1 Ena ca ko Ariuli, ko Ariuli, na koro levu a tiko kina ko Tevita! Mo vakuria ena veiyabaki; laiva me ra vakamatea na isoro.

2 Ia au na vakararawataki Ariuli, ka na tu kina na lomabibi kei na yaluma; ni sa kaya vakaoqo vei au na Turaga, ni na yaco vei Ariuli;

3 Koi Au na Turaga au vakacibiivalu vakavolivoliti koya, kau na valuti koya mai na dua na tikina cecere kau na tara na koronivalu me saqati koya.

4 Ka na vakabalei sobu ko koya, ka na qai vosa mai na delaniqele, ena rogolailai mai na kuvunisoso na nona vosa; ia na domona ena vaka e dua sa tautauvata na yalona, mai na lomaniqele, ia na nona vosa ena vakasolokakana mai na kuvunisoso.

5 Ia era lewevuqa na nona vulagi era na vaka na kuvunisoso lalai, ka lewevuqa na nona tamata rerevaki era na vaka na qanisila sa cagina tani yani, io, ena vaka na sauriva ni mata na kena vakasauri.

6 Ni na sikovi ira na Turaga ni lewevuqa ena kurukuru, kei na uneune, kei na rorogo levu, ena cava kei na cagilaba, kei na yameyame ni buka veivakarusai.

7 Kei na lewevuqa ni veimatanitu kecega era veivala kei Ariuli, io ko ira kece saraga era veivala kaya kei na nona itataqomaki, kei ira era vakararawataki koya, era na vaka na tatadra ni dua na raivotu ena bogi.

8 Io, ena vaka vei ira e dua na tamata waloloi sa tadra ka raica ni kana tiko, ia ni yadra cake a lala tu na yalona; se me vaka e dua na tamata karamaca sa tadra ka raica, ni sa gunu tiko, ia ni yadra cake, ka raica, ni sa kolaiciba, ka sa viagunu na yalona. Io, ena vakakina ko ira na lewevuqa ni veimatanitu kecega sa veivala kei na ulunivanua ko Saioni.