1 Asin ngonian, ako magtataram man manunungod duman sa manga dai nagtutubod ki Cristo.

2 Magdarangog, matubod daw kamo sa aldaw kan saindong dalaw—magdarangog, kun nuarin an Kagurangnan maabot, iyo, sagkod sa aldaw na kun an kinaban malululon siring sa sarong rolyo, asin an manga elemento matutunaw sa makuring init, iyo, sa dakulang aldaw na iyan kun nuarin kamo dadarahon na magtindog sa atubangan kan Kordero nin Dios—dangan kamo masabi na dai nin Dios?

3 Dangan saindo pa daw ipagpapadagos an pag-inda ki Cristo, o makahiling daw kamo sa Kordero nin Dios? Naghuhuna daw kamo na makaka-erok kamo na kaibahan niya sa irarom kan pagkaaram kan saindong sala? Naghuhuna daw kamo na magigi kamong maogma na mag-erok na kaibahan idtong banal na Tawo, kun an saindong manga kalag nagdudusa sa pagkaaram kan sala na kamo padagos na naglapas kan saiyang manga katugonan?

4 Totoo, sinasabi ko sa saindo na kamo magiging orog na makaheherak na mag-erok na kaibahan an sarong banal asin masuripot na Dios, sa irarom kan pakaaram kan saindong kaatian sa atubangan niya, ki sa kun kamo mag-erok na kaibahan an isinumpang manga kalag sa impiyerno.

5 Huli ta totoo, na kun kamo dadarahon na mahiling an saindong pagkahuba sa atubangan kan Dios, asin man an kamurawayan kan Dios, asin an kabanalan ni Jesu-Cristo, idto magmamakot nin laad nin dai masisibo na kalayo sa saindo.

6 O kaya kamo na dai nagtuturubod, kumiling kamo sa Kagurangnan; magkurahaw nin makusog sa Ama sa pangaran ni Jesus, tanganing tibaad pa makua kamo na daing digta, dalisay, magayon, asin maputi, huli ta nalinigan kan dugo kan Kordero, sa dakula asin huring aldaw na idto.

7 Asin sa giraray ako mataram sa saindo na nag-inda kan kapahayagan kan Dios, asin nagsasabi na an manga iyan hinali na, na dai na nin manga kapahayagan ni manga propesia, ni manga balaog, ni pagbulong, ni pagtaram nin manga dila, asin an pagpaliwanag kan manga dila;

8 Totoo sinasabi ko sa saindo, siya na nag-iinda kan manga bagay na ini dai nakakaaram kan ebanghelio ni Cristo; iyo, dai pa siya nakakabasa kan manga banal na kasuratan; kun iyo man, dai niya nasabutan an manga idto.

9 Huli ta bako satuyang nababasa na an Dios iyo kaidto, ngonian, asin sagkod pa man, asin ta sa saiya dai nin pagbabago, ni anino nin pagliwat?

10 Asin ngonian, kun saindong naiisip sa saindong sadiri an sarong dios na paburubago, asin kun kiisay igwa nin anino nin pagliwat, nag-isip kamo sa saindong sadiri nin sarong dios na bakong Dios nin manga milagro.

11 Alagad magdarangog, sakuyang ipapahiling sa saindo an sarong Dios nin manga milagro, na iyo an Dios ni Abraham, asin an Dios ni Isaac, asin an Dios ni Jacob; asin siya iyo idto an Dios na naglalang kan kalangitan asin kan daga, asin kan gabos na manga bagay na itoon duman.

12 Totoo, saiyang linalang si Adan, asin sa paagi ni Adan uminabot an pagkahulog kan tawo sa kagadanan. Asin huli kan pagkahulog kan tawo sa kagadanan uminabot si Jesu-Cristo, sagkod an Ama asin an Aki; asin huli ki Jesu-Cristo uminabot an pagtubos kan tawo.

13 Asin huli sa pagtubos kan tawo, na uminabot sa paagi ni Jesu-Cristo, sinda naibalik sa atubangan kan Kagurangnan; iyo, ini iyo an kun sain an gabos na tawo natubos, huli ta an kagadanan ni Cristo iyo an nagdara kan pagkabuhay-liwat, na nagdara kan pagtubos hali sa daing katapusan na pagkaturog, na hali sa pagturog na iyan an gabos na tawo pupukawon sa paagi kan kapangyarihan kan Dios sa pagtanog kan trumpeta; asin sinda mabarangon maging sadit o dakula man, asin an gabos matindog sa atubangan kan saiyang hukoman, bilang tinubos asin hinubadan kaining daing-kasagkuran na gapos nin kagadanan, kagadanan na iyo an temporal na pagkagadan.

14 Asin dangan maabot an paghukom kan Sarong Banal sa sainda; asin dangan maabot an panahon na siya na maati magiging maati man giraray; asin siya na matanos magiging matanos man giraray; siya na maogma magiging maogma man giraray; asin siya na bakong maogma magiging bakong maogma man giraray.

15 Asin ngonian, O kamo gabos na nag-isip sa saindong manga sadiri nin sarong dios na dai makakagibo nin manga milagro, ako mahapot sa saindo, nakalipas na daw an gabos na manga bagay na ini na sakuyang tinaram? Uminabot na daw an katapusan? Totoo sakuyang sinasabi sa saindo, Dai pa; asin ta an Dios dai nag-oontok sa pagka-Dios nin manga milagro.

16 Totoo, bakong an manga bagay na ginibo kan Dios makangangalas sa satuyang manga mata? Iyo, asin ta siisay an makakasabot kan makangangalas na manga ginibo kan Dios.

17 Siisay an masabi na bako idto milagro na sa paagi kan saiyang tataramon an kalangitan asin daga nagin; asin huli sa paagi kan kapangyarihan kan saiyang tataramon an tawo nalalang hali sa kabokabo kan daga; asin sa paagi kan kapangyarihan kan saiyang tataramon manga milagro nagibo?

18 Asin siisay an masabi na si Jesu-Cristo dai naggibo nin dakol na manga milagro? Asin igwa nin kadakol na makukusog na manga milagro na ginibo kan manga kamot kan manga apostoles.

19 Asin ta kun igwa nin manga milagro na ginibo kaidto, ngata ta an Dios nag-ontok na sa pagiging Dios nin manga milagro alagad sarong dai nagbabagong Pagkatawo? Asin magdarangog, sakuyang sinasabi sa saindo siya dai nagbabago; kun iyo siya mag-oontok sa pagiging Dios; asin ta siya dai mag-oontok sa pagiging Dios, asin sarong Dios nin manga milagro.

20 Asin an dahilan kun ngata ta nag-ontok siya sa paggibo nin manga milagro sa manga aki nin tawo iyo an huli ta sinda diit-diit na nagrayo sa pagtubod, asin nagsuhay sa tamang dalan, asin dai midbid an Dios na iyo an kaipuhan na saindang pagsasarigan.

21 Magdarangog, sakuyang sinasabi sa saindo na an siisay man na magtubod ki Cristo, nin daing pagduwa-duwa, kun ano man an saiyang hagadon sa Ama sa pangaran ni Cristo itatao sa saiya; asin ta an pangako na ini para sa gabos, sagkod sa manga kasagkuran kan kinaban.

22 Huli ta totoo, siring an sinabi ni Jesu-Cristo, an Aki kan Dios, sa saiyang manga disipulos na mawawalat, iyo, asin man sa gabos niyang manga disipulos, na nadangog kan katiripunan; Paduman kamo sa gabos na parte kan mundo, asin ipaghulit an ebanghelio sa lambang linalang;

23 Asin siya na magtubod asin magpabunyag makakaligtas, alagad siya na dai magtubod isusumpa;

24 Asin an manga tanda na ini masunod sa sainda na nagtuturubod—sa sakuyang pangaran sinda makakapaluwas nin manga demonio; sinda makakataram sa bagong manga dila; sinda makakakapot nin manga halas; asin ta kun makainom sinda nin makakagadan na manga bagay sinda dai maaano; ibubugtak ninda an saindang manga kamot sa naghihilang asin ta sinda mauumayan;

25 Asin an siisay man na magtubod sa sakuyang pangaran, na dai nin pagduwa-duwa, sa saiya sakuyang patutunayan an gabos kong manga tataramon, sagkod sa manga kasagkuran kan kinaban.

26 Asin ta ngonian, totoo, siisay an makakatindog tumang sa manga gibo kan Kagurangnan? Siisay an makakapag-inda kan saiyang manga sinabi? Siisay an magtitindog laban sa kabagsikan kan kapangyarihan kan Kagurangnan? Siisay an magsisikwal kan manga gibo kan Kagurangnan? Siisay an magsisikwal kan manga aki ni Cristo? Magdarangog, gabos kamo na manga nagsisikwal kan manga gibo kan Kagurangnan, ta kamo magngangalas asin magkakaparara.

27 O kaya dai magsikwal, asin dai magngalas, alagad magdangog sa manga tataramon kan Kagurangnan, asin hagadon sa Ama sa pangaran ni Jesus an ano man na bagay na saindong kakaipuhan. Dai magduruwa-duwa, alagad maging matinubod, asin magpoon siring kan nakaaging nang manga panahon, asin dumulok sa Kagurangnan sa bilog nindong puso, asin ihanda an saindong kaligtasan na igwa nin pagkatakot asin pagtakig sa atubangan niya.

28 Magi kamong madunong sa manga aldaw kan saindong pagbalo; hubaan an saindong sadiri kan gabos na manga kaatian; dai maghagad tanganing gamiton sana sa saindong pagkaara, alagad maghagad na igwa nin dai natatanyog na pagkasarig, na kamo dai magsuko sa ano man na pagsugot, kundi na kamo maglingkod sa totoo asin buhay na Dios.

29 Hilingon na kamo dai binubunyagan na dai man naninigo; hilingon na dai kamo nag-aako kan sakramento ni Cristo na dai man naninigo; alagad hilingon na kamo naninigo na gibohon an gabos na manga bagay, asin gibohon ini sa pangaran ni Jesu-Cristo, an Aki kan buhay na Dios; asin ta kun ini saindong gigibohon, asin magtagal sagkod sa katapusan, maski nuarin dai kamo isisikwal.

30 Totoo, ako nagtataram sa saindo na garo siring na ako nagtaram hali sa manga gadan; huli ta sakuyang aram na mapapasaindo an sakuyang manga tataramon.

31 Dai ako nindo pagsalaon huli sa sakuyang kakulangan, ni an sakuyang ama, huli sa saiyang kakulangan, ni sinda na nagsurat na enot saiya; alagad marahay pa na magtao kamo nin pasasalamat sa Dios na saiyang ipinahiling sa saindo an samuyang kakulangan, tanganing makanuod kamo na maging orog na madunong ki sa samuya.

32 Asin ngonian, totoo, samuyang isinurat an kasuratan na ini sunod sa samuyang kaaraman, sa manga letra na samuyang inapod na binagong Egipto, na itinao asin samuyang liniwat, sunod sa samuyang paagi nin pagtaram.

33 Asin kun an samuyang manga plake darakula nagsurat kutana kami sa Hebreo; alagad an Hebreo samuya man na liniwat; asin ta kun kami nagsurat sa Hebreo, totoo, dai kuta kamo nagkaigwa nin kakulangan sa samuyang kasuratan.

34 Alagad aram kan Kagurangnan an manga bagay na samuyang isinurat, asin man na daing ibang tawo na nakakaaram kan samuyang tataramon; asin huli ta daing ibang tawo na nakakaaram kan samuyang tataramon, kaya siya naghanda nin paagi sa pagpaliwanag kan manga iyan.

35 Asin an manga bagay na ini isinurat tanganing samuyang mahugasan an samuyang manga gubing kan dugo kan samuyang manga katugangan, na diit-diit na nawaraan nin pagtubod.

36 Asin magdarangog, an manga bagay na ini na samuyang minawot manunungod sa samuyang manga katugangan, iyo, sagkod an saindang pagbalik sa kaaraman ki Cristo, sunod sa manga pamibi kan gabos na manga santo na nag-erok sa daga.

37 Asin itugot man lugod kan Kagurangnan na Jesu-Cristo na an saindang pamibi masimbag sunod sa saindang pagtubod; asin marumdoman man lugod kan Dios Ama an saiyang tipan na saiyang ginibo sa harong kan Israel; asin ta saiyang bendisionan man lugod sinda sagkod pa man, sa paagi nin pagtubod sa pangaran ni Jesu-Cristo. Amen.