¶ 1 NAE lelei kia Talaiasi ke fakanofo i he buleaga ae houeiki e toko teau ma toko uofulu, ke maoluga i he buleaga kotoabe;

2 Bea ke maoluga iate kinautolu ae kau bule e toko tolu; bea koe uluaki iate kinautolu a Taniela; koeuhi ke fakaha e he houeiki ae gaahi gaue kiate kinautolu, bea ke oua naa hoko ha kovi ki he tu‘i i ha mea.

3 Bea nae fokotuu ki mua ae Taniela ni i he kau bule moe houeiki, koeuhi nae ilo ae atamai lelei iate ia, bea nae fakakaukau ae tu‘i ke fakanofo ia koe bule ki he buleaga kotoabe.

4 Bea nae toki kumi e he kau bule moe houeiki ke nau ilo ha mea kia Taniela i he buleaga; ka nae ikai te nau ilo ha mea be ha kovi; he naa ne agatonu, bea nae ikai ke ilo ha kovi be ha fai hala iate ia.

5 Bea nae behe e he kau tagata ni, E ikai te tau ilo ha mea i he Taniela ni ka i he e tau ma‘u ha mea oku kau kiate ia moe fono a hono Otua.

6 Bea nae toki fakataha ae kau bule moe houeiki koia ki he tu‘i, bea nau behe kiate ia, E tu‘i ko Talaiasi, ke ke moui o taegata.

7 Kuo fealeleaaki fakataha ae kau bule kotoabe oe buleaga moe kau bule  oe gaahi vahe fonua, moe houeiki, moe kau fakamatala fono, moe gaahi eiki tau, ke fokotuu ha fono fakabuleaga mo fokotuu ke mau ha tabu, koeuhi koia kotoabe e fai ha kole ki ha otua be ki ha tagata i he aho e tolugofulu, ka kiate koe be, e tu‘i, ke li ia ki he ana oe faga laione.

8 Bea koeni, e tu‘i, ke ke fokotuu ae fono, mo ke ai ho higoa ki he tohi, koeuhi ke oua naa fakakehe‘i ia, kae fakatatau ia ki he fono oe kakai Mitia mo Beasia, aia oku ikai ke feliliuaki.

9 Koia nae tohi ai e Talaiasi ki he tohi moe fono.

10 Bea i he ilo e Taniela, kuo tohi ae fono, naa ne hu ki hono fale, bea koe gaahi mataba jioata i hono fale mohe nae ava ki Jelusalema, bea naa ne tomabee o tuulutui o liuga tolu i he aho, bea ne lotu mo fakafetai i he ao o hono Otua, o hage ko ene faa fai i mua.

11 Bea nae toki fakataha ae kau tagata ni, bea naa nau ilo a Taniela, oku ne lotu mo fai ene hu i he ao o hono Otua.

12 Bea naa nau unuunu atu, o lea i he ao oe tu‘i ki he fono ae tu‘i. Ikai kuo ke tohi ae fono, ke iloga ha tagata e fai ha kole ki ha otua be ha tagata i he aho e tolugofulu, ka kiate koe be, e tu‘i, e li ia ki he ana oe faga laione? Bea nae lea ae tu‘i o ne beheage, Oku mooni ae mea, o fakatatau ki he fono ae kakai Mitia mo Beasia, aia oku ikai ke liliu.

13 Bea naa nau lea o behe i he ao oe tu‘i, Koe Taniela na aia oku i he fānau bobula o Juta, oku ikai te ne tokaga kiate koe, be ki he fono aia kuo ke tohi, ka oku ne fai ene lotu o liuga tolu i he aho.

14 Bea i he fanogo ae tu‘i ki he lea ni, naa ne mamahi lahi, bea nae tokaga lahi hono loto kia Taniela ke fakahaofi ia, bea naa ne feiga o a‘u ki he to hifo ae laa ke fakahaofi ia.

15 Bea nae toki fakataha ae kau tagata ni ki he tu‘i, bea nau behe ki he tu‘i, Ke ke ilo, e tu‘i, oku behe ae fono ae kakai Mitia mo Beasia, ke iloga ha fono be ha tabu oku fokotuu e he tu‘i, e ikai jii liliu ia.

16 Bea nae toki fekau e he tu‘i, bea naa nau omi a Taniela, bea li ia ki he ana oe faga laione. Ka nae lea ae tu‘i o ne behe kia Taniela, Ko ho Otua, aia oku ke faa tauhi, te ne fakahaofi koe.

17 Bea nae omi ha maka, o ai ki he gutu oe ana; bea nae buluji ia e he tu‘i aki hono fakailoga oona, bea moe fakailoga o ene houeiki; koeuhi ke oua naa liliu ae mea kia Taniela.

18 Bea nae alu ae tu‘i ki hono fale, bea ne aukai i he bo o aho, bea nae ikai ke omi ki hono ao ae gaahi mea faji hiva: bea nae mahui ae mohe meiate ia.

19 Bea nae tuu hake ae tu‘i i he bogibogi o hegihegi aubito, bea ne alu fakavave ki he ana oe faga laione.

20 Bea i he ene hoko ki he ana, naa ne kalaga i he le‘o mamahi kia Taniela; bea nae lea ae tu‘i o behe kia Taniela, E Taniela, koe tamaioeiki ae Otua moui, oku malohi ho Otua aia oku ke tauhi mau ai be, ke fakahaofi koe mei he faga laione?

21 Bea nae behe e Taniela ki he tu‘i, E tu‘i, ke ke moui o taegata.

22 Kuo fekau e hoku Otua a ene agelo, bea kuo tabuni ae gutu oe faga laione ke oua naa nau fakamamahi au: koeuhi nae ilo ae lelei iate au i hono ao: bea i ho ao foki e tu‘i nae ikai teu fai kovi.

23 Koia nae fiefia lahi aubito ae tu‘i koeuhi koia, bea ne fekau ke nau too hake a Taniela mei he ana. Koia nae too hake a Taniela mei he ana, bea nae ikai ilo ha lavea jii iate ia, koeuhi naa ne tui ki hono Otua.

¶ 24 Bea nae fekau e he tu‘i ke nau omi ae kau tagata koia nae talatalaaki‘i a Taniela, bea naa nau li akinautolu ki he ana oe faga laione, akinautolu, moe nau fānau, mo ho nau gaahi unoho; bea nae malohi ae faga laione kiate kinautolu, bea feji‘i fakaikiiki ho nau gaahi hui kotoabe, i he teeki te nau hoko hifo ki he takele oe ana.

25 Bea nae tohi e he tu‘i ko Talaiasi ki he kakai kotoabe, moe gaahi buleaga moe gaahi lea, aia oku nofo i mamani fulibe; Ke tubulekina ae melino kiate kimoutolu.

26 Oku ou fai fono, koeuhi ke tetetete mo ilifia ae kakai ki he Otua o Taniela, i he gaahi botu kotoabe o hoku buleaga: he koe Otua moui ia, bea oku tuu mau, o taegata: ko hono buleaga e ikai auha, bea ko ene bule e a‘u atu ki he gataaga.

27 Oku ne malu‘i mo fakahaofi, bea oku ne fai ae gaahi mana moe gaahi mea fakaofo i he lagi mo mamani, koia ia kuo fakahaofi a Taniela mei he malohi oe faga laione.

28 Bea nae monuia ae Taniela ni i he kei bule a Talaiasi, bea moe bule a Kolesi koe Beasia.