An Libro ni Mormon

1 Asin ngonian ako, si Mormon, naggibo nin sarong kasuratan kan manga bagay na sakuyang nahiling asin nadangog, asin inapod ini na an Libro ni Mormon.

2 Asin sa panahon na itinago ni Ammaron an manga kasuratan sa Kagurangnan, siya nagduman sa sakuya, (manga sampulong taon an sakuyang edad, asin ako nagpoon na makanuod na garo siring sa paagi kan pagkanuod kan sakuyang manga tawo) asin si Ammaron sa sakuya nagsabi: Sakuyang nahihiling na ika sarong aking mauyo an boot, asin maliksi sa pagmasid;

3 Kaya, kun ika manga nasa duwang pulo may apat na taon na an edad sakuyang minamawot na saimong marumdoman an manga bagay na saimong namasdan manunungod kan manga tawong ini; asin kun ika nasa edad na na iyan magduman ka sa daga kan Antum, duman sa bulod na aapodon na Shim; asin ta duman ko itinago sa Kagurangnan an gabos na manga banal na inukit manunungod kaining manga tawo na ini.

4 Asin magdangog, kuahon mo an manga plake ni Nephi para sa saimong sadiri, asin an natada saimong iwalat kun sain an manga idto namumugtak; asin saimong iukit sa plake ni Nephi an gabos na manga bagay na saimong namasdan manunungod sa manga tawong ini.

5 Asin ako, si Mormon, bilang sarong gikan ki Nephi, (asin an pangaran kan sakuyang ama Mormon) sakuyang narumdoman an manga bagay na ipinagboot sakuya ni Ammaron.

6 Asin ta uminagi an panahon na ako, sampulo may sarong taon an edad, dinara kan sakuyang ama sa daga pasiring sa sur, sagkod sa daga kan Zarahemla.

7 An bilog na daga napano na nin manga edipisio, asin an manga tawo kadakol na, dikit na sanang makaarog kan baybay kan dagat.

8 Asin uminagi an panahon na sa taon na ini nagpoon na magkaigwa nin gera sa katiripunan kan manga Nephite, na pinag-iribahan kan manga Nephite, asin kan manga Jacobite asin kan manga Josephite asin kan manga Zoramite; asin an gera na ini, gera kan manga Nephite asin kan manga Lamanite asin kan manga Lemuelite asin kan manga Ismaelite.

9 Ngonian an manga Lamanite asin an manga Lemuelite asin an manga Ismaelite inaapod na manga Lamanite, asin an duwang naglalaban iyo an manga Nephite asin an manga Lamanite.

10 Asin ta uminagi an panahon na an gera nagpoon sa katiripunan ninda sa pagdulonan kan Zarahemla, sa gilid kan tubig kan Sidon.

11 Asin ta uminagi an panahon na an manga Nephite nagtiripon nin kadakula na bilang nin manga lalaki, sagkod na lumabi pa sa bilang na tulong pulong ribo. Asin uminagi an panahon na nagkaigwa sa taon na idto nin nagkapirang ralabanan, na kun sain an manga Nephite nadaog an manga Lamanite asin ginadan an kadakol sa sainda.

12 Asin ta uminagi an panahon na an manga Lamanite binayaan na an saindang plano, asin nagkaigwa nin katuninongan sa daga; asin an katuninongan nagdanay sa laog nin mag-aapat na taon, na dai nagkaigwa nin pagbulos nin dugo.

13 Alagad an kasumbikalan nangibabaw sa ibabaw kan bilog na daga, sagkod na kinua kan Kagurangnan an saiyang padangat na manga disipulos, asin an paggibo nin manga milagro asin nin pagbulong napundo huli sa karaotan kan manga tawo.

14 Asin dai na nin manga balaog na hali sa Kagurangnan, asin an Espiritu Santo dai nag-abot sa kiisay man, huli sa saindang kasumbikalan asin sa kadaihan nin pagtubod.

15 Asin ako, na sampulo may limang taon an edad asin igwa nin matanos na pag-isip, kaya dinalaw ako kan Kagurangnan, asin ta nanamitan asin naaraman an karahayan ni Jesus.

16 Asin ta ako naghinguha na maghulit sa manga tawong ini, alagad an sakuyang nguso natikom, asin ako pinugolan na maghulit sa sainda; huli nanggad ta sinda tuyo na nagtumang sa saindang Dios; asin an padangat na manga disipulos hinali sa daga, huli kan saindang karaotan.

17 Alagad ako nawalat sa saindang katiripunan, alagad ako binawalan na maghulit sa sainda, huli sa katagasan kan saindang manga puso; asin huli sa katagasan kan saindang manga puso an daga isinumpa huli sa sainda.

18 Asin ining manga Gadianton na manga mahabon na nasa katiripunan kan manga Lamanite, nakalakop sa daga, sagkod na an manga nag-eerok duman nagpoon na magtarago kan saindang manga kayamanan sa daga; asin an manga idto naging mahalnas, huli ta isinumpa kan Kagurangnan an daga, kaya dai na ninda nakapotan an manga idto, ni mapapasainda an manga idto giraray.

19 Asin ta uminagi an panahon na nagkaigwa na nin manga pagratak, asin manga pagkulam asin manga salamangka; asin an kapangyarihan kan karaotan ginibo sa ibabaw kan gabos na daga, sagkod na mautob an gabos na tataramon ni Abinadi, asin man ni Samuel an Lamanite.