JST, Mak 9:3. Komperem long Mak 9:4
Jon Baptaes i stap long Bigfala Hil we Jisas I Jenis I Kam Narafala.
3 Mo Elaeas mo Moses i kamaot long olgeta, o long nara toktok, Jon Baptaes mo Moses; mo tufala i bin stap toktok wetem Jisas.
JST, Mak 9:40–48. Komperem long Mak 9:43–48
Jisas i komperem blong katemaot wan han o wan leg blong wan man we i mekem sin i semmak olsem blong stop blong stap fren wetem olgeta we oli save lidim man i go lus.
40 From hemia, sapos han blong yu i mekem yu foldaon, katemaot han blong yu; o sapos brata blong yu i mekem yu foldaon mo hem i no konfes mo i no stop fogud, bae yu katemaot hem. From i moa gud long yu, blong yu gat laef wetem wan han, bitim we yu gat tufala han afta yu go long hel.
41 From se i moa gud blong go long laef we i no save finis we yu no gat wan brata, bitim we yu mo brata blong yu i go long hel, long faea ia bae i neva save ded samtaem, long ples ia we ol maget blong olgeta i no save ded, mo faea ia i no save ded samtaem.
42 Mo bakegen, sapos leg blong yu i mekem yu foldaon, katemaot leg ia; from hem we i eksampol blong yu, we yu yu stap folem wokbaot blong hem, sapos hem i wan man we i stap brekem loa, bambae Lod i katemaot hem.
43 I moa gud long yu, blong yu gat laef wetem wan leg, bitim we yu gat tufala leg mo oli sakem yu long hel; i go long faea ia we bae i no save ded samtaem.
44 From hemia, letem evri man i stanap o i foldaon hemwan, be i no from wan narafala man; o i no dipen long wan narafala man.
45 Askem long Papa blong mi long prea, mo bae i hapen long yu long stret taem we bae yu askem, sapos yu askem wetem fet mo biliv se bambae yu kasem.
46 Mo sapos ae ia we i stap lukluk ol samting long bihaf blong ol pipol, man ia we Lod i bin putum hem blong luklukaotem gud ol pipol mo blong soem laet, sapos man ia i kam wan man blong brekem loa mo mekem ol pipol oli sin, nao yu mas tekemaot hem.
47 From i moa gud long yu blong go insaed long kingdom blong God wetem wan ae, bitim blong gat tufala ae mo oli sakem yu long faea blong hel.
48 From se i moa gud long yu blong Lod i sevem yu, bitim we hem i sakem yu long hel wetem brata blong yu, long ples ia we ol maget blong olgeta i no save ded, mo long ples we faea i no save ded samtaem.