Seksen 43
Revelesen we Lod i givim tru long Profet Josef Smit, long Ketlan, Ohaeo, long Febwari 1831. Long taem ia, sam memba blong Jos oli bin harem nogud long sam pipol we oli mekem ol giaman toktok olsem ol reveleta. Profet i bin askem Lod mo i kasem toktok ia we i go long ol elda blong Jos. Fas pat i tokbaot ol poen blong fasin blong lidim Jos; nara pat i wan woning we ol elda oli mas givim long ol nesen blong wol.
1–7, Ol revelesen mo ol komanmen oli kam nomo tru long man ia nomo we God i jusum; 8–14, Ol Sent oli kam tabu, taem oli mekem samting long tabu fasin long fored blong Lod; 15–22, Lod i sendem ol elda blong oli go aot blong taltalemaot fasin blong sakem sin, mo blong mekem ol man oli rere long bigfala dei blong Lod; 23–28, Lod i toktok long ol man wetem stret voes blong Hem, mo tru long ol paoa blong kriesen; 29–35, Taem blong Mileniom, mo taem we bae oli fasem Setan bambae i kam.
1 O lisin gud, yufala ol elda blong jos blong mi, mo harem gud ol toktok we bae mi talemaot long yufala.
2 From luk, i tru, i tru mi talem long yufala, se yufala i bin kasem wan komanmen we bae i kam wan loa long jos blong mi, tru long man ia we mi bin jusum blong yufala, blong hem i kasem ol komanmen mo ol revelesen long han blong mi.
3 Mo hemia, yufala i mas save gud—se i no gat wan narafala man we mi jusum blong yufala, blong hem i kasem ol komanmen mo ol revelesen kasem taem bae mi tekemaot hem, sapos hem i stap fetful long mi.
4 Be i tru, i tru mi talem long yufala, se i no gat wan nara man we bae mi jusum blong kasem presen ia, be tru long hem nomo; from sapos mi tekemaot long hem, bambae hem i no gat paoa be nomo blong jusum wan nara man blong tekem ples blong hem.
5 Mo hemia bae i wan loa long yufala, se yufala i no stap kasem ol tijing blong eni nara man we bae i kam long fored blong yufala olsem ol revelesen o ol komanmen.
6 Mo mi givim hemia long yufala blong oli no giaman long yufala, blong yufala i save se oli no blong mi.
7 From i tru, mi talem long yufala se hem we mi odenem, bae i mas kam insaed, tru long get, mo bae oli odenem hem olsem we mi bin talem finis long yufala, blong tijim ol revelesen ia we yufala i bin kasem mo bambae yufala i kasem tru long hem we mi bin jusum.
8 Mo naoia, luk, mi givim wan komanmen long yufala, se taem we yufala i kam tugeta long wanples, bambae yufala i mas tijim mo mekem wanwan long yufala i kam antap, blong yufala i save olsem wanem blong mekem samting mo lidim jos blong mi, olsem wanem blong mekem samting folem ol poen blong loa mo ol komanmen blong mi, we mi bin givim.
9 Mo olsem ia nao bambae yufala i kasem tijing long saed blong loa blong jos blong mi, mo bae yufala i kam tabu tru long wanem we yufala i bin kasem, mo bae yufala i mas mekem promes blong mekem samting long tabu fasin long fored blong mi—
10 Mo folem hamas bae yufala i mekem hemia, bae yufala i ademap glori long kingdom we yufala i bin kasem. Mo folem hamas bae yufala i no mekem hemia, bae mi tekemaot long yufala hemia we yufala i bin kasem finis.
11 Yufala i klinimaot gud ol rabis fasin we i stap long medel blong yufala; mekem yufala i kam tabu long fored blong mi;
12 Mo sapos yufala i wantem ol glori blong kingdom, yufala i mas jusum wokman blong mi, Josef Smit Junia, mo sapotem hem long fored blong mi tru long prea blong fet.
13 Mo bakegen, mi talem long yufala se, sapos yufala i wantem ol sikret blong kingdom, givim kaekae mo klos long hem, mo eni kaen samting we hem i nidim blong mekem wok ia we mi bin komandem hem blong mekem i kamtru.
14 Mo sapos yufala i no mekem, bambae hem i stap wetem olgeta we oli akseptem hem, blong mekem se mi holemtaet i stap, blong miwan, wan pipol we i klin evriwan long fored blong mi.
15 Mo bakegen, mi talem, yufala i lisin gud, yufala ol elda blong jos blong mi, we mi bin jusum yufala: Mi no sendem yufala i go aot blong oli tijim yufala, be blong yufala i tijim ol pikinini blong ol man abaot ol samting we mi bin putum long han blong yufala tru long paoa blong Spirit blong mi;
16 Mo bae yufala i kasem tijing we i kam long heven. Mekem yufala i kam tabu mo bambae yufala i kasem paoa, blong yufala i tij olsem we mi bin talem.
17 Yufala i lisin gud, from luk, bigfala dei blong Lod i kam kolosap nao.
18 From dei ia i stap kam we voes blong Lod i toktok aot long heven i kamdaon; bae heven i seksek mo bae wol i seksek, mo pupu blong God bae i blo longtaem mo bigwan, mo bae i talem long ol nesen we oli stap slip: “Yufala ol sent, yufala i girap mo stap laef; yufala ol man blong mekem sin, yufala i stap mo slip kasem taem mi singaot bakegen.”
19 Taswe, yufala i mas mekem yufala i rere, nogud bambae Lod i faenem yufala i stap long medel blong ol nogud man.
20 Leftemap voes blong yufala mo no stop blong toktok. Singaot long ol nesen blong oli sakem sin, tugeta ol olfala mo ol yangfala, tugeta olgeta long kalabus mo olgeta we oli fri, mo talem: “Yufala i mas mekem yufala i rere from bigfala dei blong Lod;
21 From se sapos mi, we mi wan man, mi leftemap voes blong mi mo singaot long yufala blong sakem sin, mo yufala i no laekem mi, ?wanem nao bae yufala i talem taem dei ia i stap kam we voes blong ol tanda bae oli toktok aot long evri en blong wol ia, mo toktok long ol sora blong evriwan we oli laef, mo talem: ‘Sakem sin, mo rere from bigfala dei ia blong Lod’?
22 Yes, mo bakegen, ?wanem nao bae yufala i talem taem ol laetning bae oli straekem wol stat long Is i go kasem Wes, mo bae voes blong olgeta i toktok long evriwan we i laef, mo i mekem sora we i save harem samting oli ring, mo oli talem ol toktok ia: ‘Yufala i sakem sin, from bigfala dei blong Lod i kam?’”
23 Mo bakegen, bae voes blong Lod i toktok aot long heven i kamdaon, i talem: “Lisin gud, o yufala ol nesen blong wol, mo harem ol toktok blong God ia we i bin mekem yufala.
24 !O, yufala ol nesen blong wol! !Hamas taem nao mi bin glad blong karem yufala i kam tugeta olsem wan mama faol i stap karem i kam wanples, ol pikinini blong hem andanit long ol wing blong hem, be yufala i no wantem!
25 !Hamas taem nao, mi bin singaotem yufala tru long maot blong ol wokman blong mi, mo tru long seves blong ol enjel, mo tru long voes blong miwan, mo tru long voes blong ol tanda, mo tru long voes blong ol laetning, mo tru long voes blong ol strong win, mo tru long voes blong ol etkwek, mo tru long bigfala win blong aes ston, mo tru long voes blong hadtaem blong kasem kaekae mo ol defren kaen sik, mo tru long bigfala saon blong wan pupu, mo tru long voes blong jajmen, mo tru long voes blong sore we mi givim long ful dei, mo tru long voes blong glori mo ona mo ol rij samting blong laef we i no save finis, mo hamas taem mi bin glad blong sevem yufala wetem fasin blong sevem man we i no gat en, be yufala i no wantem!
26 Luk, dei ia i kam, we kap blong bigfala nogud kros we i kamaot long kros blong mi, i fulap.”
27 Luk, i tru, mi talem long yufala, se hemia oli ol toktok blong Lod, God blong yufala.
28 Taswe, yufala i mas wok, yufala i mas wok long plantesen blong mi blong wan las taem—blong yufala i mas singaotem ol man we oli stap laef long wol blong wan las taem.
29 From long stret taem blong mi, bae mi kam long wol blong mekem jajmen, mo bae mi pemaot ol pipol blong mi mo bambae oli rul wetem mi long wol.
30 From bigfala taem blong Mileniom, we mi bin tokbaot tru long maot blong ol wokman blong mi, bambae i kam.
31 From bae mi fasem Setan, mo taem hem i go fri bakegen, bae hem i rul blong wan smol taem nomo, mo afta en blong wol i kam.
32 Mo hem we i laef long stret mo gud fasin, bae i jenis i kam niu i kwik olsem taem man i sarem wan ae, mo wol bae i go lus, olsem we faea i kakae hem.
33 Mo olgeta nogud man bae oli go lus long wan faea we i no save ded, mo en blong olgeta, i no gat man long wol we i save, mo bambae oli neva save, kasem taem oli kam long jajmen long fored blong mi.
34 Yufala i lisin gud long ol toktok ia. Luk, mi, mi Jisas Kraes, Sevya blong wol. Holemtaet gud ol toktok ia insaed long hat blong yufala, mo ol tabu samting blong taem we i no save finis oli mas stastap long maen blong yufala.
35 No pleiplei. Obei long evri komanmen blong mi. I olsem. Amen.