Ma Suhmuhslah
Mosiah 18


Sapta 18

Alma el lukmac in luti—El ahknweyac olwelah ke pacptais ac pacptais ke kof luhn Mormon—El sramtweack Alu luhn Kraist ac akmuhsraelah mwet tol—Elos sifacna katwaclos ac luti mwet ah—Alma ac mwet lal som luhkwel Tohkohsrah Noah nuh innimac. Sahp ke 147–145 Met Liki Kraist.

1 Ac inge, tukun ma inge Alma, suc kahinglac liki mwet kuhlwacnsap lal tohkohsrah Noah, el auliyak ke ma koluk lal ac mwe muhnahs, na el sifacna som nuh inmahsrlon mwet ah, ac muhtwacwacack in luti kahs lal Abinadi ac—

2 Ahok, ke ma suc ac fah tuhkuh, ac oacyacpac ke moulyak luhn mwet misac, ac iwaclah luhn mwet uh, suc fah utuckuh ma inge ke kuh, ac kweok, ac misac luhn Kraist, ac moulyak ke moulyak ac sowack Lal nuh inkuhsrao.

3 Ac puhkantwen mwet lohng kahs lal ma el luti ac. El lotwelos in lukmac, tuh tohkohsrah elan tiac etuh kac. Ac puhkantwen selos luhlahlfongi kahs lal.

4 Ac tukun ma inge puhs mwet luhlahlfongel oruh elos som nuh ke sie acn pahngpahng Mormon, ine se inge ma sel tohkohsrah, ma oan ke mahsrol luhn acn ma nwacnwaclah, ke pacl kuh puhluhn pacl se, ke kosro lwemnak.

5 Inge, oasr sie unohn in kof nwacsnwacs fin acn Mormon, ac Alma el oruh sruhluhkihn acn in monglac se lal, oasr sahk srihsrihk ungung siskacn kof se inge, ma el okanuhllah sifacna we ke pacl lwen uh liki sukok luhn tohkohsrah.

6 Ac tukun ma inge puhs mwet luhlahlfongel som in lohng kahs lal.

7 Ac tukun ma inge tukun lwen pucspucs oasr luhpah na fal se fahsreni nuh ke acn Mormon, in lohng kahs lal Alma. Ahok, elos nuhkwewa ma luhlahlfongi ke kahs lal fahsreni nuh sie, in lohnguhl. Ac el lotwelos, ac luti nuh selos ke auliyak, ac ke iwaclah, ac luhlahlfongi ke Leum.

8 Ac tukun ma inge tuh el fahk nuh selos: Liye, pa inge kof luhn Mormon (tuh pahngpahng ohinge) ac inge, ke kowos kena in tuhkuh nuh ke u luhn God, in pahngpahng mwet Lal, ac kena in akacsruhi ke ma toasr luhn kais sie, tuh ma inge in muhlahlahlac;

9 Ahok, ac kuht kena in ahsor weluhlos suc ahsor; ahok, ac ahkenganyaclos suc enenuh in ahkenganyeyuck, ac in tu oacna mwet loh luhn God ke pacl nuhkwewa ac ke ma nuhkwewa, ac ke acn nuhkwewa ma kowos oasr we, finne ne ke misac, tuh kowos in fah iweyucklac sin God, ac weluhlos suc oasr ke moulyak se met, tuh kowos in eis moul ma pahtpaht—

10 Inge nga fahk nuh suwos, fin pa inge luhngse luhn insiowos, meac lain lowos in pacptaislac ke inen Leum, in sie mwet loh ye Muhtahl tuh kowos in ilyak nuh ke sie olwelah yohrohl, tuh kowos fah kuhlwacnsuhpwacl ac karihngihn masap Lal, tuh Elan okwaclah Nguhnal in yohk nuh fowos?

11 Ac inge ke mwet ah lohng kahs inge, elos pahspahs ke paholos ke engan, ac ahkkahlwemye: Pa inge kena luhn insiacsr.

12 Ac na tukun ma inge Alma el isacl Helam, el wi emet, ac som ac tu in kof uh, wowoyak, fahk: O Leum, okwaclah Nguhn Lom nuh fin mwet kuhlwacnsap lom, tuh elan oruh orekma lal ke muhtahliyacn insiac.

13 Ac ke el fahk kahs inge, Nguhn luhn Leum tuhkuh nuh facl, ac el fahk: Helam, nga pacptaisi kom, ke wal luhn God Kuhlacna, ke sie luhlahlfongi in fahkwack tuh kom in ilyak nuh ke sie olwelah in kuhlwacnsuhpwacl nuh ke kom misac ke misac in ikoac; ac lwelah Nguhn luhn Leum in kahklah nuh fom; ac El acsot nuh sum moul ma pahtpaht, ke iwaclah luhn Kraist, suc El ahkolah e ke muhtwacwacackiyacn facluh.

14 Ac tukun Alma el fahk kahs inge, kwewana Alma ac Helam tihli nuh in kof uh; ac elos otyak ac tuhkuh liki kof uh engan, nwacnwaclah ke Nguhn.

15 Ac sifilpac, Alma el eis sie pac, ac som pacl se ahkluo nuh inkof uh, ac pacptaisellah in oacna ma se met, el tiac na isongilyac sifacna ke pacl se ahkluo nuh inkof uh.

16 Ac tukun ohiyac se inge el pacptaiselah mwet nuhkwewa ma som nuh ke acn Mormon; elos oasr ke pihsen mwet sahp oasr ke lofoko ac ahkosr; ahok, elos pacptaislac ke kof luhn Mormon, ac elos sesseslah ke luhng kuhlwacng luhn God.

17 Ac elos pahngon alu luhn God, kuh alu luhn Kraist, ke pacl sac fahlac. Ac tukun ma inge oacna sie mwet ma pacptaislac ke kuh ac wal luhn God weacng alu Lal.

18 Ac tukun ma inge Alma, ke wal luhn God, el ahkkweyelah mwet tol; finne kais sie mwet tol nuh ke kais luhmngaul ke u lalos in luti nuh selos, ac lotweltahl ke ma ma sramsram ke tohkohsrahi luhn God.

19 Ac el sapkihn nuh selos tuh in wacngihn ma elos in luti sahyacn ke ma ma el luti kac, ma sruhmuhnyuck ke oalin mwet pahluh muhtahl.

20 Ahok, finne el sapkihn nuh selos tuh elos in luti wacngihn sahyacn auliyak ac luhlahlfongi ke Leum, suc iwaclah mwet Lal.

21 Ac el sapkihn nuh selos tuh in fah wacngihn fohs nuh sin sie sin sie, tuh elos in ngwet nuh met ke lwac mwet na, luhlahlfongi sefanna ac pacptais sefanna, insiaclos in maeni in ma se ac in luhngse sie sin sie.

22 Ac ohinge el sapkihn nuh selos in luti. Ac ohinge elos eklac in tuhlihk nuhtin God.

23 Ac el sapkihn nuh selos tuh elos in akihlen lwen sahpuht, ac karihngihn in muhtahl, ac oacyacpac ke lwen nuhkwewa elos in sang kuloh nuh sin Leum God lalos.

24 Ac el oacyacpac sapkihn nuh selos tuh mwet tol suc el ahkkweyelah in orekma ke paholos sifacna nuh ke kahsruh lalos.

25 Ac oasr lwen se ke wik se ma srisrilac elos in fah oracltahlweni nuh sie in luti mwet ah, ac in alu nuh sin Leum God lalos, ac oacyacpac, in oasr ke kuhiyaclos, in oracltahlweni nuh sie.

26 Ac mwet tol ac tiac enenuh in luhlahlfongi ke mwet ah nuh ke kahsruh lalos; ke orekma lalos elos enenuh in eis luhng kuhlwacng luhn God, elos in kuh in tu kuh ke Nguhn, in oasr kahlwem ke God, tuh elos in kuh in luti ke kuh ac wal luhn God.

27 Ac sifilpac na Alma el sapkihn tuh mwet ke alu ac in kihte ma lalos, nuh sin sie sin sie in oasr na ma na fal luhn kais sie; fin oasr suhna yohrohl el enenuh in sang yohk; ac nuh sin suc ma oasr la tuh srihklac, kuhtuh srihksrihk na fal in kihtakatlah; ac nuh sin suc ma wacngihn na pwacye la el pa enenuh in kihteyuck uh.

28 Ac ohinge elos kihtaclihk ma lalos ke luhngse lalos ac kena yohk nuh sin God, nuh sin mwet tol enenuh kahsruh, ahok, nuh selos nuhkwewa suc enenuh, ma moul la alal.

29 Ac ma se inge el fahk nuh selos, ke sap luhn God; na elos fahsryak suwohs nuh ye muhtuhn God, kihte sie sin sie kwewana ma luhn ikoac ac nguhn fal nuh ke enenuh lalos ac luhngse lalos.

30 Ac na tukun ma inge tuh ma inge nuhkwewa ahkfahsryeyucklac fin acn Mormon, ahok, ke kof luhn Mormon, ke insack ma oan siskacn kof luhn Mormon; ahok, acn lal Mormon, kof luhn Mormon, insack lal Mormon, fuhkah kahtoiyacn acn inge nuh ke ngwetngwet luhn mwet ma tuhkuh nuh ke kahlwem luhn Mwet in Iwaclah lalos; ahok, ac fuhkah insewowoiyaclos, tuh elos fah on in kaksakuhnuhl ne tohk ma pahtpaht.

31 Ac ma inge kwewa oreklac ke mahsrol luhn acn uh, tuh tohkohsrah elan tiac etuh kac.

32 Tuh liye, tukun ma inge tohkohsrah, el konwacack mukwikwi inmahsrlon mwet ah, el suhpwaclah mwet kuhlwacnsap lal in liyaclos. Ohinge ke lwen sac elos oracltahlweni nuh sie in lohng kahs luhn Leum elos loh tuhkahkyak nuh sin tohkohsrah.

33 Ac inge tohkohsrah el fahk lah Alma pa puhrakwack mwet ah in mweun lainuhl; ohinge el suhpwaclah solse lal in kuhnaosuhloslac.

34 Ac tukun ma inge Alma ac mwet luhn Leum sensenkihnyuck nuh selos ke tuhkuh luhn solse lal tohkohsrah; ohinge elos us lohm nuknuk selos ac sucu lalos ac som nuh innimac.

35 Ac elos oasr ke pihsac se sahp mwet ahngfoko ac luhmngaul.