Capitulo 3
Le rey Benjamin cu tsicbatiʼc maʼs. Le Yumtsil tulácal páhtalil yan tiʼ yan u meyahtiʼc ich maʼc bey anic tu nah betaan tiʼ luʼum. Cun hókol u kiʼikel tiʼcada u holil u yotʼel le quen kuchuc tu yókol letiʼu kebanoʼob yokolcab. Chén tu yoʼolal u kabaʼLetiʼ cu salvartiʼc maʼc. Le maʼcoʼob hu páhtal u dzic tu tsel le maʼc kasaʼan bey anil, yétel cu páhtal u sutubaoʼob maʼalob maʼcoʼob tu yoʼolal le kebanoʼob dzoʼoc u boʼotaal Cristo. Le kakasoʼob yan u yuʼubic hach táh yayah tiʼ humpʼél tuʼux bey chup yétel kák yétel ázufre.
1 In kát in caʼa tán a tuculeʼex, in sucuʼuneʼex tumen yan baʼax quen in wáʼal teʼex, heʼel túnaʼ yan baʼax quen in wáʼal teʼex tiʼ kinoʼob cun h taloʼ:
2 Le baʼax quen in wáʼal teʼexaʼ h eʼesaʼab ten tumen huntúl u angel Hahal Dios. Ca tún tu yaʼalah ten: Aheʼn; cah aheʼn; ca tiʼn wilaheʼ tiʼ yan tiʼn táneʼ.
3 Ca tu yaʼalah ten: Aheʼn ca a wuʼuy le tʼanoʼob quen in wáʼal techaʼ: tumen heʼel túnaʼ quiʼn tal in tsol tech humpʼél nohoch quiʼmaʼc ólal.
4 Tumen Yumtsileʼ dzoʼoc u yuʼubic a oracion, dzoʼoc u yilic a maʼalob cuxtaliʼl tu túxtaheʼn in tsol teʼex tu yoʼolal u páhtal u quiʼmaʼctal a wól, yétel tu yoʼolal a tsolic tiʼ a cahal tu yoʼolal xan ca chuʼupucoʼob yól letiʼoʼob yétel quiʼmaʼc ólal.
5 Tumen heʼel túnaʼ tán u tal u kinil, maʼ sén náchiʼ, yétel páhtalileʼ, le tulácal páhtalil Yumtsil cu caʼansaʼal, maʼx letiʼ caʼachiʼ, letiʼ behlaʼeʼ, letiʼ xan tulácal kinoʼob, tac tulácal kínoʼob yan u yémel desde caʼan ichil u palal maʼcoʼob, bín cahlac tiʼ humpʼél nah betaan tiʼ luʼum, yétel bín xímbalnac ichil maʼcoʼob tán u betiʼc nucuch baʼal cu hasic yól maʼc, cu dzaquiʼc xan kohaʼanoʼob cu dzic cuxtal tu caʼatén tiʼ quiʼmenoʼob, cu bet le mochoʼoboʼ u betiʼc u xímbal, u dzaic u sásil le chʼopoʼoboʼ, u betiʼc u yuʼubah le cocoʼoboʼ yétel u dzaquiʼc tulácal u heʼheʼlásil kohaʼanoʼob.
6 Bín u hoʼs le quiʼsinoʼoboʼ wá le kákas pixanoʼob cahacbaloʼob tu pucsiʼkal u palal maʼcoʼoboʼ.
7 Heʼel túnaʼ yan u mukyahtiʼc u kakas caʼansahil quiʼsin, kinaʼan u wínclil, wiʼih, ukah, yétel caʼanaʼanil; hach típmaʼhaʼan u muʼyahileʼ huntúl maʼc beyoʼonaʼ cu químil yoʼolal le muʼyahiloʼ. Tumen heʼel túnaʼ yan u hókol u kiʼikel tiʼ cada humpʼél u holil u yotʼel, tiʼ hach nohochil u mukyah tu yoʼolal u kasiʼl u cahal.
8 Bín dzaʼabac u kabaʼeʼ Jesucristo, u Pal Hahal Dios u Tatail caʼan yétel luʼum, maʼx h bet tulácal baʼaloʼob desde le yáx kinoʼ; u maʼmaʼeʼ yan u kabaʼintiʼc Maria.
9 Heʼel túnaʼ tán u tal ichil le utiaʼaloʼoboʼ, tu yoʼolal u páhtal u kuchul salvacion ichil u palal maʼcoʼob yoʼolal u feil tu kabaʼ, tac le cun dzoʼoc lelaʼ yan u chʼaʼabal bey maʼqueʼ bín aʼalaʼaqueʼ yan kakas pixan tiʼ, le oʼolaleʼ bín haʼadzac yétel bín chʼuyquiʼnsaʼac tiʼ humpʼél cruz.
10 Baʼaleʼ tu yoxpʼél kíneʼ yan u caʼa cuxtal ichil le quiʼmenoʼoboʼ, heʼel túnaʼ bín líkiʼc utiaʼal u juzgartiʼc le baʼax u betmaʼh maʼc tiʼ wáy yokolcabeʼ; heʼel túnaʼ tulácal lelaʼ cu betaal tu yoʼolal ca menchahac humpʼél tadz juicio ichil u palal maʼcoʼob.
11 Tumen heʼel túnaʼ u kiʼikel xaneʼ cu pʼoʼic u keban tac le maʼxoʼob lubaʼanoʼob tu yoʼolal u keban Adanoʼ, h químoʼob, maʼ tu yoheltoʼob u yólah Hahal Dios yétel letiʼoʼobiʼ, wá h kebanchahoʼob tumen maʼ yoheʼloʼobiʼ.
12 Baʼaleʼ ótsil tiʼ le maʼxoʼob cu líkiʼloʼob tu contra Hahal Dios quex u yoheʼloʼoboʼ, tumen mix huntúl quen u náhalt u salvacionil wá maʼ tu kexic u yól yétel fe tiʼ Yumtsil Jesucristo.
13 Yumtsil Hahal Dioseʼ dzoʼoc u túxtiʼc u profetaoʼob ichil u palal maʼcoʼob utiaʼal ca u tsoloʼob tulácal le baʼaloʼobaʼ tiʼ cada otoch, luʼumil, yétel tʼan, tu yoʼolal beyoʼ le maʼx tu yohelt de que Cristo yan u tal utiaʼal ca pátac u luʼsaʼal u kebanoʼob yétel ca quiʼmaʼcchahac u yóloʼob yétel nohoch quiʼmaʼc ólal, bey hach dzocaʼan u tal ichiloʼobeʼ.
14 Quex beyoʼ Yumtsil Hahal Dioseʼ tu yilah u cahaleʼ maʼcoʼob hach chich yóloʼob, ca tu dzah humpʼél tʼan tiʼoʼob, beyoʼ u tʼanil Moises.
15 Ca tún tu yeʼesah tiʼoʼob yaʼabach baʼal cu hasic yóloʼob, yétel nucuch baʼaloʼob yétel eʼesbil tʼanoʼob, yochʼiloʼob utiaʼal u talbal mix yétel beyaʼ, beyxann le profetaoʼob h tʼanoʼob tu yoʼolal u talbal; mix yétel beyaʼ tu hach chichcuntah u pucsiʼkaloʼob yétel maʼ tu naʼatahoʼob, decosque u tʼanil Moiseseʼ mixbaʼal u bilaliʼ wá maʼ chén tu yoʼolal u sacrificioil u kiʼikel.
16 Lailiʼxan wá ca páhchahac u kebanchahaloʼob le meheʼn palaloʼob, maʼ tu páhtal u salvartaal; baʼaleʼ quiʼn wáʼalic teʼex dzoʼoc u kamic u bendicionoʼob tumen heʼebix tu yoʼolal Adan cu lúbuloʼobeʼ; quex beyoʼ u kiʼikel Cristo bín u pʼoʼ u kebanoʼob.
17 Quin wáʼalic xan techeʼ maʼ bín dzaʼabac u yanal kabaʼiʼ mix ulʼak beh wá páhtalil bín u chucoʼob salvacion u palal maʼcoʼob, baʼaleʼ chén tu yoʼolal Cristo, Yumtsil minaʼan u xul u páhtalil.
18 Heʼel túnaʼ letiʼeʼ cu juzgartiʼc yétel humpʼél tucul hach toh, huntúl chanpal cu químil ichil u chanbaliloʼ maʼ tu mukyahiʼ, baʼaleʼ, nucuch maʼcoʼobeʼ cu kascuntiʼc u yóloʼob, wá maʼ tu chin u pol ca pʼátacoʼob bey meheʼn palaloʼobeʼ, ca u creertoʼob de que le salvacion anchahi, yan yétel bín talac tu yoʼolal u kiʼikel Cristo, Yumtsil tulácal páhtalil minaʼan u xul.
19 Tumen maʼc tac u yéyic kas letiʼeʼ huntúl enemigo tiʼ Dios desde le cah lúb Adan, beyxann bín anac lailiʼ wá maʼ tán u dzaicuba tu yánal u tʼan le Hahil Pixan ca u pʼat le kasaʼan maʼcoʼ, ca u betuba utsil maʼc tu yoʼolal u sacrificio Cristo Yumtsil ca sunac tún bey huntúl chanpaleʼ: cu chinil u pol, ca muchʼuc u ba ótsil anil, maʼ tu haʼan chʼaʼic kuxil, chup yétel yácunah, yétel chucaʼan yól cu kubicuba tiʼ Yumtsil tiʼ tulácal baʼal u káteʼ heʼebix huntúl chanpal cu kubicuba tiʼ u tataeʼ.
20 Yétel quiʼn wáʼalic xan teʼexeʼ yan u tal u kinil yan u yoheltiʼc maʼc tiʼ tulácal nucuch cahoʼob, ichil otochoʼob, ich tʼanoʼob yétel le meheʼn cahoʼobeʼ yan huntúl Salvador.
21 Le quen kuchuc le kinoʼ, mixmaʼc bín ilaʼac xmaʼ culpa tu tánil Hahal Dios wá maʼ chén letiʼ meheʼn palal, wá maʼ chén tu Dios yétel tulácal páhtalil minaʼan u xul.
22 Bey túnoʼ le cun dzoʼococ a caʼansic tiʼ a cahal le baʼax dzoʼoc u yaʼalic tech Yumtsil a Dioseʼ, tu kiniloʼ yan tiʼoʼob u culpail tu tánil Dios, chén hach heʼebix dzoʼoc in wáʼalic techoʼ.
23 Behlaʼ túneʼ dzoʼoc in wáʼalic baʼax tu yaʼalah ten Yumtsil Hahal Dios.
24 Bey u yaʼalic Yumtsilaʼ: Heʼ u wáʼaltaloʼob bey humpʼél hahil tʼan cu lémbal yoʼolal le cahoʼ tu kinil le cu juzgartiʼc maʼc, tu yoʼolal leloʼ bín juzgartaac huhuntúlil heʼebix baʼaxoʼob u mentmaʼheʼ wá uts wá kas.
25 Wá kastacoʼobeʼ bín u yiloʼob le baʼaxoʼob kastacoʼob u mentahoʼob, letiʼ cun betiʼc tac u cuculpachoʼob tu tánil Yumtsil tiʼ humpʼél cuxtal hach otsil yétel humpʼél mukyah minaʼan u xul, teʼeloʼ mix bikin bín sunacoʼob, tumen dzoʼoc u kascuntiʼc u yóloʼob.
26 Le betiʼqueʼ dzocaʼan u yukuloʼob tu copail u kuxil Hahal Dios le justiʼcia maʼ páhchah u luʼsic tiʼoʼob hach heʼebix xan maʼ páhchah u luʼsic tiʼ Adan ca lúbuc u hantiʼc u yich le cheʼoʼ, bey túnoʼ maʼ tu páhtal u chʼaʼic otsilil tiʼ yókoloʼob letiʼoʼob minaʼan u xul.
27 U mukyah xaneʼ bey humpʼél kaʼnab bey kákeʼ u nucuch kákileʼ maʼ tu páhtal u tuʼupul, u budzileʼ cu naʼacal minaʼan u xul u bin. Bey dzoʼoc u túchiʼtiʼc ten Yumtsil. Amen.