¶ 1 BEA nae i Sesalia ae tagata e toko taha ko Koniliusi hono higoa, koe eiki tau oe kau tau nae ui  koe kau tau Itali.

2 Koe faa lotu ia, bea manavahe ki he Otua, aia mo hono fale kotoabe, bea nae lahi ene foaki ki he kakai, mo ne hu mau ai be ki he Otua.

3 Bea mamata bau eia i ha mea ha mai, i hono hiva nai oe feituulaa oe aho, ki ha agelo ae Otua oku ha‘u kiate ia, o ne behe kiate ia, Koniliusi.

4 Bea kuo vakai ia ki ai, bea manavahe ia, mo behe, Koeha ia, Eiki? Bea ne behe kiate ia, Kuo a‘u hake hoo gaahi hu mo hoo faa foaki, koe mea fakamanatu i he ao oe Otua.

5 Bea ke fekau leva ha kau tagata ki Joba, ke omi a Saimone, ko hono higoa e taha ko Bita:

6 Oku nofo ia mo Saimone koe tufuga gaohi kili‘i manu, oku tuu hono fale i he matātahi: bea te ne tala kiate koe ae mea totonu ke ke fai.

7 Bea kuo alu ae agelo nae lea kia Koniliusi, bea ui ia ki he toko ua i he ene kau tamaioeiki, moe tagata tau oku lotu, meiate kinautolu nae tali fekau kiate ia;

8 Bea kuo ne fakaha eni kotoabe kiate kinautolu, bea ne fekau akinautolu ki Joba.

¶ 9 Bea bogibogi ai, i he e nau fonoga atu, o ofi ki he kolo, kuo alu hake a Bita ki he tua fale ke lotu, i hono ono nai oe feituulaa:

10 Bea nae lahi ene fiekaia, bea holi ia ke kai; kae lolotoga e nau teu ia, nae āvea hono loto,

11 Bea mamata ia kuo matagaki ae lagi, bea tuku hifo kiate ia ha mea o hage ha fuu tubenu, kuo fakakave‘i i hono kaba e fa, bea tukutuku hifo ia ki he kelekele:

12 Bea nae i ai ae faga manu vee fa oe fonua, moe manu fekai, moe manu totolo, moe manu oe atā.

13 Bea nae ogo mai ae le‘o kiate ia,  o behe, Tuu hake, Bita; o tamate‘i mo kai.

14 Ka nae behe e Bita, Eiki, e ikai aubito; he oku heeki ai teu kai ha mea oku ikai gofua be taemaa.

15 Bea nae toe ogo mai ae le‘o kiate ia ko hono tuo ua, Koia kuo fakamaa e he Otua, oua naa ke behe oku ikai gofua.

16 Bea nae fai ae mea ni o tuo tolu: bea toe fuji hake ae tubenu ki he lagi.

17 Bea lolotoga ae fifili a Bita i hono loto be koeha hono uhiga oe mea kuo ne mamata ai, iloage, kuo tutuu i he mataba ae kau tagata fekau a Koniliusi, kuo nau fehui ki he fale o Saimone,

18 Bea naa nau ui, o fehui be oku nofo ai a Saimone, oku higoa ko Bita.

¶ 19 Bea lolotoga ae fifili a Bita ki he mea kuo ha mai, bea behe e he Laumalie kiate ia, Vakai, oku kumi koe e he kau tagata e toko tolu.

20 Koia ke ke tuu, o alu hifo, bea mou o mo kinautolu, bea oua naa ke manavahe: he kuou fekau akinautolu.

21 Bea toki alu hifo a Bita ki he kau tagata kuo fekau mai e Koniliusi kiate ia; o ne behe, Vakai, ko au eni oku mou kumi: bea koeha ae mea oku mou ha‘u ai?

22 Bea nau behe, Ko Koniliusi koe eiki tau, koe tagata agatonu, bea manavahe ki he Otua, bea oku ogoogo lelei ia i he kakai Jiu kotoabe, nae valoki ia e he Otua, i ha agelo maonioni, ke ne fekau kiate koe ke ke alu ki hono fale, ke ne fanogo ki ha gaahi lea iate koe.

23 Bea naa ne toki omi akinautolu ki fale, ke nau nonofo. Bea bogibogi ai, nae alu a Bita mo kinautolu, bea naa nau o moe kaiga niihi mei Joba.

24 Bea i he aho nae feholo‘i, naa nau hoko ki Sesalia. Bea tatali a Koniliusi kiate kinautolu, bea kuo ne fakataha hono gaahi kaiga moe kaugaabi.

25 Bea i he hu atu a Bita, nae fakafetaulaki mai kiate ia a Koniliusi, bea to ki lalo i hono va‘e, o ne hu.

26 Ka nae fokotuu hake ia e Bita, mo behe eia, Tuu hake; he koe tagata be foki au.

27 Bea nae kei lea ia kiate ia, bea hu ki  fale, bea ilo eia ae toko lahi kuo fakataha.

28 Bea behe eia kiate kinautolu, Oku mou ilo koe mea oku ikai gofua i he tagata Jiu ke fakataha moe tagata mei he buleaga kehe, be alu ki ai; ka kuo fakaha e he Otua kiate au, ke oua naaku ui koe taetabu be taemaa ha tagata e toko taha.

29 Koia naaku ha‘u ai, o ikai teu baogataa i he fekau mai kiate au: bea koeni, oku ou fehui be koeha ai kuo mou fekau mai kiate au?

30 Bea behe e Koniliusi, Koe aho e fa kuo hiliage, naaku aukai o hoko ki he feituulaa ni; bea i hono hiva oe feituulaa naaku lotu i hoku fale, bea mo ene tuu i hoku ao ae tagata oku kofu fetabatabaki,

31 O ne behe mai, Koniliusi, kuo ogo hoo hu, bea oku manatu‘i e he Otua hoo faa foaki.

32 Koia ke ke fekau ai ki Joba, o omi ki heni a Saimone, oku higoa ko Bita; oku nofo ia i he fale o Saimone koe tufuga gaohi kili‘i manu i he matātahi: bea ka ha‘u, e lea ia kiate koe.

33 Koia neu fekau atu ai leva kiate koe; bea koe mea lelei hoo ha‘u. Bea koeni, kuo mau fakataha kotoabe i he ao oe Otua, ke fanogo ki he mea kotoabe oku fekau e he Otua kiate koe.

34 Bea toki mafaa ae gutu o Bita, o ne behe, Koe mooni oku ou ilo  ni oku ikai filifilimanako ae Otua ki he kakai:

35 Ka oku ne ma‘u maana aia oku manavahe kiate ia, mo fai totonu, i he buleaga kotoabe.

36 Koe akonaki eni nae tuku ki he fānau a Isileli, koe malaga aki ae melino ia Jisu Kalaisi: (koe Eiki ia oe mea kotoabe:)

37 Bea koe ogoogo koia oku mou ilo‘i, aia nae fanogonogo i Jutea kotoabe, o kamata i Kaleli, i he hili ae babitaiso nae malaga aki e Jone;

38 Koeuhi koe fakanofo e he Otua a Jisu o Nasaleti aki ae Laumalie Maonioni moe malohi: aia nae faa fealuaki o fai lelei, mo ne fakamoui akinautolu kotoabe nae fakamalohi‘i e he tevolo; he nae iate ia ae Otua.

39 Bea koe kau fakamooni akimautolu oe mea kotoabe naa ne fai i he fonua oe kakai Jiu, bea i Jelusalema; koia ia foki naa nau tamate‘i i he tautau i he akau:

40 Bea nae fokotuu ia e he Otua i hono aho tolu, o fakaha lahi ia;

41  Ka nae ikai ki he kakai kotoabe, ka ki he kau fakamooni nae tomua fili e he Otua, kiate kimautolu, naa mau kai mo inu mo ia, i he hili ene toetuu mei he mate.

42 Bea naa ne fekau kiate kimautolu ke mau malaga ki he kakai, mo fakamooni ko ia ia kuo fakanofo e he Otua koe Fakamāu ki he moui moe mate.

43 Bea oku fakamooni kiate ia ae kau balofita kotoabe, ko ia fulibe e tui kiate ia, e ma‘u ae fakamolemole oe agahala i hono huafa.

¶ 44 Bea i he kei lea aki e Bita ae gaahi lea ni, ne to hifo ae Laumalie Maonioni kiate kinautolu kotoabe nae fanogo ki he lea.

45 Bea nae ofo akinautolu oe kamu nae tui, akinautolu kotoabe nae omi mo Bita, koeuhi kuo huai hifo ki he Jenitaile foki ae foaki oe Laumalie Maonioni.

46 He kuo nau fanogo ki he e nau lea aki ae lea kehekehe, mo fakamalo ki he Otua, Bea toki behe e Bita,

47 E faa taofi e ha taha ae vai, ke oua naa babitaiso akinautolu ni, ka kuo nau ma‘u ae Laumalie Maonioni o hage ko kitautolu?

48 Bea fekau eia ke nau babitaiso i he huafa oe Eiki. Bea naa nau kole kiate ia ke nofo  mo kinautolu i he aho niihi.