¶ 1 BEA kuo bau ke mau folau ki Itali, naa nau tuku a Baula moe kau bobula kehe ki  he toko taha ko Juliusi hono higoa, koe eiki tau i he kogakau a Aokositusi.

2 Bea naa mau heka i he vaka mei Atalamaito, nae teu folau ki he matātahi o Esia; bea naa mau fai la, bea ko ho mau toko taha ko Alisitake, koe Masitonia mei Tesalonika.

3 Bea bogibogi hake ai, naa mau tuku taula i Saitoni. Bea nae ofa a Juliusi kia Baula, o ne tukuage ia ke alu ki uta, ke ne ma‘u ae ofa a hono kaiga.

4 Bea kuo mau fai la mei ai, bea mau folau mo fakaū i Saibalo, he nae tokai ae matagi.

5 Bea kuo mau folau i he tahi o Silisia mo Bamifilia, bea mau a‘u atu ki Maila i Lisia.

6 Bea ilo ai e he eiki tau ae vaka mei Alekisanitia, nae teu folau ki Itali; bea naa ne fakaheka ai akimautolu.

7 Bea kuo aho lahi moe mau folau jii be, he nae tokai ae matagi, bea kuo mau feouga nai mo Naitusi, bea ne mau folau o fakaū i Keliti, o ofi ki Salamone;

8 Bea nae ikai mei to ia, bea naa mau lava ki he botu oku ui, Koe taulaga lelei; aia nae ofi ki ai ae kolo ko Lesea.

9 Bea kuo oji ae gaahi aho lahi, bea kuo hoko o faigataa ae folau, koeuhi kuo hili ae aukai, bea valoki‘i e Baula,

10 O ne behe kiate kinautolu, Ae kau matābule, oku ou ilo koe folau ni e tuutamaki mo kovi lahi, bea oku ikai ki he uta moe vaka be, ka ki he e tau moui foki.

11 Ka nae tui lahi ae eiki tau ki he toutai moe eiki vaka, kae ikai ki he gaahi mea nae lea aki e Baula.

12 Bea koeuhi nae ikai lelei ae taulaga ke nau i ai i he faahita‘u afā, bea behe e he toko lahi ke fuji taula, o ahiahi ke nau lava ki Finesi, ke nau i ai i he faahita‘u afā; koe taulaga ia i Keliti, bea oku ava ia ki he togahihifo moe luluga.

13 Bea i he agi iki ae matagi toga, bea nau behe, kuo nau lava‘i ia, naa nau fuji taula, o folau o ofi ki Keliti.

14 Ka kuo fuofuoloa jii be, bea buke ae matagi malohi, oku ui koe Ulokitone.

15 Bea i he moua ai ae vaka, moe ikai faa fakatauala, naa mau hafu ai.

16 Bea i he e mau folau o fakaū i he motu oku ui ko Kalauta, nae faigataa aubito e mau ma‘u mai ae vaka fokotuu:

17 Bea kuo nau fuji hake ia, bea nau ta li, o ha‘iha‘i ae vaka: bea tuku fanā, koe manavahe naa toka  ae vaka i he oneone holo, bea mau hafu be.

18 Bea i he e mau matuaki tomohobo i he afā, o bogibogi ai, naa nau tolo;

19 Bea i hono aho tolu, naa nau laku aki ho nau nima ae alaga vaka.

20 Bea i he ikai ha mai ae laa be koe fetuu i he gaahi aho lahi, bea alo ae afā, nae mole iate kimautolu ae amanaki ki he moui.

21 Bea kuo fuoloa moe aukai be, bea toki tuu hake a Baula i ho nau ao, o ne behe, Ae kau matābule, nae totonu hoo mou tui mai kiate au, ke oua naa fuji taula i Keliti, ke hoko ai ae kovi moe maumau ni.

22 Ka koeni, oku ou behe atu kiate kimoutolu, ke mou fiemalie: koeuhi e ikai mate ha taha iate kimoutolu, ka koe vaka be.

23 He nae tuu ofi mai kiate au i he bo ni ha agelo ae Otua, aia oku aana au, bea ko ia oku ou tauhi.

24 O ne behe mai, E Baula, oua naa ke manavahe; he te ke a‘u atu koe ki he ao o Sisa: bea vakai, kuo foaki kiate koe e he Otua akinautolu kotoabe oku mou folau.

25 Koia ae kau matābule, ke mou fiemalie: he oku ou tui ki he Otua, e fai o hage koe mea kuo tala mai.

26 Kae tukia akitautolu i ha motu e taha.

27 Bea kuo kakato ae bo e hogofulu ma fa, bea kuo mau hafu fano i he tahi o Atilia, bea tuuabo nai, bea mahalo ae kau vaka kuo nau ofi ki ha fonua;

28 Bea naa nau tukutuku, bea ilo koe ofa e uagakumi: bea kuo nau gaholo jii atu, bea toe tukutuku, bea ilo koe ofa e tekumi ma nima.

29 Bea naa nau manavahe telia naa mau toka i ha hakau, bea nau li ae taula e fa i he taumuli, mo nau fakaamu ki he aho.

30 Bea nae fai ke feholaki ae kau vaka mei he vaka, he naa nau tuku hifo ae vaka fokotuu ki tahi, o hage ko haa nau fie ave taula ki he taumua;

31 Ka nae behe e Baula ki he eiki tau moe kau tau, Kabau e ikai nofo akinautolu ni i he vaka, e ikai te mou moui.

32 Bea nae toki tutuu e he kau tau ae maea oe vaka fokotuu, bea auhia ia.

33 Bea kuo ofi ae aho, bea kole a Baula kiate kinautolu kotoabe ke nau kai, o ne behe, Ko hono hogofulu ma fa eni oe aho mo hoo mou nofo, o tae fai hoo mou keinaga.

34 Bea koia oku ou kole kiate kimoutolu ke mou kai; ke malohi ai ho mou jino: koeuhi e ikai to i he ulu o ho mou toko taha ha tuoni louulu e taha.

35 Bea kuo behe ene lea, bea ne too ae ma, o fakafetai ki he Otua i he ao o kinautolu kotoabe: bea kuo ne baki‘i ia, bea ne kamata kai.

36 Bea naa nau toki fiefia kotoabe, bea kai foki ekinautolu.

37 Bea naa mau toko uageau moe toko fitugofulu ma toko ono i he vaka.

38 Bea hili e nau kai o makona, naa nau fakamaamaa ae vaka, o tolo ae uite ki tahi.

39 Bea i he ene aho, nae ikai te nau ilo ae fonua: ka naa nau vakai ki he ava nae ai hono faga, bea naa nau holi o kabau e mafai, ke fakaoho ai ae vaka.

40 Bea kuo nau motuhi ae gaahi taula, o tuku be i tahi, bea veteage ae taufoe oe foheuli, o nau fai la, ke alu ki uta.

41 Bea naa nau to ki he botu oku fetaulaki ai ae tahi e ua, o nau fakatoka ai ae vaka; bea nae toka ma‘u ae taumua, bea ikai faa ue‘i, ka nae maumau hono taumuli e he malohi oe beau.

42 Bea nae fakakaukau ae kau tau ke tamate‘i ae kau bobula, telia naa kakau ha niihi, o hao.

43 Ka nae fie fakamoui a Baula e he eiki tau mei ho nau loto, koia ne ne taofi akinautolu; o ne fekau kiate kinautolu oku faa kakau ke nau hobo, o muomua ki uta:

44 Bea ko hono toe, koe niihi i he laubaba, koe niihi i he gaahi mea oe vaka. Bea fai fai ia bea mau hao kotoabe ki uta.