1 Ne mpindiewu Abinadi wakabambila ne: Ndi musua ne numvua ne Nzambi yeya nkayenda nealua panshi munkatshi mua bana ba bantu, ne neasungila bantu benda.

2 Ne bualu bua udi muikala mu musunyi neabikidibua ne Muana wa Nzambi, ne muikala mubatshika musunyi ku disua dia Tatu, muikala Tatu ne Muana—

3 Tatu, bualu uvua muimitshibua ku bukola bua Nzambi; ne Muana, bua musunyi; nanku udi ulua Tatu ne Muana—

4 Ne badi Nzambi umua, eyowa, mena Tatu wa Tshiendelela wa mu diûlu ne wa pa buloba.

5 Ne nanku musunyi ulua kubatshikibua kudi Nyuma, anyi Muana kudi Tatu, bikala Nzambi umua, upeta ditêtshibua, ne kayi ushila ditêtshibua kaba to, kadi udilekela bua kusekibua, ne kukumibua mfimbu, ne kuipatshibua, ne kupidibua kudi bantu benda.

6 Ne kunyima kua bionsu ebi, kunyima kua kuenza bishima binena bia bungi munkatshi mua bana ba bantu, nebaya nenda, eyowa, bu muakamba Yeshaya ne, amu bu mudi mukoku muikala kamama kumpala kua mukoshi wa miosa, mu mushindu wa ne kakabulula mukana muenda to.

7 Eyowa, mena mu mushindu wa ne nebaya nenda, nebamupopela pa mutshi mutshiamakana, ne nebamushipa, musunyi neubatshikibua mena kudi lufu, disua dia Muana nedidînyibua mu disua dia Tatu.

8 Ne nanku Nzambi udi ukosa mionji ya lufu, bualu mmutshimuna lufu; ne udi upesha Muana bukola bua kulumbuluila bana ba bantu—

9 Bu mudiyi mubanda mu diûlu, muikala ne munda mua lusa; muikala muwujibua ne moyo wa lusa bua bana ba bantu; ne udi muimana pankatshi pabu ne bululama; ne udi mukosa mionji ya lufu, udi muangata malu mabi abu ne disambuka dia mikenji diabu pa mutu penda, ne udi mubasungila, ne udi mukumbaja milombu ya bululama.

10 Ne mpindiewu ndi nnuambila ne, nganyi wakuila tshikondu tshienda? Monayi, ndi nnuambila ne, pafidibua anyima wenda bu mulambu bua mibi neamona ndelanganyi yenda. Ne mpindiewu nudi nuamba tshinyi? Ne ndelanganyi yenda neikala banganyi?

11 Monayi, ndi nnuambila ne, ewu yonsu uvua mumvua mêyi a baprofete, eyowa, a baprofete bansantu bonsu bavua bamba mêyi a buprofete bitangila dilua dia Mukalenga—ndi nnuambila ne bonsu bavua bateleja miaku yabu, ne bitabuja ne Mukalenga neasungila bantu benda, ne bavua batekemena dituku adi bua dilekedibua dia mibi yabu, ndi nnuambila ne, bobu aba badi ndelanganyi yenda, anyi badi bapianyi ba bukalenga bua Nzambi.

12 Bualu aba ki bobu bena mibi ivuaye muambula; aba ki bobu bavuaye mufuila, bua kubasungila ku dishipa dia mikenji diabu. Ne mpindiewu, kabena ndelanganyi yenda anyi?

13 Eyowa, ne baprofete, yonsu uvua munzulula mukana muenda bua kuamba mêyi a buprofete, uvua kayi mupona mu dishipa dia mikenji to, ndi nkeba kuamba ne baprofete bansantu bonsu katshia buloba buabanga, kabena nanku anyi? Ndi nnuambila ne badi ndelanganyi yenda.

14 Ne aba ki bobu bavua batangalaja ditalala, bavua balua ne ngumu ngimpa milengela, bavua batangalaja lupandu ne bambila Siyona ne: Nzambi weba udi ukôkesha!

15 Ne Ô bu muvuawu malengela pa mikuna makasa abu!

16 Ne kabidi, bu mudiwu malengela pa mikuna makasa a aba batshidi batangalaja ditalala!

17 Ne kabidi, bu mudiwu malengela pa mikuna makasa a aba bâtangalaja ditalala kunyima eku, eyowa, kumbukila ku tshikondu etshi tô ne bua kashidi!

18 Ne monayi, ndi nnuambila ne, ki mbionsu to. Bualu Ô bu mudiwu malengela pa mikuna makasa a ewu udi utuala lumu luimpa, udi mufuki wa ditalala, eyowa, Mukalenga mena, uvua musungila bantu benda; eyowa, yeya uvua mupesha bantu benda lupandu;

19 Bualu bu kabivua bua disungila divuaye muenza bua bantu benda to, buvua bulongolola katshia ku tshishimikidi tshia buloba, ndi nnuambila ne, bu ne kabuvua buabu to, bukua bantu bonsu buvua ne tshia kubutuka.

20 Kadi monayi, mionji ya lufu neikoshibua, ne Muana udi ukôkesha, ne udi ne bukôkeshi kudi bafua; bua nanku, udi uvuija dibîka dia bafua.

21 Ne apu dibîka dia ku lufu nedilua, dibîka dia ku lufu mena dia kumpala; eyowa, dibîka dia ku lufu mena dia bobu bavuaku, ne dia badiku, ne dia bikalaku, mena tô ne ku dibîka dia Kilisto—bualu ki muabikidibuaye.

22 Ne mpindiewu, dibîka dia kulufu dia baprofete bonsu, ne dia bonsu abu bavua bitabuja miaku yabu, anyi bonsu abu bavua balama mikenji ya Nzambi, nedilua mu diba dia dibîka dia ku lufu dia kumpala; bua nanku, badi dibîka dia ku lufu dia kumpala.

23 Badi babishibua ku bafua bua kusombabu ne Nzambi uvua mubasungila; ne badi ne moyo wa tshiendelela kupitshila ku Kilisto, uvua mukosa mionji ya lufu.

24 Ne bobu abu badi ne muaba mu dibîka dia ku lufu dia kumpala; ne bobu abu bavua bafua mu dipanga diabu, kumpala kua dilua dia Kilisto, kabayi babamanyisha bitangila lupandu to. Ne nanku, Mukalenga udi uvuija dipingaja dia bantu aba; ne badi ne muaba mu dibîka dia ku lufu dia kumpala, anyi badi ne moyo wa tshiendelela, bualu Mukalenga wabasungidi.

25 Ne bana bateketa badi pabu ne moyo wa tshiendelela.

26 Kadi monayi, ne tshinayi, ne zakalayi kumpala kua Nzambi, bualu nudi ne tshia kuzakala; bualu Mukalenga kena usungila muntu nansha umua to wa ku badi bamutombokela ne badi bafua mu mibi yabu; eyowa, mena bonsu abu bavua babutuka mu mibi yabu katshia buloba buabanga, bavua batombokela Nzambi ku didisuila diabu, bavua bamanya mikenji ya Nzambi, ne bavua babenga kuyilama; bobu aba badi kabayi ne muaba mu dibîka dia ku lufu dia kumpala to.

27 Bua nanku kanuena ne tshia kuzakala anyi? Bualu lupandu kaluena luvua kudi muntu wa nanku to; bualu Mukalenga kavua musungila muntu wa nanku to; eyowa, anyi Mukalenga kena mua kubasungila to; bualu kena mua kudivila to; bualu kena mua kubengela bululama padibu ne bunema buabu to.

28 Ne mpindiewu ndi nnuambila ne diba nedivua diamanyishabu lupandu lua Mukalenga kudi tshisamba tshionsu, tshîsa tshionsu, muakulu yonsu, ne bantu bonsu.

29 Eyowa, Mukalenga, batentekedi beba nebabandisha dîyi diabu; nebimba misambu ne dîyi pamua; bualu nebadimuena ne mesu, pâpingaja Mukalenga Siyona kabidi.

30 Tudikayi ne disanka, imbayi pamua, nuenu miaba mitupu ya Yelushalema; bualu Mukalenga wasambi bantu benda, wasungidi Yelushalema.

31 Mukalenga waleji diboku dienda dia tshijila patoka ku mesu a bisamba bionsu; ne ndekelu ya buloba yonsu neimona lupandu lua Nzambi wetu.