1 He el túneʼ ten Moroni quiʼn dzic u dzoʼoc u dzíbil u cuxtal in tata Mormon. Heʼel túnaʼ humpʼít le baʼaxoʼob yan in dzíbtiʼc leloʼobaʼ in tata tu túxtah ten.

2 Úchic túnoʼ, tu pach le nohoch sénquech nohoch baʼatelil Cumora, heʼel túneʼ u palal Laman tu chucpachtah u palal Nefi púdzlahoʼoboʼ tu nohol luʼumil ca láh quínsaʼaboʼob tulácaloʼob.

3 In tataeʼ químen xan tu kab u palal Laman, teneʼ h pʼaten tiʼn hun utiaʼal ca in dzíbt u ótsil tʼan ca in tsol bix xuʼulsahic in cahal, baʼaleʼ heʼel túnaʼ dzoʼoc u saʼataloʼob, teneʼ quiʼn betiʼc u tʼan in tata tiʼ ten. Teneʼ maʼ in wohél wá yan in quínsaʼal wá maʼ.

4 Tu yoʼolaleʼ bín in dzíbt yétel bín in taac le baʼaxoʼob quiʼn in dzíbteʼ teʼ luʼumoʼ, beyoʼ úchic heʼebaʼax bín úchuc teneʼ.

5 Heʼel túnaʼ in tataeʼ tu betah le dzíbaʼ, tu dzíbtah xan u baʼax oʼolalil. Heʼel túneʼ tac ten heʼel in dzíbtiʼc xaneʼ, wá yan tuʼux u dzíbtaal teʼ laminaoʼoboʼ, baʼaleʼ minaʼan ten, mix metal, tumen quiʼn wiliquiʼnba tiʼn hun. In tatae dzoʼoc u químil ichil le baʼateloʼ bey xan tulácal in wét láktsiloʼob, cu dzoʼocoleʼ minaʼan ten mix huntúl ámigo, mix tuʼux yan in bin, yétel bucaʼah kin cun u chaʼ cuxtal ten Yumtsil maʼ in woheʼliʼ.

6 Heʼel túnaʼ, dzoʼoc u maʼn cuatrocientos haʼaboʼob, tac le úch u tal Yumtsil Salvador.

7 Heʼel túnaʼ u palal Laman dzoʼoc u chʼaʼapachtiʼc in cahal, u palal Nefioʼob, tiʼ cúchil tac tiʼ ulak cúchil, utiaʼal maʼ u pʼat mix huntúliliʼ, yétel chich úch lúbul bey cu sén haʼakal in wól úch in séb xuʼulsaʼal in cahal letiʼoʼobeʼ u palal Nefioʼoboʼ.

8 Heʼel túnaʼ, yoʼolal u kab Yumtsil úchil. Letiʼ u palal Lamaʼn tán xan u baʼateloʼob, huntúleʼ tu pach ulak, tulácal u luʼumil le cahaʼ, beyoʼ maʼ tu xuʼulul u quínsaʼal maʼc yétel weʼequel kiʼikeʼ, mixmaʼc yoheʼl u xulil baʼatel.

9 Baʼaleʼ heʼel túnaʼ, maʼ tiʼn caʼ tʼan tu yoʼolaloʼob letiʼoʼob, tumen behlaʼeʼ chén yan u palal Laman yétel ocoloʼob pʼaʼatoʼob yókol le luʼumaʼ.

10 Mixmaʼc u kahól u Hahil Dios, chén le maʼcoʼob yéyaʼan tumen Jesus, le maʼxoʼob pʼatoʼob teʼ luʼumoʼ, tac ca sén yaʼabchah u kebanoʼob maʼcoʼob, beyoʼ Yumtsileʼ maʼ tu chaʼah u pátaloʼob umpuliʼ ichil le cahoʼ, mixmaʼc yohel wá tyaʼanoʼob yókol u yich le luʼumaʼ.

11 Baʼaleʼ heʼel túnaʼ in tata tiʼn wételeʼ dzoʼoc c ilicoʼob yételeʼ letiʼoʼobeʼ dzoʼoc u meyahtiʼcoʼon.

12 Le maʼx kamic le u dzíbil tʼanaʼ yétel maʼ yaʼalic de que maʼ chucaʼaneʼ, bín u yohelt baʼaloʼob maʼs sén nuctacoʼob tiʼ le heʼeloʼobaʼ. Heʼel túnaʼ ten Moroni; wá ca pátaqueʼ heʼ in dzic ohéltbil tulácal baʼaloʼobaʼ.

13 Heʼel túnaʼ, yétel le heʼelaʼ cu xuʼulul in tʼan yoʼolal le cahaʼ. U palen Mormon, in tataeʼ letiʼ caʼach tiʼ u palal Nefi.

14 Ten le maʼx taaquiʼc le úchben dzíbaʼ tu yoʼolal Yumtsil, le laminaoʼob tuʼux yanoʼoboʼ mixbaʼal u tohol tumen bey tʼanic Hahal Dios. Tumen hach u hahileʼ tu yaʼalaheʼ mixmaʼc bin chʼicoʼob utiaʼal con wá tu yoʼolal takin, tumen le úchben dzíboʼobaʼ coʼoh u tohol tiʼ Yumtsileʼ yan u dzic u bendicion tiʼ le maʼx cun hoʼsic tiʼ sásilil.

15 Tumen mixmaʼc cun antal páhtalil tiʼ utiaʼal u hoʼs tiʼ sásilil wá maʼ dzaʼabaʼan tiʼ tumen Hahal Dios, tumen Hahal Dioseʼ u kát ca mentaac chén tu yoʼolal u yutsil meyahil, wá tu yoʼolal u yutsil u kiʼikitaan cahoʼ Yumtsil dzoʼoc u betiʼc promesa tiʼ.

16 Bín dzaʼabac humpʼél bendicion yókol le maʼx cu hoʼsic tiʼ sásilil le baʼaloʼobaʼ tumen bin hókoc tiʼ ehoʼchʼeʼenil utiaʼal sásilil, heʼebix u yaʼalic u tʼan Hahal Dios. Bey bín hóksaʼac tiʼ luʼum, yétel bin lémbanac ichil le ehoʼchʼeʼeniloʼ utiaʼal ca kuchuc u kahóltoʼob le maʼcoʼoboʼ, ca úchuc tumen u páhtalil Hahal Dios.

17 Wá yan tiʼ baʼax maʼ tu beleʼ, le baʼax maʼ tu beloʼ tu yoʼolal maʼc. Baʼaleʼ heʼel túnaʼ; maʼ c ohél wá yan tʼan maʼ tu beliʼl, baʼaleʼ Hahal Dios yohel tulácal baʼaloʼob; tu yoʼolaleʼ u canántiʼcuba le maʼx cu yaʼalic baʼal tu yoʼolaloʼ u deber u canántiʼcuba yoʼolal maʼ úchuc humpʼél baʼal kas tumen u kákil le tuʼuxil tyaʼan quiʼsin.

18 Le maʼx cun aʼaliqueʼ: Eʼes teneʼ, wá maʼeʼ bín in bet lob tech; canántaba, bic a wáʼal tu contra le baʼax u yaʼalmaʼh Yumtsil.

19 Heʼel túnaʼ letiʼ juzgartiʼc sébeʼ yan u juzgartaal séb xan; tumen tu yoʼolal u meyaheʼ bín boʼotaacoʼ; le betiʼqueʼ le maʼx cu betiʼc lobeʼ bín betaac lob tiʼ tumen Yumtsil.

20 Le sagrado dzíboʼob cu yaʼalicoʼobeʼ huntúl maʼc maʼ u betiʼc lob mix u juzgar; tumen ten juzgartiʼc, cu yaʼalic Yumtsil, ten boʼotiʼc lob xan.

21 Le maʼx cu yaʼalic baʼal kuxbil tu contra u meyhul Yumtsileʼ, yétel tu contra u cahil promesa Yumtsil, letiʼoʼobeʼ u nahil Israel, ca u yaʼaleʼ: Bín c xul u meyhul Hahal Dios, ca u tuʼubs Yumtsil u promesail u betmaʼh tu tanah Israel, le maʼc heʼelaʼ cu xoʼotʼol yétel cu puʼulul ich kák.

22 Tu yoʼolal le u meyah minaʼan u xul Yumtsiloʼ yan u bín tánil, pʼis u yúchul tulácal baʼax u yaʼalmaʼheʼ.

23 Caʼa caneʼex u tʼan Isaias, heʼel túnaʼ maʼ tu páhtal in dzíbtiʼcoʼob, beyoʼ, heʼel túnaʼ quiʼn wáʼalic teʼexeʼ le maʼalob maʼcoʼob cahlahoʼob úch teʼ luʼumaʼ bin áwátnacoʼob, bey desde le polvo cun u yáwátoʼob tiʼ Yumtsil, Yumtsileʼ cuxaʼan letiʼ heʼ u kaʼahal tiʼ le promesa u betmaʼhil yételoʼobeʼ.

24 Letiʼeʼ cu yoheltiʼc u oracionoʼob, yétel u yoheʼleʼ mentaab tu yoʼolal u sucuʼunoʼob. Letiʼeʼ u kahól u fe, tumen tu kabaʼeʼ páhchah u pécsoʼob nucuch muloʼob, yétel tu kabaʼeʼ tu mentah u quiʼquiʼlanquiʼl le luʼum, tu yoʼolal u páhtalil u tʼaneʼ tu luʼsah le nah tuʼux cu kalaʼal maʼc, bey mixtún u kákil humpʼél orno páhchah u betiʼc lob tiʼoʼob, mix le baʼalcheʼoʼob cun hantiʼcoʼob, mix le kakas canoʼob, tu yoʼolal u páhtalil u tʼan.

25 Heʼel túnaʼ oracionoʼobeʼ cu nácal xan tu yoʼolaleʼ, bín u dza Yumtsil u hoʼsic u sásilil le baʼaloʼoba.

26 Yétel mixmaʼc xan cu deber u yaʼalic maʼ bín hókoc tumen hach u hahileʼ bin úchic, tumen Yumtsil aʼalmaʼhi; tumen tiʼ luʼum bin hókoc tu yoʼolal u kab Yumtsil, mixmaʼc cun páhtal u wáʼalcunsic, bin hókoc tiʼ le kinoʼob tuʼux cun aʼalbileʼ dzoʼoc u luʼsaʼal le baʼax cu haʼaksic yól maʼcoʼ; beyoʼ heʼ cu tal heʼebix u tʼan humpʼél quiʼmeneʼ.

27 Teʼ kin heʼeloʼ le u kiʼikel le maʼalob maʼcooboʼ yan u yáwátoʼob tiʼ Yumtsil, tu yoʼolal mul meyah kasaʼaniloʼob yétel le meyah ich ehoʼchʼeʼeniloʼ.

28 Heʼeleʼ, bín hókoc tu kinil can aʼalac minaʼan u páhtalil Hahal Dios, yétel le iglesiaoʼoboʼ cu kastaloʼob yétel u caʼanaltal yichoʼob, bey túnaʼ le kin le u nochiloʼob le iglesiaoʼoboʼ yétel u maʼestroiloʼoboʼ cu caʼanaltal yichoʼob, tac le maʼxoʼob yan ichil u iglesiaoʼob yan u dzíbotiʼc u chʼic u cúchiloʼob.

29 Heʼeleʼ, bín kuchic u kinil can aʼalaʼac yoʼolal kák, chác ik, u yoxol budz tiʼ nách luʼumoʼob.

30 Bey xan bín uʼuyac baʼatel, yétel úchul baʼatel u tsicbalil baʼatel yétel u quiʼquiʼlanquiʼl luʼum tiʼ heʼheʼlaʼanil cúchiloʼob.

31 Heʼeleʼ, bín hókoc le kin cun anac yaʼab baʼax sucio yókol luʼum; bin anac u quiʼnsaʼal yaʼab maʼcoʼobeʼ, yaʼab maʼc cu yocol maʼc, yaʼab u yaʼalaʼal tusoʼob u chʼaʼabalil ulak atantsil huntúl maʼc dzoʼocaʼan u bel yétal tulácal heʼheʼlasiʼl kakas baʼaliloʼob, le can anac yaʼab maʼc bey yaʼalicoʼobaʼ, Bet lelaʼ, bet leloʼ, heʼex a káteʼ, tumen tu dzoʼoc kineʼ Yumtsileʼ yan u yántiʼc le maʼx i betiʼqueʼ. Baʼaleʼ, ótsil letiʼoʼob, tumen tyaʼanoʼob ichil baʼal sén kaheʼ yétel ichil u kaxbil keban!

32 Heʼeleʼ, lelaʼ letiʼeʼ can kuchuc u kinil le bín can u wédzcuntaal le iglesiaoʼob le bín u yaʼaloʼob: Coʼoteneʼex tiʼ ten, tumen yoʼolal a takineʼexeʼ bín luʼsaʼac a kebaneʼex.

33 Oh cahal hach kasaʼaneʼex yétel ehoʼchʼeʼen a wicheʼex. Baʼaxtén ca mentiʼc iglesiaoʼob utiaʼal a hoʼsiqueʼex takin? Baʼaxtén dzoʼoc a kascuntiʼqueʼex u tʼan Hahal Dios ca caxtiʼqueʼex humpʼél kas cuxtaliʼl utiaʼal a pixaneʼex? Heʼel túnaʼ hach ilawil maʼalob u tʼanil Hahal Dios, bín kuchuc u kinil u yúchul tulácal le baʼaloʼob heʼelaʼ.

34 Heʼel túnaʼ, Yumtsileʼ u yeʼesmaʼh ten baʼaloʼob nuctacoʼob, sén cu haʼaksic yól maʼc hach taitac u taloʼob, teʼ kin can chícpahac ichileʼexeʼ.

35 Heʼel túnaʼ quiʼn wáʼaliqueʼex bey wáy tyaʼaneʼexaʼ quex tún minaʼaneʼex wáyeʼ. Baʼaleʼ heʼel túnaʼ Jesucristo dzoʼoc u yeʼesiqueʼex tiʼ ten, yételeʼ in kahól baʼax ca betiʼqueʼex.

36 In wohéleʼ ca maʼneʼex heʼebix u caʼanal yichil a pucsiʼkaleʼex, chén haytúl ichileʼex maʼ tu chʼuʼupul u tuculoʼob yétel baʼal hadzuts tu pucsiʼkaloʼob utiaʼal ca u dza nokoʼob sén hadzutstacoʼob, a káteʼex le baʼax yan tiʼ ulak maʼqueʼ; yan ichileʼex baʼatel tʼan, kasaʼanil, ca chaʼapachtiʼqueʼex maʼc yétel ca betiʼqueʼex tulácal heʼheʼlaʼanil kasoʼ yétel a iglesiaoʼob tac cada humpʼélil dzoʼoc u kastal tumen dzoʼoc u caʼanaltal a wicheʼex.

37 Tumen heʼel túnaʼ a yabiltiʼqueʼex le takinoʼ, a baʼalubaoʼ yan teʼexoʼ, a coʼoh nokeʼex, u dzaʼabal coʼocoʼoh baʼaliloʼob ta iglesiaeʼex; maʼs que ca yabiltiʼqueʼex le ótsiloʼoboʼ, le maxoʼob mixbaʼal yan tiʼoʼoboʼ, le kohaʼanoʼob yétel le maʼx yaʼab u mukyahoʼoboʼ.

38 Oh hach sucio a wóleʼex yétel caʼapʼél a wicheʼex, maʼestroeʼex can conicabaeʼex tu yoʼolal baʼal séb u tuʼutal. Baʼaxtén dzoʼoc a suciocuntiʼqueʼex le sagrado iglesia Hahal Dios? Baʼaxtén ca sublactaleʼex a chʼaeʼex u kabaʼ Cristo ta wókoleʼex? Baʼaxtén maʼ ta tucultiʼqueʼex maʼs yaʼab u tohol le quiʼmaʼc ólal minaʼan u xuloʼ que le yayah ólal minaʼan u xuloʼ, tu yoʼolal u caʼanal ichil le yokolcabaʼ?

39 Baʼaxtén ca hadzutsquiʼntiʼcabaeʼex yétel baʼal minaʼan cuxtal tiʼ, quex beyoʼ ca chaʼiqueʼex u maʼn le wiʼihoʼ, le ótsiloʼ, le minaʼan u nokoʼ, le kohaʼanoʼ, le yayah ólaloʼ, cu maʼn ta tseleʼex maʼ ta wiliqueʼex.

40 Heʼeleʼ, baʼaxtén ca betiʼqueʼex a taacbil kebaneʼex utiaʼal ca anac teʼex takin, ca betiʼqueʼex beyoʼ u yokol le coʼoleloʼob quiʼmen u yichamoʼob yétel le palaloʼob quiʼmen u tataoʼoboʼ tu tánil Yumtsil, beyxannoʼ u kiʼikeloʼob u tataoʼobeʼ yétel yíchamoʼobeʼ tu kátiʼcoʼob ca boʼotaaqueʼex segun a kebaneʼex tumen Yumtsil.

41 Heʼel túnaʼ u tadz maʼscabil u kuxil taitac u lúbul ta wókoleʼexeʼ, maʼ tu xántal dzoʼoc u kuchul u kinil a boʼotaaleʼex toh tu yoʼolal u kiʼikeloʼob le maʼalob maʼcoʼob, tumen maʼ tu páhtal u yuʼubic maʼs u yokoloʼobiʼ.