18. Templo sa Salt Lake

Pipila ka mga adlaw human ang nag-una nga pundok sa unang lumulupyo nga mga Santos sa Ulahing mga Adlaw misulod sa Walog sa Salt Lake, si Presidente Brigham Young mitugsok sa yuta sa iyang sungkod ug mipahayag, “Dinhi kita motukod sa templo sa atong Dios.” Ang yuta gidugkal niadtong 14 sa Pebrero 1853. Pagka 6 sa Abril 1853, ang mga tukurang bato gipahimutang. Ang templo nahuman sulod sa 40 ka mga tuig ug gipahinungod sa pagka 6 sa Abril 1893. Ang Unang Kapangulohan ug ang Korum sa Napulog Duha ka mga Apostoles magtigum dinhi matag semana aron sa pagtimbang-timbang ug sa pagpangayo sa giya sa Ginoo sa pagdumala ug pagtukod sa gingharian sa Dios.

Mahinungdanon nga mga Hitabo: Ang Ginoo mihatag sa mga Presidente sa Simbahan ug ubang Kinatibuk-ang Kadagkoan sa pagdasig sa espiritu sa pagpadayag dinhi, lakip ang Opisyal nga Pahayag—2. Bag-ohay pa lamang, ang Unang Kapangulohan ug ang Konseho sa Napulog Duha ka mga Apostoles nagkahiusa nga mitugot ug mimantala sa “Ang Banay: Usa ka Pamahayag ngadto sa Kalibutan.” Ang mga ordinansa sa templo nga gihimo alang sa mga buhi ug sa mga patay mipanalangin sa mga kinabuhi sa minilyon.