¶ 1 BEA i he ene hiliage ae gaahi aho lahi, nae hoko ai ae folofola a Jihova kia Ilaija i hono tolu oe ta‘u, o behe, Ke ke alu o fakaha atu koe kia Ehabi; bea teu fakato hifo ae uha ki he fonua.

2 Bea nae alu a Ilaija ke fakaha ia kia Ehabi. Bea nae lahi ae hoge i Samelia.

3 Bea nae ui e Ehabi kia Obataia, aia nae bule i hono fale: (ka koeni, nae manavahe lahi a Obataia kia Jihova:

4 He nae behe, i he ene tamate‘i e Jisibeli ae kau balofita a Jihova, nae ave ae kau balofita e toko teau e Obataia, o ne fakafufu akinautolu koe taki nimagofulu i ha ana, mo ne fafaga akinautolu aki ae ma bea moe vai.)

5 Bea nae behe e Ehabi kia Obataia, Ke ke alu atu ki he fonua, ki he gaahi mata vai kotoabe, bea ki he gaahi vaitafe kotoabe: hei ilo te tau ma‘u ai ha mohuku ke fakamoui aki ae faga hose moe faga miuli, koeuhi ke oua naa mole ae faga manu kotoabe.

6 Koia naa na vaheua ae fonua iate kinaua ke ojiki ia i he e na alu ai: nae alu a Ehabi i hono hala oona, bea nae alu a Obataia i hono hala kehe oona.

¶ 7 Bea i he ene alu a Obataia i he hala, vakai, nae fakafetaulaki mai a Ilaija kiate ia: bea naa ne ilo‘i ia, o ne to hifo ki hono mata, o ne behe, Ko koe abe ko hoku eiki ko Ilaija?

8 Bea naa ne beheage kiate ia, Ko au: alu o tala ki hoo eiki, Vakai, ko Ilaija eni.

9 Bea naa ne behe, Koeha a eku fai hala, ke ke tukuage ai a hoo tamaioeiki ki he nima o Ehabi ke tamate‘i au?

10 Hage oku moui a Jihova ko ho Otua, oku ikai ha fonua be ha buleaga kuo ikai fekau atu ki ai e he eku eiki ko hoo kumi: bea i he e nau behe, Oku ikai i heni ia; naa ne ma‘u ha fuakava mei he fonua moe buleaga, o behe, nae ikai te nau ilo koe.

11 Ka kuo ke behe eni, Alu, o tala ki hoo eiki, Ko Ilaija eni.

12 Bea e hoko o behe, kau ka alu leva meiate koe, e ave koe e he Laumalie o Jihova ki ha botu oku ikai teu ilo‘i; bea i he eku fakaha kia Ehabi, bea oku ikai ke ne ilo koe, te ne tamate‘i au: ka oku manavahe a hoo tamaioeiki ko au kia Jihova talu mei he eku kei jii.

13 Ikai kuo fakaha ki he eku eiki aia naaku fai i he ene tamate‘i e Jisibeli ae kau balofita a Jihova, a eku fufu ha toko teau oe kau balofita a Jihova o taki nimagofulu i ha ana, mo fafaga akinautolu aki ae ma moe vai?

14 Bea oku ke behe mai ni, Alu, o tala ki hoo eiki, Vakai, ko Ilaija eni: bea te ne tamate‘i au.

15 Bea nae behe e Ilaija, Oku moui a Jihova oe gaahi toko lahi, aia oku ou tuu i hono ao, bea koe mooni teu fakaha au kiate ia he aho ni.

16 Koia nae alu ai a Obataia ke fetaulaki mo Ehabi, o ne tala ki ai: bea nae alu a Ehabi ke fakafetaulaki atu kia Ilaija.

¶ 17 Bea nae hoko o behe, i he ene mamata a Ehabi kia Ilaija, nae behe e Ehabi kiate ia, Ko koe ia koa kuo fakamamahi ai a Isileli?

18 Bea nae beheage eia, Kuo ikai teu fakamamahi‘i a Isileli; ka ko koe, moe fale o hoo tamai, koe mea i hoo mou liaki ae gaahi fekau a Jihova, bea kuo ke muimui kia Beali.

19 Bea koeni fekau atu, ke tanaki mai kiate au i Kameli a Isileli katoa, bea moe kau kikite o Beali koe toko fageau moe toko nimagofulu, bea moe kau kikite oe gaahi vao tabu koe toko fageau, akinautolu oku kai i he keinagaaga o Jisibeli.

20 Koia nae fekau atu e Ehabi ki he fānau kotoabe a Isileli, bea naa ne fakataha mai ae kau kikite kotoabe ki he mouga ko Kameli.

21 Bea nae ha‘u a Ilaija ki he kakai kotoabe, mo ne behe, E fefe a hono fuoloa o hoo mou lotolotoua? kabau koe Otua a Jihova, mou muimui kiate ia: bea kabau ko Beali, muimui kiate ia. Bea nae ikai toe lea aki mai e he kakai ha momoi lea e taha.

22 Bea nae toki behe e Ilaija ki he kakai, Ko au toko taha be oku toe koe balofita a Jihova; ka koe kau kikite a Beali koe kau tagata e toko fageau moe nimagofulu.

23 Koia tuku ke nau omi kiate kitautolu ha faga bulu e ua; bea tuku ke nau fili ha bulu e taha ma anautolu, bea tafatafa‘i ia, bea hili ia ki he fefie, kae oua naa ai ha afi ki lalo: bea teu teuteu‘i eau ae bulu e taha, bea hili ia ki ha fefie, kae ikai ha afi ki ai:

24 Bea mou ui akimoutolu ki he higoa o hoo mou gaahi otua, bea teu ui au ki he huafa o Jihova: bea koe Otua koia oku tali aki ha afi, koe Otua be ia. Bea nae tali e he kakai kotoabe, o nau behe, Oku lelei ae lea.

25 Bea nae behe e Ilaija ki he kau kikite a Beali, Mou fili ha bulu ma amoutolu, bea tomua teuteu ia; he oku mou toko lahi; bea mou ui ki he higoa o ho mou gaahi otua, kae oua naa ai ha afi ki ai.

26 Bea naa nau ave ae bulu nae age kiate kinautolu o nau teuteu‘i, mo nau ui ki he higoa o Beali mei he bogibogi o a‘u ki he ene hoata malie, o behe, E Beali, fanogo mai kiate kimautolu. Ka nae ikai ha le‘o, be ha taha e lea mai. Bea naa nau fehoboaki i he ejifeilaulau nae gaohi.

27 Bea i he ene hoko ki he hoata malie, nae manuki e Ilaija kiate kinautolu, o ne behe, Kalaga aki ae le‘o lahi: he koe otua; naa oku ne fakalaulauloto, be oku ne i ha botu kehe, be kuo ne fai haane fonoga, be naa oku ne mohe, kae aoga a hono fakaā‘i.

28 Bea naa nau kalaga malohi, mo tafatafa‘i akinautolu, o hage koe nau aga, aki ae hele moe gaahi mea kini, kae buna mai ae toto kiate kinautolu.

29 Bea nae hoko o behe, i he bale ae laa, mo nau kikite ai be o a‘u ki he feituulaa oe feilaulau efiafi, nae ikai ha le‘o, be ha taha ke lea, be ha taha ke tokaga‘i.

30 Bea nae behe e Ilaija ki he kakai kotoabe, Mou unuunu mai kiate au. Bea nae unuunu mai kiate ia ae kakai kotoabe. Bea naa ne teuteu foou ae ejifeilaulau a Jihova aia nae maumau hifo.

31 Bea nae omi e Ilaija ae foi maka e hogofulu ma ua, o fakatatau moe fiha oe faahiga oe fānau a Jekobe, aia nae hoko mai ki ai ae folofola a Jihova, o behe, E fakahigoa koe ko Isileli:

32 Bea naa ne fokotuu aki ae gaahi maka ha feilaulauaga i he huafa o Jihova: bea naa ne gaohi ha luo nae keli takatakai i he feilaulauaga, nae tatau a hono lahi moe fonu oe fuaaga e ua oe tega‘i akau.

33 Bea naa ne fakatokalelei ae fefie, mo ne tafatafa‘i ae bulu, o ne hili ia ki he fefie, mo ne behe, Fakafonu mai ha buha e fa aki ae vai, bea liligi ia ki he feilaulau tutu, bea ki he fefie.

34 Bea naa ne behe, Toe fai ia ke liuga ua. Bea naa nau fai ia ko hono liuga ua. Bea naa ne behe, Fai ia ko hono liuga tolu. Bea naa nau fai ia ko hono liuga tolu.

35 Bea nae tafe takatakai ae vai i he feilaulauaga; bea naa ne fakafonu foki ae luo aki ae vai.

36 Bea i he ene hokojia ae feituulaa oe feilaulau fakaefiafi, nae unuunu mai a Ilaija koe balofita, o ne behe, E Jihova koe Otua o Ebalahame, mo Aisake, bea mo Isileli, tuku ia ke ilo‘i he aho ni koe Otua koe i Isileli, bea ko hoo tamaioeiki au, bea mo eku fai ae gaahi mea ni kotoabe i hoo fekau.

37 E Jihova, fanogo mai kiate au, fanogo mai kiate au, koeuhi ke ilo e he kakai ni ko Jihova koe koe Otua, bea kuo ke toe liliu mai ekoe a ho nau loto.

38 Bea nae toki to hifo ai ae afi a Jihova, o ne keina ae feilaulau tutu, moe fefie, moe gaahi maka, moe efu, bea ne emo hake ae vai aia nae i he luo.

39 Bea i he mamata ae kakai ki ai, naa nau to hifo ki ho nau mata: bea naa nau behe, Ko Jihova, koe Otua be ia; ko Jihova, koe Otua be ia.

40 Bea nae behe e Ilaija kiate kinautolu, Buke mai ae kau kikite a Beali; oua naa tuku ke hao ha nau toko taha. Bea naa nau buke akinautolu: bea nae o hifo akinautolu e Ilaija ki he vaitafe ko Kisoni, mo ne tamate‘i akinautolu i ai.

¶ 41 Bea nae behe e Ilaija kia Ehabi, Ke ke tuu hake, mo ke kai mo inu; he oku logologo uha lahi aubito.

42 Koia nae alu hake a Ehabi ke ne kai mo inu. Bea nae alu hake a Ilaija ki he tumutumu o Kameli; bea naa ne fakato hifo ia ki he kelekele, bea ne ai hono mata ki hono vahaa tui,

43 Bea behe eia ki he ene tamaioeiki, Alu hake eni o jio atu ki tahi. Bea naa ne alu hake, mo ne jio, bea ne behe, Oku ikai ha mea. Bea naa ne behe, Ke ke toe alu ke liuga fitu.

44 Bea i he ene hoko ki hono liuga fitu, naa ne behe, Vakai, oku ha hake mei he tahi ha kihi‘i ao jii, oku hage koe nima oe tagata. Bea nae behe eia, Ke he alu hake, o tala kia Ehabi, Teuteu hoo jaliote, bea ke alu hifo, koeuhi ke oua naa taofi koe e he uha.

45 Bea lolotoga eni, nae fakaboubouli ae lagi i he gaahi ao moe matagi, bea nae to ae uha lahi aubito. Bea nae beka a Ehabi, o ne alu ki Jesilili.

46 Bea nae ia Ilaija ae nima o Jihova; bea naa ne hukihuki a hono vala, mo ne lele muomua ia Ehabi o a‘u ki he huaga o Jesilili.