Pene 10
Te porokirokianga a Moronai ki te ngati Lamana. Te ravenga e raukaʼi te tangata tataki tai i te kite i te tika o te Puka o Moinoni.
1. E teianei, te tata nei au ko Moronai i tetai au mea tei manakoia e au e, ei mea meitaki, te tata nei au i te reira ki toku au taeake ki te ngati Lamana, te anoano nei au kia kite ratou e, kua tere atu i te a anere e rua ngauru mataiti mei te tuatau i orongaia mai ei te akairo no te aereanga mai o te Mesia.
2. E kia oti au i te ako atu e te akamaroiroi atu ia kotou, ei reira au e topiri ei i teia au akapapaanga nei.
3. I na, te anoano nei au i te akakite atu kia kotou, me tatau ake kotou i teia au mea, me ka tika i te Atua e kia tatau kotou, kia akamaara oki kotou i te aroa takinga meitaki o te Atua, tei vai ki runga i te tamariki a te tangata nei, mei te angaia anga o Adamu, e tae rava mai ki te ra e raukaʼi ia kotou teia nei au mea, e uriuri oki to kotou ngakau i te reira.
4. E me rauka ia kotou teia au mea nei, te tuatua atu nei au kia kotou, e pati kotou ki te Atua, te Metua mutu kore, na roto i te ingoa o Iesu Mesia, me kare ainei teia au mea e tika, e me pati kotou ma te ngakau tuatua tika, ma te akakoro tikai, ma te akarongo i te Mesia, ka akakite mai aia i te tika o te reira kia kotou, na roto i te mana o te Vaerua Tapu.
5. E na roto i te mana o te Vaerua Tapu, e kite ei kotou i te tika o te au mea ravarai.
6. E ko te au mea meitaki ra, e mea tika ïa, e te tuatua mou, no reira, kare rava te mea meitaki e patoi i te Mesia, ina ra, ka akakite e koia ïa.
7. Na roto i te mana o te Vaerua Tapu, ka kite ei kotou e, te ora ra aia. No reira, te karanga atu nei au kia kotou, auraka kotou e patoi i te mana o te Atua, te angaanga ra aia ma te mana, kia tau ki te akarongo o te tamariki a te tangata nei, e ka aite oki te raveanga i taua au mea ra i teia ra, apopo, e tuatau ua atu.
8. E tuatua akaou atu au kia kotou e aku au taeake, e auraka rava kotou e patoi i te mea e orongaia mai e te Atua, e e manganui oki te reira au mea, no ko mai ra i taua Atua rai. E tuke ke te au mataara e angaangaʼi taua au mea ra, ko te Atua ra tei rave i te au mea katoa ra, e kua orongaia mai ïa na roto i te angaanga a te Vaerua o te Atua ki runga i te tangata, ei puapinga no ratou.
9. E i na, kua orongaia kia apii atu i te kite i te pakari ki tetai na roto i te Vaerua o te Atua.
10. E ki tetai ra, kia apii i te tuatua o te kite na roto i taua Vaerua rai.
11. E ki tetai ra, te akarongo mou, e ta tetai ra, ko te akaoraanga maki ïa, na taua vaerua rai.
12. E ta tetai ra, ko te rave ïa i te au angaanga semeio.
13. E ta tetai ra, ko te totou ïa no runga i te au mea ravarai.
14. E ta tetai ra, ko te kite ïa i te au angela, e te au vaerua tauturu.
15. E ta tetai ra, ko te kite ïa i te au reo ke ke.
16. E ta tetai ra, ko te akaurianga i te au reo, e te kite i te au reo ke ke.
17. No ko mai anake teia au mea i te Vaerua o te Mesia, e kua tae mai te reira ki te au tangata tataki tai, kia tau ki tana i inangaro.
18. E te ako atu nei au kia kotou e aku au akaperepere e, kia akamaara kotou e, ko te au mea meitaki no ko mai ïa i te Mesia.
19. E ka ako atu rai au ia kotou e aku au akaperepere e, kia akamaara kotou e, okotai rai ona tu inanai, i teia rā, e tuatau ua atu, e ko teia au mea taku e tuatua nei, e mea Vaerua anake ïa, kare rava e ngaro ke, no atu eaa te roa o te tuatau, mari ra, kia tau ki te akarongo kore o te tamariki a te tangata nei.
20. No reira, te vai rai te akarongo, me e akarongo tetai, te vai katoa ra te manakonakoanga, me e manakonakoanga tetai, te vai katoa ra te aroa.
21. Me kare oou aroa, kare koe e ora i roto i te basileia o te Atua, kare katoa koe e ora i te basileia o te Atua me kare oou akarongo, e kare katoa koe e o me kare oou manakonakoanga.
22. Me kare oou manakonakoanga, te noo ra ia kotou i roto i te tumatetenga, e no te ara oki i tae mai ei te tumatetenga.
23. Kua tuatua tika te Mesia ki to tatou ai metua. Me e akarongo to kotou, ka rauka ia kotou kia rave i te au mea katoa taku e rave nei.
24. E teianei, te tuatua nei au ki te openga o te enua nei, me tae mai ake taua rā ra, e rave keiaʼi te mana e te au mea e orongaia mai e te Atua mei rotopu ia kotou, no to kotou akarongo kore e akaperaiaʼi.
25. Aue oki te tamariki a te tangata e, me ko te tumu teia i te akaperaiaʼi, kare rava i reira tetai i rotopu ia kotou i rave ua atu i te meitaki, kare kare rava okotai. Naringa e okotai i rotopu ia kotou i rave i te meitaki, ka angaanga aia ma te mana e te au orongaanga a te Atua.
26. Aue oki ratou tei rave mārō i teia au mea e e mate atu, ka mate oki ratou no ta ratou au ara e kare rava e akaoraia i te basileia o te Atua, e te tuatua nei au kia tau ki te tuatua a te Mesia e kare oki au e pikikaa.
27. Te ako atu nei au kia akamaara kotou i teia au mea nei, no te mea, te vaitata maira te tuatau, e kite ei kotou e, kare au i pikikaa ana, e ka kite oki kotou iaku i mua i te akavaanga a te Atua ei reira te Atua e tuatua mai ei kia kotou e, Kare ainei au i akakite atu i taku tuatua kia kotou mei tei tataia e teianei tangata mei te tu o tetai, e kapiki mai nei, mei te mate ra, ae, mei tetai rai e tuatua mai, mei roto i te one pueu?
28. Te akakite nei au i teia au mea ei akatupu i te au totouanga. E i na, ka mama mai te reira mei roto mai i te vaa o te Atua mutu kore, e ka tupu ua atu rai tana tuatua mei tera uki ki tera uki.
29. E na te Atua e akaari kia kotou i te tika o tei tataia e au.
30. E ako akaou atu rai au ia kotou kia ariu mai ki te Mesia, ma te mou ki runga i te au orongaanga meitaki, e auraka oki e mou atu i te apinga kino e te viivii.
31. E ara, e tu ki runga mei te one pueu e Ierusalema e aao ana i to kakau manea e te au tamaine a Ziona e, e akaketaketa ana i to au titi e akamaata oki i to kotinga e tuatau ua atu kia kore ei kotou e akama akaou e kia tupu ei oki te koreromotu ta te Metua mutu kore i papau kia koe e te ngutuare o Iseraela.
32. Koia ïa, e aere mai ki te Mesia e kia apakore kotou ki mua iaia, ma te patoi atu i te au mea tau kore ravarai e me akaruke kotou i te au mea kikino ravarai ma te inangaro atu i te Atua ma toou maroiroi katoa, e toou manako e toou ririnui, e kitea aroaia mai kotou i reira e te Atu i tona aroa, e riro ei kotou ei apa kore i te Mesia ra, e me no te aroa ua o te Atua kua apa kore kotou i te Mesia, e kare e rauka ia kotou i reira kia patoi i te mana o te Atua.
33. Tera oki tetai, mei te mea e na te aroa ua o te Atua i akariro ia kotou ei apa kore i roto i te Mesia ra ma te patoi kore i tona mana, ei reira kotou e akatapuiaʼi i te Mesia na roto i te aroa ua o te Atua, e na roto i te akamaringianga i te toto o te Mesia mei tei roto i te koreromotu a te Metua no te akakoreanga o ta kotou au ara kia tapu kotou ma te kore e titautau.
34. E teianei, te karanga atu nei au kia kotou ravarai e, kia orana. Kare e roa atu ana kua aere au ki te akangaroianga i te paradaiso o te Atua e tae ua atu ki te kapitianga o toku vaerua e toku kopapa e kia apainaia mai au na roto i te mareva kia aravei ia kotou ki mua i te akavaanga meitaki a Iehova te akava mutu kore no tei ora e tei mate.
Te Openga