Samfala Pat blong Translesen blong Baebol we I Kam long Josef Smit

Wanem we i kam afta, oli samfala pat blong Translesen blong Baebol King Jemes Vesen we i kam long Josef Smit (JST). Lod i givim insperesen long Profet Josef Smit blong putumbak ol trutok insaed long ol toktok blong Baebol King Jemes Vesen we oli bin lus, o oli bin jenisim long taem we oli bin raetem ol orijinol toktok. Ol trutok ia we oli bin putumbak, oli stap kliarem doktrin mo mekem man we i ridim i andastanem skripja i gud moa.

From se Lod i bin soemaot samfala trutok we ol fas man we oli bin raetem Baebol oli bin raetemdaon bifo, nao Josef Smit Translesen i no semmak long ol narafala translesen blong Baebol long wol. Long wei ia nao, toktok ia translesen, oli yusum long wan wei we i moa bigwan mo i defren long hemia we yumi yusum oltaem; from se translesen blong Josef i stap moa olsem revelesen be i no wan translesen blong wanwan toktok we i kam long wan lanwis i go long narafala lanwis.

Translesen we i kam long Josef Smit blong King Jemes Baebol i go wetem, o oli tokbaot long plante seksen blong Doktrin mo Ol Kavenan (luk long ol seksen 37, 45, 73, 76, 77, 86, 91, mo 132). Mo tu, buk blong Moses mo Josef Smit—Matiu, oli samfala pat blong Josef Smit Translesen.

Blong gat moa infomesen long saed blong Josef Smit Translesen, luk long “Josef Smit Translesen (JST)” insaed long Gaed long Ol Skripja.

Eksampol we i stap andanit ia, i soem wan pat we i kam long Josef Smit Translesen:

Pikja

eksampol

JST, Matiu 4:1, 5–6, 8–9. Komperem long Matiu 4:1, 5–6, 8–9; oli bin mekem ol semmak jenis long Luk 4:2, 5–11

Spirit i stap lidim Jisas, i no Setan.

1 Afta, Spirit i bin lidim Jisas i go long waelples, blong hem i stap wetem God.

5 Afta, oli tekem Jisas i go long tabu siti, mo Spirit i putum hem long haeples evriwan antap long tempol.

6 Afta devel i kam luk hem mo talem se: “Sapos yu yu Pikinini blong God, yu jiam i go daon: from se oli raetem long Baebol se God bae i sendem ol enjel blong hem blong lukaot long yu: nao bambae oli holem yu antap blong yu no bangem leg blong yu long wan ston.”

8 Mo bakegen, Jisas i stap anda long Spirit, mo i tekem hem i go long wan bigfala hil we i hae we i hae, mo i soemaot long hem evri kingdom blong wol mo glori blong olgeta.

9 Mo devel i kam luk hem bakegen, mo talem: “Evri samting ia, bambae mi mi givim long yu sapos yu bodaon mo yu wosip long mi.”

Ol toktok we oli stap long dak blak leta i paragraf blong Translesen blong King Jemes Baebol we i kam long Josef Smit. From se translesen blong hem i putumbak ol toktok blong ol toktok blong Baebol, ol namba blong ol ves oli defren long edisen ia we yu stap yusum.

Kros refrens ia ples, insaed long Baebol blong yu we yu sapos blong komperem wetem translesen blong Josef Smit.

Toktok ia i eksplenem wanem doktrin Josef Smit i bin mekem i klia wetem translesen blong hem.

Hemia i toktok olsem we Josef Smit i bin transletem. (Oli ademap italik blong soem wanem nao i defren long toktok blong King Jemes Vesen.)