JST, Aesea 42:19–23. Komperem long Aesea 42:19–22
Lod i sendem wokman blong Hem blong tijim olgeta we oli jusum blong no luk o harem trutok; olgeta we oli lisin mo stap obei, bae Hem i mekem olgeta oli kam stret evriwan.
19 From se bambae mi sendem wokman blong mi i go long yufala we i no save lukluk samting; yes, wan mesenja bae i kam blong openem ol ae blong blaen man, mo openem sora blong man we sora i fas;
20 Mo bambae oli kam stret gud evriwan nomata we oli no save lukluk samting, sapos oli lisin gud long mesenja, we i wokman blong Lod.
21 Yufala i wan pipol, we i stap lukluk plante samting, be yufala i no luk samting; i openem sora blong harem samting, be yufala i no harem samting.
22 Lod i no stap glad wetem kaen pipol olsem, be blong holemtaet stret mo gud fasin blong hem, bambae hem i leftemap ol loa mo mekem yumi givim ona long loa ia.
23 Yufala i wan pipol we oli stilim yufala mo tekemaot yufala; ol enemi blong yufala, evriwan long olgeta, oli putum yufala insaed long ol hol, mo oli haedem yufala long ol haos blong kalabus; oli bin tekem yufala olsem wan slef, mo i no gat man blong sevem yufala; oli tekem yufala long fos, mo i no gat wan i talem: “Letem olgeta i go fri.”