge, aia e fakamamahi aki koe e ho fili i ho gaahi mataba.

58 Kabau e ikai te ke tokaga ke fai ae gaahi lea kotoabe oe fono ni aia kuo tohi i he tohi ni, koeuhi ke ke manavahe ki he huafa nāunāuia mo fakamanavahe ni, KO JIHOVA KO HO OTUA;

59 Behe e toki gaohi e Jihova hoo gaahi tautea ke fakamanavahe, bea moe tautea ki ho hako, io, koe tautea lahi, o fuoloa, moe gaahi mahaki lahi, bea fai fuoloa.

60 Kae umaa foki a ene omi kiate koe ae gaahi mahaki o Ijibite, aia naa ke manavahe ai; bea te nau biki mau kiate koe.

61 Bea moe gaahi mahaki kotoabe, moe gaahi tautea kotoabe, aia oku ikai tohi i he tohi oe fono ni, e omi ia e Jihova kiate koe, kae oua ke ke auha koe.

62 Bea e tuku akimoutolu ke mou toe toko jii be, ka naa mou tatau moe gaahi fetuu oe lagi i hono toko lahi: koe mea i he ikai te ke fai talagofua ki he le‘o o Jihova ko ho Otua.

63 Bea e hoko o behe, hage nae fiefia a Jihova kiate kimoutolu ke fai lelei kiate kimoutolu, bea ke fakatokolahi akimoutolu: e behe, e fiefia a Jihova kiate kimoutolu ke fakaauha akimoutolu, bea ke fakaoji akimoutolu; bea e hamuji akimoutolu, mei he fonua aia oku ke alu ki ai ke ma‘u ia.

64 Bea e fakahe‘i koe e Jihova ki he kakai kotoabe, mei he gataaga e taha o mamani o a‘u atu ki hono gataaga e taha; bea te ke tauhi i ai ae gaahi otua kehe, aia nae ikai te ke ilo ekoe, be ko hoo gaahi tamai, io ae akau moe maka.

65 Bea e ikai te ke ilo ae fiemalie i he gaahi buleaga koia, bea e ikai ha mālōlō ki ho aofiva‘e: ka e tuku kiate koe e Jihova ae loto tetetete i ai, moe vaivai oe mata, moe mamahi oe loto:

66 Bea e ikai te ke ilo be te ke moui be te ke mate; bea te ke mamahi i he aho moe bo, bea e ikai te ke ma‘u fakamooni ki hoo moui:

67 Te ke behe i he bogibogi, Amujiaage kuo efiafi! bea i he efiafi te ke behe, Amujiaage kuo bogibogi! koe mea i he manavahe o ho loto, aia te ke manavahe ai, bea i he mamata e ho mata aia te ke mamata ki ai.

68 Bea e toe omi koe e Jihova ki Ijibite i he gaahi vaka, i he hala aia naaku lea ki ai kiate koe, E ikai te ke toe mamata ki ai: bea e fakatau akimoutolu i ai ki ho mou gaahi fili koe kau tagata bobula moe kau fefine bobula; bea e ikai ha tagata te ne fie fakatau  akimoutolu.