1 Asin ngonian, uminagi an panahon na kan si hading Benjamin taposon na an saiyang pagtaram kan manga tataramon na hinatod saiya kan anghel kan Kagurangnan, saiyang itiningkalag an saiyang manga mata sa palibot kan katiripunan, asin totoo na sinda nagkaparulugmok sa daga huli ta an pagkatakot sa Kagurangnan uminabot sa sainda.

2 Asin ta nahiling ninda an saindang sadiri sa kamugtakan sa laman, na hababa pa sa kabokabo kan daga. Asin sinda gabos nagkurahaw sa sarong makusog na tingog, na an sabi: O kaheraki, asin papagkanigoa na sa pagtubos kan dugo ni Cristo na kami makakua nin kapatawaran kan samuyang manga kasalan, asin an samuyang manga puso malinigan huli ta nagtutubod kami ki Jesu-Cristo, na aki kan Dios, na naglalang kan langit asin daga, asin an gabos na bagay; na siya mababa sa manga aki nin tawo.

3 Asin ta uminagi an panahon na pagkatapos nindang makapagtaram kan manga tataramon na ini an Espiritu kan Kagurangnan uminabot sa sainda, asin nagkaparano sinda nin kaogmahan, dahil ta nakakua nin kapatawaran kan saindang manga kasalan asin nagkaigwa nin katuninongan nin pag-isip, huli sa saindang labi-labing pagtubod ki Jesu-Cristo na maabot sunod sa manga tataramon na sinabi ni hading Benjamin sa sainda.

4 Asin sa giraray binuka ni hading Benjamin an saiyang nguso asin nagpoon na magtaram sa sainda, na an sabi: Sakuyang manga katuod asin manga tugang, manga manunungod asin sakuyang manga tawo, sa giraray inaapodan ko kamo na magdarangog asin saraboton an natatada kan sakuyang manga tataramon na itataram ko sa saindo.

5 Huli ta totoo, kun an kaaraman kan karahayan kan Dios sa panahon na ini nagkapurukawan kamo sa pakamati kan saindong kadaihon, asin an saindong pagkadaing kamugtakan asin sa pagkarasala—

6 Sinasabi ko sa saindo, na kun uminabot na an saindong pakaaram kan karahayan kan Dios, asin an saiyang daing kapantay na kapangyarihan, asin an saiyang kadunungan, asin an saiyang pagkamatinios, asin an saiyang halawig na pagtios para sa manga aki nin tawo; asin man, an pagtubos na hinanda magpoon kan kapinonan kan kinaban, tanganing diyan an kaligtasan saiyang makamit na nanarig sa Kagurangnan, asin maimbod sa pagsunod kan manga katugonan, asin magpadagos sa pagtubod sagkod sa katapusan kan saiyang buhay, an boot kong sabihon an buhay na mortal—

7 Sakuyang sinasabi, na ini an tawo na maako nin kaligtasan, sa paagi kan pagtubos na hinanda pagpoon pa kan kapinonan kan mundo para sa katawohan, na nabuhay magpoon kan pagkahulog ni Adan sa kagadanan, o siisay man ngonian, o siisay man na maabot pa, maski sagkod sa katapusan kan mundo.

8 Asin iyo ini an paagi na an kaligtasan maabot. Asin daing ibang kaligtasan kundi an nasambit na; ni igwa pang ibang paagi na an tawo maililigtas kundi sa paagi na sakuyang sinabi na sa saindo.

9 Magtubod sa Dios; magtubod na siya buhay asin ta siya an naglalang kan gabos na manga bagay, maging sa langit asin sa daga; magtubod na igwa siya kan gabos na kadunungan, asin gabos na kapangyarihan, maging sa langit asin sa daga; magtubod na an tawo dai nakakasabot sa manga bagay na nasasabotan kan Kagurangnan.

10 Asin sa giraray, magtubod na kaipuhan na saindong pagsorolsolan an saindong manga kasalan asin bayaan na an manga ini, asin magpakumbaba sa atubangan kan Dios; asin sa maimbod na puso maghagad na kamo patawadon; asin ngonian, kun kamo magtutubod sa gabos na manga bagay na ini hilingon na gibohon ini nindo gabos.

11 Asin sa giraray sakuyang sinasabi sa saindo siring sa sakuyang sinabi na kan enot, na siring na kamo uminarabot sa kaaraman kan kamurawayan kan Dios, o kun saindong naaraman na an saiyang karahayan asin saindong nanamitan na an saiyang pagkamoot, asin kamo nag-arako na kan kapatawaran kan saindong manga kasalan, na iyo an dahilan na kamo nag-ogma nin labi-labi sa saindong manga kalag, siring man minamawot ko na saindong marumdoman, asin magdanay sa pagrumdom, kan kadakulaan kan Dios, asin an saindong kadaihon, asin an saiyang karahayan asin halawig na pagtios para sa saindo, na dai naninigo na manga linalang, asin magpakumbaba kan sadiri sagkod sa kahurohiraromi kan pagpakumbaba, nag-aapod kan pangaran kan Kagurangnan aroaldaw asin naninindogan nin makusog sa pagtubod sa maabot, na tinaram kan nguso kan anghel.

12 Asin totoo nanggad, sakuyang sinasabi sa saindo na kun gigiribohon ini nindo, kamo danay na mag-oorogma asin mapapano kan pagkamoot kan Dios, asin danay na magkakaigwa nin kapatawaran kan saindong manga kasalan; asin kamo matalubo sa kaaraman kan kamurawayan niya na naglalang sa saindo, o sa kaaraman kan kun ano an maninigo asin totoo.

13 Asin kamo dai magkakairigwa nin pag-isip na mangulog sa iba, alagad an mabuhay na matiwasay, asin an magtao sa lambang tawo kun ano an nanunungod saiya.

14 Asin ta dai nindo magkakatirios an saindong manga aki na magkagurutom, o maghuruba; ni dai man nindo matitios na sinda magralapas kan manga katugonan kan Dios, asin magturumang asin mag-iriwal sa lambang saro, asin pagrilingkodan an demonio, na iyo an amo kan kasalan, o iyo an maraot na espiritu na pinagsasabi kan satuyang manga kamagurangan, siya na kaiwal kan gabos na katanusan.

15 Alagad tuturukdoan nindo sinda na magralakaw sa dalan nin katotoohan asin pagkamakatotoo; tuturukdoan nindo sinda na magkaminorootmootan sa lambang saro, asin magparurilingkod sa lambang saro.

16 Asin man, kamo, an sadiri nindo, magtatarabang sa nangangaipo kan saindong tabang; itatabang mo an saimong kabuhayan sa nangangaipo; asin dai mo matitios na an pakimaherak kan makilimos na bayaan mo sana, asin siya saimong pahalion tanganing mapara.

17 Tibaad saimong sabihon: An tawo an naghanap kan saiyang pagtios; kaya sakuyang pupugolon an sakuyang kamot, asin ako dai magtatao kan sakuyang pagkakan, ni magwaras ako kan sakuyang kabuhayan tanganing siya dai magtios, huli ta an saiyang padusa nanunungod man—

18 Alagad sakuyang sasabihon sa saindo, O tawo, na an siisay man na maggibo kaini, siya igwang dakulang dahilan na magsolsol; asin sagkod na dai siya magsolsol kan saiyang manga ginibo siya mapapara sagkod pa man, asin dai siyang pagmawot sa kahadean kan Dios.

19 Huli ta totoo nanggad, bako kita gabos makilimos? Bakong nananarig kita sa sarong Pagkatawo, na iyo an Dios, sa gabos na pagkabuhay na igwa kita, sa pagkakan asin sa paggubing, asin sa bulawan, asin sa plata, asin sa gabos na kayamanan na igwa kita?

20 Asin hilinga, sagkod sa panahon na ini inaapod nindo an saiyang pangaran, asin nakikimaherak sa kapatawaran kan saindong manga kasalan. Asin saiya daw natios na kamo makimaherak nin daing kamugtakan? Dai; saiyang ibinuhos an saiyang espiritu sa saindo, asin saiyang ginibo na an manga puso nindo mapano nin kaogmahan, saiyang ginibo na an manga nguso mataom na dai na kamo makakua nin tataramon, huli ta labi-labi an saindong kaogmahan.

21 Asin ngonian, kun an Dios na naglalang saindo, na sinasarigan nindo kan saindong buhay, asin sa gabos na igwa kamo asin sa kun ano kamo, itinatao saindo an ano man na saindong hagadon na tama, na igwang pagtubod, nagtutubod na tatawan kamo, O kaipuhan sana na magwararas kamo kan saindong kabuhayan na igwa kamo sa iba.

22 Asin kun saindong huhukoman an tawo na naghahagad saimo kan saimong kabuhayan tanganing dai siya mapara, asin saimong basolon siya, gurano daw katama na ika basolon kan pag-imot mo kan saimong kabuhayan, na bako man saimo alagad sa Dios, na kun siisay man an may sadiri kan saimong buhay; alagad dai man kamo naghaharagad o nagsosorolsol kan manga bagay na ginibo nindo.

23 Sakuyang sinasabi sa saindo, kaherak kan tawong idto, huli ta an saiyang kabuhayan mapapara na kaibahan niya; asin ngonian, sinasabi ko an manga bagay na ini para sa manga mayaman sa manga bagay na kinabanon.

24 Asin sa giraray, sakuyang sinasabi sa manga dukha, kamo na darai, alagad igwa man kan saindong manga pangangaipo, na kamo magkaburuhay sa aroaldaw; an boot kong sabihon kamo gabos na nag-iirimot sa manga makilimos, huli ta dai kamo; sakuyang minamawot na sabihon nindo sa saindong manga puso na ako dai nagtao huli ta ako dai, alagad na kun ako igwa ako magtatao.

25 Asin ngonian, kun sasabihon ini nindo sa saindong manga puso kamo magiging daing sala, kun dai, kamo isusumpa; asin an sumpa saindo manunungod sana huli ta kamo nagmawot kan dai pa napapasaindo.

26 Asin ngonian, dahilan kan manga bagay na sakuyang isinabi sa saindo—na iyo an tanganing magdaranay kamo na magkaigwa nin kapatawaran kan saindong manga kasalan sa aroaldaw, na kamo makapagralakaw na daing sala sa atubangan kan Dios—minamawot ko na kamo magwararas kan saindong pagkabuhay sa manga dukha, lambang tawo susog sa saiyang pagkaigwa, siring sa pagpakakan sa manga nagugutom, paggubing kan manga huba, pagdalaw sa manga naghihilang asin pagtao nin kagianan sa saindang pagtios, maging espiritual asin temporal sunod sa saindang pangangaipo.

27 Asin hilingon na an manga bagay na ini ginigibo sa kadunungan asin kahusayan; huli ta dai man kaipuhan na an tawo magdalagan na maliksi pa sa saiyang kusog. Asin sa giraray, kaipuhan na siya maging maigot, tanganing sa siring siya magkamit kan kabayadan; kaya an gabos na manga bagay kaipuhan na gibohon sa kahusayan.

28 Asin ta boot ko na saindong marumdoman na an siisay man sa saindo na magsubli sa saiyang kapwa kaipuhan na iuli an bagay na saiyang sinubli, sunod sa saiyang inuyonan, o kun dai, kamo magkakasala; asin tibaad an saindong kapwa magkasala man.

29 Asin sa katapusan, dai ko saindo masasabi an gabos na bagay kun sain kamo makakagibo nin kasalan; huli ta kadakol na manga paagi asin tuyo, kadakol na dai ko mabilang.

30 Alagad ini an masasabi ko sa saindo, na kun dai kamo magmarangno sa saindong manga sadiri, asin sa saindong manga pag-iisip, asin sa saindong manga tataramon, asin sa saindong manga gibo, asin sumunod sa manga katugonan kan Dios, asin magpadagos sa pagtubod sa saindong manga nagkadarangog manunungod kan pag-abot kan satuyang Kagurangnan, sagkod sa katapusan kan saindong manga buhay, kamo mapapara. Asin ngonian, O tawo, magrumdom tanganing dai mapara.