1. Aya ncʼwaʼl nim wajbila tiʼj, cbel ntzʼiban juntl ela teya tuʼn tel tnicyʼa tiʼj que itzʼx kina; per cbel ntzʼibana jun nim bisbil tiʼj.

2. Tuʼnj luluʼ, oʼ teʼn jun matij kʼoj wuʼna cyucʼ lamanitas, que mitiʼ o cambana; bix Arcanteo maʼ cub tuʼn spada, tzanx Luram bix Emrón; icytzanjo, bix maʼ chinaj nim tajlal ke tbanal kxjalala.

3. Bix nbaj ncʼuʼja, aya ncʼwaʼl, que cbel cykʼuchan lamanitas aj tnam luʼ; tuʼnj ntiʼx tuʼn tajs cycʼuj tuj tuʼmal, bix cucx tlaʼt Satanás tuʼn ten cykʼoj, jun cyiʼj juntl.

4. Lutzan luʼ, tzinxax nchin ocsana cyiʼj; bix octzan t-xiʼ nchicʼbaʼna tyol Dios tuʼn cyakil wipamala, nchi luʼlan bix nchi jaw kʼojl wucʼala; bix atzanj oc nyolana nyaʼ tucʼ wipana, ncyuwax cycʼuʼj tiʼj yol; cyjaʼtzan jluʼ, nbaj ncʼuʼja que aj Xewbaj te Kajaw ntiʼtl nnakʼnan cyucʼal.

5. Tuʼnj matijxax cykʼoj cye aj nneʼla nnaʼna ntiʼ tchi camacy cyiʼj; bix maʼ naj cychi-al, tiʼj jun bix juntl; bix nokxax ntxket tiʼj cycʼuʼj tiʼj chicyʼ bix tuʼn t-xelan kʼoj cyuʼn.

6. Bix atzanj, aya ncʼwaʼl wajbila tiʼj, ko akʼnan wena banwtla cyuw taʼ cyiʼj; tuʼnj ka ma txiʼ kcoʼlan tuʼn kakʼnan, oc koxel tuj sentens. Tuʼnj at jun kbinchben il tiʼj tuʼn tbant myentras toʼ tuj xumlalbaj luʼ, tuʼntzan tcub ajkʼoj kuʼn tiʼj xtis, bix ajke kanma tuʼn tcanet ujlabil tuj tkʼuʼkʼbil Dios.

7. Bix aj jaʼla cbel ntzʼibana chʼin tiʼj taʼw tuj tnam luʼ, según aj tpocbal oʼ nbintaya tiʼj Ammarón, lutzan luʼ, ateʼ nim pres cyucʼ lamanitas aj i tzyet cyuʼn tuj torre te Sherriza; bix atke xinak, xuʼj bixke cʼwal cyxol.

8. Bix oʼ cub cybiyoʼn aj cychmil xuʼj bix cyman cʼwal, bix cyej xuʼj nxiʼ kʼoʼn tchibajal cychmil te cychiʼ, bix aj cye cʼwal aj tchibajal cyman; bix ntiʼ nxiʼ kʼoʼn cye nok chʼin ni aʼ.

9. Pwes miyaʼniʼxa aj twitz il nach cye lamanitas, miyaʼ más nach twitz te ktanma Moriántum. Pwes lutzan luʼ, nimke cycʼwaʼl lamanitas ma chi cub tzʼak tuj cykʼab; bix despwes oc tel kʼiʼn cyiʼj aj cosa más cyeʼyax bix más caro twitz cyakil que a aj tuʼn min tbant nach tiʼj cychibajal cyuʼn xinak,

10. Icytzanjo, ocxatzan tbaj twiʼj icyjo, nchi cubtzan biyoʼn tuj tuʼmal nach, nchi baj patzʼuʼn asta oc cycyim; octzan tbant j-ajo cyiʼj, nxiʼ cychoʼnj xumlalbaj ajo lonxa icytzan txcupka chol xjal, nok tuʼnj cyuw cyanma, bix nbanttzan cyuʼn te yecʼbil que at cyipan.

11. Aya ncʼwaʼl nim wajbila tiʼja, tzaʼn jun tnam icytzanj jluʼ, t-txol ntiʼ tcostumbre —

12. (Bix miyaʼ laʼxa abkʼi luxix jun tnam ax icx tcostumbre)

13. Aya ncʼwaʼl, ¿Tzaʼn icytzanj jun tnam luʼ, ntzalaj tucʼ nim tnachal junmax —

14. Tzaʼn tuʼn k-ayon tiʼj que miʼ tzaj tkʼoʼn tkʼab Dios tucʼ jwisyo kiʼj?

15. Lutzan luʼ, aj wanmiya ntschʼinta: ¡Becyʼbil twitzj tnam luʼ! ¡Tzaja xtisal cyiʼj, aya Dios, bix ewanxa twitz cyil, bix cynachal bix tzʼilxix cyil jun majx twitz!

16. Bix ax, aya ncʼwaʼl, ateʼ nim meba xuʼj bix cycʼwaʼl ateʼx tuj Sherriza; bixkej nebebil aj ntiʼ canan t-xiʼ cyiʼn lamanitas, lutzan luʼ, aj ejercito te Zenefí xiʼ tiʼn tucʼal, que i eʼx kʼiʼn jatuma tuʼn cybet nok jaʼx tuma cub tiʼj cysicʼ; bix nimke tij xjal xuʼj nchi cub nacs bix nchi cyim.

17. Bix aj ejército taʼ wucʼala ntiʼ tipan; bix aj ejército cye lamanitas coʼlan kina cyuʼn tuj Sherriza; bix ajke oʼ chaj tuj ejército te Aarón oʼ chi cub biyoʼn tuj tnachal junmajx.

18. ¡Becyʼbil tcostumbre ntanmiya! Ntiʼ ttxolal mix tbanal. Lutzan luʼ, miyaʼ más kina que oʼcx xinak, bix ntitl wipamaltl oʼcx icytzan jun xinak, bix ya ntiʼtl tuʼn tbant wuʼna tuʼn tocx xoʼn aj nxiʼ nmaʼna.

19. Bix maʼ cheʼx tuj más nachtl; bix tuj aj ntiʼ cyanma parejka, pwes ntiʼ ncynajsam mixjun, mix cuʼxan mix tij xjal; bix nchi tzalaj tiʼj cyakil, per ntiʼ tiʼj aj baʼn; bix mix cyiʼj cycyimlen kxuʼjala bixke kcʼwaʼla tuj cyakil tnam junmajx nachtlka cywitz cosas cyakil; icytzanjo, mix tuʼn tyolan akʼbaj, mix tuʼn ttzʼibat.

20. Bix lutzan luʼ, aya ncʼwaʼl, miʼn chin yolana mástl tiʼj nach luʼ. Loʼn tuʼna aj tnachalj tnam luʼ; loʼn tuʼna que ntiʼ aj tzaʼn cytzajlen keʼ mixj tuʼn t-xiʼ cybisan tiʼj; bix aj cynachal más nachjo twitz cye lamanitas.

21. Lutzan luʼ, aya ncʼwaʼl, ntiʼ wipamal tuʼn cyxiʼ wokxeʼnna tucʼ Dios tuʼn tchi que bala nchin cuʼb kʼoʼna tuj sentens tuʼn.

22. Per lutzan luʼ, aya ncʼwaʼl, cxel wokxeʼnna te Dios, bix cxel keʼ ncʼuʼja tiʼj Cristo que ccoletala; bix cxel nkaʼnna te Dios tuʼn toc cwentan tankʼbila tuʼntzan toca stiwa tiʼj oc tajs cyanma aj tnam luʼ tiʼj tnachal, bixmo tiʼj oc tbaj kʼuchan junmajx; tuʼnj loʼn wuʼn que chi najal, miʼntzala ka ma tzʼajs cyanma tiʼj tnachal bix ma chajtz makʼtzʼaj tucʼalkʼa.

23. Bix ka ma chi naj, icyla icytzankaj jareditas, nok tuʼn tlaj tnachal junmajx te cyanma, que nchi jayon tiʼj chicyʼ bix t-xel kʼoj; bix katzan icyjo, tons chi najal.

24. Loʼn kuʼna que jun tajlal kermana matij oʼ chaj cyucʼ lamanitas, bix nimke txkantl chi xel cyucʼal. Tzʼiban cuba, aj chʼintl, ka ax tewanxax tiba bix wecyʼ chin cymela bix mi jtoj tuʼn toc nqueʼyntla; pero ckebil ncʼuʼja que oc cocal nqueʼyintla juntl el te jorat, tuʼnj ateke txkan storya wucʼala tuʼn cyxiʼ nkʼoʼna teya.

25. Aya ncʼwaʼl, tocxa tbanal tiʼj Cristo; bix miʼn bisan tcʼuʼja tuʼnj maʼ cub ntzʼibana tuj tuʼmal que tuʼn tel tcʼuʼja; per njaw nimsaʼn tcʼuʼja tuʼn Cristo, bixke tbis bix camacy, bix aj tcub tyecʼan tib t-xumlal twitz kman, bixj aj ntzaj kʼakʼan tcʼuʼj bix tpasens, bix aj tuʼntkeʼ tcʼuʼj bix tchi-al tankʼbil te junmajx, chi tenx tuj t-ximbitza te junmajx.

26. Bix aj txtalbil Dios Mambaj, que aj tkʼuʼkʼbil taʼ tuj cyaʼj jawna, bix aj te Kajaw Jesucristo, que ncub tutzʼeʼ tuj tipamal tbankʼaj asta que cyakilkaj cosas tuʼn cyoc tuj tcwent, baʼnwt tuʼn toc te tucʼala bix te tucʼala te junmajx. Icytzan tenjo.