JJS, Mateo 6:14. Chi’ilmanq sa’ Mateo 6:13; kijalman ajwi’ chi jo’kan li aatin sa’ Lukas 11:4
Li Qaawa’ ink’a’ nokoxb’eresi sa’ li aaleek.
14 Ut moohaakanab’ chi b’eresiik sa’ li aaleek; choohaakol b’an chiru li ink’a’ us.
JJS, Mateo 6:22. Chi’ilmanq sa’ Mateo 6:22
Wi junaj ru lix sa’ qu sa’ lix loq’al li Dios, chixjunil li qaxaqalil nujenaqaq chi saqen.
22 Lix saqenkil li tz’ejwalej a’an lix sa’ uhej; wi ut junaj ru lix sa’ aawu sa’ lix loq’al li Dios, chixjunil aaxaqalil nujenaqaq chi saqen.
JJS, Mateo 6:25–27. Chi’ilmanq sa’ Mateo 6:25; 10:10
Li Jesus naxtijeb’ lix tzolom chirix xch’a’ajkil lix k’anjeleb’ a’ut naxyeechi’i naq a’an tixkawresi li b’e ut naq li qaChoxahil Yuwa’ tixk’e li taak’anjelaq reheb’.
25 Ut jo’kan wi’chik, ninye eere, Ayuqex sa’ li ruchich’och’, ut meek’oxla li ruchich’och’; xb’aan naq li ruchich’och’ xik’ texril, ut texrahob’tesi, ut texrisi chaq sa’ xch’utleb’aaleb’.
26 A’b’anan, laa’ex texxik sa’ li junjunq chi ochoch chixtzolb’aleb’ li tenamit; ut laa’in tinxik cheru.
27 Ut lee choxahil Yuwa’ tixk’e li taak’anjelaq eere, yalaq k’a’ru li na’ajman cheru choq’ tzakemq, li k’a’ru teetzeka; ut choq’ aq’ej, li k’a’ru teek’am malaj teek’e cherix.
JJS, Mateo 6:38. Chi’ilmanq sa’ Mateo 6:33
Tento taqasik’ xb’een wa xwaklesinkil li rawa’b’ejihom li Dios.
38 Jo’kan ut, meesik’ li k’a’aq re ru re li ruchich’och’ a’in; chesik’ b’an xb’een wa xwaklesinkil li rawa’b’ejihom li Dios, ut xxaqab’ankil xwankil lix tiikilal, ut chixjunil li k’a’aq re ru a’in taak’ehe’q choq’ xtz’aqob’ eere.