Seksen 4
Revelesen we Lod i givim tru long Josef Smit i go long papa blong Josef, Josef Smit Senia, long Hamoni, Pensilvania, long Febwari 1829.
1–4, Fasin blong wok strong long wok blong God i sevem ol wokman blong Lod; 5–6, Ol fasin olsem ol fasin blong God i mekem olgeta oli inaf long seves ia; 7, Ol wokman blong Lod oli mas lukaotem ol samting we oli blong God mo oli kam long God.
1 Naoia luk, wan gudfala wok bambae i stap kamaot long medel blong ol pikinini blong ol man i no longtaem.
2 From hemia, O yufala, we yufala i stat blong mekem wok blong God, yufala i mas luk se yufala i wok blong hem wetem ful hat, ful paoa blong tingting, ful maen mo ful paoa blong yufala, blong yufala i no gat rong taem bambae yufala i stanap long fored blong God long las dei.
3 From hemia, sapos yufala i wantem blong wok blong God, nao God i singaotem yufala long wok;
4 From luk, garen i waet, i rere blong oli tekemaot kaekae; mo luk gud, man we i sakem huknaef blong hem wetem strongfala paoa, hem i stap putum gud kaekae i stap blong mekem se bae hem i no save ded, be bae hem i tekem fasin blong sevem man i kam long sol blong hem;
5 Mo fet, hop, mo bigfala hat mo lav, wetem wan ae we i lukluk nomo long glori blong God, bae i mekem hem i naf long wok ia.
6 Yufala i tingbaot blong gat fet, klin fasin, save, fasin blong kontrolem yufalawan, fasin blong save wet longtaem, kaen fasin long brata blong yufala, fasin olsem hemia blong God, bigfala hat, fasin blong gat tingting i stap daon, mo fasin blong wok strong wetem strong tingting.
7 Yufala i askem, mo bae yufala i kasem; yufala i noknok, mo bae doa i open long yufala. Amen.