Capitulo 6
Le maʼxoʼob dzoʼoc u kexic u tuculoʼoboʼ cu dzaʼabal tiʼoʼob yoc haʼ. Le maʼxoʼob oc haʼnahaʼan tiʼ le iglesiaeʼ cu perdonartaal. Le quen múchʼlacoʼob le oc haʼnahaʼanoʼobeʼ cu deber u tsicbal yoʼolal u páhtalil le Hahil Pixanoʼ.
1 Beʼoráeʼ quiʼn tʼan yoʼolal oc haʼ. Heʼel túnaʼ, caʼacheʼ cu dzaʼabal u yoc haʼ elderoʼob, presbiteroʼob yétel maʼestroʼob, maʼ tán u dzaʼabal u yoc haʼoʼob wá maʼ tán u yeʼesicoʼob u yutsil cuxtal yoʼolal le baʼax u mentmaʼhoʼoboʼ ca u náhalt u kamicoʼob.
2 Mixmaʼc xan cu kaʼamaʼl tu yoʼolal oc haʼ wá maʼ tán u tal yétel tulácal yól u pucsiʼkal utiaʼal ca kexaʼac u yól, yoʼolal u keban yétel ca u yaʼalic tu tánil iglesiaeʼ, hach tu hahil dzocaʼan u kexic yól tiʼ tulácal u kebanoʼob.
3 Mix maʼc cu yóltaal dzabil u yoc haʼ wá maʼ tán u chʼaʼic u kabaʼ Cristo tu yókol, yétel xan chucaʼan ólal utiaʼal u meyahtiʼcoʼob.
4 Cu dzoʼocol u kaʼamaʼloʼob yétel le oc haʼoʼ, dzoʼoc u meyah le Pixan cu túxtiʼcʼ Dioseʼ letiʼoʼoboʼ, dzoʼoc u pʼoʼicoʼobeʼ; cu xoʼocoloʼob ichil le u maʼcoʼob ichil u iglesiail Cristo cu dzíbtaal tún u kabaʼoʼob tu yoʼolal u kaʼahsaʼaloʼob yétel yoʼolal u tséntaaloʼob tumen u maʼalob tʼan Hahal Dios, yoʼolal u caʼansaʼaloʼob u tohil beh yétel yoʼolal u betiʼc u chén dzic xiquiʼn u oracionoʼob xmaʼ háwál, ca u dzaʼ yóloʼob chén tiʼ u meyahil Cristo tumen letiʼ dzaic le fe tiʼ letiʼoʼoboʼ.
5 Le iglesia túnoʼ yan kineʼ cu múchʼquiʼntiʼcuba utiaʼal cu pʼaʼatal u suʼukintiʼcuba yétel orar yétel xan yoʼolal u tʼan tu batsiloʼob yókol u maʼalob yantal u pixanoʼob.
6 Mantadz cu muchʼquiʼntiʼcubaoʼob caʼach yoʼolal u hántiʼcoʼob tiʼ wáhil yétel yukoʼob u haʼil uva tu dzíbotah Yumtsil Jesus.
7 Yételeʼ cu hach il cu canántiʼcubaoʼob maʼ u yantal keban ichiloʼob; wá yan wá maʼx cu yilaʼal dzoʼoc u betiʼc keban, kubaʼan tiʼ castiʼgo tumen óxtúl testiʼgoʼob tiʼ le iglesia tu tán le elderoʼoboʼ; wá maʼ tu kexic yóloʼ mix tu yaʼalic baʼax cu betiʼcoʼob cu tuʼupul u tupicoʼob u kabaʼ, yétel maʼ tu xoʼocol ichil u cahil Cristo.
8 Baʼaleʼ heʼ haytén ca kexec yól yétel le baʼax tu betah u tucul yétel ca u kát ca tuʼubsaʼac u kebanoʼ yétel humpʼél hahil tucul cu tuʼubsaʼal tiʼ.
9 Le maʼcoʼob teʼ iglesiaoʼ cu betiʼcoʼob le múchʼtaloʼobeʼ heʼebix u yeʼesahil le Pixanoʼ yétel yoʼolal u páhtalil le Pixan cu túxtiʼc Diosoʼ tumen heʼebix u bín u yeʼesaʼal tiʼoʼob tumen le Pixa cu túxtiʼc wá Diosoʼ utiaʼal cu yaʼalic yoʼolal caʼansahiloʼob Cristo, wá tu yoʼolal le oracion, wá u caʼa kateʼ, wá u kay, bey u betaaleʼ.