U Libroil Moroni
Capitulo 1
Moronieʼ cu dzíbtiʼc utiaʼal le maʼxoʼob tiʼ u palal Laman cu taloʼob. Le tu palal Nefieʼ cu kuʼubuloʼob utiaʼal u químil wá maʼ cu yaʼalic minaʼan Cristo.
1 Ten, Moroni cu dzoʼocol in dzíbtiʼc cóm u historiail u cahil Jaredeʼ, maʼ tiʼn tucultah in dzíbtiʼc maʼs, baʼaleʼ maʼ químeniʼ yétel maʼ in weʼesiquinba tiʼ le u palal Laman, utiaʼal maʼ xan ca u quínsenoʼobiʼ.
2 Tumen heʼel túnaʼ le baʼatel ichiloʼoboʼ hach sén kastac; yétel tu yoʼolal tún u chʼaʼ pʼequiʼloʼobeʼ cu quínsicoʼob heʼel haytúl u palal Nefi maʼ tu yóltiʼcoʼob u yaʼaloʼob minaʼan Cristooʼ.
3 Ten, Moronieʼ, maʼbín in wáʼal tu contra Cristoiʼ, le betiʼc quiʼn h maʼn chén heʼ tuʼuxac cu páhtal in maʼneʼ, yoʼolal in canántiʼc in cuxtal.
4 Le oʼolal túneʼ quiʼn dzíbtiʼc ulak dzeʼedzec baʼaloʼob, heʼlaʼan yétel le baʼax in creernaheʼ, tumen maʼ in tuculmaʼh in dzíbtiʼc u maʼsiliʼ; baʼaleʼ quiʼn dzíbtiʼc ulak dzeʼedzec baʼal utiaʼal maʼ xan ca kabétchahac tiʼ in sucuʼunoʼob le u palal Laman tiʼ wá baʼax kinil le cu taloʼ, heʼebix cu yóltiʼc Yumtsileʼ.