1 Asin sa giraray sakuyang manga katugangan, boot kong apodan an saindong pandangog, huli ta ako igwa pang itataram sa saindo; huli totoo, ako igwang manga bagay na sasabihon sa saindo manunungod sa manga bagay na maarabot.

2 Asin an manga bagay na sakuyang sasabihon sa saindo pinaaram sakuya sa paagi nin sarong anghel na hali sa Dios. Asin siya nagsabi sa sakuya: Magmata; asin ako nagmata, asin ta bigla na siya nagtindog sa sakuyang atubangan.

3 Asin siya nagsabi sa sakuya: Magmata, asin magdangog kan manga tataramon na sakuyang sasabihon saimo; huli nanggad, ta ako nagpadigdi sa pagbalangibog sa saimo kan marahay na manga bareta nin dakulang kaogmahan.

4 Huli an Kagurangnan nadangog an saimong manga pamibi, asin hinatolan an saimong katanusan, asin pinadigdi ako tanganing magbalangibog sa saimo na ika mag-ogma; asin tanganing saimong ibalangibog sa saimong manga tawo, tanganing sinda magkaparano man nin kaogmahan.

5 Huli ta totoo, an panahon maabot, asin bako na harayo, na igwang kapangyarihan, an Kagurangnan na Mapangyari na naghahadi, na iyo kaidto, asin ngonian, hali sa gabos na daing-kasagkuran sagkod sa gabos na daing-kasagkuran, mababa hali sa langit madigdi sa manga katiripunan kan manga aki nin manga tawo, asin maerok sa hawak na laman, asin makikiiba sa katiripunan nin manga tawo, maggigibo nin manga makusog na manga milagro, siring sa pagbulong kan manga naghihilang, pagbuhay kan gadan, pagpapalakaw kan pilay, pagtao nin liwanag sa buta, asin an bungog makadangog, asin nagbubulong nin palaen-laen na hilang.

6 Asin siya magpapalayas nin manga demonio o nin mararaot na espiritu na nag-eerok sa manga puso kan manga aki nin tawo.

7 Asin hilingon, siya matios nin manga pagsugot, asin kulog nin hawak, gutom, paha, asin kapagalan, na orog pa sa matitios nin tawo, bako sana an kagadanan; huli ta totoo, na an dugo maluwas sa lambang luho kan saiyang kublit, labi-labi kadakula kan saiyang kamundoan huli sa manga karaotan asin kasumbikalan kan saiyang manga tawo.

8 Asin siya aapodon na Jesu-Cristo, an Aki kan Dios, an Ama kan kalangitan asin daga, an Kaglalang kan gabos na manga bagay magpoon sa kapinonan; asin an saiyang ina aapodon na Maria.

9 Asin hilinga, siya mapadigdi sa saiyang sadiri, tanganing an kaligtasan umabot sa manga aki nin tawo na maski sa paagi nin pagtubod sa saiyang pangaran; asin maski pagkatapos kan gabos na ini sinda mimidbidon siya na sarong tawo, asin sasabihon na siya igwang demonio, asin siya hahampakon, asin siya ipapako sa krus.

10 Asin siya mabangon sa ika-tulong aldaw hali sa pagkagadan; asin totoo na siya matindog sa paghukom kan mundo; asin totoo, na an gabos na ini ginibo tanganing an matanos na paghatol makua kan manga aki nin tawo.

11 Huli nanggad, ta an saiya man na dugo magtutubos man kan manga kasalan kaidtong manga nagkasala huli sa paglapas ni Adan, na nagadan na dai nakakaaram kan kabotan kan Dios manunungod sa sainda, o idtong nagkasala na daing pakaaram.

12 Alagad herak man, herak man sa saiya na nakakaaram na nagtutumang siya sa Dios! Huli ta an kaligtasan dai maabot sa siring kundi sa paagi kan pagsolsol asin pagtubod sa Kagurangnan na Jesu-Cristo.

13 Asin sinugo kan Kagurangnan na Dios an saiyang manga banal na propeta sa gabos na aki nin tawo, na ibalangibog an manga bagay na ini sa lambang rasa, nasion, asin tataramon na kun siisay man an magtubod na si Cristo maabot, iyo an makakakua nin kapatawaran kan saindang manga kasalan, asin mag-oorogma nin labi-labi kadakula na kaogmahan, na siring baga sa siya nag-abot na sa sainda.

14 Alagad nahiling kan Kagurangnan na Dios na an saiyang manga tawo manga sutil na manga tawo, asin saiyang itinalaga an sarong tugon siring sa tugon ni Moises.

15 Asin kadakol na manga tanda, asin manga ngangalasan, asin manga manlaen-laen pa, asin manga anino na saiyang ipinahiling sa sainda, manunungod kan saiyang pag-abot; asin man an manga banal na propeta nagtararam sa sainda manunungod kan saiyang pag-abot; alagad saindang pinataragas an saindang manga puso, asin dai nasabutan na an tugon ni Moises daing kamugtakan kun bako sa paagi kan pagtubos kan saiyang dugo.

16 Asin maski igwa man na paagi na an saradit na manga aki magkasala dai sinda makakaligtas, alagad sinasabi ko sa saimo sinda manga paladan; huli ta totoo, siring sa ki Adan, o sa pagkatawo, sinda magkakasala, siring man an dugo ni Cristo magtutubos kan saindang manga kasalan.

17 Asin bako sana, sakuyang sinasabi sa saimo, na daing ibang pangaran na itinao, ni ibang dalan, ni paagi na kun haen an kaligtasan maabot sa manga aki nin tawo, kundi sa saiya asin sa paagi kan pangaran ni Cristo, an Kagurangnan na Mapangyari.

18 Huli ta totoo, siya naghuhukom asin an saiyang paghukom masuripot, asin an umboy dai mapapara na nagadan sa saiyang pagkaaki; alagad an manga tawo nag-iirinom nin karaotan sa sadiri nindang manga kalag, kun dai sinda magpakurumbaba asin maging siring sa saradit na manga aki, asin magturubod na an kaligtasan iyo na kaidto pa, asin ngonian asin sa maabot pa, sa laog asin sa paagi kan pagtubos kan dugo ni Cristo, an Kagurangnan na Mapangyari.

19 Huli ta an tawong laman sarong kaiwal kan Dios, asin iyo na magpoon pa kan paglapas ni Adan, asin magpapadagos sagkod nuarin pa man, sagkod na siya sumuko sa padagka kan Banal na Espiritu, asin hubaon an tawong laman asin maging sarong santo sa paagi kan pagtubos ni Cristo an Kagurangnan, asin maging siring sa aki na masinunod, mabuot, mapakumbaba, matinios, pano nin pagkamoot, nagkukuyog sa gabos na manga bagay na pighuhuna kan Kagurangnan na bagay na itao saiya, siring sa pagkuyog nin sarong aki sa saiyang ama.

20 Asin bako sana, sakuyang sinasabi sa saimo na maabot an panahon na an kaaraman nin sarong Paraligtas makakalakop sa lambang nasion, rasa, tataramon, asin manga tawo.

21 Asin totoo, na kun an oras na iyan umabot, daing makukua na daing sala sa atubangan kan Dios, kundi an saradit na manga aki, sa paagi sana nin pagsolsol asin pagtubod sa pangaran kan Kagurangnan na Dios na Mapangyari.

22 Asin sagkod sa panahon na ini, kun nuarin natukdoan mo na an manga tawo kan manga bagay na ipinagboot saimo kan Kagurangnan mong Dios, maski na sinda dai na nin kasalan sa paghiling kan Dios, kundi susog sana sa manga tataramon na sakuyang sinabi sa saimo.

23 Asin ngonian sakuyang sinabi na an manga tataramon na ipinagboot kan Kagurangnan na Dios sakuya.

24 Asin siring an sinabi kan Kagurangnan: Sinda magtitindog siring sa sarong maliwanag na patotoo laban sa manga tawong ini, sa aldaw nin paghukom; kun sain sinda hahatolan lambang saro sunod sa saiyang manga gibo, maging an manga idto marahay o maging an manga idto maraot.

25 Asin kun an manga idto mararaot sinda nakatalaga sa sarong makangurungirhat na ladawan kan saindang sala asin makangurungirhat na manga gibo, na naging dalan tanganing sinda magkuroyopos sa atubangan kan Kagurangnan sa makaheherak na kamugtakan asin sa daing katapusan na pagtios, na kun sain dai na sinda makakabalik; kaya saindang ininom an sadiri nindang karaotan sa saindang kalag.

26 Kaya, sinda nag-inom sa kupa kan kaanggotan kan Dios, na dai na maiindahan sa sainda kan kapantayan siring na dai kaini naindahan na si Adan maglapas huli sa saiyang pagkakan kan ipinangangalad na bunga; kaya dai na sinda aakoon kan pagkaherak sagkod pa man.

27 Asin an saindang pagdusa siring sa danaw nin kalayo asin asupre, na an laad dai na masisibo, asin an aso mag-iitaas sagkod nuarin pa man. Siring an pinagboot sakuya kan Kagurangnan. Amen.