1 Le cah dzoʼoc u yaʼalic rey Benjamin le tʼanoʼob h aʼalaʼab tiʼoʼ tumen u angelil Yumtsiloʼ, ca anchah úchuleʼ u sutiʼc yich u pacat ichil le maʼcoʼoboʼ, heʼel túnaʼ dzoʼoc u lúbuloʼob luʼum, tumen u sahaquiʼl Yumtsil h oc ichiloʼob.

2 Ca tu tucultubaoʼob tiʼ u keban bakeloʼobeʼ mix igual yétel le luʼumoʼ, tulácaloʼob h muchʼ áwátnahoʼob tán u yaʼalicoʼob, chaʼ toʼon ótsilil yételoʼ dza toʼon u kiʼikel Cristo utiaʼal ca c kam u luʼsaʼal c keban; yétel ca saccuntaac c pucsiʼkal tumen c creertiʼc tiʼ Jesucristo, u pal Hahal Dios maʼx h bet caʼan, luʼum yétel tulácal baʼaloʼob bín émic ichil u palal maʼcoʼob.

3 Le cah dzoʼoc tún u yaʼalic le tʼanoʼobaʼ h ém u pixan Yumtsil yókoloʼob, cah chuʼupoʼob yétel quiʼmaʼc ólal le cah dzoʼoc u kamicoʼob u pʼoʼobol u kebanoʼob yétel anhi paz tiʼ u tuculoʼob tu yoʼolah hach nohoch u fe tiʼ Jesucristo maʼx bín talac heʼebix tu yaʼalahil rey Benjamin cah tʼanahoʼ.

4 Ca tún tu caʼa heʼeh u chiʼ rey Benjaminoʼ ca hoʼopʼ u caʼa aʼalic tiʼoʼob: In lákileʼex, in sucuʼuneʼex, in lákeʼex in cahal, in kát tu caʼatén ca a chén wuʼuyeʼex yétel ca a naʼateʼex u dzoʼoc le tʼanoʼob kabét in wáʼalic.

5 Tumen heʼel túnaʼ, wá a woheʼleʼex u yutsil Hahal Dios dzoʼoc u yahsic teʼex de que ca wuʼuyicaba mixbaʼalileʼex yétel tiʼ a maʼ utsileʼex yétel a lúbaʼanileʼex.

6 Quin wáʼalic teʼexeʼ wá dzoʼoc a kahóltiʼqueʼex yutsil Hahal Dios, yétel u páhtalil minaʼan ulak igual yételiʼ, u naʼatiʼl, u pacienciail tiʼ u palal maʼcoʼob, beyxann u sacrificioil letiʼ h betaab desde u cáhal u betaabil le yókolcabaʼ, tu yoʼolal tu yétel leloʼ ca páhchahac u náhatiʼc le salvacionoʼ tumen le maʼx cu dzáic u yólal chén tiʼ Yumtsileʼ yétel ca chucpahac yól u betiʼc u tʼanoʼob, yétel ca pʼátac tiʼ le feoʼ tac tu xul u cuxtal, kát in wáʼaleʼ u cuxtaliʼl u wáy h luʼumilaʼ.

7 Quin wáʼalic túneʼ letiʼ le maʼx kamic le salvacionaʼ, tu yoʼolal u sacrificioil Jesucristo le betaab desde u cáhal yókolcab utiaʼal tulácal le maʼcoʼob yanchahoʼob desde cah lúb Adan, yétel le yanoʼob behlaʼeʼ yétel le bín anacoʼob tac tu xul yókolcab.

8 Tu yoʼolal le heʼelaʼ cu tal le salvacionoʼ. Minaʼan ulʼak salvacion wá maʼ chén letiʼ le aʼalaʼanoʼ, mix xan minaʼan ulʼak modoil u salvartaal maʼc wá chén le heʼebix aʼalaʼaniloʼ.

9 Creerteʼex tiʼ Dios, creerteʼex yan Letiʼ; yétel tu betah tulácal baʼaloʼob heʼebix caʼan yétel luʼumoʼ, creerteʼex yan tulácal naʼatiʼl tiʼ Letiʼ yétel tulácal páhtalil, heʼebix teʼ caʼanoʼ beyxann tiʼ luʼumaʼ, creerteʼex de que maʼqueʼ maʼ tu naʼatiʼc tulácal le baʼax cu naʼatiʼc Hahal Diosoʼ.

10 Tu caʼaténeʼ creerteʼex kabét a kexic a wóleʼex tiʼ a kebaneʼex yétel a pát a beteʼex yétel a chin a poleʼex tu tánil Dios, ca a káteʼex yétel tulácal u yól a pucsiʼkaleʼexeʼ ca luʼsaʼab a kebaneʼex, wá xan ca creerteʼex le baʼaloʼobaʼ beteʼex.

11 Quin wáʼalic teʼex tu caʼaténeʼ, heʼebix tiʼn yáxaʼalil teʼexeʼ, heʼebix dza caniqueʼex u nohochil Hahal Dios, wá xan dzoʼoc a wohéltiʼqueʼex u yutsil, a wuʼuyiqueʼex u yacunah, yétel dzoʼoc a kamiqueʼex u pʼoʼobolil a kebaneʼexeʼ, cu dzáic teʼex nohoch quiʼmaʼc ólal tiʼ a pixaneʼex, quex beyoʼ in kát ca kaʼahac teʼex yétel u pʼátal ta tuculeʼexeʼ u nohochil Dios yétel xan tech mixbaʼaleʼch, yétel u yutsil yétel u pacienciail ta woʼolaleʼex, kastac maʼqueʼex, ca sénquech chin a poleʼex, tán a kátiʼqueʼex u kabaʼ Yumtsil sánsamaʼl, yétel ca yanaqueʼex fe tiʼ le baʼaloʼob cun úchuloʼ letiʼ aʼalaʼan tumen u angel Hahal Dioseʼ.

12 Heʼel túnaʼ quiʼn wáʼalic teʼexeʼ, wá teʼexeʼ ca betiʼqueʼex lelaʼ maʼntadz cun yantal teʼex quiʼmaʼc ólal, bín chuʼupuqueʼex yétel u yacunah Hahal Dios yétel maʼntadz ca anac teʼex u luʼsaʼal a kebaneʼex, yétel xan bín sén cambalnaqueʼex tu nohchil le maʼx h beteʼexoʼ wá le baʼax toh yétel hah.

13 Maʼ xan bín anac teʼex u dzíbolil a baʼatel ta batsileʼexiʼ, baʼaleʼ a cahtaleʼex tiʼ paz yétel a dzaiqueʼex tiʼ huhuntúlileʼ le baʼax u náhaltmaʼhoʼ.

14 Maʼ bín a chaʼeʼex u maʼn a palaleʼex wiʼihoʼobiʼ wá minaʼan u nokoʼ, mix xan u kascuntiʼcoʼob u tʼan Hahal Dios, mix u kuxiloʼob wáʼ u baʼateloʼob tu batsiloʼob tán meyahtiʼcoʼob u quiʼsin u nohochil le kebanoʼ, wá kakas pixan, maʼx oʼolal h tʼanahoʼob, c úchben tataoʼob, tumen letiʼ u enemigo tiʼ tulácal baʼax uts.

15 Baʼaleʼ yan a caʼansiqueʼex tiʼoʼob u xímbal tiʼ u behil u hah yétel maʼalob tuculoʼob; yan a caʼansiqueʼex tiʼoʼob u paclam yábiltiʼcubaoʼob yétel u meyahtiʼcubaoʼob tu batsiloʼob.

16 Ulák baʼal xaneʼ teʼexeʼ yan a tʼoxiqueʼex baʼax yan teʼex tiʼ. Dza le baʼax kabét tiʼ le otsililoʼ bey xan maʼ a hókseʼexoʼob tankab ca mukyahnacoʼob.

17 Quen a wáʼal teʼex wáleʼ: Le maʼcaʼ dzoʼoc u tasic u yótsilil tu yókol, le betiʼqueʼ maʼ yan in tiʼn wántiʼquiʼ yétel maʼ yan in dza u yoʼoch tiʼ mix xan bín in chaʼ u yantal tiʼ baʼaloʼob intiʼaʼalaʼ, tu yoʼolal u mukyah, tumen u hadzileʼ tu bel.

18 Baʼaleʼ maʼc; quiʼn wáʼalic techeʼ le maʼx betiʼc lelaʼ hach kabét u kexic yól, tumen wá maʼ tu kexic u yól tiʼ baʼax tu betaheʼ, bín xuʼulsaʼac yétel maʼ tun yantal cúchil utiaʼal tu reinoil Hahal Dios.

19 Heʼel túnaʼ maʼ wá tulácaloʼon ótsiloʼoniʼ? Maʼ tulácloʼon c chʼaic cuxtal tiʼ le mismo Dios, tu yoʼolal tulácal le baʼaloʼob yan toʼonoʼ, tu yoʼolal hanal yétel nok, tu yoʼolal oro, yétel plata, yétel tu yoʼolal tulácal le ayikaliloʼob yan toʼonoʼ?

20 Heʼel túnaʼ, behlaʼeʼ dzoʼoc a kátiʼqueʼex u kabaʼ, tán a kátiʼqueʼex ca pʼoʼoboc a kebaneʼex. Tu chaʼah wá a kátiʼqueʼex chén beyoʼ? Maʼatech, Letiʼ tu wecah u pixan ta wókoleʼex, tu betah xan u chuʼupul a pucsiʼkaleʼex yétel quiʼmaʼc ólal, tu maʼcah xan a chiʼeʼex, maʼ u páhtal a tʼaneʼex, tu yoʼolal hach táh nohochchah a quiʼmaʼc ólaleʼex.

21 Behlaʼ túneʼ wá Dios h mentneʼex, tiʼ le maʼx cu dzaic teʼex a cuxtaliʼloʼ yétel tulácal le baʼaxoʼob yan teʼex yétel teʼex mismo, cu dzaic teʼex heʼebaʼalac toh baʼal quen a kátiʼqueʼex yétel fe, ca creertiʼqueʼex de que hah kamiqueʼexeʼ, bix yan a tʼoxabaeʼex a baʼaloʼobaʼ ichileʼex?

22 Wá xan ca juzgartiʼqueʼex le maʼx kátiʼc teʼex a baʼaleʼex tu yoʼolal maʼ u químiloʼ wá ca wáʼalic kas tu yoʼolal letiʼ bucaʼah maʼs tu bel le kas cu tal ta wókoleʼexoʼ tu yoʼolal maʼ a tʼox le atiaʼaleʼexoʼ, yétel leloʼ maʼ atiaʼaleʼexiʼ baʼaleʼ utiaʼal Hahal Dios, maʼx tiaʼaltiʼc xan a cuxtaleʼex, tiʼ tulácal lelaʼ mixbaʼal ca kátiʼqueʼex, mix xan tu kexic a wóleʼex tiʼ baʼax ca betiʼqueʼex.

23 Quin wáʼalic teʼexeʼ, otsil le maʼcoʼ tumen u baʼaloʼobeʼ bín xuʼulsaʼac yétel letiʼ, quiʼn wáʼalic le baʼaloʼobaʼ tiʼ le maʼxoʼob ayikaloʼoboʼ yétel u baʼaliloʼob le yokolcabaʼ.

24 Quin wáʼalic xan tu caʼatén tiʼ le ótsiloʼoboʼ, teʼexeʼ minaʼan teʼex yaʼab baʼaloʼob, baʼaleʼ yan teʼex utiaʼal a maʼneʼex tiʼ humpʼél kin tac tulak, lelaʼ tiʼn wáʼalic teʼex maʼ ta dzaic tiʼ le ótsiloʼob tumen minaʼan teʼex, in kat ca a wáʼaleʼex ta pucsiʼkaleʼexeʼ: Maʼ tiʼn dzaic tumen minaʼan ten baʼaleʼ wá yan teneʼ heʼel in dzaiqueʼ.

25 Wá ca wáʼaliqueʼex le heʼel ta pucsiʼkaleʼexaʼ, ca pʼátaleʼex minaʼan a kebaneʼex, wá maʼeʼ ta tasiqueʼex kas ta wókoleʼex tu bel, tumen ca dzíboltiʼqueʼex le baʼax maʼ a kameʼexoʼ.

26 Heʼel túnaʼ, tu yoʼolal le baʼaloʼob tiʼn wáʼalah teʼexaʼ, u kat yaʼaleʼ tu yoʼolal a pʼatiʼqueʼex u pʼoʼobolil a kebaneʼex sánsamaʼleʼ tu yoʼolal ca maʼnaqueʼex xmaʼ keban tu tánil Hahal Dios in káteʼ ca a dzaeʼex a baʼalubaeʼexeʼ tiʼ le ótsiloʼ, huhuntúlileʼ le yan tiʼeʼ heʼebix u tséntaal le maʼx wiʼihoʼ, u dzaʼabal u nok le maʼx minaʼan u nokoʼ, u xímbataal le kohaʼanoʼ ca utschacoʼ, heʼebix tiʼ u pixaneʼ beyxann tiʼ u wínclil heʼebix u káteʼ.

27 Ilawileʼex a betiʼqueʼex le baʼaloʼobaʼ yétel naʼatiʼl yétel tu tsoʼolol, tumen maʼ tu yutstal ca álcabnac maʼc maʼs séb tiʼ le cu páhtal yétel u mukoʼ. Ulák xaneʼ cu deber ca sákolchac heʼel u páhtal u kamic le boʼolaloʼ, le oʼolaleʼ tulácal le baʼaloʼoboʼ kabét ca betaac tu tsoʼolol.

28 In kat xan ca kaʼahsic teʼexeʼ wá yan wá maʼx ichileʼex cu katiʼc wá baʼax u maʼhant tiʼ le maʼx cu cahaʼan tu tseloʼ, ca u sut heʼebix u yaʼaliqueʼ, tumen wá maʼeʼ tán a betiʼc keban yétel xaneʼ ca betiʼc ca u ment keban le maʼc cahaʼan ta tseloʼ.

29 Tu dzoʼoqueʼ maʼ tu páhtal in láh aʼalic teʼex tulácal le baʼaloʼob iquiʼl a kebanchahaleʼexoʼ, tumen tiʼ yaʼabil le baʼaxoʼob iquiʼl a kebanchahaleʼexoʼ maʼ tu páhtal in xoquiʼcoʼob.

30 Tu yoʼolal lelaʼ heʼel u páhtal in wáʼalic teʼexeʼ wá maʼ ta canántiʼcabaeʼex teʼex, a tuculeʼex yétel tʼaneʼex yétel baʼax ca betiʼqueʼexeʼ, yétel wá maʼ ta betiʼqueʼex baʼax cu yaʼalic Hahal Dios mix tán yantaleʼex yétel humpʼél fe, tiʼ baʼax dzoʼoc a wuʼuyiqueʼex tu yoʼolal u talbal c Yumtsileʼ, tac tu xul a cuxtaleʼexeʼ bin xuʼuluqueʼex, behlaʼ túneʼ maʼc kaʼaheʼex yoʼolal maʼ a quimileʼex.