¶ 1 BEA i hono ua ta‘u oe bule a Nebukanesa, nae miji a Nebukanesa ae gaahi miji: aia nae mamahi ai a hono loto, bea nae mahui ene mohe meiate ia.

2 Koia nae fekau ai e he tu‘i ke ui ae kau fiemana, moe kau asitolonoma, moe kau tuki, moe kau Kalitia, koeuhi ke nau fakaha ki he tu‘i a ene gaahi miji. Koia naa nau ha‘u o tuu i he ao oe tu‘i.

3 Bea nae behe e he tu‘i kiate kinautolu, Kuou miji ha miji, bea nae mamahi hoku loto keu ilo‘i ae miji.

4 Bea nae lea ae kau Kalitia ki he tu‘i, i he lea faka‐Silia, E tu‘i ke ke moui o taegata: tala ki hoo kau tamaioeiki ae miji, bea te mau fakaha hono uhiga.

5 Bea nae lea ae tu‘i o behe, ki he kau Kalitia; Kuo mole ae mea meiate au: kabau e ikai te mou fakaha kiate au ae miji, mo hono uhiga oia, e tuutuu fakaikiiki aki moutolu, bea e gaohi ho mou gaahi fale koe tuuga otoota.

6 Bea kabau te mou fakaha ae miji, bea mo hono uhiga oia, te mou ma‘u meiate au ae gaahi mea foaki, moe gaahi totogi, moe fakaabaaba lahi: koia te mou fakaha mai ae miji, mo hono uhiga oia kiate au.

7 Bea nae toe lea akinautolu o behe, Ke fakamatala e he tu‘i ae miji ki he ene kau tamaioeiki, bea te mau fakaha hono uhiga oia.

8 Bea lea ae tu‘i o beheage, Oku ou ilo bau oku mou loto ke fakatuai; koeuhi oku mou ilo kuo mole ae mea meiate au.

9 Bea kabau e ikai te mou fakaha kiate au ae miji, oku ai ae fono be taha kiate kimoutolu: he kuo mou teuteu ae gaahi lea kākā mo kovi ke lea aki i hoku ao, ke oua ke ai ha kuoga kehe; koia, fakaha mai ae miji, bea teu ilo ai oku mou mafai ke fakaha hono uhiga.

10 Bea nae lea ae kau Kalitia i he ao oe tu‘i, o behe, Oku ikai ha tagata i mamani e mafai ke fakaha ae mea ni ae tu‘i; koia oku heeki ai ha tu‘i, be ha eiki, he ha bule, kuo fehui ki ha taha fai mana, be ki ha asitolonoma, be koe Kalitia, ki ha gaahi mea behe.

11 Bea koe mea oku tokaga ki ai ae tu‘i, koe mea lahi: bea oku ikai ha niihi kehe e fakaha ia ki he tu‘i, ka koe gaahi otua aia oku ikai nofo moe kakano.

12 Bea koeuhi koe mea ni nae houhau ae tu‘i, bea matuaki lili, bea ne fekau ke fakaauha ae kau tagata boto kotoabe i Babilone.

13 Bea nae fanogonogo ae fono ke tamate‘i ae kau tagata boto; bea naa nau kumi a Taniela, mo ene gaahi kau mea ke tamate‘i akinautolu.

14 Bea nae tali fakakaukau boto e Taniela, kia Alioke, koe eiki oe kau leo ae tu‘i, aia nae alu atu ke tamate‘i ae kau tagata boto o Babilone;

15 Nae lea ia o behe kia Alioke, koe eiki tau ae tu‘i, Koeha oku vave behe ai ae fono mei he tu‘i? Bea nae toki fakaha e Alioke ae mea kia Taniela.

16 Bea toki alu atu ai a Taniela ki he tu‘i o ne kole ke ne fakatotoka mua, bea te ne fakaha ki he tu‘i a hono uhiga.

17 Bea nae alu a Taniela ki hono fale, bea ne fakaha ae mea kia Hanania, mo Misaeli, mo Asalia, a ene gaahi kaumea.

18 Koeuhi ke nau kole ae gaahi aloofa mei he Otua oe lagi, koeuhi koe mea fufu ni: bea ke oua naa auha a Taniela, mo ene gaahi kaumea, fakataha moe kau tagata boto kehe o Babilone.

¶ 19 Bea nae toki fakaha ae mea fufu kia Taniela i he mea ha mai i he bo. Bea nae fakafetai a Taniela ki he Otua oe lagi.

20 Nae lea a Taniela o behe, Oku monuia ae huafa oe Otua, o taegata bea taegata; he oku oona ae boto moe malohi:

21 Bea oku ne liliu ae gaahi kuoga, moe gaahi faahita‘u: oku ne ave ae gaahi tu‘i, bea oku ne fokotuu ae gaahi tu‘i: oku ne foaki ae boto ki he kau boto, moe ilo kiate kinautolu oku ilo loto.

22 Oku ne fakaha ae gaahi mea loloto mo fufu: oku ne afio‘i ae gaahi mea oku i he bouli, bea oku nofo iate ia ae māma.

23 Oku ou fakafetai mo fakamalo kiate koe, akoe koe Otua o eku gaahi tamai, akoe kuo ke foaki mai kiate au ae boto, moe malohi, bea kuo ke toki fakaha mai kiate au, aia nau mau kole iate koe; he kuo ke fakaha mai kiate kimautolu ae mea ae tu‘i.

¶ 24 Koia nae alu a Taniela kia Alioke, aia nae fekau‘i e he tu‘i ke fakaauha ae kau tagata boto o Babilone: bea naa ne behe kiate ia; Oua naa ke fakaauha ae kau tagata boto o Babilone: ka ke ave au ki he ao oe tu‘i, bea teu fakaha ki he tu‘i hono uhiga.

25 Bea nae omi fakatootoo e Alioke a Taniela, ki he ao oe tu‘i, bea nae behe eia kiate ia, Kuou ilo ae tagata i he kau bobula o Juta, aia te ne fakaha ki he tu‘i a hono uhiga.

26 Nae folofolage ae tu‘i o behe kia Taniela, aia nae higoa ko Belitisasa, Oku ke faa fai ke fakaha kiate au ae miji, aia naaku mamata ai mo hono uhiga oia?

27 Bea lea a Taniela i he ao oe tu‘i, o behe, Koe mea fufu aia kuo eke e he tu‘i, e ikai lava‘i e he kau tagata boto, be e he kau asitolonoma, be e he kau fai mana, be e he kau kikite, ke fakaha ki he tu‘i.

28 Ka oku ai ha Otua i he lagi, aia oku fakaha ae gaahi mea fufu, bea oku ne fakaha ki he tu‘i ko Nebukanesa, aia e hoko i he gaahi aho amui. Ko eni ia a hoo miji, bea moe gaahi mea ha mai ki ho ulu i ho mohega:

29 Koeuhi ko koe e tu‘i, nae tubu hake iate koe ae gaahi fakakaukau i ho mohega ki he mea e hoko amui: bea koia oku fakaha ae gaahi mea fufu, oku ne fakaha kiate koe ae gaahi mea e hoko.

30 Ka koeuhi ko au, oku ikai ke fakaha ae mea fufu ni kiate au, koeuhi ko haaku boto oku lahi hake i he kakai moui kotoabe, ka koeuhi ko kinautolu e fakaha hono uhiga ki he tu‘i, bea koeuhi ke ke ilo be ekoe, ae gaahi mahalo o ho loto.

¶ 31 Ko koe, e tu‘i, naa ke mamata, bea vakai, koe fuu mea fakatātā. Koe fuu mea fakatātā ni aia nae lelei aubito ene gigila, nae tuu i ho ao, bea nae fakamanavahe hono aga.

32 Koe ulu oe mea fakatātā ni koe koula lelei ia, ko hono fatafata mo ono nima, koe siliva, ko hono kete, mo ono tega koe balasa,

33 Ko hono loto tega o fai ki hono va‘e koe ukamea, ko hono va‘e koe koga oe ukamea, moe koga oe umea.

34 Naa ke mamata ai be mo ene ta mai ha maka nae ikai kau ai ha nima, bea ne ta‘i aki ia ae va‘e oe mea fakatātā, aia nae fefiofi ai ae ukamea mo umea, bea nae lailai ia ke momo.

35 Bea nae toki maumau‘i fakataha ae ukamea, moe umea, ae balasa, moe siliva bea moe koula, bea nae hoko o hage koe kafukafu i he gaahi hahaaga i he faahita‘u mafana; bea nae viligia i he matagi, bea nae ikai ke ilo ha botu ki ai, bea koe maka nae ta aki ae mea fakatātā nae hoko ia koe fuu mouga o ne fakafonu a mamani kotoabe.

¶ 36 Ko eni ae miji; bea te mau fakaha i he ao oe tu‘i a hono uhiga oia.

37 Ko koe, e tu‘i, koe tu‘i koe oe gaahi tu‘i, he kuo foaki kiate koe e he Otua oe lagi ha buleaga moe bule, moe malohi moe nāunāu.

38 Bea i he gaahi botu kotoabe oku nofo ai ae fānau ae tagata, kuo ne tuku ki ho nima ae faga manu kotoabe oe vao, moe faga manu buna kotoabe oe atā, bea kuo ne fokotuu koe koe bule kiate kinautolu kotoabe; ko koe koe ulu ni oe koula.

39 Bea e tubu ki mui iate koe ha buleaga kehe, o jii hifo iate koe, mo ha buleaga kehe, ko hono tolu, oe balasa, aia e fai ae bule i mamani kotoabe.

40 Bea ko hono fa oe buleaga e malohi ia o hage koe ukamea; he koeuhi oku maumau mo iku‘i e he ukamea ae gaahi mea kotoabe: bea hage oku maumau e he ukamea ae gaahi mea ni, te ne laiki mo fakavolu.

41 Bea koeuhi i hoo mamata ki he va‘e moe gaahi louhi‘i va‘e, koe koga oe umea, moe koga oe ukamea, e vahevahe ae buleaga; ka e i ai ae malohi oe ukamea; he koeuhi naa ke mamata ki he ukamea nae fefiofi moe umea belebela.

42 Bea hage koe gaahi louhi‘i va‘e, nae ukamea ha koga bea umea ha koga, e behe ae buleaga, e malohi ha koga bea belebelegeji ha koga.

43 Bea hage naa ke mamata ki he ukamea nae fefiofi moe umea belebela, te nau fefiofi‘i akinautolu moe hako oe tagata, ka e ikai te nau febikitaki, o hage oku ikai ke fefiofi ae ukamea moe umea.

44 Bea i he gaahi aho oe gaahi tu‘i ni e fokotuu e he Otua oe lagi, ha buleaga, aia e ikai auha o lauikuoga: bea e ikai tuku ae buleaga ki ha kakai kehe, ka te ne laiki mo fakaauha ae gaahi buleaga ni kotoabe, bea e tuu mau ia o taegata.

45 Bea koeuhi naa ke mamata, nae ta ae maka mei he mouga tae kau ai ha nima, bea naa ne maumau‘i ae ukamea, ae balasa, ae umea, ae siliva, bea moe koula; kuo fakaha e he Otua lahi ki he tu‘i, aia e hoko amui: bea oku mooni ae miji, bea ko hono uhiga oia oku mau.

¶ 46 Bea nae to hifo ae tu‘i ko Nebukanesa ki hono fofoga, bea ne hu kia Taniela, bea ne fekau ke nau atu ha feilaulau moe gaahi mea namu kakala kiate ia.

47 Nae lea ae tu‘i kia Taniela, bea ne behe Koe mooni ko ho mou Otua, koe Otua oe gaahi otua bea moe Eiki oe gaahi tu‘i, bea koia oku fakaha ae gaahi mea fufu, koeuhi naa ke mafai ke fakaha ae mea fufu ni.

48 Bea nae gaohi a Taniela e he tu‘i, koe tagata lahi, bea ne foaki kiate ia ae gaahi mea lahi kehekehe, bea ne fokotuu ia koe bule ki he botu kotoabe o Babilone, bea koe uluaki ia i he kau bule ki he kau tagata boto kotoabe o Babilone.

49 Bea nae kole e Taniela ki he tu‘i bea ne fokotuu a Seteleki, mo Mesake, mo Abeteniko ke bule i he gaahi mea oe botu o Babilone: ka nae nofo a Taniela i he mataba oe tu‘i.